Mwangana wavaIsalele Ndavichi alishile Yehova mumwaso embile ngwenyi: “Ove Kalunga kami, ngunevu kuwaha hakulinga mwaya muchima wove, Jishimbi jove jili mukachi kamuchima wami.” (Samu 40:8) Ndavichi evwile kuwaha kulinga mwaya muchima waKalunga chamokomoko naukalu amwene mukuyoya chenyi. Keshi nge ikiye kaha evwile kuwaha kulinga mwaya muchima waKalungako.

Kaposetolo Paulu avulukile mazu atwama hali Samu 40:8 hakwinyikila kuli Meshiya chipwe Kulishitu. Paulu asonekele ngwenyi: “Shikaho ikiye [Yesu] hakwiza mukaye amba ngwenyi: ‘“Vimuna vakuvatula namawana kawavisakileko, oloze wanguwahishilile mujimba. Ove kawevwilile kuwaha mawana akulumba namawana ahashiliko.” Jino ngwambile ngwami, “Tala! Nguneza (mumukanda wakuvunga vasonekamo vyakunguvuluka ami) nakulinga mwaya muchima wove, ove Kalunga.”’”—Hepe. 10:5-7.

Omu apwile hano hamavu, Yesu alivwishile kuwaha kutala vyuma vyakutenga, nakupwa hamwe namasepa jenyi nakulila hamwe vyakulya. (Mateu 6:26-29; Yowa. 2:1, 2; 12:1, 2) Oloze chuma chachinene evwililile kuwaha shina kulinga mwaya muchima waIse wamwilu. Yesu ambile ngwenyi: “Kulya chami shina kulinga mwaya muchima wayauze angutumine nakukumisa mulimo wenyi.” (Yowa. 4:34; 6:38) Tumbaji twaYesu valinangwile kuli Mwata wavo chuma cheji kunehanga kuwahilila chamwenemwene mukuyoya. Valisuwile kwambulula mujimbu waWangana mukuwahilila.—Luka 10:1, 8, 9, 17.

Yesu alwezele vaka-kumukavangiza ngwenyi: “Yenunga mukatunge tumbaji kuvatu vakumafuchi osena, mukavambapachise mulijina lyaTata neli lyaMwana neli lyashipilitu yajila, nakuvanangula kulamanga vyuma vyosena vize ngunamilweze. Kaha ami nguli nayenu makumbi osena palanga nakuchikukulwishi chakatwamino kamyaka yino.” (Mateu 28:19, 20) Kuzata mulimo kanou chasakiwa kutambukila vatu kala kweshokwo natuvawana nakukindulukila kuli vaze vanawahilila, nakutwaminyina vilongesa vyaMbimbiliya. Kuzata mulimo kana chinahase kutwivwisa kuwaha chikuma.

Numba vatu navevwila kuwaha mujimbu wetu chipwe nduma oloze muchima natusolola ukiko nautulingisa tuwahilile hakuzata mulimo wakwambulula. Mwomwo ika tweji kutwalangaho lika kwambulula mujimbu wamwaza chamokomoko nakututoleka? Mwomwo twejiva ngwetu kwambulula mujimbu wamwaza nakutunga tumbaji chapwa kuzanga Kalunga navakwetu vatu. Chikupu vene kuyoya chetu nechi chavakwetu chili muponde. (Ezeke. 3:17-21; Chimo. 1, 4:16) Tutalenu havyuma vimwe vize vinakafwe vandumbwetu vavavulu vatwaleho lika kwambulula natwima muvihela vize vyapwa vyavikalu kwambulwila.

Kuzachisa vihula vyamwaza mumulimo wamuwande cheji kunehanga mihako yamwaza. Likumbi limwe nachimene, Amalia amwene lunga anakutanga lipapilo lyamijimbu muchihela chakuhemena. Ayileko nakumuhulisa nge atangileko mijimbu yamwaza. Omu amukumbulwile ngwenyi yauchi, Amalia ambile ngwenyi, “Ngunakunehela mujimbu wamwaza waWangana waKalunga.” Echi chevwishile uze lunga kuwaha kaha etavilile chilongesa chaMbimbiliya. Amalia aputukile kutwaminyina vilongesa vyaMbimbiliya vitatu hachihela kana.

Janice naikiye eji kwambulilanga hachihela chenyi eji kuzachilanga. Omu muka-kulama umwe namukwavo muvazachila vevwilile kuwaha chihande chimwe chapwile muKaposhi Kakutalila, Janice aputukile kuvatwalila jimangazini lwola lwosena. Alingile mwomumwe nakuli mukwavo weka muvazachilile uze awahililile chikuma havihande vyakulisezaseza vyatwama mujimangazini jaKaposhi Kakutalila naTonenu! Echi chalingishile muka-milimo mukwavo alombenga jimangazini. Janice ambile ngwenyi: “Echi chinapu hikukisula chakufuma kuli Yehova.” Kutwala muze apwile jino navatu 11 vaze ahanyinenga jimangazini kakweji hikakweji.

Kalama wakutambwojoka umwe ambile ngwenyi hakwambulula kuzuvo hizuvo vaka-kwambulula kavatela kwamba ngwavo natukeza lwola lukwavoko. Oloze vatela kuhulisa mwenya zuvo ngwavo: “Kutala muli nakusaka ngumilweze omu tweji kulinangulanga chilongesa chaMbimbiliya tahi?” chipwe “Likumbi nalwola muka muli nakusaka ngukamitambukile cheka mangana tukatwalilileho kushimutwila?” Ou kalama ambile ngwenyi kuzachisa jila kaneyi chakafwile vandumbwetu vamuchikungulwilo ngwatambukilile vaputuke vilongesa vyaMbimbiliya 44 muchalumingo chimwe kaha.

Kukindulukila kuvatu chakuzeneka kuhichisamo makumbi amavulu cheji kulovolanga mihako yamwaza.  Mwomwo ika? Mwomwo cheji kusololanga nge twazakama vatu tweji kwambulilanga mangana vatachikize Mbimbiliya. Omu pwevo umwe vamuhulishile ovyo vyamulingishile numba etavile kumunangula kuli vinjiho jaYehova, ambile ngwenyi, “Ngwaputukile kulinangula mwomwo vanguzakamine nakungusolwela zangi.”

Omu mwahichile makumbi amandende kufuma hakukumisa Shikola yaMulimo wauPayiniya, Madaí apwile nakutwaminyina vilongesa vyaMbimbiliya vyakuheta ku 15 kaha ahanyineko vilongesa 5 kuli vaka-kwambulula vamwe. Vilongesa vyenyi vyavivulu vyaputukile kuya nakukunguluka lwola lwosena. Vyuma muka vyakafwile Madaí numba aputuke vilongesa vyaMbimbiliya? Shikola yamukafwile atachikize ovyo chapwila chachilemu kukindulukila kuvatu vakuwahilila. Chinjiho weka uze nakafwenga vatu vavavulu valinangule muchano ambile ngwenyi, “Chuma chachilemu shina kupwa nalukakachila lwakukindulukilanga kuvatu vaze vali nakusaka kutachikiza vyaYehova.”

Kukindulukilanga kuvatu vakuwahilila nakutwaminyina vilongesa vyaMbimbiliya chasakiwa kukilikita. Oloze nganyo yeji kufumangaho yapwa yayinene. Nge natwambululanga mujimbu wamwaza, kaha natukafwa vatu “vapwenga nachinyingi chakwoloka chakutachikiza muchano” kahechi chinahase kukavalingisa vakavalwile. (Chimo. 1, 2:3, 4) Kaha yetu nawa natupwa vakuwahilila chikuma.