Jiponde jakufwana nge mindenda, napeho yanyamanganda, navihwanga, nakulukuka vaka-shikola, vyeji kusolokanga chikuma mumapapilo amijimbu, nahavisaji vyamivwimbimbi. Kutanga kaha mijimbu yajiponde kaneji, chalihandununa nakupwa muukalu kana. Vyuma muka mwatela kulinga shimbu kanda ponde yisoloke, chipwe nge yinasoloka, chipwe nge yinakumu mangana muyovoke?

VATU vosena vanahase kupwa muponde. Kaha kuliwahishila chimweza chinahase kumikafwa muyovoke. Jino vyuma muka vyeji kusakiwanga hakuliwahishila chimweza?

• Shinganyekelenu chimweza. Mwatela kutachikiza ngwenu ponde yinahase kusoloka kala lwola, kaha enu navaka-tanga yenu munahase kwingila muukalu. Mwatela kuliwahishila chimweza shimbu kanda ponde yisoloke.

• Fwilenu kutachikiza ponde yize yinahase kusoloka mungalila yenu. Mwatela kutachikiza kwakuchinyina. Kekesenu mumone numba nge zuvo yenu yakutunga kanawa, kaha nawa kakweshi vyuma vize vinahase kuneha pondeko. Zangamenu navyuma vize vinahase kwepula kakahya, vyakufwana nge makanya, najikandulu, najifwofwo, navyuma vyeka.

• Wahishilenu chimweza vyakulikafwa navyo nge kunasoloka ponde. Vyuma vyakufwana nge kakahya kakezi, nameya, nashinga vinahase kuhona kumikafwa nge kunasoloka ponde. Shikaho nge mwatwama naminyau, kaha mwatela kupwa namaji akutamo, nakupwa nawa navyakulya, nameya nangonga yavyuma vyakuzachisa nge kunasoloka ponde. Talenu lipwata lyakwamba ngwavo “ Kutala Muli naVyuma Vyakuzachisa Nge Kunasoloka Ponde Tahi?”

• Pwenunga najinambala jajishinga jamasepa vahakamwihi navaze vakwakusuku.

• Tachikizenu okwo mwatela kuchinyina nge kunasoloka ponde. Mwatela kutachikiza kwakulovokela, nakukafwa vana venu vatachikize vyuma vatela kulinga kachi nge hashikola hanasoloka ponde. Mwatela kulivwasana navaka-tanga yenu muwane chihela chize mwatela kuchinyinako, chimwe chatela kupwa hakamwihi, kaha chikwavo hahasuku. Vaka-fulumende vawana nge chapwa chakutamo kulijilisanga kutambukila hamwe navaka-tanga yenu hakuya kuvihela vyakuchinyina vize mwasakula.

• Shinganyekenu mwakukafwila vakwenu. Mwatela kukafwa tushinakaji navitonji.

Joshua, uze twavulukanga kumaputukilo ambile ngwenyi: “Omu kakahya kepukile, vatu vavavulu vaunjile michima. Vamwe vajiminenga najikopyuta javo nakuhaka meya mumitumwa. Lunga umwe ambile ngwenyi, ‘Pamo  twatela kuvandaminako chindende.’” Numba tuhu vakwavo vapwile nakuhuhwasana, oloze Joshua atambakanyine ngwenyi: “Twatela kulovokamo washi!” Omu ahanjikile ngocho vakwavo vaka-milimo vetavilile, kaha vaputukile kumukavangiza. Joshua atambakanyine cheka ngwenyi: “Nge umwe mwaholoka mumbatenu nakuchina nenyi. Tuvosena natuyovoka!”

• Nge kunepuka kakahya. Mwatela kukalava washi nakulovokela kuchikolo chili kwakamwihi. Wishi weji kulingisanga vatu vahone kumona kanawa, kaha vavavulu vaze veji kufwanga nakakahya, veji kufwanga mwomwo yawishi. Hakuchina kamwatela kumbata vikumba vyenuko, mwomwo kwenyeka lwola chinahase kumijihisa.

• Nge kunasoloka mundenda. Mwatela kuchinyina mwishi yavyuma vimwe vyakufwana nge mesa, chipwe chitwamo, chipwe mumbango. Kahomu nakuunda, mwatela kulovoka jino haweluka. Shimbu jimwe, vatu vaze vanangula mwakuyowela vaze vali muponde vanahase kukotokela kwiza ngocho fwilenu kuyovola vakwenu.

• Nge kunasoloka peho yanyamanganda. Kachi nge meya aze ayanga hatunda anakinduluka cheka, kaha mwatela kulahila washi hachihela chakulunduka. Tachikizenu ngwenu kunahase kwiza makimba amanene.

• Nge kunasoloka chijimbilanganga. Mwatela kuchina washi kuchihela chakukola chakukingiwa.

• Nge kunasoloka Livaji. Kamwatela kupwa kuvihela kuze kuli meyako. Kanda kutambuka chipwe kutambukisa minyau mumeyako. Mumeya munahase kupwa vyuma vize vinahase kumilemeka, vyakufwana nge jitambo jakakahya kakezi, navikungo kaha nawa munahase kufwa mumena.

• Uno mwatachikiza tahi? Nge meya anahete mumambuli anahase kuhungumuna minyau. Vatu vavavulu veji kufwanga nalivaji mwomwo yakutambukisa minyau mumeya aze ali namuta.

• Nge fulumende yinamilweze kufuma mungalila, kaha mwatela kufumamo hahaze vene. Mwatela kulweza vakwenu vatachikize okwo muli mokomoko vanahase kwingila muponde hakumitonda.

• Uno mwatachikiza tahi? Kusonekela mutu mujimbu hashinga chinahase kukafwa chikuma, kuhambakana kumutumina shinga.

• Nge fulumende yinamikanyisa kulovoka haweluka, kaha mwatela kutwama lika mukachi. Nge kunatuvika kapata, chipwe kuli peho yayipi yize nayihaka kuyoya chenu muponde, kaha mwatela kutwama kaha mukachi, nakujika tumena twosena twakwingisa peho muzuvo, nakusoka jinjanena, navikolo vyosena. Nge kunasoloka ponde yimwe yize nayilingisa miteleleji yihake kuyoya chenu muponde, kaha mwatela kupwa kaha mukachi. Mwatela kwivwililanga kumijimbu yahavisaji nakutwama mujizuvo jenu palanga nomu vaka-fulumende navakamilweza ngwavo ponde kana yinakumu.

Hakusaka mulikinge kujiponde nakumisongo, tushimutwilenu havyuma mwatela kulinga.

• Nge chinahase twamenu navakwenu muchishishisa chakutwama muchilombo.

• Lamenu vihela vyenu kupwa vyaunyoji.

• Mwatela kuvwala vyuma vize navimikinga nge muli nakuwahisa kuchihela kuze kwasolokelanga ponde. Nge chinahase, kaha vwalenu vyuma vize navimikinga kuchina kulilemeka kumavoko, nakuvwala nawa sapato, namatepa akukola, navyuma vyeka vyakumikinga. Zangamenu kuchina kulyata hajisambo jakakahya kakezi namakala akakahya.

• Twalenuho kulizachila milimo yenu. Vana venu vatela kumona ngwavo munaundu muchima, kaha nawa muli nalutalililo. Kafwenu vana venu milimo yakushikola, nakuhema navo, nakulemesela hamwe Kalunga. Kanda kushinganyeka lika hamijimbu yaponde yinasoloka, nakulizakamina, chipwe kusulwila matoto vaka-tanga yenuko. Itavilenu vamikafwe nakufwila nawa kukafwa vakwenu.

• Tachikizenu ngwenu ponde yeji kwenyekanga vyuma vyavivulu. Fulumende namauka eka eji kufwilanga kuyovola vatu vali muponde, keshi kukindulwisa vyuma vyosena vize vinalyenyekako. Hakusaka tuyoye, twatela kupwa nameya atoma, navyakulya, navyakuvwala, nazuvo yakutwamamo.—WaChimoteu 1, 6:7, 8.

• Itavilenu vamikafwe nge munahombo. Vatu veji kuhombanga chikuma nge kunasoloka ponde. Ukalu kana weji kuvalingisanga valizakamine, nakupwa namatoto, nakuhona kushinganyeka kanawa, nakuhona kuzata, nakuhona kusavala. Mwatela nawa kushimutwilanga namasepa jenu.

Numba tuhu Joshua ayovokele kukakahya kaze kepukile hachihela chize azachililenga, oloze masepa jenyi vavavulu vafwile. Ngocho vamukafwile kuli vakulwane muchikungulwilo nakuli vandotolo vaze valinangula vyawongo. Joshua ambile ngwenyi: “Vangufwelelesele ngwavo kulishona hakatando kakandende chikiko chinjikizo chakutachikijilaho nge nangupwa kanawa. Omu mwahichile tukweji 6, kulotalota chakeheleko, oloze ukalu weka watwalileho hatando yimwe.”

Ponde yeji kulingisanga mutu ahone kushinganyeka kanawa. Kaha vatu vamwe veji kuhananga mulonga Kalunga havyuma vyeji kusolokanga. Ngana mwaJoshua, vatu vavavulu “veji kulihananga milonga.” Joshua ambile ngwenyi, “Ngwatelelele kuyovola vatu vavavulu. Oloze kufwelela ngwami Kalunga kalinwomu afumiseko vyuma vyavipi hano hamavu changuvendejekele. Oholyapwa ngweji kulivwisanga kuwaha kuyoya nakulinga vyosena vize nanguhasa mangana ngutwaleho lika kuyoya.”—Kusoloka 21:4, 5. *