VISONEKA vyalumbununa vyuma vimwe vize vyalingishile vatu vamwe vapule uvwalo wavo? Makumbi ano, vatu kaveshi kupula uvwalo wavoko, oloze vaYuleya vamwe vapulilenga uvwalo wavo mangana vasolole nge vanahombo, vanakulinyenga, vanapihilila chipwe vanakulishona.

Chakutalilaho, Luvene “apulile mahinenyi” omu awanyine nge ndumbwenyi Yosefwe uze asakile kuyovola vanamulanjisa muundungo. Chisemi chavo Yakova, “apulile mahinenyi” omu ashinganyekele ngwenyi mwanenyi Yosefwe atela vanamuli kuli chisuma. (Kupu. 37:18-35) Yopa nawa “apulile mahinenyi” omu vamulwezele ngwavo vana venyi vosena vanavajihi. (Yopa 1:18-20) Muluwa uze ejile ‘namahinenyi akupula’ kuli Kapilishitu Wakulitulaho Eli nakumulweza ngwenyi vaIsalele vanavafungulula mujita, vana vaEli vamalunga vavali vanavajihi kaha nawa chikasha chalushiko vanachitambula. (Samwe. 1, 4:12-17) Omu Yoshiya evwile mazu amumukanda waJishimbi aze vamutangililile, nakumona vyuma vyavipi vize valingilenga vatu jenyi, “apulile mahinenyi.”—Vamya. 2, 22:8-13.

NaKapilishitu Wakulitulaho Kayafwase “apulile uvwalo wenyi wahelu” omu avangijikilile Yesu ngwenyi nasaula Kalunga. (Mateu 26:59-66) Chisemwa chavalapi chavulukile nge kala mutu uze evwile lijina lyaKalunga navalisaula, atelelele kupula uvwalo wenyi. Oloze jishimbi jikwavo javalapi jize vatungile hanyima yakunongesa tembele yaYelusalema, jahanjikile nge ‘makumbi aze mutu wosena uze evwile Lijina lyaKalunga vali nakulisaula, katelele kupula uvwalo wenyiko, mokomoko uvwalo wenyi wosena navautanyatanya.’

Kupula uvwalo kachapwile chachilemu kuli Kalungako kuvanga kaha nge chikupu vene mutu kana ali nachinyengo chikuma. Ngocho, Yehova alwezele vatu jenyi ‘vapule michima yavo, keshi mahinavoko nakukinduluka kuli ikiye.’—Yowe. 2:13.