Lemesenunga Yehova Mwangana Wahaya Myaka Yosena
“Kuli Mwangana wahaya myaka yosena . . . kuli ikiye kupwenga kavumbi naupahu haya myaka namyaka.”—CHIMO. 1, 1:17.
1, 2. (a) Uno iya apwa “Mwangana wahaya myaka yosena,” kaha mwomwo ika chapwila chakutamo kumuvuluka lijina kana? (Talenu muvwimbimbi wakulivanga.) (b) Mwomwo ika twazangila Yehova atuyule?
MWANGANA SOBHUZA II wamuSwaziland ayulile hamyaka kafwe 61. Numba tuhu ou Mwangana ayulile hatando yayisuku, oloze kuli mwangana weka uze keshi kuyoya hamyaka yayindende ngana mwavatuko. Mbimbiliya yavuluka ngwayo apwa “Mwangana wahaya myaka yosena.” (Chimo. 1, 1:17) Muka-kwimba jisamu avulukile lijina lyamwangana kanou ngwenyi: “Yehova apwa Mwangana haya myaka namyaka.”—Samu 10:16.
2 Kusuhwa chamyaka yize nayulunga Kalunga chalingisa chiyulo chenyi chilihandunune chikuma nachiyulo chavatu. Jila eji kuyulilangamo Yehova yatulingisa tupandame kuli ikiye. Mwangana uze ayulile vaIsalele hamyaka 40 alishile Kalunga ngwenyi: “Yehova napu wakeke, Muka-kutetela, Wakushipwokela kutenuka, walikoji lyalivulu. Yehova nazamisa litanda lyenyi lyawangana mwilu, Wangana wenyi unahete kuvyuma vyosena.” (Samu 103:8, 19) Yehova kapwa kaha Mwangana wetuko, oloze apwa nawa Setu wamwilu wazangi. Oloze mujila muka Yehova napunga Setu? Kaha mujila muka Yehova nasololanga nge napunga lika Mwangana kufuma vene hakulikanga chapwileko muEtene? Kukumbulula vihula kana nachitukafwa tupandame chikuma kuli Yehova nakumulemesa namichima yetu yosena.
MWANGANA WAHAYA MYAKA YOSENA MWATENGA TANGA YENYI
3. Iya apwile watete mutanga yaYehova, kaha veya vakwavo vatengele kupwa “vana” vaKalunga?
3 Yehova evwile kuwaha omu atengele Mwanenyi umwe kaha wakulipwila. Kamwenenga mwanenyi kupwa wamokomokoko. Oloze amuzangile nakumulweza azane mumulimo wakutenga vangelo vakukupuka mwosena. (Kolo. 1:15-17) Mbimbiliya yamba ngwayo, ava vangelo veji kuzachilanga Kalunga nakuwahilila hakupwa “vaka-kumuzachila, vaze veji kulinganga nganomu mwanevwila kuwaha.” Yehova avavumbika hakuvasanyika ngwenyi “vana” venyi. Vapwa vamutanga yenyi.—Samu 103:20-22; Yopa 38:7.
4. Uno vatu vejile nakupwa ngachilihi mutanga yaKalunga?
4 Omu Yehova akumishile kutenga melu namavu, atohwesele tanga yenyi. Mujila muka? Omu akumishile kuwahisa hamavu nakupwa nakuwalingisa kupwa limbo lyamwaza, Yehova atengele mutu watete Alama uze atengele muchifwanyisa chenyi. (Kupu. 1:26-28) Yehova tengi asakile Alama amwononokenga. Hakupwa Chisemi, ahanyine Alama jishimbi mujilayazangi nalikoji. Kamuhanyine jishimbi jize japwile jajikalu kukavangizako.—Tangenu Kuputuka 2:15-17.
5. Vyuma muka alingile Kalunga mangana hamavu hosena hakazale navatu?
5 Yehova eji kumonanga vangamba jenyi kupwa vatu vamutanga yenyi. Echi chalihandununa navamyangana vavatu. Avafwelela chikuma, echi chikiko chamulingisa avahanenga milimo yayivulu nangolo jakuzata milimo. Chakutalilaho, Yehova ahanyine Alama ngolo jakuyula tunyama, namulimo wakuvaluka majina. (Kupu. 1:26; 2:19, 20) Kalunga katengele vatu vavavulu mangana vasulise ano mavuko. Oloze atengele pwevo wakukupuka mwosena Eve kupwa pwevo lyaAlama. (Kupu. 2:21, 22) Kufumaho ahanyine ava valunga napwevo mulimo wakusema vana nakusulisa hamavu. Mukuhita chamyaka vaAlama naEve kachi valingishile kumavu kwosena kupwa Palachise. Kachi valinungile hamwe navangelo kupwa tanga yimwe nakulemesa Yehova myaka yosena. Yehova asolwele chikupu ngwenyi apwile chisemi wazangi uze ahanyine vaAlama naEve lutalililo lwamwaza lwakulutwe.
VANA VAKULIKANGA NAVAKANA KUVAYULA KULI KALUNGA
6. (a) Uno kulikanga chaputukile ngachilihi mutanga yaKalunga? (b) Mwomwo ika natwambila ngwetu kulikanga kachahonesele Kalunga kuyulako?
6 Chaluvinda, vaAlama naEve kavasakile kuvayula kuli Yehovako. Oloze vasakile kukavangiza Satana, mwana Kalunga wakulikanga. (Kupu. 3:1-6) Kulikanga chavo chanehele kuyanda, kukola nakufwa kuli vakivo nakuli vana vavo. (Kupu. 3:16-19; Loma 5:12) Kufuma vene haze Kalunga kapwile navana vakumwononoka hano hamavuko. Kutala echi chalumbunwine nge Yehova ahonene kuyula vatu hamavu tahi? Chiku. Oloze asolwele ngolo jenyi jakuyula hakuhanga vaze valunga napwevo mumilemba yaEtene nakuhakako vakeluve kuchikolo mangana valamengako kuchina navakinduluka mumilemba. (Kupu. 3:23, 24) Halwola lwolumwe nawa asolwele zangi yenyi hakupwa chisemi. Afwelelesele ngwenyi mwapwanga lika navangelo navatu vakushishika mutanga yenyi, kaha ngwenyi “muka-tanga” yaAlama umwe mwakanongesa Satana nakufumisaho upi uze weza mwomwo yashili yaAlama.—Tangenu Kuputuka 3:15.
7, 8. (a) Vyuma vyapihile ngachili mumakumbi aNowa? (b) Vyuma muka alingile Yehova mangana atomese hamavu nakulama tanga yavatu vakushishika?
7 Hamyaka yayivulu yakavangijileho, vatu vamwe vapwile vakushishika kuli Yehova. Vatu kana shina Avele naEnoke. Oloze vatu vavavulu vakanyine Yehova kupwa Sevo kaha nawa Mwangana wavo. Mulwola lwaNowa hamavu hosena “hapwile ulyanyi lika.” (Kupu. 6:11) Uno echi chalumbunwine nge Yehova kapwile nangolo havyuma vyapwile nakulingiwa hano hamavuko tahi? Uno Mbimbiliya yahanjika vyuma muka?
8 Mbimbiliya yamba ngwayo Yehova ahanyine Nowa jindongi jamwakutungila wato waunene uze wamuyowele natanga yenyi. Kalunga asolwele nawa zangi yenyi hali vatu omu atumine Nowa kupwa “muka-kwambulula kwoloka.” (Petu. 2, 2:5) Nowa alwezele vatu vapihilile nakwalumuka nakuvalweza vyakunongesa chapwile nakwiza kulutwe, oloze kavamwivwililileko. Hamyaka yayivulu, Nowa natanga yenyi vatwaminenga mukaye kaukenya navilinga vyauvumbi. Yehova hakupwa chisemi wazangi, atwaminyinyinenga nakukinga vatu 8 vaze vapwile vakulyononona. Omu Yehova anehele livaji hamavu hosena, anongesele vatu vakulikanga nakufumisako vangelo vakulikanga. Ngocho asolwele nge apwile nangolo jakuyula.—Kupu. 7:17-24.
Yehova napunga lika nakuyula (Talenu jipalangalafu 6, 8, 10, 12, 17)
CHIYULO CHAYEHOVA HANYIMA YALIVAJI
9. Yehova ahanyine vatu lwola lwakulinga vyuma muka hanyima yalivaji?
9 Omu Nowa natanga yenyi vafumine muwato, vatela vasakwililile Yehova hakuvazakama nakuvakinga. Hahaze vene Nowa atungile lijiko lyakulumbila nakuhana chimuna wakuvatula wakwalisa Yehova. Kalunga akiswile Nowa natanga yenyi kaha avalwezele ngwenyi: “Semenunga mukavule chikuma, mukasulise hamavu.” (Kupu. 8:20–9:1) Vatu vapwile cheka nalwola lwakulinunga mukulemesa Yehova nakusulisa hamavu.
10. (a) Kulihi kaha nawa mujila muka vatu vaputukile kulikanga kuli Yehova hanyima yaLivaji? (b) Vyuma muka alingile Yehova hakusaka vatu valinge mwaya kujina chenyi?
10 Chipwe ngocho, vatu vapwile lika vakuhona kukupuka mwosena hanyima yaLivaji. Vapwile lika nakuvahungumwisa kuli Satana navandemone jenyi. Nakushimbula chiku, vatu vaputukile kulikanga kuchiyulo chaYehova chazangi. Chakutalilaho, kakwatambuli kaNowa Nyimelote alikangile kuli Yehova. Nyimelote vamuvuluka kupwa “muka-kuzomba wangolo uze emanyinyine Yehova nakole.” Atungile jinganda jajinene jakufwana nge Mbavele, nakulivuluka lyavene kupwa mwangana “mungalila yaShinale.” (Kupu. 10:8-12, NW.) Vyuma muka alingile Yehova hali ou mwangana wakulikanga? Yehova alingile ngachilihi omu Nyimelote amwimanyinyine nakole? Kalunga aluwanganyishile lilimi lyavo nakulingisa vaka-kukavangiza Nyimelote valimwange “kwilu lyamavu kwosena.” Kwosena vayilenga valemeselenga kwitava chamakuli nakwitavila vatu vavayule.—Kupu. 11:1-9.
11. Uno Yehova asolwele ngachilihi ngwenyi apwile wakushishika kuli sepa lyenyi Apalahama?
11 Numba tuhu vatu vavavulu valemeselenga tulunga vamakuli hanyima yaLivaji, oloze kwapwile vatu vamwe vaze vapwile vakushishika kuli Yehova. Umwe apwile Apalahama uze ononokele Yehova nakuseza limbo lyenyi lyamwaza munganda yaUle nakuya nakutwama mujimbalaka hamyaka yayivulu. (Kupu. 11:31; Hepe. 11:8, 9) Apalahama kafwelelele ngwenyi vamyangana vavatu chipwe jikembwe janganda vinahase kumukingako. Oloze Yehova yikiye akingile Apalahama natanga yenyi. Muka-kwimba jisamu asonekele vyomu Yehova eji kukinganga ngwenyi: “[Kalunga] ketavile mutu umwe kuvalisa nachikelako, ahanjikilile vamyangana hali vakivo.” (Samu 105:13, 14) Hakuwana nge Yehova apwile wakushishika kuli sepa lyenyi, ngocho ashikile Apalahama ngwenyi: “Kuli ove nakukasemuka vamyangana.”—Kupu. 17:6; Yako. 2:23.
12. Uno Yehova asolwele ngachilihi wata wenyi hali vaEjipitu, kahechi chakafwile ngachilihi vatu jenyi?
12 Kalunga ashikile mwana Apalahama Isaka namuzukulyenyi Yakova ngwenyi mwakavakisula kaha muchisaka chavo mukiko namukafuma vamyangana. (Kupu. 26:3-5; 35:11) Oloze shimbu kanda vapwenga vamyangana, vana vaYakova vapwile vandungo muEjipitu. Uno echi chalumbunwine nge Yehova keshi kukatesamo lushiko lwenyi kaha nawa nahono kuyula hano hamavu tahi? Nduma. Halwola luze atongwele, Yehova asolwele nge akwechi ngolo jajivulu kuhambakana Fwalo uze apwile wakulikanga. VaIsalele vafwelelele muli Yehova kaha avasokwele mujila yakukomwesa haKalungalwiji Uchila. Echi chasolwele hatoma nge Yehova apwa Mwata Atengele Vyuma Vyosena kaha nawa Chisemi uze eji kuzakamanga vana venyi. Ngocho azachishile ngolo jenyi jajinene nakukinga vatu jenyi.—Tangenu Kulovoka 14:13, 14.
YEHOVA MWAPWA MWANGANA WAVAISALELE
13, 14. (a) Vyuma muka vavilikile vaIsalele mumwaso vyakupandama kuchiyulo chaYehova? (b) Vyuma muka Yehova ashikile Ndavichi?
13 Omu Yehova ayowele vaIsalele kufuma muEjipitu, vembile mwaso wakwalisa Yehova uze vasoneka hamukanda waKulovoka kapetulu 15. Havesi 18 hatwama mazu akwamba ngwavo: “Yehova mwapwanga mwangana haya myaka namyaka.” Chikupu vene Yehova apwile Mwangana wamuyachi wavaIsalele. (Lushi. 33:5) Oloze vaIsalele kavasakile kuvayula kaha kuli Yehova uze kavamonako. Omu mwahichile myaka 400 kufuma hakuvasokola muEjipitu, vaIsalele valwezele Kalunga avahane mwangana wamutu ngana muze valingilenga vaka-mafuchi valihachile navo. (Samwe. 1, 8:5) Chipwe ngocho, muchiyulo chaNdavichi chasolokele hatoma nge Yehova apwile lika Mwangana.
14 Ndavichi anehele chikasha chalushiko chajila kuYelusalema. Halikumbi kaneli lyakuwahilila, vaLevi vembile mwaso wakwalisa Yehova nakuvuluka mazu amalemu aze atwama hamukanda waMijimbu 1, 16:31 akwamba ngwavo: “Vambenga muli vaka-mafuchi ngwavo, Yehova napu mwangana.” Hakuwana nge ‘Yehova apwa Mwangana wahaya myaka yosena, jino apwile ngachilihi Mwangana halwola kana luze?’ Yehova eji kupwanga Mwangana nge mwazachisa ngolo jenyi chipwe mwatuma mutu amwimanyineko. Chapwa chachilemu kwijiva omu Yehova eji kupwanga Mwangana. Shimbu kanda Ndavichi afwenga, Yehova amushikile ngwenyi wangana wenyi naukelilanga haya myaka yosena. Ambile ngwenyi: “Nangukemika muka-tanga yove wakukukava, ou mwakasemuka kumujimba wove, kaha nangukazamisa wangana wenyi.” (Samwe. 2, 7:12, 13) Elu lushiko lwateselemo omu “muka-tanga” yaNdavichi asolokele hamyaka yakuhambakana 1,000 kufuma halwola vamushikile. Ou muka-tanga apwile iya, kaha lwola muka ejile nakupwa Mwangana?
YEHOVA MWATONGOLA MWANGANA WAMUHYA
15, 16. Lwola muka Yesu vamuwavishile kupwa Mwangana wakulutwe, kahomu apwile hano hamavu vyuma muka alingile kutalisa kuWangana wenyi?
15 Mumwaka wa 29 C.E., Yowano Muka-kumbapachisa aputukile kwambulula ngwenyi, “Wangana wamelu unapandama kwakamwihi.” (Mateu 3:2) Omu Yesu vamumbapachishile kuli Yowano, Yehova amuwavishile kupwa Meshiya uze vashikile uze mwakapwa Mwangana waWangana waKalunga kulutwe. Yehova asolwele zangi yenyi hali mwanenyi hakwamba ngwenyi: “Ou ikiye Mwanami, ou ngwazanga, ou ngwevwila kuwaha.”—Mateu 3:17.
16 Omu Yesu apwilenga nakwambulula mujimbu wamwaza, alishilenga Ise. (Yowa. 17:4) Alingile ngocho hakwambulula vyaWangana waKalunga. (Luka 4:43) Anangwile navaka-kumukavangiza valombenga Wangana kana wizenga. (Mateu 6:10) Hakupwa Mwangana Wakutongola, Yesu alwezele vaze vamuhungilenga ngwenyi: “Wangana waKalunga uli mukachi kenu.” (Luka 17:21) Likumbi kana lize nachingoloshi shimbu kanda afwenga, Yesu ‘alikashile chivwasano chawangana’ navaka-kumukavangiza. Echi chalumbunwine nge tumbaji twenyi vamwe vakushishika navakapwa vamyangana hamwe kaha naYesu muWangana waKalunga.—Tangenu Luka 22:28-30.
17. Mujila muka Yesu aputukile kuyula mumwaka wa 33 C.E., kaha vyuma muka apwile nakuvandamina?
17 Lwola muka Yesu aputukile kuyula kupwa Mwangana waWangana waKalunga? Yesu kaputukile kuyula hahaze veneko, mwomwo vamujihile halikumbi lyakavangijileho kaha tumbaji twenyi valimwangile. (Yowa. 16:32) Oloze Yehova apwilenga lika nakuyula ngana muze alingile kunyima. Halikumbi lyamuchitatu, asangwile Mwanenyi, kaha halikumbi lyaPendekoseta 33 C.E., Yesu aputukile kuyula chikungulwilo chavaka-Kulishitu. (Kolo. 1:13) Chipwe ngocho, Yesu uze apwile “muka-tanga” yaNdavichi vashikile atelele kuvandamina lwola lwakumuhana ngolo jakuyula kaye. Yehova alwezele Mwanenyi ngwenyi: “Twamanga kulivoko lyami lyachilyo Palanga nomu nangukalingisa vaka-kole jove kupwa chitwamo chamahinji ove.”—Samu 110:1.
LEMESENUNGA MWANGANA WAHAYA MYAKA YOSENA
18, 19. Vyuma muka natufwila kulinga, kaha vyuma muka natulinangula muchihande chinakavangizaho?
18 Hamyaka yayivulu, vangelo navatu vanalikangenga kuchiyulo chaYehova. Oloze Yehova napunga lika nakuyula, kalitwaminyinyineko. Hakupwa Chisemi wazangi, Yehova nakinginga nakuzakama vangamba jenyi vakushishika vakufwana nge Nowa, Apalahama naNdavichi. Kutala echi kachatela kutulingisa tupandame kuli Mwangana wetu nakumwononoka tahi?
19 Oloze tunahase kulihulisa ngwetu: Uno Yehova napu ngachilihi Mwangana wetu makumbi ano? Tunahase kulyononona ngachilihi kuWangana waYehova nakupwa vana venyi vamutanga yenyi? Uno chalumbununa ika kulomba Wangana waKalunga wizenga? Vihula kanevi navavikumbulula muchihande chinakavangizaho.