SOO-JEONG, uze apwa mulongeshi muSouth Korea, nazachisanga jivindiyo jahakeyala ya jw.org mushikola. Ambile ngwenyi: “Vaka-shikola vakunyukile hakutala vindiyo yakwamba ngwavo What’s a Real Friend? Omu vakumishile kutala vindiyo kana vahanjikile ngwavo: ‘Kanda tushinganyekengaho lyehi usepa mujila kaneyi. Eyi hijila yamwaza yakutungilamo usepa.’ Vamwe vambile ngwavo navayanga hakeyala kana hakala lwola navasaka kuvakafwa.” Soo-jeong ambile cheka ngwenyi: “Ngunakolezezanga vakwetu milongeshi vavavulu vazachisenga vindiyo kana, kaha vanawahilila hakupwa nachinoma chamwaza chize vanazachisanga hakunangula.”

Vindiyo yikwavo yize yinakafwe vaka-shikola vamuSouth Korea shina yaFungulula Muka-Kukuyanjisa Chakuzeneka Kumuveta. Mulongeshi umwe uze azachilenga muliuka lyaJuvenile Violence Prevention Foundation alwekesele vindiyo kana muka-shikola. Ambile ngwenyi, “eyi vindiyo yeji kukwatanga vakweze kumichima mwomwo yatwama namivwimbimbi yamwaza chikuma. Kayahanjika kaha mwakuhonesela ulyanyiko, oloze yahanjika nawa namwakulihendelako.” Liuka kana lyalombele lisesa mangana milongeshi vazachisenga vindiyo kana hajishikola javanyike. Vavetavishile kuzachisa vindiyo kana. Natupokola navakiko vali nakuzachisa jivindiyo jili ha jw.org.

Nge kanda muchizachisengaho lyehi keyala kaneyi, kaha mwatela kuyizachisa. Hatwama vihande vyakukopa, najivindiyo, naMbimbiliya namikanda yeka yayivulu, kaha munahase kututulula vyuma kana hawana wakanyombo.