OVYO CHAPWILA CHACHILEMU

Vatu vamwe vachiwana nge chapwa chamwaza kulivanga kuheta kuchihela unakuya mwomwo cheji kukehesangako kulizakamina. Kulivanga cheji kulingisanga nawa mutu apwenga napuho yamwaza. Mujila muka?

Kulivanga cheji kusololanga uhashi wamutu. Kulivanga cheji kusololanga nge mwatwama nalisesa hakuyoya chenu muchishishisa chakwechelela vyuma vyeka vimihonese kulinga vyuma muli nakusaka.

Kulivanga cheji kulingisa vatu vatufwelele. Kujingalila kuze kavatesamo vyuma kweseka nomu vanashiki vakwavoko, vatu veji kusakwililanga chikuma vaze veji kutesangamo jishiko javo. Vatu vaze veji kutesangamo jishiko javo, veji kuvafwelelanga kuli masepa javo navausoko wavo. Vakulwane vamilimo vamona vaka-kuzata vaze veji kulivanganga kumilimo nakukumisa milimo yavo mulwola kupwa vavalemu chikuma. Vaka-kuzata vangana veji kuvafwelelanga chikuma nakuvahakilako jimbongo jajivulu.

VYUMA YAHANJIKA MBIMBILIYA

MuMbimbiliya mwatwama Visoneka vimwe vize vyahanjika hakulivanga. Chakutalilaho, Mbimbiliya yamba ngwayo: “Vyuma vyosena vilingenunga mwamwenemwene kaha nawa mukulonga.” (1 Wavaka-Kolinde 1, 14:40) Nge vatu vanalishiki kuliwanyina kumwe kaha nawa halwola lumwe, chapwa chakutamo kulivanga. Mbimbiliya yamba nawa ngwayo: “Vyuma vyosena vikwechi lwola vavitongwela, mulimo himulimo ukwechi lwola vautongwela mwishi yamelu.” (Muka-kwambulula 3:1) Eyi vesi kana yahanjika ngwayo “kuli lwola lyakutumba, nalwola lwakuvunya vize vanatumbu.” (Muka-kwambulula 3:2) Vanjimi veji kutumbanga jimbuto halwola lwakutamo, mangana vakahe jimbuto jajivulu. Kulumbununa nge veji kwahanga jimbuto jajivulu mwomwo yakulivanga kulima.

Mbimbiliya yalumbununa kanawa ovyo twatela kupwila vaka-kulivanga: Yavumbika vatu nakumona lwola lwavo kupwa lwalulemu. (Wavaka-Fwilipi 2:3, 4) Ngocho, vaze vasaka kulingisa vakwavo vavavandamine veji kwenyekelanga vakwavo lwola.

“Kanda kuhakanga kulutwe vyuma mwasaka enu kahako, oloze navyuma vasaka vakwenu.”—Wavaka-Fwilipi 2:4.

VYUMA YAHANJIKA MBIMBILIYA

Mbimbiliya yatukolezeza tushinganyekenga chimweza vyakulinga. (Vishimo 21:5) Nge mwamona ngwenu mweji kukotokelanga kuheta kuchihela munakuya, kaha pamo mwanoneka kulinga vyuma vyavivulu chikuma. Kutala kamweshi kuhasa kukehesako kulinga vyuma vize navimyenyekela lwola tahi? Nonekenu kanawa lwola lwaluvulu mangana mutesengamo kuheta washi kuchihela munakuya. Echi nachimikafwa muhone kupwanga muukalu wakufwana nge kuhona kwakuhichila mwomwo yakuvulu chajiminyau chipwe kumijikila kuvula.

Mbimbiliya yatukafwa tupwenga vaka-kulikehesa. (Vishimo 11:2) Echi chalumbununa kutachikiza hakumina ngolo jenu. Shimbu kanda mwitavile kulinga vyuma vimwe, mwatela kushinganyekela chimweza numba nge namutesamo nyi chiku. Kwitavila chipwe kujina vyuma vyavivulu vize kamweshi kuhasako, chinahase kumilingisa mulizakamine nakupwa namatoto. Kaha navakwenu vanahase kwivwa mwomumwe.

Mbimbiliya yatulweza tuzachisenga kanawa lwola lwetu. (Wavaka-Efwesu 5:15, 16) Hakenunga chatete vyuma vyavilemu kulutwe. (Wavaka-Fwilipi 1:10) Chakutalilaho, nge muli nakuya kumwe muminyau yasanga chipwe muli nakuvandamina mutu, munahase kuzachisa lwola kana hakutanga chipwe hakushinganyekela chimweza vyakulinga likumbi lyosena lyamuundu.

“Vyuma veji kujinanga vaka-mangana vyeji kufukilanga.”—Vishimo 21:5.