1, 2. (a) Vyuma muka asakwile kulinga Mose omu apwile namyaka 40? (Talenu muvwimbimbi wakulivanga.) (b) Mwomwo ika Mose asakwile kuyanjila hamwe navatu jaKalunga?

MOSE ejivile ngwenyi kulutwe mwakayoya muuhando muEjipitu. Amwene jizuvo jamwaza jajinene jauhando. Vamulelele munganda, kaha nawa “vamunangwile mwayile mangana avaEjipitu osena.” Vamunangwile nawa vyakufundafunda, navyuma vyamumelu, namakumi, nasayasi navyuma vyeka. (Vili. 7:22) Chapwile chachashi kuli ikiye kupwa naluheto, naulemu nakutokwa chize vatu vavavulu vamuEjipitu kavahashile kupwa nachoko.

² Chamokomoko nakutokwa apwile nacho, oloze omu ahetele myaka yakusemuka 40, Mose asakwile kulinga vyuma vize Fwalo natanga yenyi vahonene kutachikiza kanawa. Asakwile chiyoyelo chakuyanda chize kala kaEjipitu akanyinenga kupwa nacho. Chiyoyelo kana shina chakupwa ndungo. Mwomwo ika? Mwomwo Mose apwile nalufwelelo. (Tangenu WavaHepeleu 11:24-26.) Lufwelelo lwalingishile Mose atwaleho lika kuzama kwijiva nge ali nakumona Yehova. Afwelelele muli “Uze vahona kumona,” Yehova, namujishiko jenyi.—Hepe. 11:27.

3. Vihula muka vitatu navakumbulula muchihande chino?

³ Nayetu nawa twatela kupwa nalufwelelo luze nalutulingisa tuzame mbe kwijiva nge tunakumona Yehova nakuhona kufwila vyuma vyakukaye. Twatela kupwa ‘tuvatu valufwelelo.’ (Hepe. 10:38, 39) Hakusaka tuzamise lufwelelo lwetu, tukekesenu vyuma vasoneka hamukanda WavaHepeleu 11:24-26 vyakupandama kuli Mose. Omu natukekesa chisoneka kana, twatela kukumbulula vihula vino: Uno lufwelelo lwakafwile ngachilihi Mose akane kufwila vyuma vyakumujimba? Uno omu vamutolekele,  lufwelelo lwamukafwile ngachilihi amone milimo apwile nakuzachila Yehova kupwa yayilemu? Kaha mwomwo ika Mose “ashishikile chikuma hafweto yize mwakatambula”?

4. Uno Mose atachikijile ika kutalisa ‘kukulivwisa kuwaha viseke vyashili’?

⁴ Hakupwa nalufwelelo, Mose atachikijile ngwenyi “kulivwisa kuwaha viseke vyashili” chapwile kaha chatando yayindende. Veka vamwene vyuma mujila yeka? Mwomwo ika? Mwomwo vamwene omu lifuchi lyaEjipitu lyejile nakupwa chiyulo changolo chakaye numba tuhu mwazalile navaka-kulemesa makombelo nakupanda. Oloze vatu jaYehova vapwile nakuyanda muundungo. Chipwe ngocho, Mose atachikijile ngwenyi Kalunga mwakalumuna vyuma. Numba tuhu vatu vaze vafwililile vyuma vyakumujimba vapwile nakufukila, oloze Mose afwelelele ngwenyi vatu vavapi navakavanongesa. Ngocho, chamulingishile ahone “kulivwisa kuwaha viseke vyashili hatando yayindende.”

5. Vyuma muka navitukafwa tukane “kulivwisa kuwaha viseke vyashili hatando yayindende”?

⁵ Munahase kukana ngachilihi ‘kulivwisa kuwaha viseke vyashili vyakatando kakandende’? Tachikizenu ngwenu kuwaha chatwama hakulinga shili chapwa chakatando kakandende kaha. Lufwelelo nalumikafwa mumone ngwenu “kaye kali nakuhita hamwe nakufwila chako.” (Yowa. 1, 2:15-17) Shinganyekenu havyuma navikasoloka kuli vaka-shili vaze kaveshi kupihilila nakwalumukako. Vatu kana vali ‘hasenena kaha navakavalindumuna nakuvanongesa.’ (Samu 73:18, 19) Nge muli mucheseko chakusaka kulinga shili, kaha lihulisenu ngwenu, ‘Nguli nakusaka ngukayoye ngachilihi kulutwe?’

6. (a) Mwomwo ika Mose akanyinyine “kumuvulukanga ngwavo mwana wamwanaFwalo wapwevo”? (b) Mwomwo ika namwambila ngwenu Mose asakwile kulinga vyuma vyamwaza?

⁶ Lufwelelo lwaMose lwamukafwile asakule kanawa vyakulinga mukuyoya chenyi. Mbimbiliya ngwayo: “Mwomwo yalufwelelo, omu alingile Mose hanakulu lyehi, akanyine kumuvulukanga ngwavo mwana wamwanaFwalo wapwevo.” (Hepe. 11:24) Mose kashinganyekele ngwenyi nahase kuzachila Kalunga oku ali munganda nakuzachisa luheto nangolo apwile najo nakukafwa vandumbwenyi vaIsaleleko. Oloze Mose afwililile kuzanga Yehova namuchima wenyi wosena, namwono wenyi wosena, nangolo jenyi josena. (Lushi. 6:5) Vyuma asakwile Mose kavyamulingishile aliveyeko, mwomwo vikumba vyavivulu vyamuEjipitu vavimbachile kuli vaIsalele. (Kulo. 12:35, 36) Fwalo vamwinyishile nakumujiha. (Samu 136:15) Nyi ngachilihi Mose? Ikiye kavamujihileko oloze vamuzachishile kuli Kalunga mangana atwaminyine nakukinga muyachi waIsalele. Chiyoyelo chenyi chafukilile.

7. (a) Kweseka namukanda waMateu 6:19-21, mwomwo ika twatela kuliwahishila kuyoya chahaya myaka yosena kulutwe? (b) Hanenu chakutalilaho chize chasolola chihandwa chatwama hakulilunjikila luheto lwakumujimba nelu lwakushipilitu?

⁷ Nge uchili ungamba yaYehova wamukweze, kaha lufwelelo nalukukafwa ngachilihi hakusakula milimo yakuzata? Shinganyeka vyuma mukalinga kulutwe? Pwenu nalufwelelo mujishiko jaKalunga nakukapwa nakuyoya chahaya myaka yosena kulutwe keshi kuyoya chakatando kakandendeko. (Tangenu Mateu 6:19-21.) Chakutalilaho, Sophie uze apwile nauhashi wakukina asakwile kanawa vyakulinga. Jikapani jatala hakukina muUnited States jamufwelelesele nge navamutangisa nakumwingisa hamilimo. Ambile ngwenyi: “Ngwevwile kuwaha hakungutohwesa. Ngwalivwile kupwa wamulemu kuhambakana vakwetu. Oloze kangwapwile nguwakuwahililako.” Likumbi limwe Sophie atalile vindiyo yakwamba ngwavo Young People Ask—What Will I Do With My Life? Kaha ambile ngwenyi: “Numba tuhu kaye kangulingishile ngufukile mukuyoya, nakungutohwesa kuli vatu, oloze kakangukafwile nguzachile Yehova namuchima wami wosenako.” Ngocho alombele chikuma kuli Yehova kaha alitwaminyinyine mulimo wakukina. Uno eji kwivwanga ngachilihi hakulitwamina mulimo wenyi? Ambile ngwenyi: “Kangweshi kuliveyako. Makumbi ano ngwapwa nguwakuwahilila chikuma mukuyoya chami. Ngweji kuzatanga mulimo waupayiniya hamwe kaha nalunga lyami. Katwaya fumako kaha nawa katweshi naluhetoko. Oloze twatwama naYehova, navilongesa vyaMbimbiliya, navyuma vyakushipilitu vize twalitomena kulinga. Kangwaliveya numba hahandendeko.”

8. Jindongi muka jamuMbimbiliya jize najikafwa vaka-Kulishitu vavakweze kusakula vyakulinga mukuyoya chavo?

 ⁸ Yehova ejiva kanawa vyuma twasaka. Mose ambile ngwenyi: “Yehova Kalunga kenu ali nakumilomba ika? Shina kumwivwanga Yehova Kalunga kenu woma, kutambukanga mujijila jenyi josena, nakumuzanganga, nakuzachilanga Yehova Kalunga kenu namichima yenu yosena namyono yenu yosena, kulamanga jishimbi jaYehova, navilika vyenyi, evi nguli nakumilweza likumbi lyalelo mangana mumonenga kuwaha.” (Lushi. 10:12, 13) Omu muchili muvakweze, sakulenu milimo yize nayimilingisa muzange Yehova nakumuzachila “namichima yenu yosena, namyono yenu yosena.” Mwatela kumona ngwenu kusakula milimo kana nachimilingisa “mumonenga kuwaha.”

9. Lumbununenu vyuma vyalingishile Mose achiwane kupwa chachikalu kuzata mulimo vamuhanyine.

⁹ Mose “amwene kutoleka chakutoleka Kulishitu ngwenyi hiluheto lwakuhambakana vikumba vyamuEjipitu.” (Hepe. 11:26) Muchisoneka chino, Mose vanamuvuluka ngwavo “Kulishitu” chipwe ngwetu “uze vawavisa.” Kulumbununa nge vamusakwile kuli Yehova mangana atwaminyine vana vaIsalele kufuma muEjipitu. Mose ejivile ngwenyi kuzata mulimo kana nachipwa chachikalu, kaha nawa ‘navamutoleka.’ KaIsalele umwe ahanjikile nakumufwefulula ngwenyi: “Iyaze nakulingisove kupwa umwangana wetu, umuka-kutuyula?” (Kulo. 2:13, 14) Kaha kutwala muze Mose ahulishile Yehova ngwenyi: “Fwalo mwangwivwilila ngachilihi?” (Kulo. 6:12) Hakusaka omike nge vanamufumbukila, Mose alombele kuli Yehova mangana amukafwe ahone kwivwa woma nakuhona kulizakamina. Uno Yehova akafwile ngachilihi Mose atesemo mulimo wenyi waukalu?

10. Uno Yehova akafwile ngachilihi Mose atesemo mulimo wenyi?

¹⁰ Chakulivanga, Yehova afwelelesele Mose ngwenyi: “Nangupwanga nayove hamwe.” (Kulo. 3:12) Chamuchivali, Yehova alwezele Mose mulyalumbunukila lijina lyaYehova. Amulweze ngwenyi: “Ngwapwa Mungwapwa.” * (Kulo. 3:14) Chamuchitatu, ahanyine Mose ngolo jakulinga vinjikizo vyakukomwesa jize jasolwele nge vamutumine kuli Kalunga. (Kulo. 4:2-5) Chamuchiwana, Yehova asakwile Alone apwenga muka-kuhanjikilako Mose nakumukafwa atesemo mulimo vamuhanyine. (Kulo. 4:14-16) Omu apwile kwakamwihi nakufwa, Mose afwelelele chikupu ngwenyi Yehova eji kukafwanga vangamba jenyi vatesemo kala mulimo mwavahana. Mose afwelelele chikupu muli Yehova nakulweza Yoshuwa ngwenyi: “Yehova, Ikiye Uze mwatwaminangako kumeso ove, Ikiye mwapwanga nayove, keshi kukakumbilako, chipwe kukuseza. Kanda ukevwa womako, chipwe kuhomba.”—Lushi. 31:8.

11. Mwomwo ika Mose amwene mulimo vamuhanyine kupwa waulemu?

¹¹ Mwomwo yakumukafwa kuli Yehova, Mose amwene mulimo waukalu vamuhanyine kupwa waulemu kuhambakana “vikumba vyamuEjipitu.” Kakweshi chuma chachilemu kuhambakana kuzachila Kalunga Wangolo Josenako. Kumusakula kuli Yehova mangana atwaminyine vaIsalele chapwile chachilemu chikuma kuhambakana kupwa mwana mwangana muEjipitu. Mose vamukiswile mwomwo yakupwa namuchima wamwaza. Atungile usepa wakukola naYehova, uze amuhanyine ‘ngolo jajinene’ jakutwaminyina vaIsalele muLifuchi lyaLushiko.—Lushi. 34:10-12.

12. Milimo muka yayilemu atuhana Yehova?

¹² Nayetu vatuhana mulimo kuli Yehova. Yehova natuhane mulimo wakwambulula mujimbu wamwaza ngana muze alingile kaposetolo Paulu navakwavo veka. (Tangenu WaChimoteu 1, 1:12-14.) Tuvosena tukwechi kutokwa chakwambulula mujimbu wamwaza. (Mateu 24:14; 28:19, 20) Vandumbwetu vamwe vapwa vaka-kwambulula vashimbu yosena. Vandumbwetu vamalunga vakuhya vakumbapachisa veji kuvatongolanga vazate mwavaka-kuzachila muliuka kaha veka vakulwane muchikungulwilo mangana vazachile vandumbwavo. Oloze vausoko wenu vaze kavapwa vinjihoko, navatu veka vanahase kulelesa milimo muli nakuzata, chipwe vene  kumitoleka hakulisuula chenu kuzachila Yehova. (Mateu 10:34-37) Kumitoleka chinahase kumilingisa muputuke kushinganyeka nge kulisuula chenu chamokomoko chipwe kamweshi kuhasa kutesamo mulimo wenuko. Nge chuma kana chinamisolokela, kaha lufwelelo nalumikafwa ngachilihi mutwalilileho lika kuzata milimo yenu?

13. Uno Yehova eji kutukafwanga ngachilihi mangana tutesemo milimo yetu yakushipilitu?

¹³ Lombenu kuli Yehova nakufwelela ngwenu mwamikafwa. Mulwezenu vyuma vinakumivwisa woma nakulizakamina chenu. Anukenu ngwenu Yehova mwamikafwa mufukile hakuzata mulimo wenyi mwomwo ikiye amihanawo. Mujila muka? Mujila yoyimwe yize akafwililemo Mose. Chakavanga, Yehova amifwelelesa ngwenyi: “Nangukukakikanga, chamwenemwene nangukukafwanga, chamwenemwene nangukukwachisanga nalivoko lyakwoloka chami lyachilyo.” (Isa. 41:10) Chamuchivali, amifwelelesa ngwenyi jishiko jenyi jeji kutesangamo hakwamba ngwenyi: “Chamwenemwene ngunahanjika, nangukachisolola nawa, ngunajinyi, kaha nawa nangukachilinga.” (Isa. 46:11) Chamuchitatu, Yehova eji kumihananga “ngolo jakuhambakana jize javatu” mangana mutesemo mulimo wenu. (Koli. 2, 4:7) Chamuchiwana, hakusaka mutwalilileho lika kuzata mulimo wenu, Setu uze atuzakama amihana wanawakwetu wamukaye kosena wavatu vaze valemesa Kalunga wamuchano vaze veji ‘kulikolezezanga navakwavo, nakulitunga nawa navakwavo.’ (Teso. 1, 5:11) Omu Yehova mwamikafwa mutesemo mulimo wenu, lufwelelo lwenu muli ikiye naluzama. Kaha namumona milimo muli nakumuzachila kupwa yayilemu kuhambakana kala luheto lwahano hamavu.

14. Mwomwo ika Mose afwelelele ngwenyi mwakatambula fweto?

¹⁴ Mose “ashishikile chikuma hafweto yize mwakatambula.” (Hepe. 11:26) Numba tuhu kwapwile mijimbu yayivulu yakulutwe yize Mose katachikijile kanawako, oloze vyuma vyavindende vize ejivile vyamukafwile asakule kanawa vyakulinga. Ngana mwakakuluka yenyi Apalahama, Mose afwelelele chikupu ngwenyi Yehova nahase kukasangula vafu. (Luka 20:37, 38; Hepe. 11:17-19) Kufwelela mujishiko jaKalunga chakafwile Mose atachikize ngwenyi myaka 40 yize apwile nakuchinwojoka, namyaka 40 yize apwile mupambo kayayile muwoyako. Numba tuhu kapwile namashina namasongo kutalisa kuvyuma ajina kukatesamo Kalungako, oloze lufwelelo lwenyi lwamulingishile amone fweto mwakatambula kulutwe.

15, 16. (a) Mwomwo ika twatela kushishika hafweto yize natukatambula? (b) Vyuma muka vyamwaza muli nakutalilila kukalivwisa kuwaha muchiyulo chaWangana waKalunga?

¹⁵ Kutala mweji ‘kushishika hafweto yize namukatambula’  tahi? Ngana mwaMose, nayetu nawa katwejiva kanawa mujila yize najikatesamo jishiko jaKalungako. Chakutalilaho, ‘katwatachikiza oho nalukejila lwola vatongola’ lwamalwa amaneneko. (Mako 13:32, 33) Oloze twejiva vyavivulu kupandama kupalachise yakulutwe kuhambakana Mose. Yehova atulweza vyuma vyavivulu kutalisa kuchiyoyelo chamupalachise muWangana wenyi chize tunahase “kushishika chikuma,” kulumbununa nge tunahase kumwena chimweza muvishinganyeka vyetu omu nakakapwa kaye kakahya. Nge natulinga ngocho, kaha nachitulingisa tutondetonde chatete Wangana Kalunga. Mujila muka? Achitalenu chakutalilaho chino: Kutala munahase kulanda zuvo nge kamwatachikijile kanawa omu yili nakusolokako tahi? Nduma. Chochimwe nayetu nawa katweshi kuhasa kuzachisa kuyoya chetu hakufwila vyuma vize kavyeshi kukatunehela nganyoko. Lufwelelo lwetu lwatela kutulingisa tumone omu nachikapwa kuyoya muWangana waKalunga.

¹⁶ Hakusaka mumone omu naukapwa Wangana waKalunga, ‘shishikenu’ chipwe ngwetu shinganyekenu omu nachikapwa chiyoyelo chenu mupalachise. Chakutalilaho, nge namulinangula chiyoyelo chavatu vaze vasoneka muMbimbiliya vaze vapwileko shimbu kanda kupwenga vaka-Kulishitu, shinganyekenu havyuma munahase kukavahulisa omu navakasanguka. Achishinganyekenu havyuma navakamihulisa kupandama kuchiyoyelo chenu chamumakumbi akukuminyina. Achishinganyekenu ocho kuwaha namukevwa omu namukaliwana navakakuluka jenu vaze vafwile lyehi kunyima nakuvanangula vyuma vize avalingila Kalunga. Achishinganyekenu ocho kuwaha namukevwa omu namukalinangula vyatunyama vavavulu vamuchipapa nomu namukavamona vanatwame mukuunda hano hamavu. Achishinganyekenu omu namukapandamanga chikuma kuli Yehova mwomwo yakukupuka mwosena.

17. Uno kushinganyeka hafweto yakulutwe yize katwamonako nachitukafwa ngachilihi makumbi ano?

¹⁷ Kushinganyeka havyuma vize mwakatulingila Yehova kulutwe, nachitukafwa tupwenga lika vakuwahilila nakusakula kanawa vyakulinga vize navitulingisa tukayoye haya myaka yosena. Paulu asonekelele vaka-Kulishitu vawavisa ngwenyi: “Oloze kachi nge tuli nakutalilila ocho chichili kanda tumone, kaha natutwalaho lika kuchivandamina chikuma nalukakachila.” (Loma 8:25) Awa mazu atalisa nakuli vaka-Kulishitu vosena vaze vakwechi lutalililo lwakukayoya haya myaka yosena. Numba tuhu kanda tutambule fweto yetu, oloze tukwechi lufwelelo lwakukola luze lweji kutulingisanga tuvandamine ‘fweto yize natukatambula’ kulutwe. Ngana mwaMose, nayetu katweshi kumona myaka tunazachila Yehova ngwetu yinayi muwoyako. Oloze twafwelela chikupu ngwetu ‘vyuma twamona vyapwa vyatando yayindende kaha, oloze vyuma vize twahona kumona vyapwa vyahaya myaka yosena.’—Tangenu Wavaka-Kolinde 2, 4:16-18.

18, 19. (a) Mwomwo ika chapwila chachilemu kuzata nangolo mangana tutwaleho lika kulama lufwelelo lwetu? (b) Vyuma muka natushimutwila muchihande chinakavangizaho?

¹⁸ Lufwelelo lweji kutukafwa tumone “unjiho wakusolola hatoma vyuma vivene vize katwamweneko.” (Hepe. 11:1) Mutu afwila vyuma vyakumujimba kamona kuzachila Yehova kupwa chachilemuko. Vatu vakufwana ngana vamona vyuma vyakushipilitu kupwa “uleya.” (Koli. 1, 2:14) Oloze etu twafwila kukayoya haya myaka yosena nakukamona omu navakasangula vafu, vyuma vize kavashinganyeka vaka-kayeko. Ngana muze vaka-kulinangula mangana autu vamumakumbi aPaulu vamuvulukile ngwavo “muka-kundengula” uze katachikiza vyuma eji kuhanjikangako, navatu vavavulu makumbi ano vashinganyeka ngwavo vyuma twatalilila vize tweji kuvambulilanga vyapwa vyamokomoko.—Vili. 17:18.

¹⁹ Hakuwana nge vatujingilika kuvatu vaze kavatwama nalufweleloko, twatela kuzata nangolo numba tuhase kulama lufwelelo lwetu. Lembelelenu Yehova mangana ‘lufwelelo lwenu luzeneke kukuma.’ (Luka 22:32) Ngana mwaMose, mwatela kutachikiza vyuma vyeji kufumanga hakuvulumuna shili, nakutachikiza nganyo yatwama hakuzachila Yehova, nakupwa nalufwelelo lwakukayoya haya myaka yosena. Kutala evi vikiko kaha natulinangula kumujimbu waMose tahi? Nduma. Muchihande chinakavangizaho, natushimutwila omu lufwelelo lwakafwile Mose amone “Uze vahona kumona.”—Hepe. 11:27.