1, 2. Uno chihandwa muka twatwama nacho mutanga yakumujimba namujila twalinangwililemo muchano?

YEHOVA ikiye ahakileko tanga. (Efwe. 3:14, 15) Numba tuhu twatwama mutanga yimwe, oloze twatwama navijililo naukalu wakulisezaseza. Yenu vamwe pamo munatwamenga hamwe navisemi jenu kufuma kukusemuka swi nakukukola chenu. Vatu vamwe vanafwisanga visemi javo mwomwo yamisongo, jiponde, chipwe ukalu weka. Vatu veka nawa kavejiva visemi javoko.

² Numba tuhu twapwa vamutanga yimwe yize yalemesa Yehova, oloze jijila twalinangwililemo muchano jalihandununa. Yenu vamwe mwasemukilile mumuchano, kaha visemi jenu vaminangwile jishimbi jaKalunga. (Lushi. 6:6, 7) Nyi pamo muli hakachi kavatu vavavulu vaze valinangwile muchano mwomwo yakuvambulwila mujimbu wamwaza kuli vangamba jaYehova.—Loma 10:13-15, Chimo. 1, 2:3, 4.

3. Ukalu muka tweji kumonanga tuvosena?

³ Chamokomoko navyuma tunavuluka lyehi, tuvosena tweji kumonanga ukalu wakulifwanako. Tuvosena tweji kuyandanga mwomwo yakulikanga chaAlama kaha nawa twaswana shili nakufwa nakuhona kukupuka mwosena. (Loma 5:12) Numba tuhu tweji kumonanga  ukalu kana, oloze etu vaka-kulemesa vamuchano tunahase kuvuluka Yehova ngwetu “Setu.” Kushikulu vangamba jaKalunga vahanjikilenga mazu atwama hamukanda waIsaya 64:8 ngwawo: “Ove Yehova, Ove yove Setu.” Kaha nawa mukulomba chenyi chakutalilaho, Yesu aputuka namazu akwamba ngwenyi: “Ove Setu uli mwilu, lijina lyove lipwenga lyajila.”—Mateu 6:9.

4, 5. Hakusaka tuzange chikuma Setu Yehova, vyuma muka natushimutwila?

⁴ Setu wamwilu atuzakama nakutukinga hakupwa tuvatu jenyi vaze veji kusanyikanga halijina lyenyi mulufwelelo. Kweseka namuka-kwimba jisamu Yehova ahanjika ngwenyi: “Mwomwo [muka-kulemesa wamuchano] nalipanjika nayami, shikaho nangumuyovola, nangumuzundula helu, mwomwo natachikiza lyehi lijina lyami, shikaho.” (Samu 91:14) Enga, Yehova Kalunga eji kutupulululanga kuli vaka-kole jetu nakutukinga hakupwa tuvatu jenyi mangana vahone kutunongesa.

⁵ Hakusaka tuzange chikuma Setu wamwilu, tukekesenu vyuma vino vitatu vyavilemu: (1)Setu apwa Muka-kutuhana. (2)Yehova apwa Muka-kutukinga. (3)Kalunga apwa Sepa lyetu wamwenemwene. Omu natukekesa havishina kanevi, nachitukafwa tushinganyeke hausoko wetu naKalunga nakumona omu tunahase kumuvumbika hakupwa Setu. Nachipwa nawa chachilemu kushinganyeka hakukisula chize navakapwa nacho vatu vaze navapandama kuli ikiye.—Yako. 4:8.

6. Jila yimwe muka yize Yehova apwa Muka-kuhana “mawana amwaza osena”?

⁶ Kambaji Yakova asonekele ngwenyi: “Mawana amwaza osena namawana akukupuka osena eji kufumanga mwilu, eji kwizanga kufuma kuli Setu wavyuma vyakumunyika.” (Yako. 1:17) Kuyoya chapwa wana wakufuma kuli Yehova. (Samu 36:9) Kuzachisa kuyoya chetu hakulinga mwaya muchima waKalunga nachitulingisa vatukisule mwamunene oholyapwa nakupwa nalutalililo lwakukayoya haya myaka yosena mukaye kakahya. (Vishi. 10:22 Petu. 2, 3:13) Uno nachikapwa ngachilihi ngocho hakuwana nge tweji kumona ukalu uze weza mwomwo yakulikanga chaAlama?

7. Mujila muka Kalunga atusokolwela jila mangana tutunge usoko wakukola naikiye?

⁷ Yehova apwa Muka-kuhana Wamunene mujijila jajivulu. Chakutalilaho, likoji lyenyi lyalinene lyeji kumulingisanga atuyovole. Chikupu vene tuvosena tweji kuvulumunanga shili kaha nawa tuvosena katwakupuka mwosenako mwomwo yavisemi jetu vatete. (Loma 3:23) Chipwe ngocho zangi yaYehova yamulingisa atusokolwele jila mangana tutunge usoko wakukola nayikiye. Kaposetolo Yowano asonekele ngwenyi: “Omu mukiko Kalunga asolwelele zangi yenyi kuli etu hakutuma Mwanenyi umwe kaha wakulipwila hakaye mangana tukahase kupwa nakuyoya kuhichila muli ikiye. Eyi zangi kana, keshi nge etu yetu twazangile Kalungako, oloze ikiye atuzangile etu nakututumina Mwanenyi kupwa wana wakufwika hajishili jetu.”—Yowa. 1, 4:9, 10.

8, 9. Uno Yehova apwile ngachilihi muka-kuhana wamunene mulwola lwaApalahama naIsaka? (Talenu muvwimbimbi wakulivanga.)

⁸ Kafwe myaka 1,900 kunyima shimbu kanda Yesu asemuke, chuma chimwe chasolokele mukuyoya chaApalahama chasolwele omu zangi yaYehova nayikamulingisa akahane vatu vakulyononona kuyoya chahaya myaka yosena. Mukanda WavaHepeleu 11:17-19 wahanjika ngwawo: “Mwomwo yalufwelelo, omu vamwesekele Apalahama, lunga uze atambwile jishiko nakuwahilila, asakile kulumba mwanenyi umwe kaha wakulipwila, kaha chapwile vene nge nalumbu lyehi Isaka, numba tuhu vamulwezele ngwavo: ‘Vaze navakavuluka ngwavo “mbuto yove” navakeza kuhichila muli Isaka.’ Oloze amwene ngwenyi Kalunga nahase vene kumusangula kuvafu; kaha kukiko vene amutambwile mujila yachifwanyisa.” Ngana muze Apalahama alisuwile kulumba mwaneyi Isaka, naYehova alisuwile kuhana mwanenyi Yesu Kulishitu afwile vaka kaye.—Tangenu Yowano 3:16, 36.

 ⁹ Isaka awahililile hakumupululula kukufwa. Awahililile omu Kalunga ashishishilemo chizamba chamukoko uze apwile muchiputa. (Kupu. 22:10-13) Shikaho chize chihela vachivulukile ngwavo “Yehova-yile,” kulumbununa “Yehova mwatuhana.”—Kupu. 22:14.

10, 11. Veya vanakwazana “mumulimo wakwambulula kuwanyisa,” kaha vali nakulinga ngachilihi ngocho?

¹⁰ Omu natushinganyeka havyuma vyosena vize atulingila Yehova, nachitukafwa tumone ngwetu chakuzeka wana waYesu katweshi kuhasa kupwa tumasepa jaKalungako. Paulu asonekele ngwenyi: “Zangi yize atwama nayo Kulishitu, yeji kutushinjilanga, mwomwo omu mukiko tunamono ngwetu, mutu umwe afwililile vosena; ngocho jino vosena vafwile; kaha ikiye afwililile vosena mangana vaze vali nakuyoya vazenekenga kuliyoyela cheka vavene, oloze vamuyoyelenga uze avafwililile, uze nawa vasangwile.”—Koli. 2, 5:14, 15.

¹¹ Hakuwana nge vaka-Kulishitu vamulikulukaji lyamyaka lyakulivanga vazangile Kalunga nakupwa vakuwahilila hakumuzachila, ngocho vetavilile “mulimo wakwambulula kuwanyisa.” Mulimo kanou wakwambulula nakutunga tumbaji ukiko wakafwile vatu vapwenga cheka vakuunda naKalunga, nakupwa masepa jenyi kaha nakukapwa vana vaKalunga mwilu. Makumbi ano vangamba jaYehova vawavisa veji kuzatanga mulimo woumwe. Vapwa valuwa jaKalunga naKulishitu. Mulimo wavo wakwambulula weji kulingisa vatu vamichima yamwaza vapandame kuli Yehova nakupwa vangamba jenyi.—Tangenu Wavaka-Kolinde 2, 5:18-20; Yowa. 6:44, Vili. 13:48.

12, 13. Tunahasa kusolola ngachilihi ngwetu twasakwilila Yehova havyuma vyavivulu vize atulingila?

¹² Vaka-Kulishitu vosena vaze vatwama nalutalililo lwakukayoyela hano hamavu veji kuzachilanga hamwe navasalaho hakwambulula Wangana mangana vasakwilile Yehova hakupwa Muka-kuhana wamunene. Mumulimo kanou wakwambulula, tweji kuzachisanga Mbimbiliya yize yapwa wana ukwavo wamwaza atuhana Kalunga. (Chimo. 2, 3:16, 17) Hakuzachisa kanawa Mazu aKalunga aze vahwima mumulimo wetu wakwambulula, natukafwa vatu mangana vakawane kuyoya chahaya myaka yosena. Hakusaka tuzate mulimo kanou, tuvosena twapendamina hawana ukwavo atuhana Yehova wakutukafwa, wana kana yikiko shipilitu yenyi yajila. (Zeka. 4:6, Luka 11:13) Vyuma vinakulovoka mumulimo kanou vinapu vyamwaza nge muze yinakusololanga Yearbook of Jehovah’s Witnesses. Ocho kutokwa kana vayaya hakwazana mumulimo uze weji kwalisanga Setu uze apwa Muka-kuhana!

¹³ Hakuwana nge Kalunga atulingila vyuma vyavivulu, twatela kulihulisa ngwetu: ‘Kutala nguli nakuzata nangolo hakwambulula mujimbu wamwaza mangana ngusolole nge ngwasakwilila vyuma angulingila Yehova tahi? Vyuma muka navingukafwa ngwambulule kanawa mujimbu wamwaza?’ Nge natusakwilila havyuma vyosena vize eji kutuhananga Kalunga, kaha natuhakanga chatete Wangana wenyi mukuyoya chetu. Nge natulinga ngocho, kaha Yehova mwatuhana vyuma vyasakiwa mukuyoya chetu. (Mateu 6:25-33) Hakuwana nge Kalunga atuzanga, twatela kuzata noho hakumina ngolo jetu mangana tumwivwise kuwaha nakuwahisa muchima wenyi.—Vishi. 27:11.

14. Uno Yehova napunga ngachilihi Muka-kuyovola vatu jenyi?

¹⁴ Muka-kwimba jisamu Ndavichi embile ngwenyi: “Oloze ami ngumuka-kuhutwa nakukalikiza, Mwata eji kungushinganyekanga. Ove uMuka-kungukafwa, uMuka-kunguyovola.” (Samu 40:17) Kakavulu Yehova nayovolanga vatu jenyi mwalizavu chikumanyi vaze vanayanjisanga nakufumbukila kuli vaka-kole javo. Twatela kusakwilila Kalunga hakutuhana vyuma vize navitukafwa tupwenga lika vakushishika kuli ikiye nge tuli nakumona ukalu halwola lwangana.

15. Hanenu chakutalilaho chakusolola omu chisemi wazangi eji kukinganga mwanenyi.

¹⁵ Chisemi wazangi keshi kuhana vana venyi vyuma vyasakiwa kahako oloze eji kuvakinganga nawa. Eji kwesekanga kuvayovola nge vali muponde. Ndumbwetu umwe walunga achili lika nakwanuka ponde yamusolokelele omu apwile kanyike. Omu vapwile nakukinduluka kwimbo hakufuma mumulimo wamuwande, ou ndumbwetu naise vahichile jila yakuya nakuzauka mwanakalwiji. Likumbi kana nachimene kwanokele vula yayinene yize yazalishile uze mwana kalwiji. Jila yakuzaukilamo uze mwanakalwiji shina kutumbuka lilolwa limwe lyalinene nakuya halikwavo. Uze mwana atetekelele kulutwe kahomu alingile ngwenyi atumbukile halilolwa likwavo, lihinji hinalihusuka himwaholokela mukalwiji nakujiminyina kwishi yameya nakutufuka mapapa kavali. Aha hakiko jino ise amukwachile kulivoko nakumuyovola. Ocho kuwaha kana evwile uze mwana hakumupululula washi kuli ise! Omu mukiko naSetu wamwilu eji kutuyovolanga kuvyuma vyavipi vyamukaye kano nakuli Satana uze eji kukayulanga. Chikupu vene, Yehova kaha ikiye apwa Muka-kukinga wamwenemwene uze twatela kufwelela.—Mateu 6:13, Yowa. 1, 5:19.

16, 17. Uno Yehova akafwile nakukinga ngachilihi vaIsalele omu valwile jita navaAmaleke?

¹⁶ Yehova akingile vatu jenyi mu 1513 B.C.E. Asokwele vaIsalele muundungo muEjipitu nakuvakinga hakuzauka Kalungalwiji Uchila. Shimbu kanda vahete kuPili Shinai, vaIsalele vahetele kuLefwichime.

¹⁷ Ngana muze vapolofwetele hamukanda waKuputuka 3:15, Satana atela afwililile kufumbukila vaIsalele vaze vasolokele nge kavapwile nou wakuvakingako. Jila yimwe alingililemo ngocho shina kuzachisa vaAmaleke vaze vapwile vaka-kole javatu jaKalunga. (Kula. 24:20) Uno Yehova akingile ngachilihi vatu jenyi hakuzachisa Yoshuwa, Mose, Alone naHule? Omu Yoshuwa  apwile nakulwa navaAmaleke, Mose, Alone, naHule vapwile hapili yapwile hakamwihi naYoshuwa. VaIsalele vapwile nangolo jakufungulula omu Mose azundwile mavoko enyi mwilu. Omu mavoko aMose azeukile mwomwo yakuzeya, Alone naHule vawakwachililile. Hakuvakafwa nakuvakinga kuli Yehova “Yoshuwa ahonesele Amaleke navatu jenyi.” (Kulo. 17:8-13) Mose atungile lijiko lwakulumbila kuze nakuliluka ngwenyi “Yehovanyishi,” kulumbununa Yehova ikiye lipandelo lyami.—Tangenu Kulovoka 17:14, 15.

18, 19. Vyuma muka Kalunga nawahishila vangamba jenyi vyakuvakinga makumbi ano?

¹⁸ Yehova eji kukinganga vatu vaze vamuzanga nakumwononoka. Ngana muze chapwile kuli vaIsalele kuLefwichime, nayetu tweji kupendaminanga hali Kalunga atukinge omu navatufumbukila kuli vaka-kole jetu. Lwola lwosena Yehova eji kutukinganga mwalizavu omu navatufumbukila kuli Liyavolo. Chakutalilaho, lwola lwaluvulu Kalunga nakinginga vandumbwetu vaze vayanjishile mwomwo yakuhona kwazana muvihande vyalifuchi nachiyulo. Echi chasolokele muchiyulo chaNazi muGermany namafuchi eka muji 1930 na 1940. Omu natutanganga nakushinganyeka hamijimbu yakuyoya chavatu namijimbu yamuYearbook yomu Kalunga nakinginga vatu jenyi mulwola lwakuvayanjisa, nachitujikijisa tufwelele muli Yehova hakupwa ikiye Uchinyino wetu.—Samu 91:2.

¹⁹ Yehova eji kutukinganga hakutuhuhumuna mujila yazangi kuhichila muliuka lyenyi namumikanda. Achishinganyekenu omu tunanganyala hakutanga mikanda kaneyi hamyaka yakalinwaha. Mukaye munalisale vilinga vyaujila, nautakwa nakutala chipwe kutanga vyavatu vali uselesele. Oloze Yehova natukafwenga nakutuhuhumuna mangana tulihende kuvyuma vize vinahase kwenyeka usoko wetu naikiye. Makumbi no, Setu wamwilu natuhuhumunanga tulihende kukulikata navatu vavapi kuhichila hakulituminanga mijimbu hamakina. *—Koli. 1, 15:33.

20. Veji kutukinga nakututwaminyina ngachilihi muchikungulwilo?

²⁰ Mujila muka tunahase kusolola nge ‘vatunangula kuli Yehova’? Tunahase kulinga ngocho hakukavangizanga jishimbi jenyi. (Isa. 54:13) Muchikungulwilo mukiko veji kututwaminyinanga nakutukinga. Mwatwama vakulwane vaze veji kuhuhumunanga kuzachisa Visoneka. (Ngale. 6:1) Yehova eji kuzachisanga ava “mawana amalunga,” vatuzakame muzangi. (Efwe. 4:7, 8) Uno twatela kulinga ngachilihi nge vakulwane vanatuhuhumuna? Twatela kwononoka. Nge natulinga ngocho, kaha Kalunga mwatukisula.—Hepe. 13:17.

21. (a) Vyuma muka twatela kufwila kulinga? (b) Vyuma muka natushimutwila muchihande chinakavangizaho?

²¹ Tufwilenu kwitavila shipilitu yitukafwe nakwitavila Setu wamwilu atutwaminyine. Twatela nawa kushinganyeka hachiyoyelo chamwanenyi Yesu Kulishitu nakukavangiza chakutalilaho chenyi chamwaza. Yesu vamukiswile mwomwo yakwononoka chenyi palanga nakukufwa. (Fwili. 2:5-11) Ngana mwaYesu, nayetu navatukisula nge natufwelelanga muli Yehova namichima yetu yosena. (Vishi. 3:5, 6) Shikaho lwola lwosena tupendaminenunga hali Yehova hakupwa yikiye Muka-kutuhana, naMuka-kutukinga uze katweshi kwesekesa kumutu wekako. Ocho kutokwa kana vayaya chakumuzachila ikiye kaha! Zangi yetu hali ikiye nayitohwa chikuma omu natutala hajila yamuchitatu yize Setu wamwilu eji kutuzakaminangamo, jila kana shina usepa wetu nayikiye. Chihande chinakavangizaho nachishimutwila omu Yehova apwa Sepa lyetu wamwenemwene.