PWEVO watuliwe wakuhutwa mwapakata mwanenyi umwe kaha mukasamba. Chuma kana chamukomwesele chikuma. Shimbu kanda ou mwana vamusangule naye amusachile hamavoko. Ou pwevo awahililile omu vasangwile mwanenyi. Elija ambile ngwenyi, “tala, mwanove nayoyo lyehi”

Munahichi jino myaka 3,000 kufuma haze vasangwile ou mwana. Munahase kutanga mujimbu kana mumukanda waVamyangana wakulivanga kapetulu 17. Kapolofweto kaKalunga Elija ikiye atambukilile uze tuliwe. Nyi naye you mwana apwile iya? Kavamuvuluka lijinako, oloze apwile tuliwe uze atwaminenga mumbaka yaZalefwate. Kusangula mwanenyi chikiko chuma chachinene chazamishile lufwelelo lwenyi mukuyoya chenyi chosena. Mujimbu wayou tuliwe nautunangula vyuma vyavivulu.

Yehova ambile ngwenyi mulifuchi lyamwangana wamupi wavaIsalele Ahave, namukapwa changa chachinene. Omu Elija avilikile vyachanga, Yehova amukingile kuli mwangana wamupi Ahave kaha nawa Yehova amuhanyinenga mbolo nanyama mujila yakukomwesa hakuzachisa makololo. Yehova alwezele jino Elija ngwenyi: “Katuka, uyenga kuZalefwate, lize lyapwa lyaShitone, ukatwamenga kuze. Tala, ngunalweze pwevo watuliwe akakulishilenga kuze.”—Vamya. 1, 17:1-9.

Omu Elija ahetele kuZalefwate, amwene pwevo watuliwe ali nakuhokola jitete. Kutala ou pwevo ikiye atelelele kuhana vyakulya ou kapolofweto tahi? Uno atelele kulinga ngachilihi ngocho okunyi apwile wakuhutwa? Numba tuhu Elija apwile nakuhuhwasana numba nge vyuma kana navisoloka, oloze aputukile kushimutwila nauze pwevo watuliwe. Kaha amwambile ngwenyi: “Achingunehele tumeya mumulondo ngunwenga.” Omu amunehelele meya amwambile cheka ngwenyi: “Achingunehele mwane kachihanda kambolo.” (Vamya. 1, 17:10, 11) Chapwile  chachashi kuhana ngeji meya oloze chamukaluhwilile kumuhana mbolo.

Amukumbulwile ngwenyi, “Omu ayoya Kalunga kove Yehova tu, kangweshi nakamboloko, kuvanga mukamo waunga mumulondo, natumaji twatundende musaji. Kaha tala, nguli nakuhokola tutete tuvali mangana ngwingile ngulisungilewo namwanami, tuulye hikufwa.” (Vamya. 1, 17:12) Tutalenu havyuma natulinangula kukushimutwila kanechi.

Ou pwevo watuliwe ejivile Elija kupwa kaIsalele uze evwilenga Kalunga woma. Twejiva ngocho mwomwo ahanjikile ngwenyi, “omu ayoya Kalunga kove Yehova tu.” Chasoloka nge numba tuhu apwile nachinyingi chakutachikiza Kalunga kavaIsalele, oloze kapwile nakumuzachilako mwomwo kavulukile Yehova ngwenyi ‘Kalunga kamiko.’ Atwaminenga muZalefwate, mbaka yize yapwile munganda yaFwenyisha muShitone. Zalefwate yapwile mbaka yize yazalile navatu valemeselenga Mbale. Chipwe ngocho, Yehova amwene vyuma vyamwaza muli ou pwevo watuliwe.

Numba tuhu uze tuliwe wakuhutwa atwaminenga muZalefwate muze mwalisalile vaka-kulemesa makombelo, oloze asolwele lufwelelo. Yehova atumine Elija kuya kuli uze pwevo mangana amukolezeze kaha nawa Elija akawaneko kulya. Mujimbu kana unahase kutunangula vyuma vyavilemu.

Keshi nge vatu vosena vaze valemeselenga Mbale muZalefwate vapwile navilinga vyavipiko. Yehova hakutuma Elija kuli uze pwevo watuliwe chasolola nge eji kumonanga vatu vamichima yamwaza vaze kanda vaputuke kumuzachila. Chikupu vene, “muli vaka-miyachi yosena, ou eji kumwivwanga woma nakulinganga vyuma vyakwoloka, veji kumwitavilanga kuli Kalunga.”—Vili. 10:35.

Mungalila yenu mwatwama vatu vangahi vaze vakwechi vilinga ngana vyapwevo watuliwe wakuZalefwate? Numba tuhu vatwama navatu vaze valemesa kwitava chamakuli, oloze vafwila vyuma vyamwaza. Vatu kana pamo vatwama nachinyingi chachindende chipwe kavatachikiza kanawa Yehovako, ngocho twatela kuvakafwa vatachikize kwitava chamuchano. Kutala munakutondatonda vatu vangana muvakafwe tahi?

Achishinganyekenu kanawa vyuma vize Elija alombele kuli pwevo watuliwe. Uze pwevo watuliwe te namulweze lyehi ngwenyi hanyima yakusunga unga nakulya namwanenyi kaha navafwa. Uno Elija amulwezele ngwenyi yika? “Kanda wivwa womako. Yako ukalinge nganomu unambe, oloze vangila kungusungilako ami kambolo, unguloweleko, kaha numba ulisungile namwanove. Mwomwo Yehova, Ou Kalunga kaIsalele, nambe ngwenyi, ‘Mumulondo unga kaweshi kukahwamoko, kaha musaji maji kaweshi kukatepulukamoko, palanga nakulikumbi lize mwakatuma Yehova vula hamavu.’”—Vamya. 1, 17:11-14.

Vatu vamwe vanahase kuhulisa, ‘Tukuhane kulya chetu chamakumishilo? Atela uli nakuseseka kaha.’ Oloze omu keshi mukiko alingile uze pwevo watuliweko. Numba tuhu apwile nachinyingi chachindende chakutachikiza Yehova, oloze afwelelele mazu ahanjikile Elija nakulinga vyuma amulwezele. Vyuma alombele Elija vyesekele lufwelelo lwayou tuliwe. Oloze asakwile kulinga vyuma vyamwaza.

Kalunga kavulyamine uze pwevo watuliweko. Ngana muze Elija amufwelelesele, Yehova avulishile unga muze mumulondo namaji muze musaji vize vyayoyesele Elija nauze pwevo namwanenyi palanga nomu chakumine chize changa. Chikupu vene, “mumulondo uze unga kawahwilemoko, kaha musaji yize maji  kawatepulukilemoko, nge kutesa nalizu lyaYehova lize ahanjikile muli Elija.” (Vamya. 1, 17:16; 18:1) Nge uze pwevo kapwile nalufweleloko kachi yize mbolo ochele kuunga wapwile mumulondo namaji apwile musaji kachi yapwile yamakumishilo. Oloze afwelelele muli Yehova nakuvangila kuhana Elija kulya.

Chuma natulinangula kumujimbu kanou shina, Kalunga eji kukisulanga vatu vaze navasolola lufwelelo muli yikiye. Yehova mwamikafwa nge namufwelela muli ikiye omu namumona vyeseko vize navisaka kuhonesa kulonga chenu. Mwapwanga Muka-kumihana vyasakiwa mukuyoya, Muka-kumikinga, kaha nawa Sepa lyenu uze mwamikafwanga mulipike navyeseko.—Kulo. 3:13-15.

Mu 1898 Kaposhi Kakutalila uze vavulukilenga ngwavo Zion’s Watch Tower ahanjikile hachihande chou pwevo watuliwe: Nge uze pwevo apwile nalufwelelo nakwononoka Elija, kachi vamukafwile kuli Yehova. Oloze nge kasolwele lufwelelo muli Yehovako, kachi kwapwile tuliwe weka uze asolwele lufwelelo muli ikiye. Chochimwe nayetu nawa. Lwola lumwe Yehova eji kwitavilanga lufwelelo lwetu muli ikiye valweseke. Nge natupwa nalufwelelo, ‘kaha mwatukisula; oloze nge katweshi kupwa nalufweleloko kaha natulujimbalisa.’

Nge tunalitalasana navyeseko kaha twatela kuhulisa Kalunga atutwaminyine kuhichila muVisoneka namumikanda yetu. Kaha nawa twatela kulinga kweseka namuze mwatutetekela Yehova numba tuhu nachipwa chachikalu kukavangiza jishimbi jenyi. Vanahase kutukisula nge natukavangiza mazu amangana aze atwama muchishimo chino ngwawo: “Mufwelelenga Yehova namuchima wove wosena, kanda ukakundamina hakunangakana choveko. Mwitavilenga mweshomwo nauya, kaha Ikiye mwasungamisa jijila jove.”—Vishi. 3:5, 6.

Lufwelelo lwauze pwevo watuliwe valwesekele cheka. Mbimbiliya yamba ngwayo: “Omu vyakumine vyumevi, mwanauze-pwevo mwenyazuvo yize walunga avijile. Musongo wenyi watohwele chikuma, ngocho kahashile kuhwimako.” Hakusaka kutachikiza vyuma vyanehele ukalu kana, naye yauze mwana ahulishile Elija ngwenyi: “Ove mutu waKalunga, unambe kulinga muka nayami? Uneza kuli ami nakwanukisa kuhenga chami nakujiha mwanami!” (Vamya. 1, 17:17, 18) Uno awa mazu ahanjikile namatoto atalishile mulihi?

Uno ou pwevo anukile shili yize yayanjishilenga chivezu chenyi tahi? Uno ashinganyekele ngwenyi kufwa chamwanenyi chapwile kumuzangamisa kuli Kalunga hakuzachisa muluwa wenyi Elija tahi? Mbimbiliya kayatulweza vyuma kanako, oloze twejiva ngwetu uze pwevo watuliwe kahanyine Kalunga mulonga ngwenyi yikiye anehele vyuma vyakuhengako.

Elija atela alikomokelele hakufwa chauze mwana tuliwe namazu ahanjikile uze pwevo ngwenyi kwiza chaElija chikiko chalingishile uze mwana afwenga. Omu Elija akandwishile uze mwana muzuvo yahelu, amusanyikile Yehova ngwenyi, “Ove Kalunga kami Yehova, pwevo watuliwe nawa ou ngunazuzumana nenyi unamumwenesa lupi hakujiha mwanenyi tahi?” Ou Kapolofweto evwile kupihya hakushinganyeka ngwenyi lijina lyaKalunga navalisaula nge ou pwevo walikoji nazumbu mwayanda. Ngocho Elija alembelelele Yehova ngwenyi: “Ove Kalunga kami Yehova, achitave mwane mwono wayou kanyike umwingile cheka.—Vamya. 1, 17:20, 21.

Yehova apwile nakwivwilila. Ou tuliwe asolwele lufwelelo nakuzakama Elija. Kalunga etavishile uze mwana afwenga mwomwo atachikijile ngwenyi kusanguka kanechi chatete chize vasoneka muVisoneka nachikahana vatu vavavulu lutalililo lwakulutwe. Yehova evwilile kulomba chaElija, kaha uze kanyike ayoyele cheka. Achishinganyekenu kuwaha evwile uze pwevo watuliwe omu Elija amulwezele ngwenyi: “Tala, mwanove nayoyo lyehi”! Uze tuliwe alwezele Elija ngwenyi: “Jino ngunatachikiza ngwami, Ove umutu waKalunga vene, ngwami, mazu aYehova amukanwa kove anapu amuchano.”—Vamya. 1, 17:22-24.

Mujimbu watwama hali Vamyangana 1 kapetulu 17 kawahanjika cheka vyou pwevoko. Chipwe ngocho, Yesu ahanjikile vyamwaza hali ou tuliwe, ngocho atela apwile jino ngamba yaYehova wakushishika. (Luka 4:25, 26) Mujimbu wayou pwevo watunangula nge Kalunga eji kukisulanga vatu vaze veji kulinganga mwamwaza kuli vangamba jenyi. (Mateu 25:34-40) Kaha nawa wasolola nge Kalunga eji kuzakamanga vangamba jenyi vakushishika namulwola lwavyeseko. (Mateu 6:25-34) Ou mujimbu wasolola nawa nge Yehova atwama nangolo nakufwila kusangula vafu. (Vili. 24:15) Chikupu vene, evi hivyuma vyavilemu vyatela kutukafwa kwanukanga pwevo watuliwe wakuZalefwate.