Chakutalilaho, tushimutwilenu haupolofweto wamuMbimbiliya:

• “Lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo, kaha kuvihela vyeka navyeka nakukapwa zala, namindenda.”—Mateu 24:7.

• “Hamakumbi akukuminyina nahakapwa lwola lwalukalu. Mwomwo vatu navakapwa vaka-kulizanga vavene, vaka-kuzanga jimbongo, vaka-kulitukwojola, vaka-kulitohwesa, vaka-kusaula, vaka-kulikanga kuli visemi, vaka-kuhona kusakwilila, vaka-kuhona kushishika, vaze kavazanga vakwavoko, vaze kaveshi kwitavila vivwasanoko, vaka-kuvangila vakwavo, vaka-kuhona muchima wakulikanyisa vavene, vaka-ukenya, vaze kavazanga vyuma vyamwazako, vaka-kusolola vakwavo, vaka-kunjinjavala, vaka-kulivwimba, vaka-kuzanga viseke muchishishisa chakuzanga Kalunga.”—WaChimoteu 2, 3:1-4.

Upolofweto kana unahase kulingisa vatu vamwe vambenga ngwavo kaye kanakupihilako chikuma. Chikupu vene, vatu vanahono kuwahisa vyuma mukaye. Mbimbiliya yasolola nge vatu kavatwama namangana nangolo jakuhasa kukumisa ukaluko. Chishina kanechi vanachilumbununa kanawa muvisoneka vinakavangizaho:

• “Kuyili jila mwamona mutu ngwenyi yinasungama, oloze hakukuminyina nayimutwala kukufwa.”—Vishimo 14:12.

• “Mutu nashinyinyika mukwavo mutu mangana amuyanjise.”—Muka-kwambulula 8:9.

• “Mutu katwama nangolo jakulitwaminyina iveneko.”—Yelemiya 10:23.

Nge vatu navatwalaho lika kulinga vyuma vanakufwila, kaha kaye kanahase kulyenyeka chikuma. Oloze chuma kana kacheshi kukasolokako. Mwomwo ika? Ivwenu omu yahanjika Mbimbiliya:

• Kalunga ‘azamisa mavu havihela vyawo. Kaveshi kukawaswenyesako haya myaka namyaka.”—Samu 104:5.

• “Chisemunwino chimwe nachihita, chisemunwino chikwavo nawa nachiza, oloze mavu nawapwangako haya myaka yosena.”—Muka-kwambulula 1:4.

• “Vaka-kwoloka navakaheta mavu, kaha navakatwamangaho haya myaka yosena.”—Samu 37:29.

• “Hamavu nahakapwanga mbuto jamanona jakulisala. Hajipili hosena nahakapwanga mbuto jamanona jajivulu.”—Samu 72:16.

 Vyuma kanevi yanangula Mbimbiliya vyasolola kukumbulula chamwenemwene. Vatu kaveshi kukafwa mwomwo yakulyenyeka chapeho, nakuhona vyakulya, nameya chipwe misongo yachihitako. Kaye kaveshi kukakenyeka namata amatendazunguko. Mwomwo ika? Mwomwo Kalunga ikiye atachikiza kanawa omu nakakapwa kano kaye kulutwe. Kalunga netavisa vatu vazachise lisesa lyavo lyakulisakwila vyakulinga. Oloze navakaha kweseka navyuma vanasakula. (Wavaka-Ngalesha 6:7) Kaye kakeshi ngana mwaminyau yize yinafumu mumukwakwa nakwijiva kuya kaha nakwingila mupondeko. Kalunga atachikiza seteko yize vatu vanahase kukumina hakwenyeka kano kaye.—Samu 83:18; WavaHepeleu 4:13.

Chipwe ngocho, Kalunga mwakalingi vyuma vyamwaza vyavivulu. Mwakaneha “kuunda chamwenemwene.” (Samu 37:11) Muchihande chino vanalumbununamo vyuma vyavindende kaha kutalisa kuvyuma vyamwaza vili nakwiza kulutwe vize Vinjiho jaYehova vanalinangula muMbimbiliya.

Vinjiho jaYehova vapwa hilizavu lyamalunga napwevo vaze vakwechi myaka yakulisezaseza kaha nawa vakuvisemwa vyakulisezaseza. Veji kulemesanga Kalunga umwe kaha wamuchano ukwechi lijina lyenyi Yehova, kweseka nomu vasolola muMbimbiliya. Kavevwa woma wavyuma navikasoloka kulutweko mwomwo Mbimbiliya yamba ngwayo: “Yehova, ou Kalunga wamuchano, ou atengele melu, ou atengele mavu, ou awazamishile, ou kawatengele chawanako, oloze awatengele ngwenyi hatwamenga vatu, nambe ngwenyi: ‘Ami yami Yehova kakweshi wekako.’”—Isaya 45:18.