KUKUPUTUKA chamwaka wa 2017, lizavu lyavaka-sayasi lyavilikile mujimbu waupi chikuma. Kaha kuheta muJanuary, lizavu lyavaka-sayasi lyambile ngwalyo kaye kanapandama chikuma kulikumbi lyaukalu waunene. Hakusaka valumbunune omu kaye kapwile nakupandama kwakamwihi nalikumbi lyaukalu waunene chikuma, vaka-sayasi vazachishile Loloji Yakusolola Likumbi lyaUkalu Waunene mangana yisolole nge kukuma chinapandama chikuma. Loloji kaneyi vahakilileko jisekondi 30 kufuma haze yapwile. Ngocho kunasale minyutu yivali nachimbwa mangana eyi Loloji Yakusolola Likumbi lyaUkalu Waunene yihete mukachi kaufuku, echi chinasolola nge kaye kanakuswenya chikuma kuukalu waunene uze kanda usolokengaho lyehi hamyaka 60 yinahichimo.

Kuheta mumwaka wa 2018, vaka-sayasi vanashinganyeka kuhehwojola cheka mangana vakawane nge tunapandama kukukuma chakano kaye. Uno eyi loloji kana nayikasolola unjiho walikumbi lyaukalu waunene tahi? Munashinganyeka ngachilihi? Uno ukalu mukaye naukakuma tahi? Chihula kana chinahase kumikaluhwila kukumbulula mwomwo navatu vamwe vaze valinangula chikuma kavetavila chuma kanako. Vatu vavavulu kavafwelela likumbi lyaukalu waunene kupwa lyamuchanoko.

Vatu vavavulu muno mukaye vafwelela ngwavo navakalivwisa kuwaha vyuma vyamwaza kulutwe. Veji kwambanga ngwavo vakwechi unjiho wakusolola nge vatu vavavulu hano hamavu navakayovoka nakukatwalaho lika kuyoya kanawa. Uno unjiho kana wapwa wamuchano tahi? Uno ukalu mukaye naukakuma tahi, nyi chiku?