1, 2. Mwomwo ika Samu 45 yapwila yayilemu kuli yetu?

MWANGANA mwaya nakulwa jita yamuchano yakwoloka kaha himwaya akafungulule vaka-kole jenyi. Hanyima yakufungulula himwambata mwenga wenyi. Ou mwangana navamwanukanga nakumulemesanga haya myaka yosena. Evi vikiko vyuma vimwe vyakwivwisa kuwaha vasoneka hali Samu 45.

² Chipwe ngocho Samu 45 kayatwama kaha namijimbu yakwivwisa kuwaha kahako. Oloze yatwama naulumbunwiso waulemu kuli yetu mwomwo yakwata hakuyoya chetu choholyapwa nachakulutwe. Ngachize tuhakenu mangana kuvyuma natulinangula muSamu kaneyi.

3, 4. (a) “Lizu lyamwaza” muka lize muka-kwimba jisamu asonekele, kaha linahase kukwata ngachilihi kumichima yetu? (b) Mujimbu muka tweji kuvulukanga ‘wakuvuluka mwangana,’ kaha mivumbo yetu yeji kupwanga ngachilihi nge sonekeso?

³ Tangenu Samu 45:1. “Lizu lyamwaza” lize lyalingishile muchima wamuka-kwimba jisamu ‘ufwafumuke’ shina lyamujimbu wakupandama kuli mwangana. Lizu valumuna muchiHepeleu ngwavo “kufwafumuka” lyalumbununa “kusava.” Muka-kwimba jiSamu awahililile chikuma hakwivwa mujimbu kana kwijiva nge  muchima wenyi unakusava natwima. Kaha nawa lilimi lyenyi lyapwile nge “sonekeso yamuka-kusoneka lufushi.”

⁴ Uno echi chalumbununa ika kuli etu? Mujimbu wamwaza waWangana wauMeshiya wapwa himujimbu wamwaza uze weji kutwivwisanga kuwaha kumuchima. Mujimbu waWangana wapwile chikumanyi ‘wamwaza’ mu 1914. Mwomwo ika? Mwomwo kufuma vene mumwaka kana, ou wangana kawapwile jino Wangana wakulutweko. Kufuma mu 1914 mujimbu wamwaza unapunga nakuhanjika hafulumende yize yili nakuyula mwilu oholyapwa. Ou ukiko “mujimbu wamwaza waWangana” uze tweji kwambululanga “kumavu kwatwama vatu kwosena, nakupwa unjiho kuli vaka-mafuchi osena.” (Mateu 24:14) Kutala michima yetu yeji “kufwafumuka” chipwe kuwahilila hamujimbu kanou waWangana tahi? Kutala tweji kwambululanga mujimbu wamwaza waWangana natwima tahi? Ngana mwamuka-kwimba jisamu, nayetu nawa tweji ‘kuvulukanga vyuma vyakuvuluka mwangana,’ kulumbununa Mwangana wetu Yesu Kulishitu. Tweji kuvilikanga ngwetu Yesu ali jino Mwangana waWangana wauMeshiya mwilu. Kaha nawa tweji kusanyikanga vatu vosena, kuhakilako vene navatwamina vamuno mukaye mangana valiluule kuchiyulo chenyi. (Samu 2:1, 2, 4-12) Malimi etu eji kupwanga nge “sonekeso yamuka-kusoneka lufushi” omu tweji kuzachisanga Mazu aKalunga hakwambulula mujimbu.

5. (a) Mujila muka Yesu apwile ‘wamwaza’? (b) Uno Yesu ambulwilenga ngachilihi ‘nalikoji,’ kaha tunahase kumulondezeza ngachilihi?

⁵ Tangenu Samu 45:2. Visoneka kavyavuluka chikuma omu apwile nakusoloka Yesu kumujimbako. Hakupwa apwile wakukupuka mwosena, atela apwile ‘wamwaza.’ Oloze kulonga nakupwa wakushishika kuli Yehova chikiko chamulingishile apwenga wamwaza. Kaha nawa, Yesu azachishile “mazu amwaza” aze akwachile vatu kumuchima hakwambulula mujimbu waWangana. (Luka 4:22; Yowa. 7:46) Kutala tweji kuzatanga nangolo mangana tulondezeze Yesu mumulimo wakwambulula tahi?—Kolo. 4:6.

6. Mujila muka Kalunga akiswililemo Yesu “haya myaka yosena”?

⁶ Yehova akiswile mulimo waYesu wahano hamavu nakumufweta hanyima yakuhana mwono wenyi mwandando yakusokola mwomwo yakupwa nakashishi nakuzanga chikuma Ise. Kaposetolo Paulu asonekele ngwenyi: “Omu afwanyine nge himutu, alinyishile ivene, kaha ononokelenga palanga nakukufwa, enga, kufwa chahachitondo chakuyanjishila. Mwomwo yachumechi nawa, Kalunga amuzezwile nakumuhaka hachihela chahelu, kaha amuhanyine mujila yalikoji lijina lize lyahambakana majina eka osena, mangana ngwenyi mulijina lyaYesu, mambuli osena akafukame—avaze vali mwilu, navaze vali hamavu navaze vali kwishi yamavu—kaha malimi osena aketavile hatoma ngwawo, Yesu Kulishitu ikiye Mwata, mangana vamutohwesenga Kalunga Setu.” (Fwili. 2:8-11) Yehova akiswile Yesu “haya myaka yosena” hakumusangula namujimba wakuzeneka kufwa.—Loma 6:9.

7. Mujijila muka Kalunga awavishile Yesu ‘kuhambakana vakwavo’?

⁷ Tangenu Samu 45:6, 7. Hakuwana nge Yesu azangile vyuma vyakwoloka nakuhunga vyuma vize ahunga Ise, ngocho Yehova  amuwavishile kupwa Mwangana waWangana wauMeshiya. Yesu vamuwavishile ‘namaji akulisamba kuhambakana vakwavo,’ vamyangana vakuYuta vamuchisaka chaNdavichi. Mujila muka? Chatete Yesu vamuwavishile kuli Yehova. Chamuchivali Yehova awavishile Yesu kupwa Mwangana nakupwa nawa Kapilishitu Wakulitulaho. (Samu 2:2, Hepe. 5:5, 6) Chamuchitatu Yesu kavamuwavishile namajiko oloze nashipilitu yajila kaha nawa wangana wenyi kaweshi wahano hamavuko oloze wamwilu.

8. Mwomwo ika natwambila ngwetu chiyulo chaYesu chapwa chakwoloka, kaha mazu akwamba ngwavo ‘Kalunga ikiye litanda lyaYesu’ alumbununa ika?

⁸ Mu 1914 Yehova atongwele Mwanenyi kupwa Mwangana wauMeshiya mwilu. ‘Mukombo wakusungama ukiko mukombo wawangana wenyi.’ Shikaho tunahasa kufwelela ngwetu chiyulo chenyi nachikapwanga chakwoloka lwola lwosena. Yesu akwechi ngolo jakuyula mwomwo ‘Kalunga ikiye litanda lyenyi,’ kulumbununa nge Yehova atongola Yesu kupwa Mwangana. Kaha nawa litanda lyawangana waYesu nalikelilanga “haya myaka namyaka.” Ocho kutokwa kana twatwama nacho hakuzachila Yehova kuhichila muli Mwangana uze atongola!

9, 10. (a) Mwaka uka Kulishitu alikashile poko yenyi hatungi, kaha aputukile kuyizachisa ngachilihi? (b) Mujila muka yikwavo yize Kulishitu mwakazachisa poko yenyi yamukwale?

⁹ Tangenu Samu 45:3. Yehova eji kulwezanga Mwangana alikase poko yenyi hatungi. Echi chalumbununa nge Yehova eji kulwezanga Yesu kulwa jita navaze veji kuhunganga chiyulo chaKalunga nakuvanongesa. (Samu 110:2) Hakuwana nge Kulishitu apwa Mwangana Muka-kufungulula, ngachize vamuvuluka ngwavo “chindume.” Yesu alikashile poko yenyi yamukwale hatungi mu 1914 omu afungulwile Satana navandemone jenyi nakuvambila hano hamavu.—Kuso. 12:7-9.

¹⁰ Jita kana yapwile maputukilo akufungulula vaka-kole jenyi. Oloze mwatwalaho lika “kufungulula.” (Kuso. 6:2) Yehova najinyi ngwenyi vihanda vyaSatana vyosena vyahano hamavu vatela kuvinongesa kaha Satana navandemone jenyi vaze veji kuhungumwisanga vatu vatela kukavafumisako. Chakavanga navakafumisako Mbavilone Yayinene yize yapwa kwitava chamakuli chamukaye kosena. Yehova mwakazachisa vaka-kuyula vamapolitiki kunongesa ou “pwevo muka-ujila” wamupi. (Kuso. 17:16, 17) Kufumaho, Mwangana Muka-kufungulula mwakanongesa jifulumende jaSatana josena jahano hamavu. Kaha nawa Yesu uze vavuluka ngwavo “kangelo wakuwina wakuzeneka kukuma” mwakafungulula vaka-kole jenyi vosena omu mwakambila Satana navandemone jenyi muwina wakuzeneka kukuma. (Kuso. 9:1, 11; 20:1-3) Tutalenu omu vyuma kanevi vyakwivwisa kuwaha vavipolofwetele mumukanda waSamu 45.

11. Uno Kulishitu eji kutambukanga ngachilihi hakavalu mangana ahakwile “muchano”?

¹¹ Tangenu Samu 45:4. Mwangana keshi kulwa jita mangana atambule mafuchi chipwe kukwata vandungoko. Oloze eji kulwanga jita mwomwo yavyuma vyavilemu. Eji kutambukanga hakavalu mangana ahakwile ‘muchano nakulinyisa nakwoloka.’ Yehova ikiye kaha akwechi ngolo jakuyula melu namavu. Ou ukiko “muchano” waulemu uze twatela kuhakwila. Omu Satana alikangile, ambile ngwenyi Yehova katwama nangolo jakuyulako. Kufuma vene haze, vandemone navatu vali nakufwefulula muchano kanou. Luno jino hilwola luze Mwangana vawavisa kuli Yehova atela kulwa jita nakusolola hatoma nge Yehova ikiye akwechi ngolo jakuyula.

12. Uno Mwangana eji kutambukanga ngachilihi hakavalu mangana ahakwile “kulinyisa”?

¹² Mwangana eji kutambukilanga nawa hakavalu mangana ahakwile “kulinyisa.”  Lwola lwosena Yesu atuhana chakutalilaho chamwaza chakulinyisa nakwononoka kuli Ise. (Isa. 50:4, 5; Yowa. 5:19) Vangamba jaMwangana vakulyononona vatela kukavangiza chakutalilaho chenyi chakulinyisa hakwononoka kuwata waYehova muvyuma vyosena. Vatu vaze veji kulinganga vyuma kanevi vakivo kaha navakengila mukaye kakahya kaKalunga.—Zeka. 14:16, 17.

13. Uno Kulishitu eji kutambukanga ngachilihi hakavalu mangana ahakwile “kwoloka”?

¹³ Kulishitu eji kutambukilanga nawa hakavalu mangana ahakwile “kwoloka.” Echi kwoloka chikiko “kwoloka chaKalunga” chipwe ngwetu jishimbi jaYehova jakupandama kuvyuma vyakwoloka nevi vyakuhenga. (Loma 3:21; Lushi. 32:4) Isaya apolofwetele vyakupandama kuli Yesu Kulishitu ngwenyi: “Mwangana mwakapwanga muwangana mukwoloka.” (Isa. 32:1) Muchiyulo chenyi, Yesu mwakaneha “melu amahya namavu amahya” muze “namukapwanga kwoloka.” (Petu. 2, 3:13) Echi chalumbununa nge vosena vaze navakatwama mukaye kakahya vatela kukakavangiza jishimbi jaYehova.—Isa. 11:1-5.

14. Uno livoko lyachilyo lyaKulishitu nalikatesamo ngachilihi “vyuma vyakwivwisa woma”? (Talenu muvwimbimbi wakulivanga.)

¹⁴ Muka-kwimba jisamu ambile ngwenyi Mwangana mwakatambukila hakavalu nakulikasa poko yenyi yamukwale hatungi. (Samu 45:3) Mwambata poko yamukwale mulivoko lyachilyo nakuputuka kuyizachisa. Muka-kwimba jisamu apolofwetele ngwenyi: “Livoko lyove lyachilyo nalikunangula vyuma vyakwivwisa woma.” (Samu 45:4) Omu Yesu Kulishitu mwakatambukila hakavalu nakunongesa kaye kaSatana haAlamangetone, mwakatesamo “vyuma vyakwivwisa woma” kuli vaka-kole jenyi. Katwejivile kanawa omu Mwangana mwakanongeselamo kaye kaSatanako. Oloze twejiva ngwetu vyuma mwakalinga Yesu navikevwisa woma vaze veji kulikanganga kuli Kalunga nakukana kulyononona kuchiyulo chaMwangana. (Tangenu Samu 2:11, 12.) Muupolofweto wenyi wakuvuluka kukuma chakaye, Yesu ambile ngwenyi vatu “navakalezumuka hakwivwa woma nahakutalilila nawa vyuma vize navikeza kumavu kwatwama vatu, mwomwo ngolo jamelu najikalinyika. Jino navakamona Mwanamutu ali nakwiza mulivwi nangolo naupahu waunene.”—Luka 21:26, 27.

15, 16. Veya ‘navakasa jita’ hamwe kaha naKulishitu?

¹⁵ Kwiza chaMwangana “nangolo naupahu waunene” hakunongesa vaka-kole jaKalunga vachivuluka mumukanda waKusoloka, ngwavo: “Ngwamwene mwilu munasokoloka, kaha hakutala ngwamwene kavalu utoma. Uze atwamineho vamuvulukile ngwavo, Wakushishika kaha Wamuchano, kaha eji kusopesanga nakulwanga jita mukwoloka. Kaha nawa mazavu avaka-jita vamwilu vamukavile hatuvalu vatoma, kaha vavwalile mahina amwaza, atoma, akuzeneka majilo. Mukanwa kenyi mwalovokele poko yamukwale yayisuku yakuvambuka, mangana ayizachise kukujiha vaka-mafuchi, kaha ikiye mwakafunganga namukombo wafwelu. Kaha nawa mwalyatangila muchikamwino chavinyo chautenu waKalunga Wangolo Josena.”—Kuso. 19:11, 14, 15.

¹⁶ Veya navakapwa ‘vaka-kwasa jita’ vamwilu vaze navakaya hamwe naKulishitu kujita? Vangelo valwile hamwe naYesu jita omu alikashile poko yamukwale hatungi hakufumisa Satana navandemone jenyi mwilu. (Kuso. 12:7-9) Ngachize, chapwa chakutamo kukukulula ngwetu hajita yaAlamangetone, vangelo vajila navakapwa hali vaka-kwasa jita vaKulishitu. Uno kuli veka nawa vaze navakasa jita hamwe naKulishitu tahi? Yesu ashikile vandumbwenyi vawavisa ngwenyi: “Kahou mwafungulula nakulamanga vilinga vyami palanga nakusongo, nangukamuhana ngolo jakuyula vaka-mafuchi, nganomu ngwajitambula lyehi nayami nawa kuli Tata, kaha mwakafunganga vatu namukombo wafwelu, mangana vakavachike nge jindeho jaunonga.” (Kuso. 2:26, 27) Ngocho, vandumbu jaKulishitu vawavisa  vaze vasanguka nakuya mwilu navakazana mujita kaneyi. Vawavisa navakapwa kusali yaYesu omu mwakatesamo “vyuma vyakwivwisa woma” hakunongesa mafuchi.

17. Uno kavalu utoma emanyinako yika? (b) Uno poko yamukwale nauta wamanana vyemanyinako vyuma muka?

¹⁷ Tangenu Samu 45:5. Hali Kusoloka 6:2 hamba ngwavo: “Ngwamwene kavalu utoma; kaha uze atwamineho apwile nauta wamanana; kaha vamuhanyine muchama, ngocho ayile nakufungulula mangana akumise kufungulula chenyi.” Kavalu utoma emanyinako jita yakwoloka yize vetavila kuli Kalunga. (Kuso. 19:11) Mwangana kapwile kaha napoko yamukwaleko oloze ambachile nawa uta wamanana. Vitwa kanevi vivali vyemanyinako jila yize Kulishitu mwakazachisa hakujiha vaka-kole jenyi.

18. Uno “mivwi” yaKulishitu ‘nayikavambuka’ ngachilihi?

¹⁸ Muka-kwimba jisamu azachishile mazu achifwanyisa akupandama kuli Mwangana ngwenyi: “Mivwi yove yinavambuka, Vatu veka naveka navalindwomwoka mushi yove, yili mumichima yavaka-kole jamwangana.” Kunongesa kana nachikapwa mukaye kosena. Yelemiya apolofwetele ngwenyi: “Vakujiha kuli Yehova navakapwa kufumisa kusongo yamavu nakutwala kusongo yamavu yikwavo.” (Yele. 25:33) Upolofweto ukwavo wahanjika ngwawo: “Ngwamwene nawa kangelo nemana mulikumbi, kaha atambakanyine nalizu lyakukanguka nakwamba kuli tujila vosena vaze veji kutukanga hautangatanga ngwenyi: ‘Twayenu kuno, likungulwilenu kukulya chachingoloshi chaKalunga chachinene, mangana mulyenga misonyi yavamyangana namisonyi yatupitau vamaswalale vavakulwane namisonyi yamalunga vangolo namisonyi yatuvalu nayeyi yavaze vanatwameho, namisonyi yavatu vosena, yavatu vakulihehwa nayeyi yavandungo nayeyi yavatu vavandende navava vavanene.’”—Kuso. 19:17, 18.

19. Uno Kulishitu ‘mwakatambuka ngachilihi nakufukila’ nakukumisa kufungulula chenyi?

¹⁹ Hanyima yakunongesa kaye kaSatana, Mwangana waupahu Yesu Kulishitu ‘mwakatambuka nakufukila.’ (Samu 45:4) Mwakakumisa kufungulula hakumbila Satana navandemone jenyi muwina wakuzeneka kukuma. Navakatwama muwina kana hamyaka likombakaji omu Yesu navaze 144,000 navakayula. (Kuso. 20:2, 3) Omu Liyavolo navangelo jenyi navakapwa muze muwina, navakapwa kwijiva nge vanafu mwomwo kaveshi kukapwa nangolo jakuhungumwisa vatuko. Vatu vosena hano hamavu navakalivwisa kuwaha kuvayula kuli Mwangana chakuzeneka kuvatangula kuli Satana navandemone jenyi. Shimbu kanda mavu osena apwenga palachise, nakukapwa vyuma vyeka vize navikatulingisa tukawahilile hamwe kaha naMwangana navaze 144,000. Vyuma kana natuvishimutwila muchihande chinakavangizaho.