Zachilenu Yehova Shimbu Kanda Makumbi Amapi Ezenga
“Anukanga . . . Ou nakutenge.”—KWAMBU. 12:1.
1, 2. (a) Uno Solomone vamuhwiminyine asoneke ika kuli vakweze? (b) Mwomwo ika vaka-Kulishitu vamyaka 50 nakutwala kwilu vatela kukavangijila mazu aSolomone?
YEHOVA ahwiminyine Mwangana Solomone alweze vakweze ngwenyi: “Anukanga . . . Ou nakutenge hamakumbi aukweze wove, shimbu achili makumbi amapi kandeze.” Uno Solomone atalishile mulihi hakuvuluka “makumbi amapi”? Atalisa kuushinakaji. Solomone avulukile ukalu veji kumonanga tushinakaji wakufwana nge kuchikima mavoko, kuzeya mahinji, kupukuka mazo, kufwa meso, kujika matwitwi, kusoka jivwi nakuhokoka nyima. Echi chikiko chalingishile Solomone atulweze kwanukanga Tengi yetu muukweze.—Tangenu Muka-kwambulula 12:1-5.
2 Vaka-Kulishitu vavavulu vaze vali namyaka 50 nakuhambakanyisaho vachili nangolo javo. Vanahase kupwa najivwi, oloze veka kaveshi nakumona ukalu uze avulukile Solomoneko. Kutala ava vaka-Kulishitu vanashinakaja navakivo vanahase kuzachisa mazu aze asonekele Solomone kuli vakweze akwamba ngwenyi: “Anukanga . . . Ou nakutenge” tahi? Uno mazu kana alumbununa ika?
3. Kwanukanga Tengi yetu chalumbununa ika?
3 Pamo munazachilanga Yehova hamyaka yayivulu, oloze lwola lumwe mwatela kushinganyeka haunene waTengi yetu. Atuhana wana wamwaza wakuyoya. Vyuma atenga vyapwa vyakukomwesa, ngocho katweshi kuhasa kutachikiza omwo avitengeleko. Vyuma vyakulisezaseza atenga vyeji kutulingisanga tulivwisenga kuwaha kuyoya mujijila jakulisezaseza. Omu natushinganyeka havyuma atenga Yehova, tweji kwanukanga ngwetu apwa wazangi, namangana nangolo. (Samu 143:5) Kwanukanga Tengi yetu chalumbununa nawa kwanuka vyuma vize asaka tulinge. Kushinganyeka havyuma vyosenevi, cheji kutulingisanga tumusakwilile nakufwila kumuzachila nangolo jetu josena.—Kwambu. 12:13.
MILIMO MUNAHASE KUZATA MUUSHINAKAJI
4. Vihula muka vatela kulihulisa vaka-Kulishitu vaze vanashimbula, kaha mwomwo ika?
4 Nge munatwame myaka yayivulu kaha lihulisenu ngwenyi: ‘Vyuma muka ngwatela kulinga oholyapwa shimbu nguchili nangolo?’ Hakupwa muvaka-Kulishitu munashimbula mumuchano, mukwechi milimo yayivulu kuhambakana vakwenu. Munahase kunangula vakweze vyuma munalinangula kuli Yehova. Munahase kukolezeza vakwenu hakuvalweza vyuma munalivwisanga kuwaha hakuzachila Kalunga. Mwangana Ndavichi alombele kuli Yehova amukafwe, ambile ngwenyi: “Ove Kalunga, unangunangula kufuma kuunyike wami . . . Nomu ngunakulu lyehi nakupwa najivwi, Ove Kalunga, kanda ungusezako, Palanga nomu ngunalweze livoko lyove kuli vaka-chisemunwinocho nachizaho, Naundume wove nawa kuli vosenovo navakeza.”—Samu 71:17, 18.
5. Uno vaka-Kulishitu vatushinakaji vanahase kulweza ngachilihi vakwavo vyuma vanalinangula?
5 Jijila muka munahase kulwezelamo vakwenu chinyingi chize munalinangula hamyaka yayivulu? Kutala munahase kusanyika vakweze vezenga hembo lyenu mangana muvakolezeze tahi? Kutala munahase kulivwasana navo mangana mukazate navo mumulimo wamuwande nakuvalweza vyuma vyamwaza munawane hakuzachila Yehova tahi? Elihu ambile ngwenyi: “Vakwechi makumbi amavulu vahanjike, Ava vali namyaka yayivulu vajimbule mangana.” (Yopa 32:7) Kaposetolo Paulu alwezele vaka-Kulishitu vamapwevo vakolezeze vakwavo nakuvahana chakutalilaho chamwaza. Asonekele ngwenyi: “Vakulwane vamapwevo . . . vapwenga vaka-kunangula vyuma vyamwaza.”—Chitu. 2:3.
VYUMA MWATELA KULINGA MANGANA MUKAFWE VAKWENU
6. Mwomwo ika vaka-Kulishitu vanatwame myaka yayivulu vapwila vavalemu?
6 Nge mwapwa muvaka-Kulishitu vatushinakaji, kaha kuli vyuma vyavivulu munahase kulinga mangana mukafwe vakwenu. Achishinganyekenu havyuma munatachikiza oholili vize kamwatachikijile hamyaka 30 chipwe 40 yinahichi kunyima. Munatachikiza mwakuzachishila jindongi jamuMbimbiliya mukuyoya chenu. Muli nauhashi wakuheta vatu kumichima hakuvambulila muchano wamuMbimbiliya. Nge mwapwa muvakulwane muchikungulwilo, kaha munatachikiza mwakukafwila vandumbwetu vaze kavasakwile kanawa vyakulingako. (Ngale. 6:1) Pamo mwalinangula mwakulongesela kanawa milimo yahachikungulwilo, nahakukunguluka chachihanda, namwakutungila jiZuvo jaWangana. Pamo mwatachikiza mwakukolezezela vandotolo mangana vokenga vaveji chakuzeneka kuvahaka manyinga. Numba tuhu enu vamwe vanamimbapachisa kalinwomu, oloze munamono vyavivulu mukuyoya. Chakutalilaho, nge mukwechi vana, kaha munalinangula chinyingi chachivulu. Vaka-Kulishitu vatushinakaji vanahase kukafwa vatu jaYehova hakuvanangula, nakuvatwaminyina, nakuvakolezeza.—Tangenu Yopa 12:12.
7. Uno vaka-Kulishitu vatushinakaji vanahase kunangula ngachilihi vakweze?
7 Mujijila muka jikwavo munahase kuzachisa uhashi wenu hakukafwa vakwenu? Pamo munahase kusolwela vakweze mwakuputukila nakutwaminyina vilongesa vyaMbimbiliya. Nge wapwa undumbwetu wapwevo, kaha unahase kukafwa vasanda jamapwevo vatachikize mwakuzakamina vana vavo vavandende nakuzata milimo yakushipilitu. Nge wapwa undumbwetu walunga, kaha unahase kukafwa vakweze vahanjikenga vihande natwima nakupwa nauhashi wakwambulula mujimbu wamwaza. Unahase kuya hamwe navakweze vakamone omu mweji kukolezezanga vandumbwetu vatushinakaji. Numba tuhu kamweshi nangolo jize mwapwilenga najo hakavangako, oloze munahase lika kuwana jijila jakukafwilamo vakweze. Mbimbiliya yamba ngwayo: “Upahu wavakweze jikiko ngolo javo, kaha luvaji lwavakulwane hijivwi.”—Vishi. 20:29.
KUZACHILA KUZE KULI NAKUSAKIWA KUKAFWA
8. Vyuma muka alingile Paulu omu apwile kashinakaji?
8 Kaposetolo Paulu azachilenga natwima mumilimo yaKalunga palanga namuushinakaji. Mu 61 C.E., halwola luze vamufumishile mukamenga muLoma, Paulu te hanazate lyehi natwima nakumika muvyeseko vyavivulu mumulimo waumishonali. Nge asakile, kachi atwamine kaha muLoma nakwambulwilamo. (Koli. 2, 11:23-27) Vandumbwetu muLoma kachi vevwile kuwaha kutwama hamwe naPaulu nakuvakolezeza. Oloze Paulu amwene ngwenyi atelele kuya namumafuchi eka muze mwapwile nakusakiwa vaka-kwambulula. Ngachize, aputukile cheka mulimo wenyi waumishonali nakuya hamwe naChimoteu naChituse kuEfwesu, nakuKelete pamo nakuMasetonya. (Chimo. 1, 1:3; Chitu. 1:5) Katwatachikizako nge ayile nakuSepanya oloze ajinyine kuyako.—Loma 15:24, 28.
9. Lwola muka Petulu ayile nakuzachila kuze kwapwile nakusakiwa kukafwa? (Talenu muvwimbimbi wakulivanga.)
9 Kaposetolo Petulu pamo apwile namyaka yakuhambakana 50 omu ayile kuze kwapwile nakusakiwa kukafwa. Mwomwo ika tunahanjikila ngocho? Nge apwile namyaka yoyimwe naYesu chipwe nge yikiye akoleleko chindende, kahanyi apwile namyaka 50 mumwaka wa 49 C.E., omu ayile nakuliwana navakwavo vaposetolo muYelusalema. (Vili. 15:7) Kufumaho, Petulu ayile nakutwama muMbavilone nakwambulwila vaYuleya vavavulu vaze vatwamine munganda kana. (Ngale. 2:9) Apwile nakutwama munganda kana halwola asonekele mukanda WaPetulu wamuchivali mu 62 C.E. (Petu. 1, 5:13) Numba tuhu kuya nakuzachila kuze kwapwile nakusakiwa kukafwa chapwile chachikalu, oloze Petulu kashinganyekele ngwenyi nakolo kaha keshi kuhasa kulivwisa kuwaha kuzachila Yehovako.
10, 11. Vulukenu chakutalilaho chandumbwetu wakashinakaji uze ayile nakuzachila kuze kwapwile nakusakiwa vaka-kuzata.
10 Makumbi ano, vaka-Kulishitu vavavulu vaze vali namyaka 50 nakuhambakanyisaho vanamono ngwavo vyuma vimwe vinalumuka mukuyoya chavo kaha vanahase kuzachila Yehova mujijila jajihya. Vamwe vanayi nakuzachila kuze kunakusakiwa kukafwa. Omu mukiko alingile Robert napuwenyi. Vapwile namyaka kafwe 55, omu vamwene ngwavo vali najijila jeka jajihya jakuzachilamo Yehova. Mwanavo walunga te nakolo lyehi kaha hanalimanyina lyehi kaha nawa kavapwile namulimo wakuzakama visemi javoko mwomwo vafwile. Vavaselelele uswana waundende kuli visemi javo kaha nawa vashinganyekele kulanjisa zuvo yavo mangana vafwetemo mikuli vapwile nayo nakusezako jimbongo jimwe jakulikafwa najo swi nomu Robert atambwile peshoni. Vevwile ngwavo mulifuchi lyaBolivia vatu vavavulu vapwile nakwitavila kuvanangula Mbimbiliya, kaha nawa chiyoyelo mulifuchi kana chapwile chachashi. Ngachize vayile. Robert ambile ngwenyi: “Chapwile chachikalu kwijilila chiyoyelo chakuze. Vyuma vyosena vyapwile vyavikalu kavyalyesekele nomu twapwile nakuyoyela muNorth Americako. Oloze vatukiswile hakukilikita chetu.”
11 Robert ambile cheka ngwenyi: “Hakumbi hakumbi tweji kuzatanga milimo yakupandama kuchikungulwilo. Vatu vamwe vaze twanangwile Mbimbiliya vavambapachishile. Tanga yimwe twapwile nakunangula yapwile yakuhutwa yize yapwile mungalila yakwakusuku. Oloze chalumingo hichalumingo vatambukilenga tunda yayisuku nakuya kumbaka nakukunguluka. Ocho kuwaha kana twevwile hakumona tanga kaneyi yili nakuzovoloka kushipilitu kaha nawa mwanavo wakukola aputukile kuzata upayiniya!”
KUZACHILA MUNGALILA YAZACHISA LILIMI LYEKA
12, 13. Hanenu chakutalilaho chandumbwetu wakashinakaji uze aputukile kuzachila Yehova mujila yeka hanyima yakutambula litayamende.
12 Vikungulwilo vyazachisa malimi eka vinahase kunganyala chikuma havyakutalilaho vyavandumbwetu vatushinakaji. Kaha nawa jingalila kana jinahase kupwa jamwaza kwambulilamo. Chakutalilaho, Brian wakuBritain asonekele ngwenyi atambwile litayamende te ali namyaka 65. Ngachize, ikiye napuwenyi vashinganyekele ngwavo chiyoyelo chavo nachivanehela uli. Ambile ngwenyi: “Vana vetu vakolele nakufuma hembo, kaha muwande katwawanyinenga chikuma vatu vakuwahilila vakunangula Mbimbiliyako. Likumbi limwe ngwawanyine mukweze umwe ahanjikilenga lilimi lyaChinese uze apwile hayunivesiti. Etavilile kwiza kukukunguluka, kaha ngwaputukile kumunangula Mbimbiliya. Omu mwahichile vyalumingo vyavindende, aputukile kwiza nasepa lyenyi ahanjika lilimi lyaChinese. Kahomu mwahichila vyalumingo vivali ejile nasepa lyenyi wamuchitatu nawamuchiwana.
13 “Kahomu mutu wamuchitanu uze ahanjikile lilimi lyaChinese ejile nakungulomba ngumunangulenga Mbimbiliya, ngwashinganyekele ngwami, ‘Kupwa namyaka 65 kachatela kunguhonesa kuzachila Yehovako.’ Ngocho ngwahulishile puwami uze apwa kanyike kuli ami namyaka yivali nge ali nakusaka kulinangula lilimi lyaChinese. Twaputukile kulinangula lilimi kana hakwivwilila kumazu akukopa. Munahichi jino myaka likumi. Kwambulila mungalila yazachisa lilimi lyeka chatulingishile tulivwe nge tuchili lika tuvanyike. Oholyapwa ngana tunanangula Mbimbiliya vatu 112 vazachisa lilimi lyaChinese. Kaha vavavulu veji kupwanga kukukunguluka. Umwe eji kuzatanga nayetu hamwe mumulimo waupayiniya.”
Munahase kuzata milimo yayivulu nge kamwashinakajiwile chikumako (Talenu palangalafu 12, na 13)
LIVWISENU KUWAHA MILIMO MUNAHASE KUZATA
14. Vyuma muka vize vaka-Kulishitu vatushinakaji kavatela kuvulyamako, kaha chakutalilaho chaPaulu nachivakolezeza ngachilihi?
14 Echi kachalumbununa nge vaka-Kulishitu vosena vaze vali namyaka yakuheta 50 vanahase kuzachila Yehova mujijila jekako. Vandumbwetu vamwe vaviza, kaha veka veji kuzakama vana vavo chipwe kuzakama visemi javo vatushinakaji. Oloze anukenu ngwenu Yehova amona milimo veji kumuzachilanga vangamba jenyi vosena kupwa yayilemu. Muchishishisa chakwivwa kupihya hakuhona kuzata milimo yimwe, oloze livwisenu kuwaha kuzata kala milimo munahase. Tuchitalenu hachakutalilaho chakaposetolo Paulu. Apwile mukamenga hamyaka yayivulu, ngocho kahashile kuya maungeji enyi aumishonaliko. Chipwe ngocho, ambulwililenga vatu vaze vamutambukilile hakuvalweza Visoneka nakuvajikijisa vatwalilileho lika kuzachila Kalunga mukashishi.—Vili. 28:16, 30, 31.
15. Mwomwo ika vaka-Kulishitu vatushinakaji vapwila vavalemu?
15 Yehova amona nawa milimo veji kumuzachilanga tushinakaji kupwa yayilemu. Numba tuhu Solomone ambile ngwenyi makumbi amapi amisongo kawapwa amwaza mukuyoyako, oloze Yehova eji kumonanga milimo veji kuzatanga vaka-Kulishitu vatushinakaji hakumulemesa kupwa yayilemu. (Luka 21:2-4) Vikungulwilo vyeji kulinangulanga kuchakutalilaho chamwaza chavandumbwetu vatushinakaji hakupwa vakushishika nakumika.
16. Milimo muka yize Ana ahonene kuzata, oloze milimo muka yize azachilenga hakulemesa Kalunga?
16 MuMbimbiliya mwatwama mujimbu wakashinakaji Ana uze apwilenga nakuzachila Yehova nakashishi. Ou tuliwe, apwile namyaka 84 omu Yesu asemukile. Mwomwo yaushinakaji kahashile kuzachila Yehova ngana muze valingile vakwavoko. Pamo kahashile kupwa kambaji kaYesu, chipwe kumuwavisa nashipilitu yajila, chipwe kuya nakwambulula mujimbu wamwaza waWanganako. Oloze Ana alivwishile kuwaha kuzachila Yehova mujijila jeka. Chakutalilaho, hakumbi hakumbi chimene nachingoloshi, ayilenga kuchipango chatembele nakulomba muuholela haminyutu kafwe 30 omu kapilishitu apwile nakulumba vize vyalivumba lyamwaza. Mbimbiliya yamba ngwayo: “Ejilenga shimbu yosena kutembele nakuzatanga mulimo wajila naufuku namusana.” (Luka 2:36, 37) Omu amwene Yesu te achili kemba, aputukile “kuhanjika vyayauze mwana kuli vosena vaze vapwile nakuvandamina kusokoka chaYelusalema.”—Luka 2:38.
17. Tunahase kukafwa ngachilihi tushinakaji navandumbwetu vaze vaviza mangana vazane mukulemesa chamuchano?
17 Makumbi ano, twatela kuwana jijila jakukafwilamo vandumbwetu vatushinakaji chipwe vaze vaviza. Vandumbwetu vatushinakaji vamwe vasaka kupwa kukukunguluka chachikungulwilo chipwe chachinene, oloze kaveshi nangolo jakulinga ngochoko. Uno vikungulwilo vinahase kuvakafwa ngachilihi? Kujingalila jimwe, vandumbwetu veji kuwahisa kanawa vyuma mangana ava vandumbwetu vatushinakaji vevwilile kukukunguluka chosena hashinga. Kujingalila jeka jila kana kayeshi kuzatako. Numba tuhu ava tushinakaji kaveshi kuhasa kuya nakukungulukako, oloze vanahase kukundwiza kulemesa chamuchano. Chakutalilaho, vanahase kulomba mangana chikungulwilo chizovoloke.—Tangenu Samu 92:13, 14.
18, 19. (a) Vaka-Kulishitu vatushinakaji vanahase kukolezeza ngachilihi vandumbwavo? (b) Veya vatela kukavangiza mazu akwamba ngwavo: “Anukanga . . . Ou nakutenge”?
18 Vaka-Kulishitu vatushinakaji kaveshi kuhasa kutachikiza mujila veji kukolezezelangamo vakwavoko. Achishinganyekenu chakutalilaho chaAna uze ayilenga nakuzachila kutembele nakashishi hamyaka yayivulu. Pamo katachikijile ngwenyi chakutalilaho chenyi nakuzanga chenyi Yehova navakachisoneka muMbimbiliya nakutukolezeza nayetu makumbi anoko. Nayenu nawa kuzanga chenu Kalunga kaveshi kukachivulyama kuli vandumbwetuko. Echi chikiko chalingisa Mazu aKalunga avuluke ngwawo: “Jivwi jinapu muchama waupahu, Navajiwana mujila yakwoloka.”—Vishi. 16:31.
19 Tuvosena tweji kuzachilanga Yehova kweseka noho hakumina ngolo jetu. Oloze omu muchili nangolo, fwilenu ‘kwanukanga Ou namitenge shimbu kanda makumbi amapi ezenga.’—Kwambu. 12:1.