YESU KULISHITU ambile ngwenyi: “Yakonga kumahyove kuli vausoko wove, ukavambulile vyuma vyosena nakulingila Yehova nomu nawa nakutetela.” Mazu kana awahanjikile kuli lunga uze asakile kupwa muka-kumukavangiza kuNgatalya kusulo yaChijiva ChakuNgalileya. Mazu aYesu asolola nge atachikijile muchima twatwama nawo etu vatu wakuzanga vausoko.—Mako 5:19.

Tweji kumonanga muchima kanou makumbi ano, numba tuhu visemwa vimwe vyeji kusololanga chikuma muchima kanou kuhambakana visemwa vikwavo. Ngocho, omu mutu mwapwa muka-kuzachila Kalunga wamuchano Yehova, eji kufwilanga kwambulilako vausoko wenyi. Uno nahase kuvambulila ngachilihi? Nahase kuheta ngachilihi kumichima yavausoko vaze vatwama mukwitava cheka? Mbimbiliya yatuhana jindongi jakutukafwa.

Mulikulukaji lyamyaka lyakulivanga, Andelei ikiye watete kutachikiza Yesu kupwa Meshiya. Kaha alwezeleko iya? Mbimbiliya ngwayo: “Chatete [Andelei] avangilile kuwana ndumbwenyi Shimona nakwamba kuli ikiye ngwenyi: ‘Tunamuwane Meshiya’ (kulyalumuna linalumbununa ngwavo, Kulishitu).” Andelei atwalile Petulu kuli Yesu, ngocho amukafwile Petulu apwenga kambaji kaYesu.—Yowa. 1:35-42.

Kafwe myaka 6 yahichilemo omu Petulu apwile nakutwama muNjopa, vamusanyikile kuya kuKesaliya kuzuvo yakapitau kamaswalale, Kolonelyu. Veya awanyine Petulu muzuvo yayou kapitau? Mbimbiliya ngwayo: “Kolonelyu apwile nakuvavandamina [Petulu navaze apwile nakutambuka navo], oku hanakungulula lyehi vausoko wenyi namasepa jenyi vaze alizangilenga navo.” Ngachize Kolonelyu ahanyine vausoko wenyi lwola lwakwivwilila kuli Petulu nakusakula vyakulinga kweseka navyuma vevwile.—Vili. 10:22-33.

 Vyuma muka natulinangula kuli Andelei naKolonelyu mujila vazakaminyinemo vausoko wavo?

VaAndelei naKolonelyu valingileko vyuma vimwe. Andelei atwalile Petulu kuli Yesu, kaha Kolonelyu nawa awahishile vyuma mangana vausoko wenyi vevwilile vyuma apwile nakuhanjika Petulu. Oloze Andelei naKolonelyu kavashinyinyikile vausoko wavo chipwe kuzachisa mazu akuzangama mangana navakivo vapwenga vaka-kukavangiza Kulishituko. Kutala munalinangulako chuma chimwe tahi? Nayetu tunahase kulinga ngana muze alingile Kolonelyu naAndelei. Nayetu nawa tunahase kulwezako vausoko wetu vyuma twafwelela. Wanenu jijila munahase kushimutwilamo kanawa navausoko wenu mangana valinangule muchano nakutachikiza vandumbwetu. Chipwe ngocho, katweshi kuvashinjila muvyuma navasaka vavene kulingako. Hakusaka twivwishise kanawa omu tunahase kukafwa vausoko wetu, tutalenu hachakutalilaho chaJürgen naPetra, valunga napwevo valimbata vakuGermany.

Petra apwilenga nakulinangula Mbimbiliya naVinjiho jaYehova, kaha kutwala muze vamumbapachishile. Lunga lyenyi apwile kapitau kamaswalale. Hakavanga, lunga lyenyi Jürgen kawahililile omu puwenyi apwile chinjihoko. Oloze kutwala muze, amwene ngwenyi Vinjiho veji kwambululanga muchano wamuMbimbiliya. Ngocho nayikiye alihanyine kuli Yehova, kaha oholyapwa apwa mukulwane muchikungulwilo. Vyuma muka eji kuhanjikanga kutalisa kukuheta kumuchima wavausoko vaze vatwama muliuka lyeka?

Jürgen ambile ngwenyi: “Katwatela kuvashinjila nakuvalweza vyuma vyavivulu vyakushipilituko. Kulinga ngocho nachilingisa vahone kwalumuka. Oloze nachiwaha nge namuvalwezanga tuvihande tumwe twamwaza hakumbi hakumbi. Kaha nawa nachipwa chamwaza kulweza vausoko wetu vatachikize vandumbwetu vakwechi myaka yimwe navakivo kaha nawa vasaka vyuma vize vasaka vakivo. Echi chinahase kuvakafwa vaputuke kuzanga muchano.”

Kaposetolo Petulu navausoko waKolonelyu vetavilile washi muchano wamuMbimbiliya. Kaha vatu veka vamulikulukaji lyamyaka lyakulivanga vaze valinangwile muchano, vambachile tando yayisuku numba vasakule vyakulinga.

Vausoko jaYesu vamwe vafwelelele muli ikiye halwola luze apwilenga nakwambulula mujimbu. Chakutalilaho, chasoloka nge kaposetolo Yakova naYowano vapwile vasonyi jaYesu kaha nevo Salome apwile isepwevo. Ou isepwevo atela nayikiye apwile hakachi kamapwevo “veka vavavulu vaze vapwile nakuvazachila [Yesu navaposetolo] navyuma vyavo.”—Luka 8:1-3.

Oloze vausoko vakwavo kavafwelelele muli Yesu hahaze veneko. Chakutalilaho, omu mwahichile mwaka umwe kufuma hakumumbapachisa, liyongomena lyalikungulwile muzuvo nakwivwilila vyuma apwile nakunangula. “Oloze omu vausoko wenyi vevwile vyuma vyapwile nakulingiwa, vayile kuze ngwavo vakamukwate, mwomwo vapwile nakwamba ngwavo: ‘Nakindama.’” Halwola lukwavo nawa omu vandumbwenyi vamuhulishile vyaungeji wenyi, kavakumbulwile hatomako. Mwomwo ika? Mwomwo “vandumbwenyi kavasolwele lufwelelo muli ikiyeko.”—Mako 3:21; Yowa. 7:5.

Vyuma muka natulinangula mujila muze Yesu ayoyelelemo navausoko wenyi? Kapihililileko omu vamwe vamwambile ngwavo nakindama. Nahanyima yakufwa nakusanguka chenyi, Yesu atwalilileho lika kukolezeza vausoko wenyi hakusoloka kuli ndumbwenyi Yakova. Kusoloka kana kachakafwile kaha Yakovako oloze chakafwile navasongo jenyi vakwavo vatachikize  chikupu ngwavo apwile Meshiya. Vapwile hamwe navaposetolo veka muzuvo yahelu muYelusalema kaha vatambwile shipilitu yajila. Hakuhita chalwola Yakova naYuta uze apwile ndumbu yaYesu mukwavo vatwalileho lika kuzata milimo yaKalunga.—Vili. 1:12-14; 2:1-4; Koli. 1, 15:7.

Ngana muze chapwile mulikulukaji lyamyaka lyakulivanga, navausoko vamwe veji kumbatanga lwola lwalusuku numba vawane jila yakuya kukuyoya. Chakutalilaho, lunga lyaRoswitha vamumbapachishile nakupwa Chinjiho chaYehova mu 1978. Halwola kana Roswitha apwilenga Muka-Katolika watwima. Hakavanga apwilenga nakufumbukila lunga lyenyi mwomwo yakupwa chinjiho. Oloze mukuhita chamyaka, amwene ngwenyi Vinjiho vapwile nakunangula muchano, ngocho alitwaminyine kufumbukila lunga lyenyi. Kuheta mu 2003 Roswitha vamumbapachishile. Vyuma muka vyamwalumwine? Muchishishisa chakupihilila mwomwo yakumuhunga kuli puwenyi, oloze ikiye amuhanyine lwola mangana alumune vishinganyeka vyenyi. Mazu muka ahanjikile? Ambile ngwenyi: ‘Munahase kukafwa vakwenu hakuvatalilila chikoki.’

Monika vamumbapachishile mu 1974, kaha vana venyi vamalunga vavali vapwile Vinjiho omu mwahichile kafwe myaka 10. Numba tuhu lunga lyenyi Hans, kavafumbukilileko, oloze kuheta mu 2006 nayikiye vamumbapachishile. Uno eyi tanga yatukolezeza ngachilihi? vambile ngwavo: “Twalenuho lika kwononoka kuli Yehova kaha kanda kumbila lufwelelo lwenuko.” Chapwile chachilemu kulweza Hans ngwavo navamuzanganga lika. Kaha vapwile nalufwelelo ngwavo kulutwe namakumbi mwakalumuka.

Lwola lumwe, Yesu alumbunwine ngwenyi muchano wapwa nge meya aze eji kutwalanga kukuyoya chamyaka yosena. (Yowa. 4:13, 14) Twasaka vausoko wetu valihizumune hakunwa meya amuchano atuta kaha nawa atoma. Chikupu vene katweshi nakutonda vaswame meya kana hakuvanwisawo lumbushi chipwe kuvashinjilawoko. Jila tweji kuvalumbunwinangamo lufwelelo lwetu yinahase kuvahizumuna chipwe kuvaswamisa. Mbimbiliya yamba ngwayo, “muchima wamuka-kwoloka naushinganyeka mwakukumbulwila,” kaha “muchima wamuka-mangana weji kunangulanga kanwa kenyi, Nakuhakilako kunanguka kumivumbo yenyi.”—Vishi. 15:28; 16:23.

Pwevo nahase kulumbunwina lunga lyenyi lufwelelo lwenyi. Nge ‘mwashinganyeka mwakukumbulwila,’ kaha mwasakula kanawa mazu nakuhona kulusuka hakuhanjika. Katela kulivwa nge wakwoloka chipwe wamulemu kuhambaka lunga lyenyiko. Hanjikiso yamwaza yeji kuhizumunanga nakuneha kuunda. Lwola muka luze lunga lyenyi eji kusuulukanga nakupwa wamwashi kuhanjikisa? Vihande muka eji kulivwisanga kuwaha kushimutwila chipwe kutanga? Kutala asaka vihande vyasayasi, vyamapolitiki chipwe vyakuhema chakulitapa tahi? Nahase kumulingisa ngachilihi apwenga napwipwi yakwivwilila kumijimbu yamuMbimbiliya nakuhona kumufwefulula havishinganyeka vyenyi? Kushinganyeka mujila yangana nachimukafwa ahanjike nakulinga vyuma mujila yamangana.

Kuheta kumichima yavausoko vaze kavapwa Vinjihoko kachasakiwa kaha kulumbununa lufwelelo lwetu mukanwako oloze twatela kupwa nawa navilinga vyamwaza.

Jürgen uze twavulukanga hakavanga, alumbunwine ngwenyi: “Twalenuho lika kukavangizanga jindongi jamuMbimbiliya hakumbi hakumbi. Eyi yikiko jila yamwaza yakukafwilamo vausoko wetu vamone ngwavo tuli navilinga vyamwaza numba kaveshi kumona vilinga vyavivuluko.” Hans uze vambapachishile kafwe myaka 30 kufuma haze puwenyi vamumbapachishile, ambile ngwenyi: “Chapwa chachilemu muka-Kulishitu kupwa navilinga vyamwaza, mangana vausoko wenyi vamone kuwaha chatwama hakutachikiza muchano mukuyoya chetu.” Vausoko wetu vatela kumona ngwavo lufwelelo lwetu lwatulingisa tulihandunune navakwetu muchishishisa chakulumona mujila yayipi.

Kaposetolo Petulu akafwile mapwevo vaze vapwile namalunga javo vakuzeneka kufwelela vyuma vyovimwe ngwenyi: “Liluulenunga kuli malunga jenu, mangana chipwe nge vamwe kaveshi kwononoka kumazuko, muhase kuvakoka chakuzeneka mazu hakumona twamiso yamwaza yayenu mapwevo javo, mwomwo yakupwa vakaleho vaze vanamono twamiso yenu yitoma nakalemesa kenu kakanene. Kuliwahisa chenu kanda chipwa chakuwelukako—chakuvinda jikambu nakuvwala vyuma vyaulu, chipwe kuvwala uvwaloko—oloze chipwenga chakuwahisa mutu wakuswamana wamumuchima, wakuvwika  uvwalo wakuhona kuya nakupola washipilitu yayivwovu yakuunda, yize yandando yayinene kumeso aKalunga.”—Petu. 1, 3:1-4.

Petulu asonekele ngwenyi lunga vanahase kumukunyula navilinga vyamwaza vyapuwenyi. Christa afwilile kukavangiza lushimbi kanelu hakusaka kuheta lunga lyenyi kumuchima navilinga vyenyi vyamwaza kufuma vene haze vamumbapachishile mu 1972. Numba tuhu lunga lyenyi lwola lumwe alinangwilenga naVinjiho jaYehova, oloze muchano kanda uchimulumbunukile. Akungulukaho lyehi kaha eji kulivwasananga kanawa navandumbwetu muchikungulwilo. Kaha nawa vandumbwetu valemesa vyuma asakula kulinga. Mujila muka Christa eji kuzatanga nangolo amuhete kumuchima?

Ambile ngwenyi: “Ngunakufwila kutwalaho lika kutambuka mujila yize Yehova ali nakusaka ami kuya. Kaha nawa ngweji kutondanga kukunyula lunga lyami ‘chakuzeneka mazu’ oloze navilinga vyami vyamwaza. Ngweji kumwononokanga lwola lwosena nge vyuma ali nakusaka kavyalimbalakile najindongi jamuMbimbiliyako. Kaha nawa ngwalemesa lisesa atwama nalyo lyakulisakwila nakuseza vyuma vyosena mumavoko aYehova.”

Chakutalilaho chaChrista chasolola ovyo chapwila chachilemu kupwa namuchima wauvwovu. Eji kutwalililangaho lika milimo yakushipilitu yakufwana nge kuyanga kukunguluka lwola lwosena nakuyanga mumulimo wamuwande. Oloze eji kupwa namuchima wakunangakana hakwanuka ngwenyi lunga lyenyi akwechi lisesa lyakumuzanga nakupwa nenyi nakumuzakama. Chapwa chachilemu kuli etu vosena twatwama navausoko vaze kavafwelelako kupwa namuchima wauvwovu nawakunangakana. Mbimbiliya ngwayo, “kuchuma hichuma kuli ngonde vachitongwela.” Chisoneka kana chatalikisa nakulwola luze twatela kutwama hamwe navausoko wetu chikumanyi vaka-mahyetu vaze katwafwelela navoko. Kupwanga nalwola lwakutwama hamwe cheji kulingisanga vatu kulihanjikisa kanawa. Vyuma vinakusolokanga vyasolola nge kushimutwila chamwaza cheji kulingisanga vatu vahone kwivwanga chikuma uli chipwe kupwa nalisungu.—Kwambu. 3:1.

Holger uze akwechi ise uze vambapachishile myaka 20 kunyima kufuma haze vambapachishile tanga yosena ambile ngwenyi: “Chapwa chachilemu kuzanga vausoko nakuvalombelangako.” Christa ambile ngwenyi ‘keshi kukazeyako mwomwo ejiva ngwenyi likumbi limwe lunga lyenyi mwaketavila muchano nakupwa kusali yaYehova.’ Vilinga vyetu kutalisa kuli vausoko vaze kavafwelela muvyuma twafwelelako vyatela kupwanga lwola lwosena vyamwaza.

Chuma twatela kufwila shina kulama usoko wetu navausoko, kuvahana lwola lwakwitavila muchano nakuheta kumichima yavo namujimbu wamuMbimbiliya. Muvyuma vyosena twatela kupwa “namuchima wauvwovu nakalemesa chikuma.”—Petu. 1, 3:15.