NGANA mwavakolekole veka, vakolekole vamukalungalwiji veji kukakachilanga kumalolwa, nakumitondo, chipwe kujimbopolo. Chipwe ngocho, vakolekole veka veji kulikwachililanga chikuma kuchina kuholoka, oloze vaze vamukalungalwiji veji kulikwachilila hakuzachisa mahinji vavuluka ngwavo byssus threads. Kaha vakwechi mahinji amavwovu aze eji kuvakafwanga vakwate vyakulya nakutambuka, oloze mahinji kana asoloka nge kawapwa akukolako numba ahase kwimana mbe kumakimba amukalungalwiji. Uno awa mahinji eji kuvakafwanga ngachilihi vazezalale nakuhona kuvahungumuna kumakimba amukalungalwiji?

Achishinganyekenu hachumechi: Chihanda chimwe chamahinji chapwa chakukola chikuma, kaha chikwavo chapwa chachivwovu. Vaka-kuhehwojola vawana nge chihanda chamahinji chize chapwa chakukola chatwama najipaseti 80, kaha chize chachivwovu chatwama najipaseti 20, ngocho vihanda kana vyeji kuvakafwanga valamate kuchuma chimwe. Ngocho makimba amukalungalwiji kawahasa kuvahungumunako.

Mutu alinangula chikuma Guy Genin avulukile echi kuhehwojola ngwenyi “chakulipwila,” kaha ambile ngwenyi: “Chuma chakukomwesa vatwama nacho ava vakolekole shina chihanda chamahinji chachivwovu nachize chakukola.” Vaka-sayasi vafwelela ngwavo mujila vatungilamo mahinji ava vakolekole vanahase kuyizachisa muvyuma vyakufwana nge kukutungisa jizuvo, namiyengo yameya, nahakununga mishisa yize yawanyisa vifuhwa, nahakuka mbandu yize navapula vandotolo. Mutu alinangula chikuma wahaYunivesiti yaCalifornia muSanta Barbara, U.S.A walijina lyaJ. Herbert Waite ambile ngwenyi: “Vyuma vyakutenga vyatwama navyuma vyavivulu vyakulipwila vize tunahase kulinangulako vyuma vimwe.”

Enu munashinganyeka ngachilihi? Uno mahinji akolekole alijililile avene tahi? Nyi valingile akutenga?