VYUMA VAHANJIKA VAKA-SAYASI

Chihande chimwe chamumukanda waHarvard Mental Health Letter, chahanjika ngwacho “muchima wakusakwilila weji kulingisanga mutu apwenga wakuwahilila. Muchima wakusakwilila weji kulingisanga vatu vapwenga vakusuuluka nakuhona kuhomba, nakulivwisa kuwaha vyuma vyamukuyoya, nakupwa vakulikangula kumujimba, nakuvakafwa valipike naukalu, nakutunga nawa usepa wakukola navakwavo.”

VYUMA YAHANJIKA MBIMBILIYA

Mbimbiliya yatukafwa tupwenganga namuchima wakusakwilila. Kaposetolo Paulu uze asolwele muchima kana asonekele ngwenyi: “Sololenunga kusakwilila chenu.” Chakutalilaho, ‘asakwilililenga Kalunga chakuzeneka kulitwamina’ hakumona omu vatu vakwilenga kanawa kumujimbu uze avambulililenga. (Wavaka-Kolose 3:15; Wavaka-Tesolonyika 1, 2:13) Hakusaka tupwenga chikupu vakuwahilila, katwatela kukumina kaha hakwamba ngwetu twasakwililako oloze twatela kuchisolola muvilinga vyetu. Echi chinahase kutukafwa tuhone kulivwimba, nakuhona kupwa nalwiso, nakuhona nawa kukwachila vakwetu koko, vilinga kana vinahase kulingisa vakwetu vahone kupandama kuli etu nakutulingisa tuhone kupwa vakuwahilila.

Tengi yetu atuhana chakutalilaho chamwaza hakusolola kusakwilila chenyi nakuli vatu. Mukanda WavaHepeleu 6:10 wamba ngwawo: “Kalunga kapwa wakuhengako numba avulyame milimo yenu, nazangi munasolola yakuzanga lijina lyenyi.” Chikupu vene, Tengi yetu amona muchima wakusakwila kupwa waulemu.

“Wahililenunga shimbu yosena. Sakwililenunga havyuma vyosena.”—Wavaka-Tesolonyika 1, 5:16, 18.

VYUMA TWATELA KUTACHIKIZA

Nge natusakwililanga vakwetu vaze navatuhana wana, chipwe vaze navahanjika mazu amwaza, chipwe vaze navatukafwa muvyuma vimwe, kaha nachivalingisa vevwenga nge vapwa vavalemu. Navatu vaze katwatachikizako veji kuwahililanga kachi nge natuvasakwilila hakutulingila kala chuma numba vene kutusokolwela kuchikolo.

VYUMA YAHANJIKA MBIMBILIYA

Yesu Kulishitu ambile ngwenyi “Pwenunga muvaka-kuhana, kaha vatu navakamihana nayenu nawa. Navakahingunwina mujisweko jenu chesekelo chamwenemwene, chakujinda, chakunyukumuna, chakuzalilila.” (Luka 6:38) Achitalenu hachakutalilaho chaRose, kanyike wapwevo wakaveveve wahalitungu lyaVanuatu, lize lyatwama muSouth Pacific.

Numba tuhu Rose akungulukilenga naVinjiho jaYehova, oloze kanganyalilenga chikumako mwomwo nou atachikijile lilimi lyatuveveve wauchi. Omu valunga napwevo valimbata vaze vatachikijile kanawa lilimi lyatuveveve vatambukilile chikungulwilo kana nakumona ukalu kanou, vaputukile kunangula vakwavo lilimi lyatuveveve. Rose asakwililile chikuma, kaha ambile ngwenyi: “Ngunawahilila chikuma hakupwa namasepa vaze vanguzanga.” Vaze vandumbwetu vamukafwile, vawahililile chikuma hamuchima wenyi wakusakwilila nahakumumona ali nakuhanjikangaho hakukunguluka. Rose asakwililile nawa hakumona omu vandumbwenyi vakilikichile mangana valinangule lilimi lyatuveveve mangana vashimutwilenga nenyi.—Vilinga 20:35.

‘Ou eji kuhananga chimuna wakuvatula kupwa wana wenyi wakusakwilila eji kutohwesanga Kalunga.’—Jisamu 50:23.

VYUMA YAHANJIKA MBIMBILIYA

Vishinganyeka vyetu vyalitombola nomu tweji kwivwanga. Ndavichi alombele kuli Kalunga ngwenyi: “Ngweji kushinganyekanga hamilimo yove yosena, ngweji kushinganyekanga chikuma hamilimo yamavoko ove.” (Samu 143:5) Chikupu vene, Ndavichi kavamutangwile kuzata milimo yaKalungako. Ndavichi ashinganyekelenga hajijila jaKalunga mukuyoya chenyi chosena, kahechi chamukafwile apwenga namuchima wakusakwilila.—Samu 71:5, 17.

Mbimbiliya yatukafwa namazu amwaza akwamba ngwavo: ‘Shinganyekenunga lika havyuma vyamuchano, navize navilingisa vatu vavizange, navize vili napuho yamwaza, navize vinapu vyamwenemwene, navyeshovyo vyuma vyakwalisa.’ (Wavaka-Fwilipi 4:8) Mazu akwamba ngwavo “shinganyekenunga lika” alumbununa nge twatela kuhunanana shimbu yosena havyuma vize navitukafwa tupwenga namuchima wakusakwilila.

“Kushinganyeka chamumuchima wami nachisolola kunangakana.”—Samu 49:3.