1. Uhashi muka twatwama nawo hakututenga muchifwanyisa chaKalunga?

HANJIKISO yakwamba ngwavo “mwaIse mwaMwana” vayizachisa kuswakumwe. Vana vavavulu valifwana chikuma navisemi javo. Mwana himwana eji kutambulangako vilinga vimwe kuli naye naise. Setu wamwilu Yehova ikiye atuhana kuyoya. (Samu 36:9) Hakupwa tuvana venyi twalifwana nayikiye mujijila jimwe. Hakuwana nge vatutenga muchifwanyisa chenyi, ngocho twatwama nauhashi wakushinganyeka, nakusakula vyakulinga, nakutunga usepa wakukola nayikiye.—Kupu. 1:26.

2. Uno usepa wetu naYehova wapendamina haka?

² Yehova nahase kupwa sepa lyetu wamwenemwene. Tunahase kupwa tumasepa jenyi mwomwo yazangi yenyi nakufwelela muli ikiye namuli Mwanenyi. Yesu ambile ngwenyi: “Mwomwo Kalunga azangile chikuma kaye ngocho ahanyine mwanenyi umwe kaha wakulipwila, mangana ngwenyi wose mwasolola lufwelelo muli ikiye vakahone kumunongesa, oloze akapwe nakuyoya chahaya myaka yosena.” (Yowa. 3:16) Kwatwama vyakutalilaho vyavivulu vyavatu vaze vatungile usoko wakukola naYehova. Tuchikekesenu havyakutalilaho vyavatu vavali.

3, 4. Chuma muka chalingishile usepa waApalahama naYehova ulihandunune nausepa wavaIsalele naYehova?

³ Yehova avulukile Apalahama kakuluka yavaIsalele ngwenyi “sepa lyami Apalahama.” (Isa. 41:8) Mukanda waMijimbu 2, 20:7  naukiko wavuluka Apalahama kupwa sepa lyaKalunga. Chuma muka chalingishile Apalahama apwenga nausepa wakukola naTengi yenyi? Chuma kana shina lufwelelo lwenyi lwakukola.—Kupu. 15:6; tangenu WaYakova 2:21-23.

⁴ Vana vaApalahama vaze vejile nakupwa muyachi waIsalele navakivo Yehova apwile Sevo kaha nawa Sepa lyavo. Chaluvinda vajimbalishile usepa wavo naKalunga. Mwomwo ika? Mwomwo vahonene kutwalililaho kufwelela mujishiko jaYehova.

5, 6. (a) Uno Yehova apwa ngachilihi Sepa lyenu? (b) Vihula muka vize twatela kulihulisa?

⁵ Nge namulinangula chikuma vyaYehova kaha lufwelelo lwenu naluzama nakumuzanga chikuma. Achishinganyekenu halwola lwatete luze mwalinangwile nge Kalunga apwa mutu nahenyi kaha nahase kupwa sepa lyenu. Mwalinangwile cheka nge tuvosena twasemuka nashili yize yeza mwomwo yakulikanga chaAlama. Mwejile nakwivwishisa nge vatu vosena vasosoloka kuli Kalunga. (Kolo. 1:21) Kufumaho mwejivile jino ngwenu Setu wazangi wamwilu atwama hakamwihi nayetu kaha nawa eji kutuzakamanga. Omu twalinangwile vyandando yakusokola yaYesu nakusolola lufwelelo mundando kana, twaputukile kutunga usepa naKalunga.

⁶ Omu natushinganyeka omu twejile nakutachikiza Yehova, twatela kulihulisa ngwetu: ‘Kutala usepa wami naKalunga uli nakutohwelako lika tahi? Kutala ngweji kufwelela chikuma muli Sepa lyami Yehova nakutwalaho lika kumuzanga hakumbi hakumbi tahi? Mutu mukwavo wakushikulu uze apwile nausepa wakukola naYehova shina Ngiteyone. Tutalenu jino hachakutalilaho chenyi chamwaza chize twatela kukavangiza.

7-9. (a) Vyuma muka vyakulipwila amwene Ngiteyone kaha vyuma muka vyafuminemo? (Talenu muvwimbimbi wakulivanga.) (b) Tunahase kutunga ngachilihi usepa wakukola naYehova?

⁷ Muka-kuyula Ngiteyone azachilile Yehova mulwola lwalukalu omu vaIsalele vengilile muLifuchi lyaLushiko. Mukanda waVaka-kuyula wamba nge kangelo kaYehova alisolwele kuli Ngiteyone kuOfwola. Halwola kana luze vaMichane vaze valihachile navo vevwishilenga woma vaIsalele. Mwomwo yachuma kana, Ngiteyone apwile nakuzungula tiliku muchikamwino chavinyo mangana chipwenga chachashi kuyisweka muchishishisa chakukamwina hatoma. Ngiteyone alikomokelele hakumona kangelo kaYehova mwalisolola kuli ikiye nakumusanyika ngwenyi “ove chindume waungazule.” Numba tuhu Yehova ayowele vaIsalele kufuma muEjipitu, oloze Ngiteyone akakasanyine numba nge Yehova mwavakafwa halwola kana. Kangelo uze apwile nakuhanjikilako Yehova amwambile ngwenyi Yehova mwamukafwa Ngiteyone.

⁸ Ngiteyone katachikijile omu ‘mwakalwila vaIsalele kufuma mumavoko avaMichaneko.’ Yehova amwambile ngwenyi: “Chamwenemwene nangupwanga nove, kaha naukavaveta vaMichane nge mutu umwe kaha.” (Kuyu 6:11-16) Chipwe ngocho, Ngiteyone alwezele kangelo amuhane chinjikizo chakufuma kuli Kalunga. Nyingililenu ngwenu mukushimutwila chino Ngiteyone kahuhwasanyine ngwenyi Yehova kapwile mutu nahenyiko, oloze amumwene kupwa Mutu nahenyi.

⁹ Vyuma vyakavangijileho vyazamishile lufwelelo lwaNgiteyone nakumupandamisa chikuma kuli Kalunga. Ngiteyone awahishile vyakulya nakuvihana kuli Kangelo. Kufumaho kangelo ochele chize kulya namukombo wapwile mulivoko lyenyi mujila yakukomwesa. Omu Ngiteyone atachikijile ngwenyi chikupu vene ou kangelo vamutumine kuli Yehova, alizuzukilile nawoma. Kaha Ngiteyone ambile ngwenyi: “Ove Mwata Yehova, mama lelo kuli ami, mwomwo ngunamumono kangelo kaYehova meso nameso, shikaho!” (Kuyu. 6:17-22) Kutala chuma amwene Ngiteyone chajihile usepa wenyi naKalunga tahi? Nduma! Usepa wenyi naYehova wazamine jino chikuma. Ngiteyone ejivile Yehova, kaha chamulingishile apwenga wakuunda naKalunga. Twejiva ngocho mwomwo lijiko lyakulumbila lize atungile kuchihela kana  alivulukile ngwenyi “Yehova-shalome,” kulumbununa nge “Yehova Ikiye Kuunda.” (Tangenu Vaka-kuyula 6:23, 24.) Nge natushinganyekanga havyuma vize Yehova anakutulingila hakumbi hakumbi, kaha natutachikiza ngwetu apwa chikupu Sepa wamuchano. Nge natulombanga kuli Kalunga hakumbi hakumbi, kaha natupwa mukuunda kaha nawa usepa wetu nayikiye nauzama mbe.

10. Kweseka naSamu 15:3, 5, vyuma muka Yehova asaka tulingenga numba tupwenga tumasepa jenyi?

¹⁰ Hakusaka tupwenga masepa jaYehova, twatela kulingako vyuma vimwe. Nge muze vasoneka hamukanda waSamu 15, Ndavichi avulukile vyuma vize twatela kulinga numba tupwenga ‘mumbalaka yaYehova,’ chipwe ngwetu kupwa masepa jaKalunga. (Samu 15:1) Tuchitalenu havyuma vivali vize twatela kulinga, kulihenda kumakuli nakuhanjikanga muchano muvyuma vyosena. Ndavichi ahanjikile vyamutu uze navetavila kuli Yehova kutwamanga mumbalaka yenyi ngwenyi: “Ou akana kuvangila mukwavo nalilimi lyenyi. . . . Chipwe kutambula maswekeza mangana apayise ou azeneka chuma chakumuhanyina mulonga.”—Samu 15:3, 5.

11. Mwomwo ika twatela kulihenda kukuhanjika makuli hali vakwetu?

¹¹ Musamu yikwavo Ndavichi ahuhumuna ngwenyi: “Kinga lilimi lyove kufuma kukupihya.” (Samu 34:13) Nge natuhona kukavangiza mazu kana awa vahwima, kaha nachijiha usepa wetu naSetu wamwilu. Kaha nawa makuli apwa hivilinga vyamuka-kole wamunene waKalunga, Satana. Lizu “Liyavolo” lyafuma kulizu lyachiHelase lize lyalumbununa “muka-lusongi.” Nge natusakulanga kanawa mazu hakuhanjika navakwetu, kaha natulama usoko wetu naYehova. Echi chapwa chachilemu chikumanyi nge natusolola muchima wamwaza kuli malunga vatongola muchikungulwilo.—Tangenu WavaHepeleu 13:17; WaYuta 8.

12, 13. (a) Mwomwo ika twatela kupwa vakashishi muvyuma vyosena? (b) Kupwa nakashishi cheji kulingisanga vatu veka valinge ika?

¹² Vangamba jaYehova vavejiva kupwa vatu vakashishi. Kaposetolo Paulu asonekele ngwenyi: “Twalenuho lika nakutulombelako, mwomwo tunafwelela ngwetu tuli nachivezu chakashishi omu tuli nakusaka ngwetu tutwamenga nakashishi muvyuma vyosena.” (Hepe. 13:18) Hakuwana nge twafwila kutwama “nakashishi muvyuma vyosena,” ngachize tweji kulihenda kumuchima wakwonga vandumbwetu. Chakutalilaho, nge natuhana vandumbwetu milimo, kaha twatela kuvazachisa kanawa nakuvafweta kweseka nachivwasano. Hakupwa tuvaka-Kulishitu, tweji kupwanga vakashishi kuli vatu vaze veji kutuzachilanga nakuli vatu vosena. Nge vanatwingisa milimo kuli ndumbwetu, kaha katwatela kuzata nauvwa nakushinganyeka ngwetu nevi mwatulinga vyauchi.

¹³ Kakavulu vatu muno mukaye veji kusangejeka Vinjiho jaYehova mwomwo yakushishika chavo. Chakutalilaho, muka-kutwaminyina kapani yayinene yize yatala hakutungatunga ahanjikile ngwenyi Vinjiho jaYehova veji kutesangamo vyuma veji kushikanga, kaha ambile ngwenyi: “Lwola lwosena mweji kulamanga jishiko jenu jakulinga vyuma.” (Samu 15:4) Vilinga vyangana vyeji kutukafwanga tulame usepa wetu naYehova. Kaha nawa cheji kwivwisanga Setu wamwilu kuwaha.

14, 15. Tunahase kukafwa ngachilihi vatu mangana vapwenga masepa jaYehova nge tuli mumulimo wamuwande?

¹⁴ Numba tuhu vatu tweji kuwananga muwande vafwelela ngwavo Kalunga kwatwama, oloze kavamumona kupwa Sepa lyavo wamwenemweneko. Tunahase kuvakafwa ngachilihi? Tuchitalenu hajindongi jize Yesu ahanyine tumbaji twenyi 70 hakuvatuma kuya nakwambulula. Ambile ngwenyi: “Mweshomwo muzuvo namwingila vangilenu kwamba ngwenu: ‘Muzuvo yino mupwenga kuunda.’ Kachi nge kamweshi mutu  asaka kuundako, kaha nachihiluka cheka kuli enu vavene. Oloze nge mwali, kaha kuunda chenu nachitwama hali ikiye.” (Luka 10:5, 6) Vatu vanahase kutwivwilila nge natuvasolwela chisambo. Nge natusolwela likoji vaze vali nakutwimanyina nakole, kaha nachivalingisa vaunde muchima nakukevwilila kumujimbu wamwaza halwola lukwavo.

¹⁵ Omu natuwana vatu vaze veji kuyanga mukwitava chamakuli chipwe vaze vali nakukavangiza visemwa vize vyalimbalaka naVisoneka, yetu twatela kutwalaho lika kuvasolwela chisambo nakuunda. Tweji kutambwokesanga vatu vosena vaze veji kwizanga kukukunguluka chetu, chikumanyi vaze vanahombo navyuma vili nakusoloka muno mukaye vaze vali nakusaka kulinangula vyavivulu hali Kalunga tweji kulemesanga. Vihande vyakwamba ngwavo “Mbimbiliya Yeji Kwalumunanga Kuyoya chaVatu” vyamumangazini yino vyatwama navyakutalilaho vyavivulu vyavatu vangana.

16. Mujila muka tunahase kupwa masepa jaYehova kaha nawa ‘vakwavo mutwazachila hamwe’?

¹⁶ Kakavulu, vatu vaze veji kuzachilanga hamwe halwola lwaluvulu veji kupwanga nausepa wakukola chikuma. Vosena vaze valihana kuli Yehova vatwama nakutokwa chakupwa masepa jenyi kaha nawa vakwavo ‘muvazachila hamwe.’ (Tangenu Wavaka-Kolinde 1, 3:9.) Omu tweji kwambululanga mujimbu nakutunga tumbaji, tweji kulinangulanga vyavivulu kupandama kuvilinga vyaSetu wamwilu. Tweji kumonanga omu shipilitu yenyi yajila yeji kutukafwanga twambulule mujimbu wamwaza.

17. Mujila muka kukunguluka chachihanda nachangalila chasolola nge Yehova apwa Sepa lyetu?

¹⁷ Nge natwazananga chikuma mumulimo wakwambulula, kaha natupandama chikuma kuli Yehova. Tweji kumonanga omu Yehova eji kuhonesanga vaka-kole jetu vaze vasaka kuhonesa mulimo wetu wakwambulula. Yehova napunga lika nakututwaminyina, kaha tunalikomokela mujila muze ali nakutunangwilamo kuhichila mukukunguluka namumikanda yetu. Omu tweji kupwanga kukukunguluka chachihanda nechi changalila, tweji kumonanga ngwetu Yehova atachikiza ukalu wetu navyuma twasaka. Hakukumisa kukunguluka changalila, tanga yimwe yasakwililile hakukunguluka kana nakwamba ngwavo: “Kukunguluka kana chinatukwate chikuma kumuchima. Twamwene ngwetu Yehova atuzanga mutu himutu kaha nawa asaka tufukilenga.” Hanyima yakukunguluka changalila chakulipwila chapwile kuIreland, valunga napwevo vaze valimbata vakulifuchi lyaGermany vahanjikile ngwavo vasakwililile chikuma mujila muze vavatambwililemo nakuvazakaminamo. Vambile nawa ngwavo: “Twasakwilila chikumanyi Yehova naMwangana atongola Yesu Kulishitu. Vanatusanyika tupwenga mutanga yimwe yakulinunga yamukaye kosena. Katweshi nakuhanjika kaha hakulinungako, oloze tuli nakulivwisacho  kuwaha hakumbi hakumbi. Vyuma twakalivwishile kuwaha kukukunguluka changalila muDublin navitwanukisanga lika kutokwa twatwama nacho chakuzachila Kalunga ketu wakulitulaho.”

18. Chihula muka twatela kulihulisa kupandama kukulihanjikisa naYehova?

¹⁸ Usepa weji kuzamanga chikuma nge vasepa namutu navalihanjikisanga mujila yamwaza. Makumbi ano vatu veji kuzachisanga chikuma Internet nakulisonekela mijimbu. Uno echi chalifwana ngachilihi najila tweji kulivwasanyinangamo naSepa lyetu wamwenemwene Yehova? Chikupu vene Kalunga “eji kwivwililanga kulomba.” (Samu 65:2) Mapapa kangahi tweji kuhanjikanga naYehova?

19. Vyuma muka navitukafwa nge cheji kutukaluhwilanga kulweza Setu wamwilu ukalu wetu?

¹⁹ Vangamba jaYehova vamwe cheji kuvakaluhwilanga kuhanjika ukalu wavo. Oloze Yehova asaka tumulweze ukalu wetu wosena hakulomba. (Samu 119:145; Lungu. 3:41) Nge cheji kutukaluhwilanga kuwana mazu akulweza Yehova ukalu wetu, kaha mazu ahanjikile Paulu nawatukafwa. Paulu asonekelele vaka-Kulishitu vamuLoma ngwenyi: “Ukalu uze twatela kulombela kweseka nomu twatela kulomba, etu katwautachikijileko, oloze shipilitu yivene yeji kutulembelelangako hakulikemenena chetu natuhona kutufula mazu. Kahou eji kutalatalanga mumichima natachikiza omu yinatwale shipilitu, mwomwo yili nakuvalembelelako vaka-kujila kweseka nomu mwaya muchima waKalunga.” (Loma 8:26, 27) Kutanga mikanda yamuMbimbiliya yakufwana nge yaYopa, Samu, naVishimo nayitukafwa kuwana mazu akuzachisa hakulweza Yehova ukalu wetu.

20, 21. Kuvendejeka muka chatwama mumazu aPaulu atwama hamukanda Wavaka-Fwilipi 4:6, 7?

²⁰ Nge natumona ukalu, kaha twatela kwanuka mazu aPaulu asonekelele Vaka-Fwilipi ngwenyi: “Kanda namulizakamina hachuma numba chimweko, oloze muvyuma vyosena, hakulomba kaha nawa nahakulomba mujila yakulembelela hohamwe nahakusakwilila, mulwezenunga Kalunga vyuma munakusaka.” Nge natulomba kuli Yehova mujila kaneyi, kaha natujikiza. Paulu asonekele ngwenyi: “Kuunda chaKalunga chize chahambakana kunangakana chosena nachikinga michima yenu navishinganyeka vyenu kuhichila muli Kulishitu Yesu.” (Fwili. 4:6, 7) Twatela kusakwililanga ‘kuunda chaKalunga’ chize cheji kukinganga michima yetu navishinganyeka vyetu.

²¹ Kulomba cheji kutukafwanga tuzamise usepa wetu naYehova. Ngachize, tutwalenuho lika ‘kulombanga shimbu yosena.’ (Teso. 1, 5:17) Twatela kutwalaho lika kuzamisa usepa wetu naKalunga nakulinga vyuma vize mwatulweza. Kaha nawa tuwanenungako lwola lwakuhunanana havyuma vize vyamwaza tuli nakulivwisa kuwaha mwomwo Yehova apwa Setu, Kalunga ketu, kaha nawa hiSepa lyetu.