Mu 1985 te nguli namyaka yakusemuka 10, vanyike vamwe vakulifuchi lyaCambodia vejile hashikola ngwapwile nakutangila muColumbus, Ohio, U.S.A. Kanyike umwe katachikijile chikuma lilimi lyaChingeleshiko. Aputukile kungulweza mivwimbimbi yakwimbo lyavo yavanyike vaze vapwile nakujiha, nakuvaveta nakuvayanjisa. Ngwevwilenga chikuma keke, kaha kuheta naufuku ngwalililenga hakushinganyeka omu vapwile nakuyanda. Kaha ngwasakile kuvalweza vyalutalililo lwakusanguka naPalachise, oloze kavevwile lilimi ngwahanjikileko. Numba tuhu ngwapwile ngukanyike, ngwashinganyekele kulinangula lilimi lyaCambodia mangana nguhase kwambulwila vakwetu vaka-shikola mujimbu waYehova. Kangwatachikijile ngwami chuma kanechi ngwasakwile kulinga nachikangukafwa kulutweko.

Chapwile chachikalu kulinangula lilimi lyaCambodia. Mapapa kavali, ngwasakile kulitwamina kulinangula lilimi kana. Oloze ngwasakwililile chikuma Yehova hakuzachisa visemi jami mangana vangukolezeze. Mukuhita chamakumbi, milongeshi jami vangulwezele nguyenga kushikola yahelu mangana ngukawane milimo yamwaza kulutwe. Oloze ngwasakwile kuzata upayiniya. Shikaho, ngwasakwile kulinangula milimo yakukaye yize nayikanguhana lwola lwakuzata upayiniya. Omu ngwakotokelenga kushikola, ngwayilenga kuli vapayiniya vamwe nakuzata navo muwande. Kaha nawa ngwalisonekesele kunangula vakwetu vaka-shikola vaze vasakile kulinangula lilimi lyaChingeleshi. Echi changukafwile chikuma.

Omu ngwapwile jino namyaka yakusemuka 16, ngwevwile ngwavo kuLong Beach, California, U.S.A. kuli vatu vamwe vahanjika lilimi lyaCambodia. Ngocho ngwayileko kaha ngwakalinangwile kutanga lilimi kana. Omu ngwakumishile shikola, ngwaputukile kuzata upayiniya, kaha ngwatwalilileho lika kwambulwila vatu vahanjika lilimi kana vaze vapwile kwakamwihi nalimbo lyami. Jino omu ngwapwile namyaka 18, ngwashinganyekele kwalukila kulifuchi lyaCambodia mangana ngukambulwile vatu kana. Oloze halwola kana te mulifuchi kana muchinazwangala, kaha nawa ngwatachikijile ngwami vatu vavandende kaha vakiko vevwile mujimbu wamwaza waWangana. Mulifuchi kana mwapwile kaha chikungulwilo chimwe chize chapwile navaka-kwambulula 13. Omu ngwapwile namyaka yakusemuka 19, ngwavangililile kuya nakutala lifuchi kana. Kahomu mwahichile myaka yivali, ngwayile nakutwama kuze nakuputuka kuzata upayiniya. Ngwawanyineko nawa milimo yakumujimba yakwalumuna nakunangula Chingeleshi mangana nguwaneko jimbongo jakulikafwa najo mukuyoya. Kutwala muze ngwawanyine pwevo wakumbata uze nayikiye azangile kuzata upayiniya. Kaha twalimbachile. Tunalivwisa kuwaha kwambulwila vatu vamuCambodia nakuvakafwa valihane kuli Kalunga.

Ngunasakwilila chikuma Yehova ‘hakunguhana vyuma ngwasakile mumuchima wami.’ (Samu 37:4) Mulimo wakutunga tumbaji weji kusuulwisanga chikuma mutu. Hamyaka 16 ngunatwame mulifuchi lyaCambodia, ngunamono omu lizavu lyavaka-kwambulula 13 linatoho nakutunga vikungulwilo 12 namazavu awana aze atwama kwakusuku nachikungulwilo.—Vanawambulula kuli Jason Blackwell.