VINAKUSOLOKA MUKAYE
Mijimbu Yahanjika haLifuchi lyaAmerica
Mijimbu yayivulu yakuMafuchi akuMulauko yasolola nge muMbimbiliya mwatwama chinyingi chachivulu.
Kehesenuko kutanga mijimbu yahamakina enu kuchina kulizakamina
Kweseka nakuhehwojola chapwile muVancouver mulifuchi lyaCanada, vawanyine nge vatu vanahase kukehesa kulizakamina chavo nge navatanganga mijimbu yahamakinavo katatu halikumbi muchishishisa chakuyitanga kakavulu. Kostadin Kushlev, uze atetekelele mulimo wavaka-kuhehwojola akukulwile ngwenyi: “Vatu vanakuchiwana kupwa chachikalu kuhonesa ukalu wakutanganga mijimbu yahamakinavo, oloze kuhonesa cheseko kana cheji kukehesangako kulizakamina.”
VYUMA WATELA KUSHINGANYEKAHO: Hakuwana nge tuli nakuyoyela ‘mulwola lwalukalu,’ kutala katwatela kuwanako jila yimwe yakukeheselamo kulizakamina tahi?—WaChimoteu 2, 3:1.
Vyuma vinakukafwa vaishi vasemunwine
Mujimbu waWildlife Conservation Society (WCS) wasolola nge muBelize namujingalila jeka jamuCaribbean, “vaishi navakala vali nakuvulilako chikuma muvihela vize vakanyisa kujiha vaishi.” Ou mujimbu wamba cheka ngwawo: “Hakusaka vaishi vasemunwine muvihela vize vakanyisa kuvajiha, mwatela kuhita mwaka umwe nakuheta kumyaka 6, oloze hakusaka vavule chikuma, kuvanga muhite myaka yakuhambakana 10.” Janet Gibson, mukulwane wapolongalamu yaWCS ahanjikile kutalisa kulifuchi lyaBelize ngwenyi: “Chasoloka hatoma nge kukanyisa kujiha vaishi muvihela vimwe chinakukafwa vaishi vasemunwine chikuma.
VYUMA WATELA KUSHINGANYEKAHO: Kutala mujila veji kusemunwinangamo vaishi kayasolola mangana aTengiko tahi?—Samu 104:24, 25.
Ulyanyi muBrazil
Mujimbu waAgência Brasil wasolola nge ulyanyi unakuvulilako chikuma muBrazil. Mu 2012, vatu vakuhambakana ha 56,000 vavajihile. Mutango watala havipatela wambile ngwavo kanda vamonengaho lyehi kuvula kanechiko. Luís Sapori uze atala hakukinga vatu amwene ngwenyi kuvula kanechi chasolwele nge vatu vapwile navilinga vyavipi chikuma. Ambile ngwenyi nge vatu navahona kuvumbika jishimbi vavahana, kaha “vanahase kuputuka kuzachisa ngolo javo mangana vatesemo vyuma vali nakusaka.”
UNO MWATACHIKIZA TAHI? Mbimbiliya yahanjikile chimweza ngwayo zangi yavatu “nayikahola” kaha nawa upapwoki naukavula.—Mateu 24:3, 12.
