1, 2. Uno Wangana waKalunga naukatesamo vyuma muka, kaha mwomwo ika twafwelela ngwetu Wangana kana naukeza?

OMU Yesu Kulishitu apwile hapili yapwile kwakamwihi naKapelenau mu 31 C.E., anangwile vaka-kumukavangiza valombenga ngwavo: “Wangana wove wizenga.” (Mateu 6:10) Numba tuhu vatu vavavulu veji kuhuhwasananga ngwavo Wangana waKalunga kaweshi kukezako, oloze etu twafwelela ngwetu Yehova mwakakumbulula kulomba chetu chakulomba Wangana wenyi wizenga.

² Yehova mwakazachisa Wangana wenyi akanunge hamwe tanga yenyi yamwilu neyi yahamavu. Chuma kanechi ajina kuvanga nachikatesamo. (Isa. 55:10, 11) Vyuma vyamwaza vinasoloka mumyaka 100 yinafumuho vyasolola nge Yehova achili lika Mwangana kaha nawa ali nakulingila vyuma vyamwaza vangamba jenyi vakushishika. (Zeka. 14:9; Kuso. 15:3) Yehova apwa Mwangana. Oloze echi chalihandununa nakwiza chaWangana waKalunga uze Yesu atulweza tulombenga. Uno chalihandununa ngachilihi, kaha chakwata ngachilihi hakuyoya chetu?

3. (a) Mwaka uka vaswanyishile Yesu kupwa Mwangana, kaha kulihi? (b) Unjiho uka wasolola nge Wangana waKalunga waputukile kuyula mu 1914? (Talenu kwinyikila chamwishi.)

³ Myaka kafwe 20 shimbu kanda mwaka wa 1900, vangamba jaKalunga vaputukile kwivwishisa upolofweto uze vasonekele kuli Ndanyele myaka kafwe 2,500 kunyima. Asonekele ngwenyi: “Hamakumbi  avamyangana vaze Kalunga wamwilu mwakakatula wangana, ukiko kaweshi kukeza kukanongako haya myaka yosena.” (Ndanye. 2:44) Vaka-Kulinangula Mbimbiliya vahanjikile hamyaka yayivulu ngwavo mwaka wa 1914 naukapwa wakulipwila. Vatu vavavulu vafwililile kumona kutesamo chaupolofweto kana. Muka-kusoneka umwe asonekele ngwenyi: “Mwaka wa 1914 wapwile mwaka walutalililo nalushiko.” Oloze kusongo yamwaka kana Jita yaKaye yakulivanga yepukile, ngocho upolofweto wamuMbimbiliya wateselemo. Zala yakalombolombo, mindenda, misongo yachihita, navyuma vikwavo vize vapolofwetele vyateselemo. Kahechi chasolwele nge Yesu Kulishitu aputukile kuyula muWangana waKalunga mwilu mu 1914. * Kuswanyisa mwanenyi kupwa Mwangana wauMeshiya chasolwele nge Yehova apwile Mwangana mujila yayihya.

4. Chuma muka chatete alingile Mwangana wamuhya omu vamuswanyishile hawangana, kaha kufumaho alingile vyuma muka?

⁴ Chuma chatete alingile ou Mwangana wamuhya shina kulwa jita naSatana uze apwa muka-kole wamunene waIse. Yesu navangelo vambilile Liyavolo navandemone jenyi hano hamavu. Echi chanehele kuwahilila mwilu namalambakaji hano hamavu. (Tangenu Kusoloka 12:7-9, 12.) Kufumaho ou Mwangana aputukile kutomesa, nakunangula nakulongesa vatu jenyi hano hamavu mangana valinge mwaya muchima waKalunga. Tumonenu omu kulyononona chavo kujindongi jaYesu chatuhana chakutalilaho chamwaza.

5. Kutomesa muka chapwileko mumwaka wa 1914 nakumaputukilo amwaka wa 1919.

⁵ Hanyima yakuhanga Satana navandemone jenyi mwilu, Yehova ahanyine mulimo Yesu wakukekesa nakutomesa vaka-kumukavangiza vahamavu. Kapolofweto Mika alumbunwine ngwenyi kutomesa kanechi chapwile chakushipilitu. (Mala. 3:1-3) Mijimbu yakunyima yasolola nge echi kutomesa chapwileko mukachi kamwaka wa 1914 nakutwala kumaputukilo amwaka wa 1919. * Nge tuli nakusaka kupwa mutanga yaYehova, kaha twatela kupwa vatoma chipwe vajila. (Petu. 1, 1:15, 16) Twatela kulihenda kukwitava chamakuli nakuhona kwazana mumauka amapolitiki numba kulemesa chetu chipwenga chitoma.

6. Uno kulya chakushipilitu veji kuchihananga ngachilihi, kaha mwomwo ika chapwila chachilemu?

⁶ Kufumaho, Yesu azachishile ngolo jenyi jakupwa mwangana hakutongola “ndungo wakushishika wakuzangama.” Ou ndungo ikiye nahanenga kulya chakushipilitu kuli vosena vaze vatwama ‘muutanga umwe’ uze eji kuzakamanga Yesu. (Mateu 24:45-47; Yowa. 10:16) Kufuma mu 1919, lizavu lyalindende lyavandumbwetu vamalunga vawavisa linazatenga mulimo kanou waunene wakulisa “vaka-kuzata kuzuvo” yakaka yenyi. Eyi yikiko jila vali nakutuhanyinamo kulya chakushipilitu mangana tuzame mulufwelelo. Cheji kutulingisanga tufwile kupwa vatoma kushipilitu, namuvilinga, namumuchima, nakumujimba, namuvyuma vyosena tuli navyo. Echi kulya chakushipilitu cheji kutunangulanga nakutukafwa tupwenga vakulizanga kuzata mulimo waulemu chikuma hano hamavu, wakwambulula mujimbu. Kutala mweji kulyanga kulya kanechi chakushipilitu lwola lwosena tahi?

7. Mulimo muka waulemu aputukile Yesu omu apwile hano hamavu, kaha mulimo kana nautwalaho lika palanga nakumwaka uka?

⁷ Omu Yesu aputukile kuzata mulimo wenyi wakwambulula hano hamavu, ambile ngwenyi: “Ngwatela kwambulula mujimbu wamwaza waWangana waKalunga nakujinganda jeka nawa,  mwomwo vikiko vene vangutuminyine.” (Luka 4:43) Hamyaka yitatu nachimbwa, mulimo kanou ukiko wapwile waulemu chikuma kuli Yesu. Alwezele tumbaji twenyi ngwenyi: “Kahomu namuya, ambululenunga ngwenu: ‘Wangana wamelu unapandama kwakamwihi.’” (Mateu 10:7) Omu vamusangwile, Yesu ambile ngwenyi vaka-kumukavangiza navakatandakanyisa mujimbu “kuvihela vyakwakusuku vyahamavu.” (Vili. 1:8) Ashikile ngwenyi mwakavakafwa kuzata mulimo kanou palanga nakusongo.—Mateu 28:19, 20.

8. Mwangana akolezezele ngachilihi vaka-kumukavangiza hano hamavu vambulule mujimbu?

⁸ Kuheta mu 1919, “mujimbu wamwaza waWangana” wapwile naulumbunwiso weka. (Mateu 24:14) Mwangana apwile nakuyula mwilu, kaha akungulwile lizavu lyalindende lyavaka-kumukavangiza vaze vatomesele hano hamavu. Eli lizavu lyononokele nakukavangiza lushimbi lwaYesu lwakwambulula mujimbu wamwaza kuvihela vyahamavu vyosena. (Vili. 10:42) Chakutalilaho, vaka-kwambulula wangana vakuheta ku 20,000 vapwile kukukunguluka chamafuchi chize chapwile muCedar Point, Ohio, U.S.A., muSeptember 1922. Achishinganyekenu ocho kuwaha vevwile omu Ndumbwetu Rutherford ahanjikile chihande chenyi chakwamba ngwavo, “Wangana.” Kaha ahanjikile ngwenyi, “Talenu, Mwangana ali nakuyula! Enu munapu muvaluwa jenyi vaka-kwambulula. Shikaho ambululenu, ambululenu, ambululenu, Mwangana nawangana wenyi.” Likumbi lyakavangijileho vatu vakuheta ku 2000 vapwile kukukunguluka kana vaputukile kuya nakwambulula mujimbu wamwaza. Kaha veka vayile nakwambulila kuvihela vyakwakusuku, kafwe tunda yajikilomita 72 kufuma hachihela chakukungulukila. Ndumbwetu umwe wapwevo ambile ngwenyi: “Kangweshi kukavulyama mazu kana awa vatukolezezele akuvilika Wangana natwima yavandumbwetu vaze vakungulukileko.” Navakwavo veka mukiko vahanjikile.

9, 10. (a) Vyuma muka vanalongesanga mangana vanangule vaka-kuvilika Wangana? (b) Uno munanganyala ngachilihi kukunangula kana?

⁹ Kuheta mu 1922, vaka-kuvilika Wangana vakuheta ku 17,000 vapwile natwima yakwambulula mumafuchi 58. Oloze vasakiwile kuvanangula. Mulikulukaji lyamyaka lyakulivanga, ou Mwangana vatongola ahanyine tumbaji twenyi jindongi jakupandama kuvyuma vatela kwambulula, nakuvihela vyakwambulwila, namujila vatela kwambulwilamo. (Mateu 10:5-7; Luka 9:1-6; 10:1-11) Namakumbi ano nawa, Yesu ali nakuhana jindongi vaze vali nakwambulula mujimbu wamwaza, navinoma vyakuvakafwa vapwenga vaka-kunangula vamwenemwene. (Chimo. 2, 3:17) Yesu ali nakuzachisa chikungulwilo chavaka-Kulishitu chinangule vaka-kumukavangiza vambulule kanawa mujimbu. Jila yimwe eji kuvanangwilangamo shina kuhichila muShikola yaMulimo waTeokalasi yize yeji kupwanga muvikungulwilo vyakuhambakana 111,000 mukaye kosena. Eyi shikola yili nakunangula vaka-kwambulula mujimbu wamwaza vakuhambakana  ha 7 miliyoni mangana vatachikize mwakukafwila “vatu vakulisezaseza vosena.”—Tangenu Wavaka-Kolinde 1, 9:20-23.

¹⁰ Kuli nawa mashikola aMbimbiliya akwavo aze ali nakunangula vakulwane muvikungulwilo, vapayiniya, vandumbwetu vavajike vamalunga, navaka-Kulishitu vakulimbata, vandumbwetu vamuKomiti yaMutango namapwevo javo, tulama vakutambwojoka namapwevo javo, navamishonali. * Vandumbwetu vamwe vaze vapwile muShikola Yakulinangula Mbimbiliya yaVaka-Kulishitu Valimbata yakulivanga vahanjikile nakusakwilila ngwavo: “Vyuma tunalinangula vinatulingisa tuzange chikuma Yehova nakutuzamisa tukafwe vakwetu.”

11. Uno vaka-kuvilika Wangana vanahasenga ngachilihi kwambulula mujimbu numba tuhu vanavafumbukilanga kuli Satana?

¹¹ Muka-kole yetu Satana ali nakumona vyuma vyosenevi tuli nakukilikita hakwambulula mujimbu wamwaza wakunangula vatu. Ngachize nahase kuzachisa kala jila mangana atangule mujimbu wetu navaze veji kuwambululanga. Oloze mwahona, mwomwo Yehova nahake Mwanenyi havihela “vyakuhambakana chikuma jifulumende josena, namawata osena, nangolo josena, nautwamina wosena.” (Efwe. 1:20-22) Hakupwa mwangana, Yesu mwazachisanga ngolo jenyi hakukinga nakutwaminyina tumbaji twenyi mangana mwaya muchima waIse vakalingemo. * Mujimbu wamwaza vali nakutwalaho lika kuwambulula, kaha mayevuyevu avatu vakulyononona vali nakuvanangula mangana valemese Yehova. Chapwa hikutokwa chikuma kwazana mumulimo kanou waulemu.

12. Vatu jaKalunga vanavalongesanga ngachilihi kufuma vene mu 1914?

¹² Kufuma vene haze Yesu aputukile kuyula mu 1914, nalongesanga vangamba jaKalunga mangana valinge mwaya muchima waIse. (Tangenu Isaya 60:17.) Mu 1919, vatongwele muka-kutwaminyina mulimo wamuwande muchikungulwilo hichikungulwilo mangana atetekele mulimo wamuwande. Kaha kuheta mu 1927 vikungulwilo vyaputukile kuyanga mumulimo wamuwande haSondo hiSondo. Mu 1931 omu valilukile lijina lyamuVisoneka lyaVinjiho jaYehova, ava vaka-kukundwiza Wangana vafwililile jino kuzata chikuma mulimo wamuwande. (Isa. 43:10-12) Kaha kuheta mu 1938 vaze vapwile nakutwaminyina muvikungulwilo kavavasakwilenga hakuvwotako, oloze vavatongwelenga hakutesamo jishimbi jamuMbimbiliya. Kuheta mu 1972, lizavu lyavakulwane likiko jino lyatalilenga hachikungulwilo chosena. Vosena vaze vatelemo kupwa vakulwane navaka-kuzachila muliuka vavakolezezele  ‘vafungenga utanga waKalunga uze vavahana kulama.’ (Petu. 1, 5:2) Mu 1976 lizavu lyakutwaminyina lyatungile jikomiti 6 jitwaminyine mulimo waWangana mukaye kosena. Kufuma halwola kana, Yesu natwalengaho lika kulongesa vaka-kumukavangiza mangana valinge mwaya kujina chaKalunga.

13. Uno vyuma unalingi Wangana hamyaka 100 vinakwate ngachilihi hachiyoyelo chenu?

¹³ Achitalenu havyuma nalingi Mwangana wauMeshiya hamyaka 100 nayulunga. Natomesa vatu vaze vemanyinako lijina lyaYehova. Natwaminyinanga mulimo wakwambulula mumafuchi 239, kaha nanangula vatu vavavulu valemese Yehova. Nanungu vaka-kumukavangiza vakuhambakana ha 7 miliyoni vaze vanakulisuula kulinga mwaya muchima waIse. (Samu 110:3) Chikupu vene nazachisa Wangana wauMeshiya ulinge vyuma vyakukomwesa. Kaha nawa kulutwe naukalinga vyuma vyamwaza.

14. (a) Vyuma muka tweji kulwezanga Kalunga hakulomba ngwetu: “Wangana wove wizenga”? (b) Chisoneka chamwaka wa 2014 chika, kaha mwomwo ika chinapwila chakutamo kusakula chisoneka kana?

¹⁴ Numba tuhu Yehova aswanyishile Mwanenyi Yesu Kulishitu kupwa Mwangana wauMeshiya mu 1914, oloze echi kachakumbulwile kanawa kulomba chetu chakwamba ngwavo “Wangana wove wizenga[ko].” (Mateu 6:10) Mbimbiliya yahanjikile chimweza ngwayo Yesu mwakapwanga ‘mwangana muli vaka-kole jenyi.’ (Samu 110:2) jifulumende javatu jize vali nakuzachisa kuli Satana jichili lika nakwimanyina Wangana nakole. Omu natulomba ngwetu Wangana waKalunga wizenga, tuli nakulweza Kalunga ngwetu Mwangana wauMeshiya navaze mwakayula navo mwilu vatela kufumisako viyulo vyavatu navaze vali nakwimanyina Wangana wenyi nakole. Nge chuma kanechi chinasoloka, kaha upolofweto waNdanyele 2:44 naukatesamo uze wamba ngwawo, Wangana waKalunga “naukachikachika mawanganosenawa nakuwakumisa.” Naukanongesa jifulumende jize jemanyina nakole Wangana waKalunga. (Kuso. 6:1, 2; 13:1-18; 19:11-21) Kalinwomu vyuma kanevi visoloke. Ngocho chinapu chakutamo kusakula mukanda waMateu 6:10 kupwa chisoneka chamwaka cha 2014. Mukanda kana wamba ngwawo: “Wangana wove wizenga.”

15, 16. (a) Vyuma muka navikasoloka muChiyulo chaMyaka Likombakaji? (b) Chuma muka chamakumishilo mwakalinga Mwangana wauMeshiya, kaha vyuma muka navikasoloka kuvyuma ajina Kalunga?

¹⁵ Omu Mwangana wauMeshiya mwakanongesa vaka-kole jaKalunga, mwakambila Satana navandemone jenyi muwina wakuzeneka kukuma hamyaka likombakaji. (Kuso. 20:1-3) Hamyaka kaneyi, Wangana naukakafwa vatu vakanganyale kundando yakusokola yaYesu nakufumisako ukalu wosena uze weza mwomwo yashili yaAlama. Mwangana mwakasangula jimiliyoni javatu vaze vali muvimbumbe nakulongesa mulimo wakuvanangula vyaYehova mukaye kosena. (Kuso. 20:12, 13) Kaye kosena nakakapwa palachise ngana muze chapwile mumilemba yaEtene. Kaha vatu vakushishika vosena navakapwa vakukupuka mwosena.

¹⁶ Kusongo yaChiyulo chaKulishitu chaMyaka Likombakaji, Wangana wauMeshiya naukatesamo vyuma ajina Yehova kutalisa kumavu. Kufumaho Yesu mwakahana Wangana kuli Ise. (Tangenu Wavaka-Kolinde 1, 15:24-28.) Kakweshi kukapwa cheka mutu wakutwimanyina kuli Yehovako. Vana vaKalunga vosena vamwilu navahamavu navakapwa vakulinunga naSevo wamwilu nakupwa tanga yimwe.

17. Vyuma muka muli nakufwila kulinga kutalisa kuWangana?

¹⁷ Vyuma vyamwaza vinasoloka mumyaka 100 muchiyulo chaWangana vyasolola nge Yehova achili lika nakuyula kaha nawa mwakatesamo vyuma ajina kutalisa kumavu. Ngachize, tutwalenuho lika kwononoka kuli ikiye hakuvilika Mwangana naWangana wenyi. Twafwelela chikupu ngwetu Yehova kalinwomu akumbulule kulomba chetu chakwamba ngwavo: “Wangana wove wizenga.”