UNO VALINGILE VYAKUTENGA TAHI?
Vimbangachi Vyavakolekole VamuKalungalwiji
VIMBANGACHI vyavakolekole vamukalungalwiji vyeji kuvakinganga kumuta waunene wamukalungalwiji nakumusana. Echi chinalingisa vaka-kutunga makina valinangule vyuma vimwe kuvimbangachi kana mangana vatunge jiminyau najizuvo jize najikinga vatu.
Shinganyekenu hachumechi: Vaka-kutunga makina vanahunanana havimbangachi vyavakolekole vyamiyachi yivali, vimwe vyapwa vyakulifwika vikwavo vyakulijinga.
Vaka-kutunga makina vawana nge mifunda yahakachi yize yatwama havimbangachi vyakulifwika yikiko yeji kukinganga vakolekole kukala ukalu. Kaha nawa vimbangachi vyavakolekole vyakulijinga vikwechi mifunda yize yeji kuvakinganga kuponde. Vimbangachi vyamiyachi yosena yivali vyeji kuvakinganga kukala ponde yayinene.
Vaka-kuhehwojola vaneseka kuhehwojola chimbangachi chakolekole hakuchesekesa kuvimbangachi vize vapulitile halikina vavuluka ngwavo 3-D printer. Vyuma vawanyine vyasolwele nge chimbangachi chakolekole chapwa chakukola chikuma kuhambakana vize vapulitile.
Mangazini vavuluka ngwavo Scientific American nayikiko yamba ngwayo: “Nge namukatambukisa minyau yize navakatunga ngana mwachimbangachi chakolekole, kaha minyau kana nayikapwa yakulipwila chikuma kaha nawa nayikakinga vatu vaze navakatambukilamo.”
Enu munashinganyeka ngachilihi?: Uno vimbangachi vyavakolekole vamukalungalwiji vyalijilile vivene tahi? Nyi valingile vyakutenga?
Pamo Nauzanga Nawa
TONENU
Shingo yaKazenene
Uno ou katutu nahase kumbata ngachilihi vyuma vyavilemu chikuma kuhambakana mujimba wenyi?
TONENU
Jimbangi jaNgandu
Ngandu nahase kusuma chikuma hachuma chize ndumba chipwe chisupa nahase kusuma kafwe mapapa katatu, chipwe ngocho, eji kwijivanga washi nge hajimbangi jenyi hali chuma chimwe, oloze mutu keshi kwijiva washi nge chuma chimwe chili hamunwe wenyiko. Mujila muka?
