1, 2. (a) Chuma muka nachitulingisa tuvulyame vyuma tunamono? (b) Vyuma muka twatachikiza kupandama kuWangana waKalunga?

PAMO mwatachikiza omu vatu veji kuhonanga kwanuka vyuma vyosena vize vamwene. Namutu nawa nahase kuvulyama vyuma vimwe vize vamulwezele kuli ndotolo omu vamuwanyine namusongo. Kaha nawa vatu vamwe pamo vanahase kutondatonda jisapi chipwe vivanjilo vyavo okunyi vili hakamwihi. Vaka-kuhehwojola vamba ngwavo ukalu kanou wakuhona kumona vyuma vili hatoma chipwe wakuvulyajama wapwa hiupuputa, mwomwo muchima uli kuvyuma vyeka. Echi chasolola nge omu mukiko weji kuzatanga wongo wetu.

² Vatu vavavulu makumbi ano vapwa ‘tupuputa’ chikumanyi kuvyuma vili nakusoloka mukaye. Vanahase kwitavila ngwavo vyuma muno mukaye vinalumuka chikuma kufuma vene mu 1914, oloze kaveshi kumona omu vyalumbunukila vyuma kanako. Etu vaka-kulinangula Mbimbiliya twejiva ngwetu Wangana waKalunga wejile mujila yachifwanyisa mu 1914 omu Yesu vamuswanyishile kupwa Mwangana mwilu. Oloze twatachikiza ngwetu kuli vyuma vyavivulu vyasakiwa kulinga numba vakakumbulule kulomba chakwamba ngwavo, “Wangana wove wizenga. Mwaya muchima wove  mulingiwe mwilu, nahamavu nawa.” (Mateu 6:10) Echi kulomba navakachikumbulula kanawa omu navakanongesa kano kaye kakapi. Kuvanga vyuma kanevi vinalingiwa hano hamavu numbanyi mwaya muchima waKalunga vakalingemo hano hamavu nganomu veji kulingangamo mwilu.

3. Vyuma muka natutachikiza nge natulinangula Mazu aKalunga?

³ Kutanga Mazu aKalunga hakumbi hakumbi cheji kutukafwanga tumone ngwetu ou upolofweto uli nakutesamo makumbi ano. Oloze vatu vavavulu kavejiva nge upolofweto kana uli nakutesamoko. Vanandupukila mumilimo yavo yamukuyoya, ngocho kaveshi nakumona unjiho wakusolola nge Kulishitu napunga nakuyula kufuma vene mumwaka wa 1914 kaha nawa kalinwomu asopese vatuko. Chipwe ngocho, mutu himutu atela kulihulisa ngwenyi: ‘Kutala nguchili lika nakufwelela ngwami kano kaye kali hakamwihi nakunonga kaha nawa vyuma vili nakusoloka hano hamavu vili nakuhana unjiho nge kalinwomu kanonge tahi?’ Numba tuhu nge linwaha munapu muVinjiho, oloze vyuma muka mwafwila? Kala mweshomwo namukumbulwila, tutalenu havyuma vyavilemu vitatu vize vyatela kutulingisa tufwelele ngwetu Mwangana uze vawavisa kuli Kalunga kalinwomu alingeko vyuma vimwe mangana mwaya muchima waKalunga vakalingemo hano hamavu.

4, 5. (a) Vyuma muka napunga nakulinga Yesu kufuma vene mu 1914? (Talenu muvwimbimbi wakulivanga.) (b) Uno vaka-kutwama hatuvalu vatatu vemanyinako ika, kaha vyuma vili ngachilihi makumbi ano?

⁴ Mu 1914 Yesu Kulishitu vamuhanyine muchama mwilu kulumbununa nge apwile jino Mwangana waWangana waKalunga. Upolofweto watwama haKusoloka kapetulu 6 wasolola Yesu natwame hakavalu utoma. Hanyima yakumuswanyisa, Yesu aputukile kufungulula kaye kakapi kaSatana. (Tangenu Kusoloka 6:1, 2.) Ou upolofweto wasolola nge hanyima yakuzamisa Wangana waKalunga, vyuma mukaye navikapihya chikuma, vyakufwana nge jijita, zala yakalombolombo, misongo yachihita navyuma vyeka vize vyeji kunehanga kufwa. Ukalu kana wemanyinako vaka-kutwama hatuvalu vatatu vaze vali nakukavangiza Yesu Kulishitu.—Kuso. 6:3-8.

⁵ Ngana muze vapolofwetele, jijita jafumishile “kuunda hamavu.” Echi chasolokele numba tuhu mafuchi amavulu alivwasanyine ngwawo nawazachila hamwe nakuneha kuunda. Jita yaKaye yatete yikiko yapwile yakulivanga hajijita jajivulu jize jinafumisa kuunda hamavu. Numba tuhu kufuma mu 1914 chiyoyelo chavatu nachinyingi chavaka-sayasi chinazovolokanga, oloze ukalu wakuhona vyakulya najimbongo uchili nakutwalililaho lika mukaye kosena. Naumwe wauchi mwamba ngwenyi misongo, naukalu wakulijila, naukalu weka kavyeshi nakujiha vatu mwaka himwakako. Vyuma kanevi vili nakuneha ponde chikuma, kaha nawa vili nakusolokanga kuswa kumwe nakujiha vatu vavavulu kuhambakana omu chapwile kunyima. Uno mwatachikiza omu vyalumbunukila vyuma kanevi tahi?

6. Veya vatachikijile kutesamo chaupolofweto wamuMbimbiliya, kahechi chavalingisile valinge vyuma muka?

⁶ Vatu vavavulu valizakaminyine mwomwo yakuputuka chaJita yaKaye yatete, namusongo wafuluweza yakuSpain. Oloze vaka-Kulishitu vawavisa vatachikijile ngwavo Myaka yaVaka-mafuchi eka chipwe “lwola vatongola lwavaka-mafuchi” nalukakuma mu 1914. (Luka 21:24) Vawavisa kavejivile kanawa omu naukatesamo ou upolofweto wamuMbimbiliyako. Oloze vejivile ngwavo mumwaka wa 1914 Wangana waKalunga naukaputuka kuyula. Omu venjikijile ngwavo upolofweto kana unatesamo, vavilikile ngwavo Wangana waKalunga unaputuka kuyula. Vandumbwetu vavavulu vaze vapwile nakwambulula vyaWangana vavayanjishile chikuma. Echi kuyanjisa kana chateselemo upolofweto ukwavo wamuMbimbiliya. Hamyaka yayivulu, vaka-kole vaWangana  vayanjishile vaka-kuvilika Wangana hakulyongela mujishimbi, nakuvalemeka, nakuvambila mutumenga, nakuvajiha hakuvasukika, nakuvaloza nakuvateta mitwe mangana valitwamine kwambulula.—Samu 94:20; Kuso. 12:15.

7. Mwomwo ika vatu vavavulu kaveshi nakutachikiza ulumbunwiso wavyuma vili nakusoloka mukayeko?

⁷ Nge kuli unjiho uli nakusolola nge Wangana waKalunga waputukile kuyula mwilu, kaha vyuma muka vili nakulingisa vatu vahone kuchitachikiza? Mwomwo ika kaveshi nakumona ngwavo vyuma vili nakusoloka mukaye vili nakutesamo upolofweto wamuMbimbiliya ngana muze vatu jaKalunga vanavilikanga hamyaka yayivulu? Kutala chili nakusoloka nge vatu makumbi ano vali nakuhaka kaha mangana kuvyuma vize vali nakumona nameso tahi? (Koli. 2, 5:7) Kutala vali nakuhaka kaha mangana kumilimo yavo yamukuyoya yize yili nakuvalingisa vahone kumona vyuma ali nakulinga Kalunga tahi? (Mateu 24:37-39) Kutala vamwe vali nakuvahungumwisa navishinganyeka vyamuno mukaye kaSatana tahi? (Koli. 2, 4:4) Hakusaka tutachikize vyuma uli nakulinga Wangana waKalunga, twatela kupwa nalufwelelo nauhashi wakutachikiza vyuma vyavivulu keshi vize kaha tuli nakumona namesoko. Ocho kuwaha kana vayaya hakuwana nge tuli nakumona vyuma vili nakusoloka!

8-10. (a) Uno mukanda WaChimoteu 2, 3:1-5 unatesamo ngachilihi? (b) Mwomwo ika natwambila ngwetu vilinga vyavipi vili nakupihilako lika?

⁸ Kuli chuma chamuchivali chatulingisa tutachikize ngwetu Wangana waKalunga kalinwomu uputuke kuyula hano hamavu. Kaye jino kanapihi chikuma, kaha kali nakupihilako lika. Hamyaka kafwe 100, tunamono omu unatesamo upolofweto watwama hamukanda WaChimoteu 2, 3:1-5. Vilinga vavuluka hamukanda kana vili nakusoloka mukaye kosena. Kutala nayenu munamono kutesamo chaupolofweto kanou tahi? Tutalenu havyakutalilaho vimwe.—Tangenu WaChimoteu 2, 3:1, 13.

⁹ Achesekesenu vyuma vyasolokelenga mumyaka yaji 1940 chipwe 1950 vize vatu vamwenenga kupwa vyavipi navize vili nakusoloka makumbi ano kutalisa kukuhemahema,  nakulihizumuna, nakulilenga, nakumilimo. Ukenya navilinga vyauvumbi vinalisale chikuma makumbi ano. Vatu vali nakulipecha navakwavo hakulinga vilinga vyavipi mangana vavamone ngwavo vakangana. Jipolongalamu jahavisaji vyamivwimbimbi jize vatu vamwenenga ngwavo jajipi muji 1950 jikiko jino jitanga jajivulu jili nakulivwisa kuwaha kutala makumbi ano. Vatu vavavulu vanamono ngwavo vaka-kulisavala navatu vausonyi umwe vali nakulisolola chikuma muvyuma vyakuhemahema namuvyuma vyakulilenga, kaha vali nakukundwiza hatoma vilinga vyavo vyavipi. Etu twatokwa chikuma hakutachikiza omu eji kwivwanga Kalunga havyuma kanevi.—Tangenu WaYuta 14, 15.

¹⁰ Muka-Kulishitu atela kushinganyeka havyuma vize vamwenenga kupwa vyavipi kulinga kuli vakweze mumyaka yaji 1950 nakuvyesekesa kuvyuma vali nakulinga vakweze makumbi ano. Visemi vapwilenga nakulizakamina chikuma nge vana vavo vali nakunwa makanya, chipwe kunwa wala, nakukina mujila yayipi. Oloze makumbi ano tuli nakwivwa mijimbu yayipi yakufwana nge: Muka-shikola wamyaka yakusemuka 15 alozele vakwavo vaka-shikola, nakujihaho vavali kaha nakulemeka 13. Lizavu lyavanyike vapendele wala lyakenyukilile nakujiha kanyike wapwevo wamyaka yakusemuka 9 nakuveta ise namusonyenyi. Vilinga vyauhwanga vize vyasolokele mulifuchi limwe lyamuAsia mumyaka 10 yinahichimo vavilingilenga chikuma kuli vanyike. Kutala kuli mutu mwahamika ngwenyi vyuma makumbi ano kavyeshi nakupihilako tahi?

11. Mwomwo ika vatu vavavulu kaveshi nakumona omu vyuma vili nakupihilako?

¹¹ Kaposetolo Petulu avulukile chimweza ngwenyi: “Hamakumbi akukuminyina nahakasoloka vaka-kusekeleka nakusekeleka chavo, navakalinganga mwaya kufwila chavo vavene nakwamba ngwavo: ‘Kupwako chenyi ocho vashika chili kulihize? Mwomwo kufuma haze vakakuluka jetu vasavalile tulo twakufwa, vyuma vyosena hanga vyapwila vene ngana kufuma kukuputuka chakutanga vyuma.’” (Petu. 2, 3:3, 4) Mwomwo ika vatu vamwe veji kulingilanga vyuma kanevi? Nge vyuma vimwe tuli nakuvimona lwola lwosena, kaha vyeji kuseka nakuhona kuhakako mangana. Nge vilinga vyasepa lyetu vinalumuka washi, echi cheji kutulingisanga tulikomokele, oloze nge vishinganyeka navilinga vyavatu vamuchitungilo navyalumuka chikoki chikoki halwola lwalusuku, kaha katweshi kuhasa kuvimonako. Chipwe ngocho, echi kwalumuka kana nachikiko chapwa chaponde.

12, 13. (a) Mwomwo ika katwatela kuzeya hakumona vyuma vili nakusoloka mukaye? (b) Vyuma muka navitukafwa tumike ‘mulwola lwaukalu’?

¹² Kaposetolo Paulu atuhuhumwine ngwenyi, “hamakumbi akukuminyina nahakapwa lwola lwalukalu.” (Chimo. 2, 3:1) Chipwe ngocho tunahase kuhonesa kala ukalu natumona, ngachize katweshi kuhasa kuchinako. Tunahase kupwa lika vakushishika kuli Yehova hakutukafwa kuli ikiye nashipilitu yenyi, nachikungulwilo chavaka-Kulishitu. Kalunga mwatuhana “ngolo jakuhambakana jize javatu.”—Koli. 2, 4:7-10.

¹³ Paulu hakusoneka upolofweto wakuvuluka makumbi akukuminyina, aputukile namazu ano ngwenyi “tachikiza chumechi.” Mazu kana asolola nge upolofweto kana naukatesamo. Twejiva ngwetu kano kaye nakaya nakupihilako lika palanga nomu Yehova mwakakanongesa. Vaka-kulinangula vyakushikulu vasoneka ngwavo nge vilinga vyavipi navivula, kaha vitungilo vyavatu namafuchi navipihya. Kuvula chavilinga vyavipi mukaye kosena makumbi ano kanda chisolokengaho lyehi. Vatu vavavulu vanahase kuliula ulumbunwiso wavyuma kanevi vinakusoloka, oloze vyuma vinasolokanga kufuma mumwaka wa 1914 vyatela kutukunyula tufwelele ngwetu Wangana waKalunga kalinwomu ukumise upi wosena.

14-16. Unjiho muka wamuchitatu watela kutulingisa tufwelele ngwetu Wangana waKalunga kalinwomu “wizenga”?

¹⁴ Unjiho wamuchitatu uze watufwelelesa nge  kukuma kalinwaha chizenga shina wamijimbu yavatu jaKalunga vakunyima. Chakutalilaho, shimbu kanda Wangana waKalunga uputuke kuyula mwilu, lizavu lyavawavisa vakushishika lyapwile nakuzachila Kalunga natwima. Vyuma muka valingile omu upolofweto wahonene kutesamo mu 1914 ngweseka nomu vajinyine? Vavavulu vomikile hakuvayanjisa nakutwalililaho lika kuzachila Yehova. Hamyaka yayivulu, ava vawavisa vavavulu chipwe nge keshi vosenako vanakumisa mulimo wavo wahamavu nakashishi.

¹⁵ Yesu ahanjikile muupolofweto wenyi wakuvuluka chikukulwishi chakatwamino kamyaka yino ngwenyi: “Chisemunwino chino chikupu vene kacheshi kuhitako palanga nomu navikasoloka vyuma vyosena evi.” (Tangenu Mateu 24:33-35.) Twejiva ngwetu Yesu hakuvuluka ngwenyi “chisemunwino chino” apwile nakutalisa kumazavu avali avaka-Kulishitu vawavisa. Lizavu lyatete lyapwileko mu 1914, kaha lyejivile ngwalyo Kulishitu aputukile kuyula mwaMwangana mwilu mumwaka kana uze. Vatu vamulizavu kana kavapwile kaha vavatonyi mu 1914 koko, oloze vavawavishile nashipilitu yajila mumwaka kana chipwe kunyima.—Loma 8:14-17.

¹⁶ Lizavu lyamuchivali lyavatu ‘vamuchisemunwino chino,’ lyapwa lyavatu vaze vawavishile nashipilitu yajila halwola luze vawavisa vamulizavu lyatete vapwile nakuyoya hano hamavu. Ngachize, keshi nge vawavisa vosena valiko makumbi ano vatwama ‘muchisemunwino’ chize avulukile Yesuko. Makumbi ano, vaze vatwama mulizavu kaneli vanashinakaja lyehi. Oloze mazu aYesu atwama hamukanda waMateu 24:34 atufwelelesa nge vamwe ‘vamuchisemunwino kana kaveshi chikupu kukahitako’ kuvanga vanamono omu nawakaputuka malwa amanene. Echi chatela kutufwelelesa nge kalinwomu Wangana waKalunga ufumiseko upi nakuneha kaye kakahya kakwoloka.—Petu. 2, 3:13.

17. Natukukulula ngachilihi havyuma vitatu evi tunalinangula?

¹⁷ Natukukulula ngachilihi havyuma vitatu evi tunalinangula? Nganomu ambile Yesu, katwatachikiza likumbi chipwe lwola nachikeza kukumako. (Mateu 24:36; 25:13) Oloze Paulu ambile ngwenyi twatachikiza “myaka,” chipwe ngwetu lwola nakukapwa makumbi akukuminyina. (Tangenu Wavaka-Loma 13:11.) Oholili tuli nakuyoyela mumyaka kaneyi yakukuminyina. Nge natuhaka mangana kuupolofweto wamuMbimbiliya nakutachikiza vyuma vize Yehova Kalunga naYesu Kulishitu vali nakulinga, kaha nachitukafwa tumone ngwetu kukuma chakano kaye kakapi chili hakamwihi.

18. Vyuma muka navakamona vaze vakana kuvayula kuWangana waKalunga?

¹⁸ Vosena vaze veji kukananga kuvayula kuli Yesu Kulishitu uze apwa Muka-kutwama hakavalu utoma kalinwomu vatachikize ngwavo vanalimbenje. Kaveshi kukamona kwakuchinyinako. Halwola kana, vatu vavavulu navakalila ngwavo: “Iyaze mwahasa kwimana?” (Kuso. 6:15-17) Kapetulu 7 wamumukanda waKusoloka akumbulula chihula kanechi. Vawavisa navaze vakwechi lutalililo lwahamavu navakahasa ‘kwimana’ mwomwo Kalunga avevwila uselewa. Kufumaho “liyongomena lyalinene” lyamikoko veka nalikayovoka hamalwa amanene.—Kuso. 7:9, 13-15.

19. Vyuma muka muli nakutalilila kulutwe hakuwana nge mwafwelela ngwenu kukuma kalinwomu chizenga?

¹⁹ Nge natutwalaho lika kuhaka mangana kuupolofweto wamuMbimbiliya uze uli nakutesamo makumbi ano, kaha kaveshi kukatuhungumwisa kukaye kano kaSatanako. Katweshi kukapwa tutupuputa nakuhona kumona vyuma vili nakulingiwa mukayeko. Kalinwomu Kulishitu akumise kufungulula chenyi nakunongesa kano kaye kakapi hajita yakwoloka yaAlamangetone. (Kuso. 19:11, 19-21) Achishinganyekenu kuwahilila natukevwa omu nayikakuma jita kana!—Kuso. 20:1-3, 6; 21:3, 4.