1, 2. Uno jila eji kututalilangamo Yehova yalihandununa ngachilihi najikamela jakumona vyuma vyahamukwakwa?

MUMAFUCHI amavulu, jifulumende jeji kuzachisanga jikamela jajinene mangana jisolole jiminyau jili nakutambuka hamukwakwa najiponde jinakusoloka hamukwakwa. Jeji kusololanga nawa vanyamutekenya vaze veji kuchikanga vatu nakuchina ngwavo navavakwata. Eji jikamela jeji kukafwa jifulumende jiwane ava vanyamutekenya nakuvakasa. Mwomwo yajikamela kaneji, chinakupwanga chachikalu kuli vaka-kuhokola jishimbi kuchina.

² Mbimbiliya yamba ngwayo meso aYehova “ali kwosena.” (Vishi. 15:3) Uno echi chalumbununa nge Yehova eji kututalanga kaha mangana amone nge tunakuhokola jishimbi jenyi tahi? Kutala Kalunga eji kusakanga kaha kutuzangamisa nge tunahokola jishimbi jenyi tahi? Nduma. (Yele. 16:17; Hepe. 4:13) Yehova eji kututalanga mwomwo atuzanga kaha nawa asaka tupwenga vakukingiwa nakuwahilila.—Petu. 1, 3:12.

3. Vyuma muka vitanu vize natushimutwila muchihande chino?

³ Vyuma muka navitukafwa tumone ngwetu Kalunga atuzanga? Natushimutwila vyuma 5 vize vyasolola nge Yehova eji kutuzakamanga. (1) Eji kutuhuhumuna shimbu kanda tulinge  vyuma vyavipi. (2) Eji kutuzangamisa nge tunahengesa. (3) Eji kututwaminyinanga kuzachisa jishimbi jenyi jamuMbimbiliya. (4) Eji kutukafwanga omu tweji kumonanga ukalu. (5) Eji kutufweta nge tunalingi mwamwaza.

4. Mwomwo ika Yehova ahuhumwinyine Kena shimbu kanda avulumune shili?

⁴ Chatete tutalenu omu Kalunga eji kutuhuhumunanga nge tunaputuka kulinga vyuma vyavipi. (Miji. 1, 28:9) Chakutalilaho, Kena “evwile matoto chikuma” omu Yehova akanyine wana wenyi. (Tangenu Kuputuka 4:3-7.) Yehova alwezele Kena ngwenyi nge keshi ‘kulinga mwamwazako,’ kaha nahase kulinga shili. Chafwanyine nge shili yapwile ‘nakuutama kuchikolo,’ mangana yimukwate. Kalunga amulwezele ngwenyi, shili “uyononona.” Yehova asakile evwile Kena ‘uselewa.’ Nge Kena evwilile kumazu akumuhuhumuna kachi atwalilileho lika kupwa nausoko wamwaza naKalunga.

5. Mujijila muka Yehova eji kutuhuhumunanga?

⁵ Omu mukiko chapwa namakumbi ano. Yehova eji kumonanga vyuma vyatwama mumichima yetu. Ejiva vishinganyeka vyetu navyuma twafwila kulinga, kaha katweshi kuhasa kumuswekela kala vyuma natulingako. Setu wazangi asaka tulingenga vyuma vyakwoloka, oloze keshi kutushinjilako. Eji kutuhuhumunanga kuhichila muMazu enyi Mbimbiliya nge namono ngwenyi tunaputuka kulinga vyuma vyavipi. Mujila muka? Nge natutanganga Mbimbiliya hakumbi hakumbi, nakutanga mikanda yetu, nakuyanga kukukunguluka, kaha natwivwilila kumazu aKalunga akuhuhumuna. Kutala mwatangaho lyehi chipwe kwivwa chuma chize chamikafwile muhonese ukalu uze vejivile kaha kuli Yehova tahi? Yehova eji kutuhuhumunanga halwola lwakutamo.

6, 7. (a) Mwomwo ika natwambila ngwetu kulya chakushipilitu chize vali nakuwahishilanga vatu vavavulu chasolola nge Kalunga eji kutuzakamanga? (b) Vyuma muka twatela kulinga numba tunganyale kujila eji kutuzakaminangamo Yehova?

⁶ Mazu akutuhuhumuna asolola nge Yehova atuzanga nakutuzakama tuvosena. Chikupu vene Mbimbiliya, namikanda yetu, nakukunguluka chetu vyeji kukafwanga vatu vavavulu. Oloze Yehova amilweza mukavangizenga vyuma mwamihuhumuna vize vyatwama muMazu enyi mangana mulinge vyuma vyakwoloka. Echi chasolola nge Yehova atuzakama mutu himutu.

⁷ Hakusaka tunganyale kumazu mwatuhuhumuna Kalunga, twatela kwanuka ngwetu eji kutuzakamanga chikupu. Kaha twatela kukavangiza vyuma natulinangula muMazu enyi nakufwila kufumisa kala vishinganyeka vize navivwisa Kalunga kupihya. (Tangenu Isaya 55:6, 7.) Nge natukavangiza vyuma navatuhuhumuna, kaha natulihenda kuukalu wauvulu. Nyi ngachilihi nge katweshi kwivwililako? Kutala Yehova mwatuzakamanga lika tahi?

8, 9. Vyuma eji kutuhuhumunanga Yehova kuhichila muli vandumbwetu vyasolola ngachilihi nge atuzakama? Hanenu chakutalilaho.

⁸ Nge Yehova mwatuzangamisa kaha twatela kutachikiza ngwetu atuzakama. (Tangenu WavaHepeleu 12:5, 6.) Chikupu vene katweshi kwivwa kuwaha nge vanatuzangamisako. (Hepe. 12:11) Nge mutu umwe mwamihuhumuna kweseka naVisoneka, kaha nachipwa chachilemu kuli enu kwivwishisa vyuma nalingila ngocho. Keshi kulinga ngocho mangana amivwise kupihyako, oloze namono ngwenyi usoko wenu naYehova uli muponde. Nalisuula kuzachisa lwola lwenyi nangolo jenyi mangana amilweze kuhichila muMbimbiliya omu munahase kukinduluka cheka kuli Yehova. Tweji kumonanga kukafwa kana kupwa chachilemu mwomwo cheji kufumanga kuli Yehova.

 ⁹ Tutalenu chakutalilako chandumbwetu uze atalilenga vyavatu vali uselesele shimbu kanda atachikize muchano. Omu alinangwile muchano echele tato kana. Kahomu alanjile shinga yayihya aputukile cheka nawa kutala mivwimbimbi yauselesele haInternet. (Yako. 1:14, 15) Echi chasolwele nge muchima wenyi wapwile nakufwila lika kutala mivwimbimbi yauselesele ngana mwamakala akakahya. Likumbi limwe ahanyine shinga yenyi kuli mukulwane wamuchikungulwilo mangana azachiseko. Omu ou mukulwane aputukile kuzachisa yize shinga, amwene mivwimbimbi yauselesele. Hahaze vene ou mukulwane ahuhumwine ou ndumbwetu, kaha ou ndumbwetu evwililile kuvyuma vamuhuhumwine. Kaha kutwala muze alitwaminyinyine tato kana. Yehova eji kumonanga shili yize tweji kuvulumunanga kupenge kaha eji kufwila kutukafwa shimbu kanda usoko wetu naikiye ufwenga. Tweji kusakwililanga Yehova hakutuzakama.

10, 11. (a) Mujila muka tunahase kwitavila Kalunga atutwaminyine? (b) Uno tanga yimwe yanganyalile ngachilihi hakwitavila Yehova avatwaminyine?

¹⁰ Muka-kwimba jisamu embile ngwenyi: “Naungulwezanga jila napunga yove.” (Samu 73:24) Tunahase ‘kwitavila’ Yehova atutwaminyine hakuhehwojola muMazu enyi. Nge natulinga ngocho, kaha natutachikiza omu eji kushinganyekanga Yehova, nakukavangiza jishimbi jenyi, nakutwalaho lika kupwa nausoko wamwaza nayikiye. Jishimbi jenyi jeji kutukafwanga nawa tulizakame etu vavene najitanga jetu.—Vishi. 3:6.

¹¹ Chakutalilaho chakusolola omu Yehova eji kutwaminyinanga vangamba jenyi shina chanjimi umwe natanga yenyi yayinene yize yapwile nakutwama muzuvo yakufwetela mungalila yajipili yamuMasbate muPhilippines. Ikiye napuwenyi vapwile nakuzata upayiniya washimbu yosena. Likumbi limwe valikomokelele hakutambula mukanda kufuma kuli mwenya zuvo wakuvalweza vafume muze muzuvo. Mwomwo ika? Mwomwo vavavangijikilile nge kavapwile vakushishikako. Numba tuhu ou ndumbwetu alizakaminyine okwo nahase kuya nakutwama natanga yenyi, oloze afwelelele muli Yehova, kaha ambile ngwenyi: “Yehova mwatukafwa. Lwola lwosena eji kutuzakamanga chamokomoko nakala vyuma navisoloka.” Omu mwahichile makumbi amandende, vavalwezele ngwavo kaveshi kufuma muze muzuvoko. Vyuma muka vyasolokele? Mwenya  zuvo ambile ngwenyi numba tuhu vavavangijikilile, oloze yize tanga yaVinjiho yatwalilileho lika kukavangiza jishimbi jamuMbimbiliya, kaha nawa yapwile nakalemesa nakutwama mukuunda navakwavo. Echi chevwishile mwenya zuvo kuwaha, kaha chamulingishile aveche vatwame nakuvahana musenge waunene wakulima. (Tangenu WaPetulu 1, 2:12.) Chikupu vene, Yehova eji kututwaminyinanga kuhichila muMazu enyi mangana atukafwe mwakulipikila naukalu wamukuyoya.

12, 13. Vyuma muka vinahase kulingisa vatu vashinganyeke ngwavo Kalunga keshi kumona kuyanda chavoko?

¹² Hakupwa tuvangamba jaYehova, tweji kumonanga ukalu wauvulu. Ukalu umwe unahase kupwa misongo, kutufumbukila kuli vausoko chipwe kutuyanjisa. Ukalu waunene tweji kulipikanga nawo shina kuhona kulivwasana navandumbwetu mwomwo yakulihandununa chamichima.

¹³ Chakutalilaho, munahase kwivwa kupihya nge ndumbwenu namyambe mwamupi. Munahase kushinganyeka ngwenu ‘chuma kana kachatela kusoloka muliuka lyaKalungako.’ Kaha nawa ndumbwenu uze mwamivwisa kupihya kumuchima vanahase kumuhana milimo muchikungulwilo, kaha nahase kusoloka nge vandumbwenyi veka veji kumusangejekanga. Munahase kulihulisa ngwenu: ‘Nachipwa ngachilihi ngocho? Kutala Yehova keshi nakumonako tahi? Uno mwakalingaho vimwe tahi?’—Samu 13:1, 2; Hamba. 1:2, 3.

14. Vyuma muka vinahase kulingisa Kalunga echelele ukalu wetu utwalilileho lika?

¹⁴ Pamo kuli vyuma vimwe vinalingisa Yehova echelele vyuma vimwe visoloke. Chakutalilaho, nge ndumbwetu umwe natuhuhumuna, tunahase kwivwa kupihya ngwetu katelanga kutuhuhumunako. Oloze Kalunga nahase kumona vyuma mujila yeka. Kuhuhumuna chize natumona ngwetu kachatelemoko, chinahase kutunganyalisa. Ndumbu Karl Klein ambile ngwenyi lwola lumwe vamutenukilile kuli Ndumbu J. F. Rutherford. Kutwala muze omu Ndumbu Rutherford amenekele Ndumbu Klein nachisambo, ikiye kamukumbulwile kanawako mwomwo achipwile lika namatoto. Omu Ndumbu Rutherford amwene ngwenyi Ndumbu Klein achili lika namatoto, amukafwile ngwenyi: “Zangama, kuchina Liyavolo mwakuhungumwisa.” Mazu kana akafwile Ndumbu Klein. Omu apwile jino muLizavu Lyakutwaminyina, ahanjikile ngwenyi vandumbwetu vakwechi lisesa lyakutuhuhumuna, kaha nge natuvahunga mwomwo yakutukafwa, kaha Liyavolo mwatufungulula. *

15. Vyuma muka twatela kwanuka nge tuli nakumona ukalu?

¹⁵ Twasaka kachi ukalu wetu ukume washi. Oloze chapwa chachilemu kuunda muchima. Chakutalilaho, achishinganyekenu munayi kuchikayo nakutwisa unga kaha namuwana mukana wausuku. Kamwatachikijile lwola namukaheta kulutwe nakutwisa unga wenuko. Nge namupihilila nakufuma mumukana nakuya kuchikayo cheka, pamo namukawana mukana wausuku chikuma kuhambakana nauze munaseze kunyima. Kaha nawa pamo munahase kushimbula chikuma kuhambakana nakuze mwapwanga. Oloze nge mwaundanga muchima kuze kuchikayo chatete, kachi munatwisa washi unga wenu. Chochimwe nawa, nge natuunda muchima nakukavangiza jishimbi jamuMbimbiliya, kaha Yehova mwatukafwa tumike muukalu.

16. Chuma muka chikwavo chinahase kulingisa Yehova atwechelele tumone ukalu?

¹⁶ Yehova nahase kwechelela ukalu mangana tulinanguleho vyuma vimwe. (Tangenu WaPetulu 1, 5:6-10.) Kanda natushinganyeka ngwetu Kalunga ikiye eji kunehanga ukalu wetuko.  (Yako. 1:13) Oloze ‘muka-kole wetu Liyavolo’ ikiye eji kunehanga ukalu wauvulu. Chipwe ngocho, twatela kutachikiza ngwetu Kalunga eji kumonanga ukalu wetu kaha nawa atuzanga. Keshi kukatwechelela tumonenga ukalu haya myaka yosenako. Ukalu wetu unapu ‘wakatando kakandende.’ Fwelelenu ngwenu Yehova mwamizakama nakumihana ngolo mangana mutwaleho lika kumika.—Koli. 2, 4:7-9.

17. Mwomwo ika Yehova eji kukekesanga michima yavatu vosena?

¹⁷ Yehova eji kukekesanga michima yavatu vosena mangana amone vaze vamuzanga. Kapolofweto Hananyi alwezele Mwangana Asa ngwenyi: “Meso aYehova eji kuhitangananga kumavu kwosena, mangana alisolole nangolo hali vakwechi michima yakukupuka mwosena kuli Ikiye.” (Miji. 2, 16:9) Yehova ‘mwasolola ngolo’ hali enu, kulumbununa nge mwamikinga nakumifweta.

18. Mwomwo ika twatela kufwelela ngwetu Yehova mwatukisula nge natulinga vyuma vyamwaza? (Talenu muvwimbimbi wakulivanga.)

¹⁸ Yehova asaka ‘kututetela,’ kulumbununa nge asaka kutufweta. Nge natusaka atukisule, kaha twatela ‘kusakasaka kuwaha,’ ‘nakuzanga kuwaha’ ‘nakulinganga vyuma vyamwaza.’ (Amo. 5:14, 15; Petu. 1, 3:11, 12) Yehova eji kufwetanga vaka-kwoloka numba tuhu vatu kaveshi kumona milimo yavo yamwaza veji kulingangako. (Samu 34:15) Achishinganyekenu hachakutalilaho chavifungwiji vavaIsalele vavali, vaShifwala naPuwa. Fwalo avahanyine lushimbi ngwenyi vatela kujiha vana vamalunga vavaIsalele vosena vaze navasemukanga. Ava vifungwiji vononokele Kalunga muchishishisa chakwononoka Fwalo, kaha kavajihilenga vaze vakembako. Yehova amwene vilinga vyamwaza vyaShifwala naPuwa, kaha avakiswile ‘nakuvahana’ vana. (Kulo. 1:15-17, 20, 21) Lwola lumwe tunahase kushinganyeke ngwetu kakweshi mutu ali nakumona vyuma vyamwaza tuli nakulingako. Oloze Yehova eji kumonanga vyuma vyamwaza vyosena vize tweji kulinganga. Ngocho mwakatufweta.—Mateu 6:4, 6; Chimo. 1, 5:25; Hepe. 6:10.

19. Ndumbwetu umwe wapwevo vamukiswile ngachilihi hakulinga vyuma vyamwaza?

¹⁹ Shimbu jimwe tunahase kushinganyeka ngwetu Yehova keshi nakumona milimo tweji kuzatanga mumulimo wakwambululako, oloze eji kutumonanga. Chakutalilaho, ndumbwetu wapwevo wakuHungary uze atwama muAustria atambwile keyala yapwevo uze ahanjika lilimi lyaHungary. Hahaze vene ou ndumbwetu ayile nakutonda uze pwevo, oloze kamuwanyine hemboko. Chipwe ngocho, ahilukililengako mapapa kakavulu kafwe hamwaka wamuundu nachimbwa. Amusezelele mikanda yetu, nanambala yenyi yashinga, namikanda yize amusonekelele. Lwola lumwe evwilenga nge muzuvo mwapwile mutu, oloze nowo asokolwele kuchikolo wauchi. Likumbi limwe omu akindulukilileko cheka, awanyine uze mwanapwevo mwasokolola kuchikolo nakwamba ngwenyi: “Ingilenu mwane. Ngunatangenga mikanda yosena yize munapunga nakungunehela. Kaha ngunapunga nakumivandamina.” Ou pwevo napunga nakutambula vitumbo vyakasa kaha kapwile nakusaka kuhanjika navatuko. Vaputukile kulinangula Mbimbiliya. Chikupu vene, Kalunga akiswile ou ndumbwetu hakukilikita chenyi nakupwa nalukakachila.

20. Mweji kwivwanga ngachilihi hakutuzakama kuli Yehova?

²⁰ Yehova eji kumonanga vyuma vyosena vize tweji kulinganga, kaha eji kutukisulanga hakulinga ngocho. Katwatela kushinganyeka ngwetu Kalunga eji kututalanga mangana awane tutenga twetu chipwe kulama vyuma vyosena vize natupihisako. Oloze tweji kupandamanga kuli ikiye mwomwo twatachikiza ngwetu atuzakama kaha nawa eji kutukafwanga nakutufweta hakulinga mwamwaza.