1-3. (a) Ukalu muka wajimbongo veji kumonanga vatu vavavulu makumbi ano, kaha vatu vamwe veji kuukimisanga ngachilihi? (Talenu muvwimbimbi wakulivanga.) (b) Visemi vamwe veji kulizakaminanga havyuma muka kutalisa kukulela vana vavo?

PWEVO umwe walijina lyaMarilyn * ambile ngwenyi: “Lunga lyami James azeyelenga hakumbi hakumbi hakufuma kumilimo, oloze jimbongo atambwilenga japwilenga jajindende. Ngocho katwahashilenga kulanda vyuma vyosena vyakulikafwa navyo hakumbi hakumbiko. Ngwasakile kukafwako lunga lyami nakulanjila mwanetu Jimmy vyuma vyamwaza vize vapwilenga navyo vakwavo vaka-shikola.” Marilyn asakile nawa kukafwako vausoko wenyi nakutulikako jimbongo jimwe jakukalikafwa najo kulutwe. Masepa jenyi vavavulu valukilile kumafuchi eka nakuzachilako milimo mangana vakawane jimbongo jajivulu. Oloze omu ashinganyekele vyaungeji kana apwile namichima yivali. Mwomwo ika?

² Marilyn evwile kupihya hakushinganyeka kuseza tanga yenyi. Kaha nawa amwene kulemesela hamwe Yehova mwatanga kupwa chachilemu mukuyoya chavo. Uno navalemesela ngachilihi hamwe Yehova nge mwaya kulifuchi lyeka? Kaha nawa ashinganyekele ngwenyi jitanga javakwavo vaze vayile nakuzachila kumafuchi eka japwile nakuzata kanawa milimo yakushipilitu. Kutala nahase ‘kulela mwanenyi mukuzangamisa namukuhuhumuna chakuli Yehova’ kuzachisa Internet najishinga tahi?—Efwe. 6:4.

 ³ Marilyn ahulishile vakwavo vamukafwe. Lunga lyenyi ambile ngwenyi kasakile puwenyi afume hemboko, oloze nawa keshi kumukanyisa nge lyavene nasake kuyako. Vakulwane muchikungulwilo navandumbwetu veka vamukafwile ngwavo katela kuyako, oloze vandumbwenyi vamapwevo vavavulu vamulwezele ngwavo atela kuya. Vambile ngwavo: “Nge wazanga tanga yove, kaha watela kuya. Mukatwalililaho lika kuzachila Yehova.” Numba tuhu apwile nakukakasana, oloze asalishile lunga lyenyi namwanenyi Jimmy nakuya kulifuchi lyeka. Kaha avafwelelesele ngwenyi, “kangweshi kukashimbulako.”

4. Mwomwo ika vatu vavavulu veji kuyilanga kumafuchi eka, kaha veya veji kuvalaminanga vana vavo?

⁴ Yehova kasaka vatu jenyi vayandeko. Kufuma vene kushikulu, vatu jaYehova vanatambukanga nakuya kujingalila jeka mangana vakawane mwakuyoyela. (Samu 37:25; Vishi. 30:8) Hakusaka kukumisa zala, Yakova atumine vana venyi kuya kuEjipitu nakulanda vyakulya. * (Kupu. 42:1, 2) Vatu vavavulu makumbi ano vaze veji kuyanga kumafuchi eka kaveshi kuya mwomwo yazalako. Veka mikuli yikiko yeji kuvalingisanga vayenga kumafuchi eka. Veka nawa veji kusakanga jitanga javo jiyoye muuhando. Vatu vamwe vatwama mumafuchi akuhutwa. Ngocho hakusaka kuyoya mujila yamwaza, vamwe vanaseze jitanga javo nakuya kumafuchi eka chipwe kujingalila jeka mangana vakawane jimbongo jajivulu. Kakavulu visemi kana veji kusezanga vana vavo vavandende kuli vaka-mahyavo chipwe kuli vana vavo vakukola, chipwe kuli visemi javo chipwe kuli vausoko wavo chipwe masepa javo. Numba tuhu vaze veji kuyanga kumafuchi eka cheji kuvakolanga kumuchima kuseza jitanga javo, oloze vashinganyeka ngwavo mwakulingila mwauchi.

5, 6. (a) Vyuma muka Yesu anangwile kupandama kukuwahilila nakumukingo? (b) Vyuma muka vize Yesu alwezele vaka-kumukavangiza valombenga? (c) Yehova eji kutukisulanga mujila muka?

⁵ Mumakumbi aYesu, vatu vavavulu vapwile vaka-kuhutwa. Kaha pamo vashinganyekele ngwavo navapwa vakuwahilila nakukingiwa nge navapwa najimbongo jajivulu. (Mako 14:7) Oloze Yesu kasakile vatu vahake muchima kuvyuma vize kavyelilako. Asakile vafwelelele muli Yehova uze mwakavakisula haya myaka yosena. Muchihande chenyi ChahaPili, Yesu anangwile ngwenyi kuwahilila namukingo wamwenemwene vyeji kwizanga mwomwo yakupwa nausoko wamwaza naSetu wamwilu keshi mwomwo yakupwa naluheto chipwe yakukilikita nangolo jetuko.

⁶ Mukulomba chenyi chakutalilaho, Yesu katulweza tulombe mangana tupwenga nachiyoyelo chauhandoko. Oloze atulweza tulombenga kuli Kalunga atuhane “kulya chetu chalikumbi lino lyalelo.” Yesu alwezele vaka-kumukavangiza ngwenyi: “Litwaminenu kulilunjikilanga luheto hano hamavu. . . . Oloze lilunjikilenu luheto mwilu.” (Mateu 6:9, 11, 19, 20) Twafwelela ngwetu Yehova mwatukisula kweseka nomu atushika. Kalunga keshi kutwivwila kaha uselewako, oloze atufwelelesa ngwenyi mwatuhana vyuma vyosena vize vyasakiwa mukuyoya. Chikupu vene kupwa nakuwahilila namukingo wamwenemwene chasaka kufwelela muli Setu twazanga Yehova keshi kufwelela mujimbongoko.—Tangenu Mateu 6:24, 25, 31-34.

7. (a) Yehova ahana veya mulimo wakulela vana? (b) Mwomwo ika visemi vosena vavali vatela kulikafwa kunangula vana vavo?

⁷ Kulinga mwaya muchima waYehova chasakiwa kulama kanawa jitanga jetu kweseka namuze asaka Yehova. Chakutalilaho, Jishimbi jaMose jalwezele visemi vanangulenga vana vavo mangana vazachile Yehova. Vaka-Kulishitu vaze navasaka kwivwisa Yehova kuwaha vatela kulinga mwomumwe. (Tangenu Lushimbi lwamuchivali 6:6, 7.) Kalunga ahana jishimbi kaneji kuli visemi keshi kuli vakaka javo chipwe kuli kala mutuko. Mwangana Solomone ahanjikile ngwenyi:  “Ove mwanami, ivwilila kunangula chaiso, Kanda ukaseza jishimbi janokoko.” (Vishi. 1:8) Yehova ali nakusaka jitanga jitwamenga hamwe mangana visemi vanangulenga vana vavo nakuvatwaminyina. (Vishi. 31:10, 27, 28) Nge vana navevwa visemi javo navahanjika hali Yehova nakumona omu vali nakumuzachila hakumbi hakumbi, kaha navakivo navavalondezezanga.

8, 9. (a) Vyuma muka vyeji kusolokanga nge visemi vanalihandununa navana vavo? (b) Ukalu muka unahase kusoloka nge visemi navahona kutwama hamwe navana vavo?

⁸ Vatu vavavulu vaze veji kushinganyekanga kuseza jitanga javo, vatachikiza ukalu vanahase kukamona kuze navaya. Oloze chapwa chachikalu kutachikiza ukalu nayikamona tanga yove nge unafumuho. (Vishi. 22:3) * Omu alingile Marilyn hanayi lyehi, aputukile jino kwanuka tanga yenyi. Lunga lyenyi namwanenyi navakivo vaputukile kumushinganyeka. Mwanenyi Jimmy amuhulishilenga ngwenyi, “Mwomwo ika wangusezelelele.” Marilyn ajinyine kutwamako kaha tukweji vavandende, oloze akatwamine jino myaka yayivulu. Kaha hakukinduluka awanyine vyuma mutanga vinalivete ngimbu. Jimmy kapwile ngana muze apwilenga kunyimako. Apwilenga jino wakuhomba kaha kahanjikishilenga kanawa nayeko. Naye ambile ngwenyi, “Zangi apwile nayo hakavanga yakumine.”

⁹ Nge visemi navana kaveshi nakutwama hamwe mwatangako, kaha vanahase kuviza muvishinganyeka nakuputuka kwazana muvilinga vyavipi. * Nge vanyike vachili vavandende kaha nawa navahanduka kuli visemi javo halwola lwalusuku, chinahase kuvalingisa vengile muponde yayinene chikuma. Marilyn alwezele mwanenyi Jimmy ngwenyi apwile nakuzachila ikiye mangana akayoye kanawa. Oloze Jimmy amwene nge naye namusuvilila. Hakavanga apihililile hakumuseza kuli naye. Kaha nomu naye avatambukililenga, ikiye apihililenga lika hakumumona. Ngana muze vana vavavulu veji kwivwanga hakuvaseza kuli visemi javo, naJimmy ashinganyekele ngwenyi katelele cheka kwononoka nakuzanga nayeko.—Tangenu Vishimo 29:15.

10. (a) Vyuma muka navisoloka kuli vana nge visemi javo navavatuminanga kaha wana muchishishika chakutwama navo hamwe? (b) Vyuma muka vinahase kusoloka nge chisemi naseze tanga?

¹⁰ Numba tuhu Marilyn apwile kwakusuku, oloze atuminenga jimbongo nawana weka kuli mwanenyi. Chipwe ngocho, anukile ngwenyi apwile nakulihandununa kuli mwanenyi. Kaha nawa apwile nakumulweza kuzanga chikuma jimbongo kuhambakana kuzanga tanga yenyi chipwe Yehova. (Vishi. 22:6) Jimmy alwezele naye ngwenyi: “Kanda kukindulukako. Oloze twalililaho lika kungutuminanga wana.” Marilyn aputukile kushinganyeka ngwenyi keshi kuhasa  kulela mwanenyi hakumutuminanga mikanda, nashinga chipwe kuhanjika nenyi hakopyutako. Ambile ngwenyi: “Kaweshi kuhasa kupakata mwanove mukasamba nakumulweza asavale kanawa kuzachisa Internet koko.”

11. (a) Nge valunga napwevo navalihandununa, kaha ulo wavo naupwa ngachilihi muponde? (b) Lwola muka Marilyn ashinganyekele vyakukinduluka kwimbo nakutwama natanga yenyi?

¹¹ Usoko waMarilyn naYehova walyenyekele, mwomwo akungulukilenga kaha kamwe muchalumingo. Kaha nawa ulo wavo waputukile kusekenya. Mukulwane wenyi wamilimo amushimbilenga. Hakuwana nge Marilyn naJames kavahanjikilenga haukalu wavoko mwomwo yakulihandununa, echi chavalingishile vaputuke kuhanjika navatu veka kaha hasalile hahandende kachi valingile ukoji. Marilyn ambile ngwenyi numba tuhu kavalingile ukojiko, oloze ulo wavo wapwile muukalu. Mbimbiliya yalweza vaze valimbata vakavangizenga jindongi jamuMbimbiliya jakulihananga vize vyatela muulo. Hakuwana nge Marilyn naJames valihandunwine, ngocho kavahashilenga kutwama hamwe nakushimutwila nakulisolwela zangiko. (Mwaso 1:2; Koli. 1, 7:3, 5) Kaha kavahashile cheka kulemesa Yehova hamwe namwanavoko. Marilyn ambile ngwenyi: “Omu ngwalinangwile kukukunguluka changalila ngwavo kupwa nachilongesa chatanga chapwa chachilemu hakusaka tukayovoke halikumbi lyaYehova, ngwashinganyekele kukinduluka kwimbo. Ngwaputukile kuzamisa usoko wami naYehova hamwe kaha natanga yami.”

12. Jishimbi muka jamuMbimbiliya jize jinahase kukafwa vaze vanaseze jitanga javo?

¹² Omu Marilyn ashinganyekele kukinduluka kwimbo, vamwe vamukafwile mujila yamwaza kaha veka vamukafwile mwamupi. Vakulwane vamuchikungulwilo chakuze ayile nakuzachila vamukolezezele akinduluke. Oloze veka vaze vasezele jitanga javo vamukolezezele atwame, mwomwo ngwavo keshi kukawana jimbongo jajivulu nge mwakinduluka kulifuchi lyavoko. Vambile ngwavo: “Unakuya tuhu, linwaha ukinduluke.” Muchishishisa chakukafwa mujila yakuhenga, vaka-Kulishitu vatela kukafwa “vana vamapwevo vazangenga malunga javo, vazangenga vana vavo, . . . vaka-kuzata kujizuvo javo” “mangana mazu aKalunga vakahone kuwasaula kuvatu.”—Tangenu WaChituse 2:3-5.

13, 14. Mwomwo ika chasakiwa kupwa nalufwelelo muli Yehova numba tukane vyuma vyakuhenga navatulweza vausoko? Hanenu chakutalilaho.

¹³ Vatu vavavulu vaze veji kusezanga jitanga javo nakuya nakuzachila kwakusuku vanalinangula kumona visemwa, navausoko, chikumanyi visemi kupwa vyavilemu kuhambakana vyuma vyosena. Vaka-Kulishitu vatela kupwa nalufwelelo lwakukola numba vakane vyuma vize navavalweza kuli vausoko wavo vize kavyevwisa Yehova kuwahako.

¹⁴ Achitalenu chakutalilaho chaCarin. Ambile ngwenyi: “Omu mwanami Don asemukile, ami  nalunga lyami twapwile nakuzachila kulifuchi lyeka oho te ngunaputuka kulinangula Mbimbiliya naVinjiho jaYehova. Vosena mutanga vashinganyekele ngwavo nangutuma Don kwimbo mangana vakamulame kuli visemi jami swi noho natukawana jimbongo jajivulu.” Omu Carin ambile ngwenyi mwalela mwanenyi, vausoko wenyi kuhakilako vene nalunga lyenyi vamusehele nakumwamba ngwavo muvwa, ali nakuchina kuzata milimo. Carin ambile ngwenyi: “Halwola kana kangwatachikijile kanawa kupihya chapwile hakuseza mwanami Don kuli visemi jami hamyaka yayindendeko. Oloze ngwejivile ngwami Yehova ahana mulimo wakulela vana kuli etu visemi.” Omu apwile nalijimo lyamuchivali, lunga lyenyi wakuzeneka kwitava amulwezele alifumiselyo. Vyuma vyakwoloka vize asakwile kulinga hakavanga vyamujikijishile, ngocho nahalwola kanelu asakwile cheka kulinga vyuma vize vyevwishile Yehova kuwaha. Makumbi ano ikiye nalunga lyenyi, navana vavo vali nakutwama hamwe mukuwahilila. Nge Carin atwalile mwanenyi umwe chipwe vosena vavali vakavalele kuvatu veka, kachi vyuma kavyapwile kanawako.

15, 16. (a) Vicky vamulelele ngachilihi omu apwile kanyike. (b) Mwomwo ika akanyinyine kulela mwanenyi mujila yoyimwe?

¹⁵ Chinjiho walijina lyaVicky ambile ngwenyi: “Ami vangulelele kuli vakaka hamyaka yayindende, oloze songo yami vamulelele kuli visemi jami. Halwola ngwayile kuli visemi jami, kangwavazangile chikumako. Songo yami apwile wakukasunuka kuvalweza vyuma vyosena vyapwile kumuchima wenyi chipwe kuvapakata mukasamba nakulivwisa kuwaha kupwa hamwe navakivo. Ngwalivwile nge ngwapwile hahasuku navisemi jami, kaha nomu vene ngwakolele ngwachiwanyine kupwa chachikalu kuvalweza omu ngwapwile nakwivwa. Yami nasongo yami twafwelelesa visemi jetu ngwetu natukavalamanga omu navakashinakajiwa. Ami nangukavalama mwomwo yakulingila chilika, oloze songo yami mwakalinga ngocho mwomwo yakuvazanga.

¹⁶ Vicky ambile ngwenyi: “Oholyapwa mama ali nakusaka ngumuhane mwanami wapwevo mangana anguleleleyo ngana muze atumine ami kuli vanaye. Oloze ngwakanyine mukuzangama.” Vicky ambile ngwenyi: “Yami nalunga lyami twasaka kulela vana vetu mujila yize asaka Yehova. Kangweshi nakusaka kwenyeka usoko wami wakulutwe namwanamiko.” Vicky amwene ngwenyi hakusaka tufukile, twatela kuhaka jishimbi jaYehova kulutwe muchishishisa chakufwila jimbongo chipwe kusaka kusuulwisa vausoko. Yesu ambile ngwenyi: “Kakweshi ndungo mwahasa kuzachila vamyata vavaliko,” kuzachila Kalunga naLuheto hamweko.—Mateu 6:24; Kulo. 23:2.

17, 18. (a) Vyuma muka vize vaka-Kulishitu veji kusakulanga kulinga? (b) Vihula muka natushimutwila muchihande chinakavangizaho?

¹⁷ Setu wamwilu Yehova atufwelelesa ngwenyi mwatuhana vyosena vize vyasakiwa mukuyoya chetu chikalu kaha nge natuhaka Wangana nakwoloka chenyi kulutwe mukuyoya chetu. (Mateu 6:33) Mwomwo yalufwelelo kanelu, vaka-Kulishitu vamuchano lwola lwosena veji kusakulanga kanawa vyakulinga. Namulwola lwalukalu tweji kuwananga jila yakwivwishilamo Yehova kuwaha nakukavangiza jishimbi jenyi. Yehova atufwelelesa ngwenyi ‘mwatusela ulovokelo.’ (Tangenu Wavaka-Kolinde 1, 10:13.) Kulomba chetu nakwononoka chetu vyasolola nge twafwelela muli Yehova. (Samu 37:5, 7) Yehova eji kumonanga milimo yetu nakutuhana vyuma vyosena vize vyasakiwa, ‘nakufukisanga’ kuyoya chetu.—Esekesenuko Kuputuka 39:3.

¹⁸ Vyuma muka twatela kulinga mangana tukumise ukalu uze weza mwomwo yakulihandununa? Uno tunahase kuzakama ngachilihi jitanga jetu chakuzeneka kujiseza nakuya kweka? Kaha tunahase kukafwa ngachilihi vakwetu vatwame hamwe najitanga javo? Chihande chinakavangizaho nachishimutwila vihula kanevi.