CHIHANDE CHACHINENE | DISEASE—MWAKULIKINGILA KUMISONGO
Likingenu KuMisongo
KUSHIKULU, jinganda jajivulu vajijingilikilenga kujikembwe jajisuku. Nge muka-kole napuzula numba vene chihanda chachindende chakembwe, kaha vatu vosena munganda vapwilenga muponde. Namujimba wenu nawa wapwa ngana mwanganda yize yili mukembwe. Mwatela kulikinga enu vavene numba mupwenga vakulikangula kumujimba. Achitalenu havyuma vino vitanu vize vinahase kuminehela misongo nomu munahase kulikinga kuvyuma kana.
1 MEYA
PONDE: Tututu vavapi vanahase “kwingila” mumujimba wenu hakuzachisa meya amajiko.
MWAKULIKINGILA: Jila yayilemu yakulikingilamo shina kulama meya enu kuchina nawapwa namajilo. Nge munejiva ngwenu meya mweji kuzachisanga apwa amajilo, kaha munahase kuhakamo vitumbo chipwe kuwateleka shimbu kanda muwazachise. * Kwachilenunga meya enu muvitenga vyakufwika kanawa nakuwatehuna kuzachisa lupasa lwaunyoji. Kamwatela kwingisa mavoko mumeya akuzachisako. Nge chinahase, kaha munahase kwalukila kungalila kuze kwatwama vatu vaze kavapihisa meya hakumbilamo vyuma vyamajiloko.
2 VYAKULYA
PONDE: Havyakulya hanahase kupwa tututu vavapi vaze navaneha misongo.
MWAKULIKINGILA: Kulya chamajilo chinahase kusoloka kupwa chamwaza chipwe chiyema hakuchitala kaha nameso. Ngocho pwenunga nachijililo chakukosanga kanawa mihako namafwo enu. Hakuwahisa vyakulya nahakuvihana kuvatu, mwatela kumona ngwenu jindeho navyeka vyakukwachila vyakulya munavikoso kanawa, nahaze namuwahishila vyakulya hatela nawa kupwa haunyoji nakusananga nawa kumavoko. Vyakulya vimwe nawa vyasakiwa kuviteleka chikuma numba tututu vafwenga. Kanda kulya vyakulya vize navisoloka nge vili nambundu chipwe vinakunukako, mwomwo evi hivinjikizo vyakusolola nge vyakulya kana vili natututu vavavulu. Lamenu vyakulya vize kamwazachishileko muchihela munatutu kanawa. Kamwatela kuwahishila vakwenu vyakulya nge munakuvizako. *
3 TUTUTU
PONDE: Tututu vamwe vanahase kumivijisa mwomwo mumijimba yavo mwatwama tututu vavapululu vaze veji kunehanga misongo.
MWAKULIKINGILA: Mwatela kutwamanga muzuvo chipwe kuvwala uvwalo uze unahase kumikinga wakufwana nge milukwe yayisuku navikovelo vyavisuku mavoko mangana mulihende kutututu vaze veji kunehanga misongo. Savalenunga mumushikitela uze uli navitumbo chipwe kulikwita vitumbo kuchina kumisuma kutututu. Mbilenu vitenga vyamokomoko vyosena vize vili nameya amajilo aze nawalingisa tungenengene vasemenemo. *
4 TUNYAMA
PONDE: Tututu vavapululu vaze vatwama mumijimba yatunyama vanahase kumivijisa. Nge kanyama namisumu chipwe namipale, chipwe nge namukwata tuji twenyi, kaha munahase kuviza.
MWAKULIKINGILA: Vatu vamwe veji kulaminanga vimuna javo haweluka kuchina misongo. Ngocho, mwatela kusananga kumavoko hanyima yakukwata kanyama wakupita hembo. Oloze mwatela kulihenda chikumanyi kutunyama vamumusenge. Nge vanamisumu chipwe vanamipale kukanyama, kaha mwatela kukosa kanawa hambandu nakuya kuchipatela. *
5 VATU
PONDE: Tututu vamwe vanahase kwingila mumijimba yetu kuhichila mumaleji aze nawachituka nge mutu nafwiji chipwe nachehula. Tututu kana munahase kuvatambula nawa hakulipakata namutu mukasamba, chipwe hakulimeneka mumavoko. Vatu veji kusezanga tututu kumapito, nakuvikungo vyakulikwachililako, nakujishinga, nahavivamba vyajikopyuta, nahajikeyboard.
MWAKULIKINGILA: Kamwatela kulitambasana kavemba, chipwe mukumbo chipwe litwayiko. Lihendenu kukukwata tunyama, nakuvyuma vyakufwana nge liyena lyavatu, nakumanyinga, nakuvyuma vize vili namanyinga. Chapwa changanyo nawa kusananga kumavoko lwola lwosena. Eyi hijila yayilemu yakuhoneselamo tututu kutanda.
Nge chinahase, twamenunga hembo nge munakuviza. Liuka lyaU.S. Centers for Disease Control and Prevention lyamba ngwalyo, mutu katela kukohwela chipwe kuchehwila mulivokoko, oloze atela kulinga ngocho halipepa chipwe hachikovelo chenyi.
Chishimo chakushikulu chamba ngwacho: “Muka-kuzangama eji kumonanga ponde, kaha himwaswama.” (Vishimo 22:3) Mazu kana apwa amuchano chikumanyi mumakumbi ano omu kaye kosena kanazale namisongo yayipi. Ngocho, yenunga kuvipatela vamikafwe mwakulikingila kumisongo. Munahase nawa kulikinga kumisongo hakupwa vaunyoji. Likingenu mangana mukeheseko misongo.
^ par. 6 Liuka lyaWorld Health Organization lyavuluka jijila jajivulu jakutomeselamo meya jakufwana nge kuhakamo vitumbo, chipwe kuwateleka chipwe vene kuwatuta.
^ par. 9 Nge munakusaka mijimbu yayivulu yamwakulamina kanawa vyakulya, kaha talenu Tonenu! yaChingeleshi yaJune 2012 mafwo 3-9.
^ par. 12 Nge munakusaka vyavivulu vyakusolola mwakulikingila kumusongo wachishikashika, kaha talenu Tonenu! yaJuly 2015 mafwo 14-15.
^ par. 15 Nge kanyama waulembe chikuma namisumu, kaha mwatela kulahila washi kuchipatela vakamyuke.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Vyuma Muka Yahanjika Mbimbiliya haMisongo yaChihita?
Vatu vamwe veji kuhanjikanga ngwavo makumbi ano Kalunga ali nakuzangamisa vatu kuzachisa misongo yachihita namisongo yeka. Oloze Mbimbiliya kayakundwiza vishinganyeka kanako.
ESSENTIAL BIBLE TEACHINGS
Mwomwo Ika Kalunga Etavishila Kuyanda?
Vatu vavavulu vasaka kutachikiza ovyo chijindo nakuyanda vinavulila muno mukaye. Mbimbiliya yavuluka vyuma vyalingisa chijindo nakuyanda vivule muno mukaye, kaha vyuma yahanjika vinahase kutuvendejeka.
VYAYETU
Lomba Vakutambukile
Shimutwilenu chihula chimwe chamuMbimbiliya chipwe kulinangula vyavivulu hali Vinjiho jaYehova.
