Sakulenunga Kanawa Vyakulinga Shimbu Muchili muVakweze
“Nayenu vakweze jamalunga nayenu vasanda jamapwevo, . . . Valisenga lijina lyaYehova.”—SAMU 148:12, 13.
1. Milimo muka vali nakulivwisa kuwaha vakweze?
TULI nakuyoyela mulwola lwakulipwila. Vatu vavavulu vakumafuchi osena vali nakwiza nakulemesa Yehova. (Kuso. 7:9, 10) Vakweze vavavulu vali nakulivwisa kuwaha hakukafwa vakwavo ‘vatambule meya akuyoya awana.’ (Kuso. 22:17) Ava vakweze veji kukafwa vatu valinangule Mbimbiliya nakupwa nachiyoyelo chamwaza. Vakweze veka veji kulinangulanga malimi eka nakuya nakwambulula mujimbu wamwaza kujingalila jazachisa malimi kana. (Samu 110:3; Isa. 52:7) Vyuma muka mwatela kulinga hakusaka kwazana mumulimo kana?
2. Chakutalilaho chaChimoteu chasolola ngachilihi nge Yehova asaka kuhana vakweze milimo? (Talenu muvwimbimbi wakulivanga.)
2 Munahase kusakula vyuma vyakulinga vize navikamikafwa mukazate milimo yeka yakuzachila Kalunga. Chakutalilaho, Chimoteu wakuLusutala asakwile kanawa vyuma vyakulinga vize vyamulingishile atengamo kumutongola kupwa kamishonali omu apwile namyaka kafwe 20. (Vili. 16:1-3) Chasoloka nge mwahichile tukweji vavandende omu Paulu alwezele Chimoteu ayenga kuchikungulwilo chachihya kuTesolonyika kuze vayanjishilenga vandumbwetu. Paulu afumineko mwomwo yapindangano yapwileko, oloze afwelelele ngwenyi Chimoteu mwajikijisa vandumbwenyi. (Vili. 17:5-15; Teso. 1, 3:1, 2, 6) Achishinganyekenu kuwaha evwile Chimoteu hakumuhana mulimo kana!
CHUMA CHACHILEMU MWATELA KUSAKULA KULINGA
3. Chuma muka chachilemu mwatela kusakula kulinga mukuyoya chenu, kaha lwola muka mwatela kulinga ngocho?
3 Lwola lwamwaza lwakusakula vyuma vyavilemu shina lwaukweze. Oloze chuma muka chachilemu mwatela kusakula kulinga? Chuma chachilemu shina kuzachila Yehova. Lwola muka lwamwaza mwatela kusakula chuma kana? Yehova amba ngwenyi: “Anukanga . . . Ou nakutenge hamakumbi aukweze wove.” (Kwambu. 12:1) Jila ‘yakwanukilamo’ Yehova yapwa yakumuzachila namuchima wosena. (Lushi. 10:12) Echi hichuma chachilemu mwatela kulinga mukuyoya chenu. Mwomwo nachikamikafwa mukuyoya chenu chosena.—Samu 71:5.
4. Vyuma muka vikwavo vyavilemu mwatela kusakula vize navimikafwa kuzachila Kalunga?
4 Kusakula chenu kuzachila Yehova keshi chikiko kaha nachikamikafwa kulutweko. Munahase nawa kusakula kupwa muulo chipwe kutwama ujike, kaha nawa munahase kusakula mutu wakukapwa nenyi muulo namilimo namukazata. Vyuma kanevi vyapwa vyavilemu chikuma mukuyoya, oloze mwatela chatete kusakula kuzachila Yehova namuchima wenu wosena. (Lushi. 30:19, 20) Mwomwo ika? Mwomwo vyuma vyosenevi namusakula kulinga vyazachila hamwe. Vyuma namusakula kupandama kuulo nakumilimo vinahase kumikafwa chipwe kumihonesa kuzachila Kalunga. (Esekesenuko Luka 14:16-20.) Kaha nawa muchima wenu wakusaka kuzachila Kalunga unahase kumikafwa hakusakula vyakulinga kutalisa kuulo chipwe kumilimo yakukaye. Ngocho chatete sakulenu vyuma vyavilemu chikuma mukuyoya chenu.—Fwili. 1:10.
MILIMO MUKA NAMUZATA OMU MUCHILI MUVAKWEZE?
5, 6. Hanenu chakutalilaho chakusolola omu kusakula kanawa vyakulinga mukuyoya chinahase kutulingisa tumone vyuma vyamwaza kulutwe. (Talenu nawa chihande chakwamba ngwavo “Vyuma Ngwasakwile Omu Ngwapwile Ngukanyike” mukaposhi uno.)
5 Sakulenu kuzachila Yehova, wanenu vyuma asaka mulinge, nakusakula mujila yize mwatela kuzachishilamo kuyoya chenu. Ndumbwetu wakuJapan asonekele ngwenyi: “Omu ngwapwile namyaka yakusemuka 14, ngwayile mumulimo wamuwande namukulwane wamuchikungulwilo uze amwene ngwenyi kangwazangile mulimo kanako. Anguhanjikishile nalizu lyalivwovu ngwenyi: ‘Yuichiro, yako kwimbo ukatwame muchitwamo mangana ukashinganyeke kanawa havyuma vize akulingila Yehova.’ Ngwalingile vyuma angulwezele. Kaha hamakumbi akavangijileho, ngwalombelenga kuli Kalunga nakushinganyekaho chikuma. Kutwala muze muchima wami walumukile, kaha ngwapwile jino nakulivwisa kuwaha kuzachila Yehova. Ngwevwilenga kuwaha kutanga mijimbu yavamishonali, kahechi changulingishile nguputuke kushinganyeka chikuma vyakuzachila Kalunga.”
6 Yuichiro ambile ngwenyi: “Ngwaputukile kusakula kanawa vyakulinga. Kahechi changulishile kuya nakuzachila Yehova mulifuchi lyeka.” Ambile ngwenyi: “Ngwaputukile kulinangula Chingeleshi. Kahomu ngwakumishile shikola, ngwaputukile kuzata mulimo wakunangula vatu Chingeleshi mangana nguhase kuwanako mbongo jakulikafwa najo hakuzata upayiniya. Omu ngwapwile namyaka 20, ngwaputukile kulinangula lilimi lyaMongolian kaha ngwatambukilile lizavu lyavaka-kwambulula lize lyazachishilenga lilimi lyaMongolian. Omu mwahichile myaka yivali, mu 2007, ngwayile kulifuchi lyaMongolia. Omu ngwayile nakwambulula hamwe navapayiniya, ngwamwene vatu vavavulu vapwile nakusakiwa kuvanangula, ngocho ngwasakile kuya nakuzachilako. Ngwakindulukile kuJapan nakuliwahisa vyakuya nakuzachila kuMongolia. Ngunazachilanga upayiniya mulifuchi lyaMongolia kufuma vene muApril 2008. Numba tuhu chiyoyelo mulifuchi kana chapwa chachikalu, oloze vatu vali nakwivwilila kumujimbu wamwaza, kaha ngunakuvakafwa vapandame kuli Yehova. Ngweji kushinganyekanga ngwami ngwasakwile chuma chachilemu mukuyoya.”
7. Vyuma muka mwatela kulisakwila kulinga, kaha chakutalilaho muka chize Mose amisela?
7 Mutu himutu atela kulisakwila ivene mujila mwazachishilamo kuyoya chenyi hakuzachila Yehova. (Yoshu. 24:15) Katweshi kuhasa kumilweza ngwetu mwingile muulo chipwe kutwama ujike, chipwe kumisakwila mutu wakulimbata nenyi, chipwe milimo mwatela kuzatako. Kutala namusakula milimo yakumujimba yize nayimbata kaha lwola lwalundende hakulinangulayo tahi? Vakweze vamwe mwatwama mujingalila jakuhutwa, kaha veka vatwama mujinganda jaluheto. Kaha nawa vakweze mukaye kosena valihandununa muvilinga, namuuhashi, navyuma valinangula, namuvyuma vasaka kulinga namulufwelelo. Chiyoyelo chenu chalihandununa nachavakwenu, ngana muze chiyoyelo chaMose chalihandunwine nachavakweze vavaHepeleu vaze vapwilenga muEjipitu. Mose apwile nakuyoyela kunganda yamwangana, oloze vakwavo vaHepeleu vapwile muundungo. (Kulo. 1:13, 14; Vili. 7:21, 22) Mose navakweze vakwavo vavaHepeleu vapwile nakutwama mulwola lwakulipwila ngana muze chili kuli enu makumbi ano. (Kulo. 19:4-6) Kala mutu atelele kulisakwila vyakulinga mukuyoya chenyi. Mose asakwile kuzachila Yehova.—Tangenu WavaHepeleu 11:24-27.
8. Veya vanahase kumikafwa musakule kanawa vyakulinga?
8 Yehova eji kumikafwanga musakule kanawa vyakulinga muukweze wenu. Eji kumihananga jindongi jize munahase kuzachisa kweseka nachiyoyelo chenu. (Samu 32:8) Kaha nawa visemi jenu vaka-Kulishitu navakulwane muchikungulwilo vanahase kumikafwa mwakukavangijila jindongi kaneji. (Vishi. 1:8, 9) Tutalenu jino hajindongi jitatu jamuMbimbiliya jize najimikafwa mwakusakwila kanawa vyakulinga oholyapwa.
JINDONGI JITATU JIZE NAJIMIKAFWA
9. (a) Yehova amivumbika ngachilihi hakumihana lisesa lyakulisakwila vyuma? (b) Uno ‘kutonda chatete Wangana’ cheji kunehanga vyuma muka?
9 Tondenu chatete Wangana waKalunga nakwoloka chenyi. (Tangenu Mateu 6:19-21, 24-26, 31-34.) Yehova amivumbika hakumihana lisesa lyakulisakwila vyuma munasake kulinga. Kamilweza ngwenyi muzachisenga lwola lwenu lwosena mumulimo wakwambulula Wanganako. Oloze Yesu atunangula kulema chatwama hakutonda chatete Wangana. Nge namutondanga chatete Wangana, kaha namupwa nalwola lwaluvulu lwakuzachila Kalunga. Chakutalilaho, namupwa namilimo yayivulu yakusolola nge mwazanga Yehova navatu, kaha nawa mwamusakwilila hakumihana lutalililo lwakukayoya haya myaka yosena. Kutala vyuma muli nakusaka kulinga vyakupandama kukulimbata, nakumilimo vyasolola nge mwazakama chikuma vyaluheto kuhambakana kutonda chatete Wangana waKalunga nakwoloka chenyi tahi?
10. Vyuma muka vyalingishile Yesu apwenga wakuwahilila, kaha vyuma muka mwatela kusakula kulinga numba mupwenga vakuwahilila?
10 Wahililenunga hakuzachila vakwenu. (Tangenu Vilinga 20:20, 21, 24, 35.) Yesu atunangwile chishina kanechi chachilemu. Apwile wakuwahilila mwomwo alingilenga mwaya muchima waIse muchishishisa chakulinga mwaya muchima wenyi. Yesu awahilililenga omu amwene vatu vavavulu navevwilila kumujimbu wamwaza. (Luka 10:21; Yowa. 4:34) Pamo nayenu mweji kwivwanga kuwaha kukafwa vakwenu. Nge namukavangiza jindongi kaneji ahanjikile Yesu, kaha namupwa vakuwahilila nakwivwisa Yehova kuwaha.—Vishi. 27:11.
11. Mwomwo ika Mbaluke ahonene kupwa wakuwahilila, kaha Yehova amukafwile ngachilihi?
11 Kuwahilila chamwaza cheji kwizanga hakuzachila Yehova. (Vishi. 16:20) Lwola lumwe Mbaluke uze apwile muka-kusoneka waYelemiya kapwile wakuwahililako. Mwomwo ashinganyekele chikuma havyuma vize asakile ikiye, keshi vize asakile Yehovako. Yehova amulwezele ngwenyi: “Weji kulitondelanga vyuma vyavinene tahi? Kanda uvitondako, mwomwo tala, nangukaneha lupi hali vakwechi mijimba vosena, . . . oloze mwono wove nangukakuhanawo kupwa nge chuma chakupukula kweshokwo naukaya.” (Yele. 45:3, 5) Vyuma muka vyatelele kulingisa Mbaluke apwenga wakuwahilila? Kulinga vyuma vize asakile nakumunongesa tahi nyi kulinga vyuma vize asakile Yehova nakukayovoka hakunongesa Yelusalema?—Yako. 1:12.
12. Mulimo muka uze walingishile Romiro apwenga wakuwahilila?
12 Ndumbwetu umwe walijina lyaRamiro apwile wakuwahilila hakukafwa vakwavo. Ambile ngwenyi: “Ngwafumine kutanga yakuhutwa yize yatwama muAndes Mountains. Chapwile hikutokwa omu yaya angulwezele ngwenyi mwangufwetela jimbongo jakuya kuyunivesiti. Oloze halwola kana te vanangumbapachisa kupwa umwe waVinjiho jaYehova, kaha nawa te payiniya umwe nangulweze nguzate nenyi mulimo wakwambulula mumbaka yimwe yayindende. Omu ngwahetele kuze ngwalinangwile kuteula jikambu, kaha ngwasokolwele chitanda chakutewula jikambu mangana nguwane mwakuyoyela. Vatu vavavulu vetavilile kuvanangula Mbimbiliya. Kutwala muze ngwalikachile nachikungulwilo chize chazachishilenga lilimi lyamungalila kana. Romiro atwama muchikungulwilo kana, kaha nazachilamo hamyaka 10. Mulimo wakukafwa vatu valinangule Mbimbiliya mulilimi lyavo weji kunehanga kuwahilila kuhambakana milimo yeka.”
Ramiro apwa wakuwahilila mwomwo yakuzachila Yehova muukweze wenyi (Talenu palangalafu 12)
13. Mwomwo ika kuzachila Yehova muukweze chapwila chamwaza?
13 Livwisenu kuwaha kuzachila Yehova muukweze wenu. (Tangenu Muka-kwambulula 12:1.) Kanda kushinganyeka ngwenu kuvangila munawane milimo yamwaza numba jino muputuke kuzata upayiniyako. Lwola lwamwaza lwakuputuka kuzachila Yehova namuchima wosena shina oholyapwa shimbu kanda mupwenga namilimo yayivulu yamutanga. Oholili muli nangolo jakuzata milimo yayikalu. Vyuma muka namufwila kulingila Yehova muukweze wenu? Pamo munakufwila kuzata upayiniya chipwe kwambulila vatu vaze vazachisa lilimi lyeka. Pamo muli nakusaka kuzata nangolo muchikungulwilo chenu. Kala vyuma muli nakusaka kulinga, mwatela kuwana mwakuyoyela. Ngachize lihulisenu ngwenu: ‘Milimo muka yakumujimba nangusakula kuzata, kaha lwola lungahi nayimbata hakulinangulayo?’
KUZACHISA JINDONGI JAMUMBIMBILIYA HAKUSAKULA KANAWA VYAKULINGA
14. Vyuma muka mwatela kushinganyekaho kanawa hakusakula vyakulinga?
14 Eji jindongi jamuMbimbiliya jitatu tunashimutwila jinahase kumikafwa kusakula kanawa milimo mwatela kuzata. Valongeshi jenu navilolo jafulumende vanahase kumilweza milimo yamungalila yenu yize mwatela kuzata. Vatu kana vanahase kumikafwa, oloze mwatela kuzangama, mwomwo vanahase kumilingisa mupwenga namuchima wakuzanga chikuma vyuma vyahano hakaye. (Yowa. 1, 2:15-17) Muchima wenu unahase kumihungumwisa nge namutala havyuma vili muno mukaye.—Tangenu Vishimo 14:15; Yele. 17:9.
15, 16. Veya vanahase kumikafwa musakule kanawa milimo yakumujimba?
15 Nge munatachikiza lyehi milimo munahase kuzata, mwatela kulomba vamikafwe. (Vishi. 1:5) Veya vanahase kumikafwa muzachise kanawa jindongi jamuMbimbiliya hakusakula milimo? Mwatela kwivwilila kuvatu vaze vazanga Yehova, vaze vamizanga vaze vatachikiza kanawa chiyoyelo chenu. Navamikafwa mushinganyeke kanawa havyuma munahase kulinga navize muli nakufwila kulinga. Pamo vyuma navamilweza navimikafwa mushinganyeke kanawa havyuma namusakula kulinga. Nge visemi jenu vazanga Yehova, kaha vanahase kumikafwa chikuma. Kaha nawa vakulwane muchikungulwilo vanahase kumikafwa. Hulisenu vapayiniya natulama vakutambwojoka vamilweze ovyo vyavalingishile vazachise lwola lwavo nangolo javo hakuzachila Yehova. Uno vaputukile ngachilihi? Milimo muka yakumujimba vazachile? Nganyo muka vanawane hakuzachila Kalunga?—Vishi. 15:22.
16 Vatu vaze vamitachikiza kanawa vanahase kumikafwa mujila yamwaza. Chakutalilaho, ngachilihi nge namusaka kwecha shikola nakuputuka kuzata upayiniya mwomwo ngwenu kushikola kwatwama chikuma milimo? Mutu uze amizanga nahase kumona ovyo muli nakusakila kwecha shikola. Ngocho mwamikafwa mumone ngwenu kupwa namuchima walukakachila kushikola chinahase kumikafwa mutwaleho lika kulinangula muchishishisa chakwecha. Chuma kanechi nachikamikafwa hakuzachila Yehova.—Samu 141:5; Vishi. 6:6-10.
17. Milimo muka yize twatela kulihendako?
17 Vosena vaze navazachila Yehova navamonanga ukalu uze unahase kuzeyesa lufwelelo lwavo nakuvasosolola kuli Yehova. (Koli. 1, 15:33; Kolo. 2:8) Milimo yimwe yinahase kuzeyesa chikuma lufwelelo lwenu kuhambakana milimo yeka. Pamo mwatachikizako vandumbwetu vamwe vaze ‘vanavombesa lufwelelo’ lwavo mwomwo yamilimo veji kuzatanga. (Chimo. 1, 1:19) Chapwa chamangana kulihenda kumilimo yize nayijiha usepa wenu naKalunga.—Vishi. 22:3.
LIVWISENU KUWAHA KUPWA VAKWEZE VAKA-KULISHITU
18, 19. Vyuma muka mwatela kulinga nge kamweshi namuchima wakuzachila Yehovako?
18 Nge muli nakufwila kuzachila Yehova, kaha zachisenu ngolo jenu hakuzachila Kalunga muukweze wenu. Sakulenu kulinga vyuma vize navimikafwa mulivwise kuwaha kuzachila Yehova mumakumbi ano akulipwila.—Samu 148:12, 13.
19 Vyuma muka mwatela kulinga nge kamweshi namuchima wakuzachila Yehovako? Twalenuho lika kuzamisa lufwelelo lwenu. Paulu alumbunwine vyuma alingile numba vamukisule kuli Yehova. Ambile ngwenyi: “Kachi nge namushinganyeka mweka, kaha Kalunga mwakamisolwela muchima kanou wakwoloka. Chipwe ngocho, heshoho haseteko tunahete mukuzovoloka chetu, tutwalenuho lika nakutambuka kanawa mujila yoyimwe.” (Fwili. 3:15, 16) Anukenu ngwenu Yehova amizanga, kaha nawa jindongi jenyi jinahase kumikafwa. Mulwezenu amikafwe musakule kanawa vyakulinga shimbu muchili muvakweze.