Achitalenu hachakutalilaho chikwavo: Chisemi wapwevo wamujike uze atwama navana vavali navamusanyika kuli vandumbwetu valimbata vamuchikungulwilo mangana ayenga akashikame navo likumbi limwe nachingoloshi. Omu mwalweza vana venyi mujimbu kanou, hinavawahilila nakuvandamina likumbi kana lihete washi. Oloze shimbu kanda likumbi kana lihete, tanga nayilweza uze chisemi ngwayo kavatela kwizako, mwomwo kunasoloka mujimbu wakukasumuna. Kutwala muze himwatachikiza vyuma vize vyalingisanga vaze valunga napwevo vamulweze nge kanda navayako. Hanyima yakumusanyika, ava valunga napwevo vavasanyikile kuya kuzuvo yamasepa javo hachingoloshi chochimwe, kaha vetavilile.

Etu vaka-Kulishitu twatela kutesangamo vyuma natulishikanga navakwetu. Katwatela kuhanjikanga ngwetu “eyo okunyi ndumako.” Kulumbununa nge katwatela kwalumuna vishinganyeka vyetu chakuzeneka unjiho wambwendeko. (Koli. 2, 1:18) Oloze nganomu vinasolola evi vyakutalilaho vivali, vyuma vize vyeji kusolokanga kuli vatu vyeji kulihandununanga. Kweji kupwanga lwola lumwe luze katweshi kulama jishiko jetuko mwomwo mwakulingila mwauchi. Lwola lumwe nakaposetolo Paulu alingile ngocho.

Mumwaka wa 55 C.E., omu Paulu apwile muEfwesu haungeji wenyi wamuchitatu waumishonali, ashinganyekele kuzauka Kalungalwiji Angenyi mangana akaye kuKolinde, kaha kufuma kuKolinde mwakaya kuMasetonya. Omu apwile nakukinduluka kuYelusalema, ashinganyekele cheka kutambukila chikungulwilo chamuKolinde kamuchivali mangana akatambule mawana aze vakungulwilile vandumbwenyi vamuYelusalema. (Koli. 1, 16:3) Twejiva ngocho mwomwo yamazu tweji kutanganga hachisoneka chaWavaka-Kolinde 2, 1:15, 16 aze ahanjika ngwawo: “Ngocho, hakupwa nalufwelelo kanelu, ngwasakile ngwami nguvangile kwiza okwo kuli enu, mangana muhase kuwahilila kamuchivali, kaha hanyima yakumimonako chachindende numba ngukaye kuMasetonya, kaha nge ngunakinduluka cheka kuli enu kufuma kuMasetonya, numba jino mukangushinjikize hakuya kuYuleya.”

 Chasoloka nge mumukanda wenyi asonekelele vandumbwenyi muKolinde, Paulu avalwezele vyuma apwile nakujina. (Koli. 1, 5:9) Omu mwahichile tando yayindende kufuma haze Paulu asonekele mukanda kanou, vamulwezele kuli vaka-tanga yaKolowe ngwavo muchikungulwilo mwapwile vikokojola. (Koli. 1, 1:10, 11) Paulu ajihile ungeji wenyi nakusoneka jino mukanda Wavaka-Kolinde, 1. Mumukanda kanou Paulu asonekelemo mazu akuhuhumuna nakwolola. Asonekelemo cheka ngwenyi nalumuna ungeji wenyi, mwavangila chatete kuya kuMasetonya numba jino akaye kuKolinde.—Koli. 1, 16:5, 6. *

Chasoloka nge omu vandumbwetu vamuKolinde vatambwile mukanda avasonekelele, vamwe vamulumbilishile ngwavo Paulu kateselengamo jishiko jenyiko. Vashinganyekele ngwavo vapwile nakulinga vyamwaza kuhambakana Paulu. Vatu kana Paulu avavulukile ngwenyi ‘vaposetolo vakukangana.’ Paulu alihakwilile ngwenyi: “Omu ngwasakile kulinga ngocho, kutala ngwapwile nakuseseka numba? Kutala ngweji kujinanga vyuma kweseka nomu mwaya musonyi, nakwitavilanga kaha ngwami ‘Eyo, Eyo,’ chipwe ngwami ‘Nduma, Nduma’ tahi?”—Koli. 2, 1:17; 11:5.

Tunahase kulihulisa ngwetu, kutala Paulu apwile “nakuseseka” tahi? Nduma. Lizu valumuna ngwavo “kuseseka” lyalumbununa kuhona kufwelela chuma kaha linahase kutalisa nawa kumutu uze mwahona kutesamo jishiko jenyi. Chihula chaPaulu chakwamba ngwenyi, “Kutala ngweji kujinanga vyuma kweseka nomu mwaya musonyi” tahi? atela chakafwile vaka-Kulishitu vamuKolinde vamone ngwavo Paulu kalumwine ungeji wenyi mwomwo yamakuliko.

Paulu avakumbulwile omu avasonekelele ngwenyi: “Oloze hakuwana nge Kalunga twamufwelela, ngocho mazu etu kuli enu kaweshi Eyo okunyi Ndumako.” (Koli. 2, 1:18) Paulu alumwine ungeji wenyi mangana akafwe vandumbwenyi kuKolinde. Hamukanda Wavaka-Kolinde 2, 1:23 hamba ngwavo: “Ocho ngunahonena kwiza okwo kuKolinde, ngunasake ngwami nguhone kumivwisa ushona chikuma.” Kwalumuna ungeji wenyi chalingishile vandumbwenyi vazachise mazu akuhuhumuna avasonekelele shimbu kanda ayengako. Kahomu mukiko valingile. Omu apwile muMasetonya, Paulu vamulwezele kuli Chituse ngwenyi uze mukanda atumine wakafwile vaka-Kolinde vevwishise ngwavo vyuma vapwile nakulinga vyapwile vyavipi, kaha vapihililile nakwalumuka. Echi chalingishile Paulu awahilile.—Koli. 2, 6:11; 7:5-7.

Omu ‘vaposetolo vakukangana’ valumbilishile Paulu mwomwo yakuhona kutesamo jishiko jenyi, atela vashinganyekele ngwavo kaveshi kufwelela vyuma apwile nakwambululako. Oloze Paulu alwezele vaka-Kolinde ngwenyi apwile nakuvambulwila mujimbu waYesu Kulishitu. Ambile ngwenyi: “Mwomwo MwanaKalunga, Yesu Kulishitu uze vambulwile mukachi kenu kuli etu, kuli ami vene naShilivanu naChimoteu, ikiye kapwile eyo okunyi ndumako, oloze eyo yinapu eyo kuli ikiye.” (Koli. 2, 1:19) Kutala Yesu Kulishitu uze valondezezelenga kuli Paulu apwile namakuli tahi? Nduma. Yesu ahanjikilenga muchano lwola lwosena mukuyoya chenyi namumulimo wenyi wakwambulula mujimbu. (Yowa. 14:6; 18:37) Nge vyuma vize ambulwilenga Yesu vyapwile chikupu vyamuchano, kaha navyuma vize ambulwilenga Paulu nawa vyapwile vyamuchano, mwomwo Paulu ambulwilenga mujimbu wowumwe.

Chikupu vene Yehova apwa “Kalunga wamuchano.” (Samu 31:5) Twamona mazu kana awa kupwa amuchano kweseka namazu awa ahanjikile Paulu ngwenyi: “Numba jishiko jaKalunga jivula tuhu ngachilihi, josena jinapu eyo kuhichila muli ikiye,” kulumbununa kuhichila muli Kulishitu. Hakuwana nge Yesu alamine kulonga chenyi omu apwile hano hamavu, tunahase kufwelela ngwetu jishiko jaYehova japwa jamuchano. Paulu asonekele cheka ngwenyi: “Shikaho kuhichila muli ikiye mukiko vene tuli nakwambila ngwetu ‘Amene’ kuli Kalunga, nakumunehela upahu kuhichila muli etu.” (Koli. 2, 1:20) Uno chalumbununa ika hakwamba ngwavo Yesu ikiye “Amene”? Chalumbununa nge jishiko jaYehova Kalunga josena najikatesamo kuhichila muli Yesu.

 Ngana mwaYesu Kulishitu naYehova Kalunga, naPaulu ateselengamo vyuma ahanjikilenga. (Koli. 2, 1:19) Apwilenga mutu wamuchano uze vatelelele kufwelela, kahanjikilenga ‘kweseka nomu mwaya musonyiko.’ (Koli. 2, 1:17) Oloze ‘atambukilenga nashipilitu.’ (Ngale. 5:16) Vyuma vyosena alingilenga vyasolwele nge asakile kukafwa vandumbwenyi. Ngachize lizu lyenyi lyakwamba ngwenyi Eyo lyapwilenga vene Eyo.

Makumbi ano, vatu vavavulu vaze kavakavangiza jindongi jamuMbimbiliyako veji kulishikanga jishiko nakuhona kujitesamo nge kunasoloka ukalu waundende chipwe nge vali nakusaka kulinga vyuma vyeka. Chakutalilaho, mukusekasana lizu “eyo” kalyeshi nakupwanga ‘eyoko’ chipwe vene nge vyuma valivwasananga vavisonekanga. Vatu vavavulu kavamona ulo kupwa lushiko lwakwilila luze vatela kulama mukuyoya chavo chosenako numba tuhu vanakumona ukalu. Vatu vaze vali nakulilukulula vali nakuvulilako lika, kaha echi chasolola vatu vavavulu vamona lushiko lwamuulo kupwa lwamokomoko luze vanahase kuhokola kala lwola.—Chimo. 2, 3:1, 2.

Nyi ngachilihi yenu? Kutala lizu lyenu lyakwamba ngwenu Eyo lyapwa vene Eyo tahi? Ngana muze twamonanga kumaputukilo achihande chino, lwola lumwe munahase kwalumuna vishinganyeka vyenu keshi mwomwo yakuhanjika makuliko, oloze mwomwo yavyuma vimwe vinasoloka vize kamweshi nangolo jakuvihonesako. Oloze hakupwa muvaka-Kulishitu, mwatela kuzata nangolo mangana mutesemo jishiko jenu. (Samu 15:4; Mateu 5:37) Nge namutesangamo jishiko jenu, navamitachikiza kupwa muvatu vaze veji kuhanjikanga muchano lwola lwosena. (Efwe. 4:15, 25; Yako. 5:12) Kaha nge vatu navamifwelela muvyuma vyosena, kaha vanahase kumivwilila omu namuvambulwila mujimbu waWangana waKalunga. Ngachize, twatela chikupu kumona ngwetu lizu lyetu lyaEyo lyatela kupwa vene Eyo!