PUTU vene kuwinyike wenyi, Pascal apwile nakushinganyeka kupwa nachiyoyelo chamwaza omu apwile mulifuchi lyaCôte d’Ivoire. Apwile nakulinangula kuhema chakwasa jikonyi kaha alihulishilenga ngwenyi, ‘Kulihi ngwatela kuya mangana vakangukafwe ngufumane nakupwa naluheto lwaluvulu?’ Omu apwile namyaka yakusemuka 25, amwene ngwenyi atela kuya kuEurope. Oloze kapwile navitupa vyakwingila navyo mulifuchi kanako, ngocho ashinganyekele kuya nakwingila muwiji.

Mu 1998, omu apwile namyaka yakusemuka 27, Pascal aputukile kuya ungeji wenyi. Azombokele museto nakwingila muGhana, nakupulasana muTogo nakwingila muBenin, kaha kufumaho hikwingila mumbaka yaBirni Nkonni muNiger. Kufumaho jino ungeji wenyi waputukile kukaluhwa. Hakusaka kuya kunote, atelele kusukama kuchimbayambaya chakuzeneka venyayo kutachikiza nakupulasana Likundu lyaSahara. Kaha hakuheta kukalungalwiji waMendetelenya ashinganyekele kukwela mbopolo nakuya kuEurope. Omu mukiko ajinyine kulinga, oloze kwapwile vyuma vivali vize vyamuhonesele.

Chatete, jimbongo jamukumine, kaha chamuchivali awanyine Noé, uze aputukile kumunangula Mbimbiliya. Vyuma alinangwile vyamukwachile chikuma kumuchima, kaha vyamulingishile alumune vyuma ashinganyekele kulinga mukuyoya chenyi. Alumwine muchima wakufwila luheto nakufwila jino vyuma vyakushipilitu. Kaha Pascal vamumbapachishile muDecember 1999. Hakusaka asolole muchima wakusakwilila Yehova, aputukile kuzata upayiniya mu 2001 muNiger, mumbaka yize alinangwilile muchano. Uno eji kwivwanga ngachilihi hamulimo kanou? Ambile ngwenyi, “Nguli nakulivwisa chikuma kuwaha mukuyoya chami!”

Ngana mwaPascal, vatu vavavulu vanachiwane nge kupwa vakusuuluka mukuyoya chapendamina hakuhaka vyuma vyakushipilitu kulutwe. Hakusaka kutesamo vyuma kanevi, vatu vamwe vanafumu muEurope nakwiza muAfrica nakuzachila kuvihela kuze kunakusakiwa vaka-kwambulula Wangana. Vinjiho vakuheta ku 65 vakufuma kuEurope vamyaka yakusemuka yamukachi ka 17 na 70 vayile nakuzachila kuze kwapwile nakusakiwa vaka-kwambulula mumafuchi akuWest Africa akufwana nge Benin, Burkina Faso, Niger naTogo. * Vyuma muka vyavalingishile numba vayenga nakuzachila kumafuchi kana, kaha vyuma muka vyafuminemo?

Anne-Rakel wakuDenmark ambile ngwenyi: “Visemi jami vazachile mwavamishonali mulifuchi lyaSenegal. Lwola lwosena vahanjikilenga natwima vyakuyoya chaumishonali, kaha echi changulingishile nayami nawa nguputuke kuzata mulimo kana.” Kafwe myaka 15 yinahichimo omu Anne-Rakel apwile namyaka yakusemuka 20, ayile kuTogo kuze eji kuzachilanga muchikungulwilo chavaze vazachisa lilimi lyatuveve. Uno kuya chenyi nakuzachila kuze chakolezeza ngachilihi vakwavo? Ambile ngwenyi: “Kutwala muze, songo yami walunga nawapwevo vangukavangijile kuTogo.”

 Aurele, lunga ambata wamyaka yakusemuka 70 wakuFrance, ahanjikile ngwenyi: “Myaka yitanu yize yinahichi kunyima te ngunafumu lyehi hamilimo, ngwatelele kusakula vyakulinga. Chuma chimwe ngwatelele kusakula shina kutwama kanawa muFrance nakuvandamina Palachise yizenga, kaha chikwavo shina kulingako vyuma vimwe mangana ngutohwese mulimo wakwambulula.” Aurele asakwileho kuzata mulimo wakwambulula. Kafwe myaka yitatu kunyima, ikiye napuwenyi Albert-Fayette, vayile kuBenin. Aurele ambile ngwenyi, “Kulihana kwiza nakuzachila kuno chapwile chuma chamwaza twalingile.” Kaha nawa ahanjikile oku ali nakuseha ngwenyi, “Ngwalikomokelele hakuwana nge ngalila yimwe yize yatwama kungenge yakalungalwiji kuze tweji kwambulwilanga yeji kungwanukisanga Palachise.”

Clodomir napuwenyi Lysiane, vafumine kuFrance nakuya kuBenin myaka 16 kunyima. Hakavanga, vashinganyekelenga chikuma tanga yavo namasepa javo muFrance, kaha vashinganyekele ngwavo kaveshi kuhasa kwijilila chiyoyelo chavo chachihyako. Oloze kakwapwile vyuma vyakuvalingisa valizakamineko. Valivwishile kuwaha chikuma. Ngocho, Clodomir ahanjikile ngwenyi: “Hamyaka 16, tunapunga nakutokwa chakukafwa mutu umwe alinangule muchano hamwaka hamwaka.”

Sébastien napuwenyi Johanna, vakuFrance, vayile kuBenin mu 2010. Sébastien ambile ngwenyi: “Muchikungulwilo muli milimo yayivulu yakuzata. Kuzachila kuno chinafwane nge tuli mushikola yateokalasi!” Uno vatu muwande veji kwakulanga ngachilihi kumujimbu? Johanna ngwenyi: “Vatu vafwila kulinangula muchano. Numba nge tuli nakulihichila mumukwakwa katweshi nakwambululako, vatu veji kutwimikanga nakutuhulisa vihula vyamuMbimbiliya nakutulomba mikanda.” Uno kuzachila kuze chinavakafwe ngachilihi muulo wavo? Sébastien ambile ngwenyi: “Echi chinajikijisa ulo wetu. Ngweji kwivwanga kuwaha kuzachila hamwe muwande napuwami likumbi lyosena.”

Eric napuwenyi Katy, veji kuzatanga upayiniya kunote yaBenin kuze kwatwama vatu vavandende. Myaka kafwe 10 kunyima omu vapwile nakutwama muFrance, vaputukile kutanga vihande vize vyahanjika hakuya nakuzachila kuze kuli nakusakiwa kukafwa, nakuhanjika navandumbwetu vaze vatwama mumulimo washimbu yosena. Echi chavalingishile vapwenga napwipwi yakuya nakuzachila kuze kwapwile nakusakiwa vaka-kwambulula, kaha kuheta mu 2005, vayile. Vevwile kuwaha hakumona omu vatu vapwile nakuzovoloka. Eric ahanjikile ngwenyi: “Myaka yivali kunyima, lizavu lyetu lyamumbaka yaTanguiéta lyapwile kaha navaka-kwambulula 9, oloze oholyapwa lili jino navaka-kwambulula vakuheta ku 30. LyaSondo, kukukunguluka kweji kupwanga vatu vakuheta ku 50 na 80. Tweji kwivwanga kuwaha chikuma hakumona omu vatu vali nakuvulilako.”

Ukalu muka vanamononga vaze veji kuyanga kuze kuli nakusakiwa vaka-kwambulula? Benjamin, wamyaka yakusemuka  33, apwa songo yaAnne-Rakel. Mu 2000 muDenmark, aliwanyine nakamishonali uze azachilile muTogo. Benjamin ambile ngwenyi: “Omu ngwalwezele ou kamishonali ngwami ngwasakile kuzata upayiniya, ahanjikile ngwenyi: ‘Unejiva, unahase kuzachila upayiniya muTogo.’” Benjamin ashinganyekele hamujimbu kana. Ambile ngwenyi: “Halwola kana kangwapwile namyaka yakusemuka 20 koko, oloze te vayayami vavali vamapwevo vali lyehi nakuzachila kuTogo. Echi chalingishile mangana chingwashiwile kuya kuze.” Ngocho ayile. Oloze kwapwile ukalu umwe. Benjamin ahanjikile ngwenyi: “Kangwejivile kuhanjika numba lizu limwe lyaFrench koko. Tukweji 6 vakuputukilako vangukaluhwilile, mwomwo changukaluhwilile kuhanjika navatu.” Kutwala muze, ejivile kuhanjika lilimi kana. Oholyapwa jino Benjamin eji kuzachilanga haMbetele yaBenin, haze eji kuzatanga mulimo wakutwalanga mikanda nakukafwa kulipatimende lyajikopyuta.

Eric naKaty vaze twavulukanga hakavanga, vapwile nakuzachila mungalila muze vazachisa lilimi lyeka muFrance shimbu kanda vayenga kuBenin. Uno lifuchi afumine lyalihandununa ngachilihi namafuchi amuWest Africa? Katy ambile ngwenyi: “Kachapwile chachashi kuwana chihela chamwaza chakutwamako. Twatwaminenga muzuvo yakuzeneka kakahya kakezi nameya hatukweji vavavulu.” Eric nayikiye ambile ngwenyi: “Vatu vamundanda vembishilenga chikuma myaso helu swi namukachi kaufuku. Chasakiwile kuunda muchima navyuma vyakufwana ngana nakwijilila chiyoyelo kana.” Ava valunga napwevo vambile ngwavo: “Kuwaha cheji kufumanga hakuzachila mungalila muze kanda vachambulilengaho lyehi kacheshi kulyeseka naukalu watwamamoko.”

Michel napuwenyi Marie-Agnès, vakuFrance vamumyaka yaji 50, vayile kuBenin hamyaka 5 yinahichimo. Hakavanga valizakaminyine chikuma. Michel ambile ngwenyi vatu vamwe vashinganyekele ngwavo ungeji wavo wapwile waponde. Ambile nawa ngwenyi: “Unahase kwivwa woma nge kawejivile ngwove Yehova eji kutukafwako. Ngocho twayile nakuzachila Yehova, kaha atukafwile.”

Vatu vaze vazachilaho lyehi kuze kuli nakusakiwa vaka-kwambulula veji kukolezeza vakwavo valiwahise chimweza hakulinga vyuma vino: Kuliwahishila chimweza vyakulutwe. Kulinangula mwakuyoyela chiyoyelo chachihya. Kuhona kulanda vyuma vize kamwajinyine kulandako. Nakupendamina hali Yehova.—Luka 14:28-30.

Sébastien uze twavulukanga hakavanga ambile ngwenyi: “Shimbu kanda tuyenga ungeji wetu, ami napuwami Johanna hamyaka yivali katwenyekelenga jimbongo kuvyakuhemahema nakukulanda vyuma chamulanjilako.” Hakusaka vatwalilile kuzachila mulifuchi lyeka, ava vapayiniya veji kuzachilanga milimo yakukaye muEurope mwaka himwaka hatukweji vavandende, kaha echi cheji kuvalingisanga vawane jimbongo jakulikafwa najo mumwaka wosena wamuundu muBenin.

Marie-Thérèse apwa umwe havandumbwetu 20 vamapwevo vaze vafuma kumafuchi eka nakwiza nakuzachila kuze  kuli nakusakiwa vaka-kwambulula muWest Africa. Apwa nyamutekenya wasacha muFrance. Oloze kuheta mu 2006 atambwile makumbi mangana anoke mumwaka wosena wamuundu mangana ayenga nakuzata upayiniya muNiger. Omu ayile kuze, amwene ngwenyi mulimo kana ukiko asakile kuzata mukuyoya chenyi. Marie-Thérèse ambile ngwenyi: “Hakukinduluka kuFrance, ngwalwezele mukulwane wami wamilimo vishinganyeka vyami vyakwalumunako mwakuzachila mulimo wami, kaha etavilile kulinga ngocho. Oholyapwa ngweji kutambukisanga sacha kufuma muMay nakutwala muAugust kuFrance, kaha muSeptember nakutwala muApril, ngweji kuzatanga upayiniya muNiger.”

Vosena vaze veji “kutondanga chatete Wangana” vanahase kufwelela ngwavo Yehova mwavahana ‘navyuma vikwavo’ vize vyasakiwa mukuyoya. (Mateu 6:33) Chakutalilaho: Achishinganyekenu havyuma vyasolokele kuli Saphira, ndumbwetu wapwevo wamujike wakuFrance uze ali namyaka yamuji 20 uze nawa azata upayiniya muBenin. Mu 2011 akindulukile muFrance mangana awaneko jimbongo jakulikafwa najo muAfrica mangana akwanyise mwaka wamuchi 6. Saphira ambile ngwenyi: “Likumbi limwe lyaChitanu, lyapwile lyamakumishilo kuzata milimo, oloze ngwatelelele kuzata makumbi akwavo likumi numba nguwane jimbongo jakutamo jakulikafwa najo mumwaka wamuundu wakavangijileho. Kwasalile kaha vyalumingo vivali numba ngufume muFrance. Ngwalombele kuli Yehova nakumulweza ukalu wami. Nakushimbula chiku, ngwatambwile shinga kufuma kukambani yimwe nakungulweza nge vali nakusaka mutu wakuzata milimo muvyalumingo vivali.” Ngocho, lyaMande Saphira ayile hakambani kana mangana vakamunangule mwakuzachila milimo yamutu uze asakile kufumaho. Ambile ngwenyi: “Ngwalikomokelele chikuma hakuwana nge mutu ngwayile nakushisa apwile ndumbwetu wapwevo uze alombele makumbi likumi mangana ayenga kuShikola yaMulimo wauPayiniya! Mukulwane wenyi wamilimo akanyine kumuhana makumbi akunoka, oloze amulwezele ngwenyi mwamwitavisa ayenga nge kunasoloka mutu wakumushisa. Alembelele Yehova amukafwe ngana muze ngwalingile ami.”

Vandumbwetu vamwe vanazachilanga muWest Africa hamyaka yayivulu kaha mafuchi kana vanawamono jino nge himembo avo. Veka vanazachilangako hamyaka yayindende, kaha kufumaho hikukinduluka kumafuchi avo. Noholyapwa vatu kana vachili lika nakunganyala kumyaka yize vazachilile kumafuchi eka. Valinangwile nge mutu kupwa wakuwahilila mukuyoya chapendamina hakuzachila Yehova.