1, 2. (a) Wenga weya naukaneha kuwahilila mwilu? (b) Vihula muka natushimutwila?

CHEJI kumbatanga lwola kuwahisa vyawenga. Oloze natushimutwila hawenga uze vanawahisanga hamyaka kafwe 2,000 kunyima. Kalinwomu mwenyamwenga apwenga hamwe namwenga wenyi. Myaso yakwivwisa kuwaha navakayimba muchipango chamwangana, kaha mwilu navakemba ngwavo: “Mwalisenu Ya, mwomwo Yehova Kalunga ketu, ou Wangolo Josena, naputuka lyehi kuyula mwamwangana. Tuwahililenu, tukinyinyinenu nakumutohwesa, mwomwo chilika chaulo waMwanamukoko chinahete lyehi, kaha pwevo lyenyi naliwahisa lyehi.”—Kuso. 19:6, 7.

² “Mwanamukoko” vavuluka muchisoneka chino ikiye Yesu Kulishitu. (Yowa. 1:29) Uno uvwalo wamwenyamwenga naukapwa ngachilihi? Mwenga ikiye iya? Mujila muka mwenga nalizange vyaulo? Lwola muka nakukapwa wenga? Ou ulo naukaneha kuwahilila mwilu. Nyi ngachilihi vaze vakwechi lutalililo lwahano hamavu, kutala navakivo navakawahilila hachilika kanechi chawenga tahi? Tunakufwila kutachikiza mwakukumbulwila vihula kanevi omu natutwalaho lika kulinangula mukanda waSamu 45.

3, 4. (a) Muka-kwimba jisamu ahanjikile ika kutalisa kuuvwalo wahawenga waMwenyamwenga, kaha vyuma muka vyamulingisa awahilile? (b) Veya vapwa “vana vavamyangana” vamapwevo, ‘nalisano’ vaze veji kuwahililanga hamwe naMwenyamwenga?

³ Tangenu Samu 45:8, 9. Mwenyamwenga, Yesu Kulishitu mwavwala uvwalo wenyi wawenga waupahu. Uvwalo wenyi uli nalupengopengo lwakufwana nge “vyuma vyalivumba lyamwaza” vyakufwana nge mila nakasha, maji ajila akuwavisa aze vazachishilenga muIsalele.—Kulo. 30:23-25.

⁴ Myaso yamwilu yize yili nakwimba muchipango chamwenyamwenga yili nakwivwisa Mwenyamwenga kuwaha omu chilika chaulo chinakupandama. Ali nakuwahilila hamwe ‘nalisano,’ kulumbununa liuka lyaKalunga lyamwilu lize likwechi “vana vavamyangana” vamapwevo, vakivo vangelo vajila. Vivumo vyamwilu navimba ngwavyo: “Tuwahililenu, tukinyinyinenu . . . mwomwo chilika chaulo waMwanamukoko chinahete lyehi.”

5. Iya apwa “pwevo lyaMwanamukoko”?

⁵ Tangenu Samu 45:10, 11. Mwenyamwenga twamwijiva, nyi mwenga apwa iya? Ou mwenga emanyinako vaka-Kulishitu vawavisa vakuheta ku 144,000. Kaha Yesu ikiye apwa mutwe wachikungulwilo. (Tangenu Wavaka-Efwesu 5:23, 24.) Ava vawavisa navakayula hamwe naKulishitu muWangana wauMeshiya mwilu. (Luka 12:32) Kaha nawa veji “kukavangizanga Mwanamukoko kweshokwo mwaya.” (Kuso. 14:1-4) Veji kupwanga “pwevo lyaMwanamukoko” nakumukavangiza mwilu kwimbo lyenyi.—Kuso. 21:9; Yowa. 14:2, 3.

6. Mwomwo ika vawavisa vavavulukila ngwavo “mwanamwangana wapwevo,” kaha mwomwo ika vavalwezela ‘kuvulyama vakwavo vatu’?

⁶ Mwenga vamuvuluka ngwavo “Mwanamwangana wapwevo.” (Samu 45:13) Uno ou “mwangana” kana ikiye iya? Ikiye Yehova. Eji kwitavilanga vaka-Kulishitu vawavisa kupwa “vana” venyi. (Loma 8:15-17) Ava vawavisa vavalweza ngwavo: “Vulyama nawa vakwenu vatu, navaze vakuzuvo yaiso.” Hakuwana nge navakapwa mwenga mwilu, ngocho vawavisa vatela kuhaka ‘vishinganyeka vyavo kuvyuma vyamwilu, keshi kuvyuma vyahamavuko.’—Kolo. 3:1-4.

7. (a) Uno Kulishitu nalongesanga ngachilihi mwenga wenyi? (b) Uno mwenga eji kumonanga ngachilihi lunga lyenyi uze mwakamumbata?

⁷ Hamyaka yayivulu, Kulishitu nalongesanga mwenga wenyi vyachilika chawenga chamwilu. Kaposetolo Paulu alumbunwine ngwenyi Kulishitu “azangile chikungulwilo nakulyecha ivene hachikiko, mangana ngwenyi achilingise kupwa chajila nakuchitomesa hakuchisanyisa nameya amazu aKalunga, mangana chikungulwilo achimike kumeso enyi lyavene chaupahu, chakuzeneka lipenga chipwe mukonya chipwe chuma cheka changocho, oloze ngwenyi chipwenga chajila chakuzeneka katenga.” (Efwe. 5:25-27) Paulu alwezele vaka-Kulishitu vawavisa vamuKolinde ngwenyi: “Nguli nakumisungwila nalisungu lyaukalunga, mwomwo ami ngwamishikile kukamihangisa kuli lunga umwe, mangana ngukamimike kumeso aKulishitu nge pwevo utoma uze kanda achilisavaleho lyehi nalunga.” (Koli. 2, 11:2) Hakuwana nge kulemesa chenyi chapwa chitoma kaha nawa vachitavila kuli Kalunga, ngocho Mwangana Yesu Kulishitu amona mwenga wenyi kupwa wamwaza. Mwenga eji ‘kuvumbikanga’ lunga lyenyi uze mwakamumbata nakumwitavila kupwa “mwata” wenyi.

8. Mwomwo ika mwenga vamuvulukila ngwavo ‘waupahu’?

⁸ Tangenu Samu 45:13, 14a. Mwenga vamusolola kupwa ‘waupahu’  mangana ayenga kuwenga wenyi. Hamukanda waKusoloka 21:2, mwenga vamufwanyisa kunganda yaYelusalema Yayihya kaha “vanamuwahishila lunga lyenyi.” Eyi nganda yamwilu yeji kuvyakumanga “naupahu waKalunga,” ngana ‘mwalilolwa lyandando yayinene chikuma, nge lilolwa lyayashipili, lyakuvyakuma nge kulusutalu.’ (Kuso. 21:10, 11) Mukanda waKusoloka wasolola kanawa Nganda yaYelusalema Yayihya. (Kuso. 21:18-21) Echi chikiko chalingisa muka-kwimba jisamu ambenga ngwenyi ou mwenga apwa ‘waupahu.’ Omu mukiko watela kupwa wenga wamwilu.

9. Mwenga navakamutwala kuli “mwangana” muka, kaha mwakavwala uvwalo muka?

⁹ Mwenga navamutwala kuli Mwenyamwenga, ikiye Mwangana wauMeshiya. Napunga nakumuwahisa ‘nakumutomesa hakumusanyisa nameya amazu.’ Apwa ‘wajila wakuzeneka katenga.’ (Efwe. 5:26, 27) Mwenga vatela kumuvwika uvwalo wahawenga. Kaha mukiko vene navwale. Chikupu vene, “kuvwala chenyi vachitunga nakuselula ulu,” kaha “navakamutwala wakuvwala mahina amisululu kuli mwangana.” Mwenga, “vanamwitavisa kuvwala lihina lyamwaza, likejima, lyakuzeneka majilo, mwomwo lihina eli lyamwaza lyemanyinako vilinga vyakwoloka vyavaka-kujila.” Lihina kana mwakalivwala hachilika chaulo chaMwanamukoko.—Kuso. 19:8.

10. Lwola muka nakukapwa chilika chaulo waMwanamukoko?

¹⁰ Tangenu Kusoloka 19:7. Lwola muka nakukapwa chilika chaulo waMwanamukoko? Numba tuhu mukanda waKusoloka 19:7 wahanjika ngwawo “pwevo lyenyi naliwahisa lyehi” vyaulo, oloze jivesi jinakavangizaho kajavuluka vyawengako. Oloze vyasolola vyuma navikasoloka kusongo yamalwa amanene. (Kuso. 19:11-21) Uno echi chalumbununa nge ulo naukapwako shimbu kanda Mwangana akumise kufungulula tahi? Nduma. Vyuma vavulukile chimweza mumukanda waKusoloka kavavisoneka mujila yize navikalikavasanyinamoko. MuSamu 45, Mwangana Yesu Kulishitu mwakambata poko yamukwale nakufungulula vaka-kole jenyi numba jino kukapwe wenga.—Samu 45:3, 4.

11. Mujila muka Kulishitu mwakakumisa kufungulula chenyi?

¹¹ Twalinangula muMbimbiliya nge vyuma tunavuluka navikasoloka mukulikavasana. Chakavanga navakafumisako “pwevo waujila chikuma,” Mbavilone Yayinene uze apwa kwitava chamakuli chamukaye kosena. (Kuso. 17:1, 5, 16, 17; 19:1, 2) Kufumaho, Kulishitu mwakanongesa kaye kaSatana haAlamangetone “jita yahalikumbi lyalinene lyaKalunga Wangolo Josena.” (Kuso. 16:14-16; 19:19-21) Chamakumishilo, Mwangana mwakakumisa kufungulula chenyi hakumbila Satana navandemone jenyi muwina wakuzeneka kukuma, mangana vakahone kuhungumwisa vatu. Kupwa chavo muwina nachikapwa kwijiva nge vanafu.—Kuso. 20:1-3.

12, 13. (a) Lwola muka nakukapwa chilika chaulo waMwanamukoko? (b) Veya navakawahilila mwilu hachilika chaulo waMwanamukoko?

¹² Mumakumbi akukuminyina, vaka-Kulishitu vawavisa vaze navatwalaho lika kupwa vakushishika palanga nakukufwa veji kuvasangulanga nakuya mwilu. Kufuma haze navakanongesa Mbavilone Yayinene shimbu kanda Alamangetone, Kulishitu mwakakumisa kukungulula vaka-Kulishitu vawavisa vosena vamulizavu lya 144,000 nakupwa nayikiye mwilu. (Teso. 1, 4:16, 17) Omu nayikakuma Alamangetone, hakiko jino nakukapwa chilika chaulo waMwanamukoko. Ocho kuwaha kana nachikapwako hachilika chaulo waMwanamukoko! Mukanda waKusoloka 19:9, wamba ngwawo: “Vawahilila vaze vanasanyika kukulya chachingoloshi kuchilika chaulo waMwanamukoko.” Chikupu vene  Mwenyamwenga mwakawahilila hachilika chenyi. Ou Mwangana mwakawahilila hakupwa hamwe navawavisa vosena mwilu. (Luka 22:18, 28-30) Mwenga naMwenyamwenga keshi vakivo kaha navakawahililako.

¹³ Ngana muze twevwanga kumaputukilo, mwilu navakemba myaso ngwavo: “Tuwahililenu, tukinyinyinenu nakumutohwesa [Yehova], mwomwo chilika chaulo waMwanamukoko chinahete lyehi, kaha pwevo lyenyi naliwahisa lyehi.” (Kuso. 19:6, 7) Nyi ngachilihi vangamba jaYehova vahano hamavu? Uno kutala navakivo navakalivwisa kuwaha hachilika kana tahi?

14. Ngana muze vavuluka hamukanda waSamu 45, veya vapwa “vajike vakwavo” vamwenga?

¹⁴ Tangenu Samu 45:12, 14b, 15. Kapolofweto Zekaliya apolofwetele ngwenyi hamakumbi akukuminyina, vatu vosena mukaye navakevwa kuwaha kuzachila Yehova hamwe kaha navasalaho vawavisa. Asonekele ngwenyi: “Kumakumbi aze nachikasoloka, nakukalinjilila malunga likumi vakumalimi avaka-mafuchi osena, navakalinjilila sanya yamutu wakaYuleya ngwavo, ‘Natuya nayenu hamwe, mwomwo tunevu ngwavo, Kalunga ali kuli enu, shikaho.’” (Zeka. 8:23) Hali Samu 45:12, ava “malunga likumi” vemanyinako “mwanaTule” wapwevo ‘navatu vaka-luheto.’ Veji kuhananga vawavisa mawana mangana vavevwile uselewa nakuvakafwa vazachile Yehova. Kufuma vene mu 1935, vasalaho vawavisa vananehenga vatu vavavulu “kukwoloka,” kulumbununa nge vatu vavavulu vanavanangula muchano waYehova. (Ndanye. 12:3) Ava “malunga likumi” vapwa vakulyononona kuli vaka-Kulishitu vawavisa nakutomesa kuyoya chavo kufuma kukunangula chamakuli chosena. Evi  vikiko vavavulukila ngwavo “vajike vakwavo.” Valihana kuli Yehova nakusolola ngwavo vapwa vangamba vakushishika vaMwangana Yesu Kulishitu.

15. Uno “vajike vakwavo” vanazachilanga ngachilihi hamwe navasalaho vawavisa?

¹⁵ Vasalaho vawavisa veji kusakwililanga chikuma ava “vajike vakwavo” mwomwo vali nakuvakafwa kuzata chikuma mulimo wakwambulula “mujimbu wamwaza waWangana” kumavu kwosena. (Mateu 24:14) Keshi kaha “shipilitu namwenga veji kwambanga ngwavo: ‘Twaya!’” oloze navaze veji kwivwangako veji kwambanga ngwavo: “Twaya.” (Kuso. 22:17) Echi chalumbununa nge “mikoko veka” vanevu omu vawavisa vali nakwambanga ngwavo “twaya” kaha vanalinungu navakivo hamwe nakulweza vatu vamukaye kosena ngwavo ‘twayenu.’—Yowa. 10:16.

16. Kutokwa muka Yehova ahana mikoko veka?

¹⁶ Vasalaho vawavisa vazanga mikoko veka. Veji kwivwanga kuwaha hakwijiva ngwavo Yehova ahana mikoko veka kutokwa chakwazana mukuwahilila chaulo waMwanamukoko. Vavulukile chimweza ngwavo ava “vajike vakwavo” “navakavaneha nakuwahilila nakukinyinyina.” Eyo, namikoko veka vaze vakwechi lutalililo lwakukayoyela hamavu myaka yosena navakivo navakawahilila omu chilika chaulo waMwanamukoko nachikapwako. Mukanda waKusoloka wasolola “liyongomena lyalinene” lyavaze veji kuzachilanga Yehova hano hamavu “vanemana kulutwe lwalitanda, nakumeso aMwanamukoko.” Veji kuzachilanga Yehova muchipango chenyi chatembele yakushipilitu yahano hamavu.—Kuso. 7:9, 15.

17, 18. Uno ulo waMwanamukoko naukanganyalisa ngachilihi vaze navakapwa mukaye kakahya, kaha Kulishitu mwakapwa ise yaveya muChiyulo chenyi chaMyaka Likombakaji?

¹⁷ Tangenu Samu 45:16. “Vajike vakwavo” navakawahilila chikuma omu ou ulo naukaneha vyuma vyamwaza mukaye kakahya. Mwangana Yesu Kulishitu mwakasangula “vaise” chipwe ngwetu vakakuluka jenyi vaze jino navakapwa “vana” venyi hano hamavu. (Yowa. 5:25-29; Hepe. 11:35) Kulishitu mwakasakulaho vamwe kupwa “vaka-kulitulaho kumavu kwosena.” Twafwelela nawa ngwetu mwakatongola navakulwane vamwe vakushishika vamakumbi ano mangana vakatwaminyinenga mukaye kakahya.—Isa. 32:1.

¹⁸ MuChiyulo chenyi chaMyaka Likombakaji, Kulishitu mwakapwa nawa ise yavatu veka. Mujila muka? Vosena vaze vafwelela mundando yakusokola yaYesu navakayoya myaka yosena hano hamavu. (Yowa. 3:16) Ngocho mwakapwa jino “Sevo yamyaka yosena.”—Isa. 9:6, 7.

19, 20. Uno vyuma vavuluka hamukanda waSamu 45 vyalingisa vaka-Kulishitu valinge vyuma muka?

¹⁹ Tangenu Samu 45:1, 17. Vaka-Kulishitu vosena vatela kuhaka mangana kuvyuma vasoneka hamukanda waSamu 45. Vawavisa vaze vachili hano hamavu veji kwivwanga kuwaha hakwijiva ngwavo kalinwomu vayenga mwilu nakulinunga hamwe naMwenyamwenga. Mikoko veka vafwila lika kwononoka kuli Mwangana wavo. Kaha nawa vawahilila hakulikata navawavisa vaze vemanyinako mwenga vaze vachili hano hamavu. Kukisula chize Kulishitu naMwenga wenyi navakaneha hano hamavu hanyima yakulimbata chavo, nachikapwa chachinene chikuma.—Kuso. 7:17; 21:1-4.

²⁰ Omu tuli nakutalilila kutesamo chaupolofweto wahanjika vyaMwangana wauMeshiya tweji kufwilanga chikupu kutandakanyisa lijina lyenyi. Ngachize, twalisenu Mwangana “haya myaka namyaka.”