1. Liuka muka lyashishile vaIsalele vaze vasosolokele kulufwelelo mangana limanyineko lijina lyaYehova? (Talenu muvwimbimbi wakulivanga.)

MAKUMBI ano Yehova eji kwivwanga kuwaha omu vatu jenyi veji kumulemesanga mujila yamwenemwene. Kushikulu vaIsalele vavasakwile kuli Kalunga kupwa vatu jenyi. Oloze vasosolokele kulufwelelo. Kufumaho Yehova asakwile muyachi weka uze wapwile wavaka-kukavangiza Kulishitu. Muyachi kana ukiko wapwile liuka lyemanyinyineko Yehova. Numba tuhu Yelusalema vayinongesele mu 70 C.E., oloze liuka lyaYehova kavalinongeseleko. (Luka 21:20, 21) Mumakumbi ano akukuminyina, eli liuka lyalihya valilongesa limanyineko Yehova. Kaveshi kukalinongesa omu kaye kaSatana navakakanongesako. (Chimo. 2, 3:1) Twafwelela ngachilihi ngocho?

2. Yesu ahanjikile vyuma muka kutalisa ‘kumalwa amanene,’ kaha nawakaputuka ngachilihi?

² Yesu ahanjikile chimweza kutalisa kuvyuma navikasoloka kumakumbi akukuminyina ngwenyi: “Nakukapwa malwa amanene, aze kanda asolokengaho lyehi kufuma kukuputuka chakaye palanga  nakulelo lino, kaha chipwe kulutwe nawa kaweshi kukasoloka chekako.” (Mateu 24:3, 21) Awa malwa amanene nawakaputuka omu Yehova mwakanongesa “Mbavilone Wamunene,” uze emanyinako kwitava chamakuli chamukaye kosena. (Kuso. 17:3-5, 16) Kufumaho vyuma muka navikasoloka?

3. Vyuma muka navikasoloka kuli vatu jaYehova omu navakanongesa kwitava chamakuli?

³ Omu navakakumisa kunongesa kwitava chamakuli, liuka lyaVinjiho jaYehova likiko kaha nalikasalaho. Satana nakaye kenyi navakanyemukila vatu jaKalunga. Nachikasoloka kwijiva nge vatu jaYehova kaveshi namukingoko. Visoneka vyavulukile chimweza kupandama kuli “Ngonge, wakulifuchi lyaMangonge” ngwavyo: “Naukakanduka, naukezako nge nyamanganda, naukapwa nge ulivwi nakufwika lifuchi, nayove namazavu ove osena navatu veka naveka vavavulu nove hamwe.” Oloze kunyemukila kanechi nachikavanehela ukalu waunene.—Ezeke. 38:1, 2, 9-12.

4, 5. Yehova mwakalinga ngachilihi omu navakanyemukila vangamba jenyi?

⁴ Omu Satana navaka-kumukavangiza navakanyemukila vatu jaYehova, nachikapwa kwijiva nge vali nakufumbukila Yehova. (Tangenu Zekaliya 2:8.) Uno Yehova mwakalinga ika? Setu wamwilu mwakawana jila yakukingilamo vatu jenyi. Keshi kukavechelela vakavanongeseko. Aha hakiko jino Yehova mwakaneha jita yaAlamangetone nakunongesa kaye kaSatana kosena.—Kuso. 16:14, 16.

⁵ Mbimbiliya yapolofwetele kutalisa kuAlamangetone ngwayo: “Yehova ali namulonga wakuhanjika navaka-mafuchi, Ikiye mwakalisopesa navakwechi mijimba vosena, kaha vaka-kuhuka mwakavahana kujipoko jamikwale. Mukiko mwanambe Yehova. Yehova wamayongomena nambe ngwenyi, Ivwenu, muli vaka-lifuchi limwe namukalovoka lupi nakuya kuli vaka-lifuchi likwavo, navakasangumuna nyamanganda wamunene kusongosongo yamavu. Kaha vakujiha kuli Yehova navakapwa kufumisa kusongo yamavu nakutwala kusongo yamavu yikwavo halikumbi lize, kaveshi kukavalila jimbimbiko chipwe kuvakungulula chipwe kuvafunda, navakapwanga nge wilo kwilu lyamavu.” (Yele. 25:31-33) Alamangetone nayikakumisa kaye kaSatana kosena. Oloze liuka lyaYehova nalikayovoka.

6, 7. (a) Vatu vaze vatwama ‘muliyongomena lyalinene’ vafuma kulihi? (b) Vatu jaKalunga vali nakuvulilako ngachilihi makumbi ano?

⁶ Liuka lyaKalunga lili nakutwalaho lika kuzovoloka mwomwo lyatwama navatu vaze evwila Kalunga uselewa. Mbimbiliya yamba ngwayo: “Meso aYehova anatale hali vaka-kwoloka, matwitwi enyi nawatengeleka kukulomba chavo chakulembelela.” (Petu. 1, 3:12) Hali ava vaka-kwoloka hatwama “liyongomena lyalinene” lyavatu vavavulu vaze navakayovoka “malwa amanene.” (Kuso. 7:9, 14) Achishinganyekenu kuwaha namukevwa hakuyovoka malwa amanene!

⁷ Eli liyongomena lyalinene likwechi vatu vakumafuchi osena. Mulimo wakwambulula ukiko uli nakuvaneha hamwe. Yesu ahanjikile chimweza ngwenyi: “Kahou mujimbu wamwaza waWangana navakawambulula kumavu kwatwama vatu kwosena, nakupwa unjiho kuli vaka-mafuchi osena, numbanyi kukuma chikeze.” (Mateu 24:14) Kahechi chikiko chalingisa vangamba jaKalunga vazate chikuma mulimo wakwambulula Wangana waKalunga. Echi chili nakulingisa vatu vavavulu valemese Yehova “mushipilitu namumuchano.” (Yowa. 4:23, 24) Chakutalilaho, kufuma  mumwaka wa 2003 nakuheta mu 2012 vatu vakuhambakana 2,707,000 valihananga kuli Kalunga nakuvambapachisa. Makumbi ano kuli Vinjiho vakuhambakana 7,900,000, kaha mwaka himwaka mayevuyevu avatu ali nakupwanga kuchilika chaKwanuka Kufwa chaMwata. Tweji kuwahililanga hakuwana nge eli liyongomena lyalinene lili nakutohwelako lika, kaha nawa twatachikiza ngwetu Yehova ikiye ali nakulilingisa litohweleko lika.—Koli. 1, 3:5-7.

8. Mwomwo ika liuka lyaYehova lili nakutohwelako lika?

⁸ Yehova nasakula liuka hano hamavu mangana limwimanyineko. Ali nakulingisa liuka kana litohweleko chikuma. (Tangenu Isaya 43:10-12.) Kuvula kanechi vachivulukile chimweza muupolofweto uno ngwavo: “Lyalindende nalikalinga kupwa likombakaji, lyalindende chikuma nalikalinga kupwa vaka-lifuchi vakujikiza. Ami Yehova nangukachanguhwisa hamwaka wacho.” (Isa. 60:22) Vawavisa vasalaho vaze vavuluka ngwavo ‘vaIsalele jaKalunga’ vapwile lizavu “lyalindende,” oloze Yehova akiswile mulimo wavo wakwambulula. Eli lizavu lyavulile omu vaka-Kulishitu vawavisa veka vejile muliuka lyaKalunga. (Ngale. 6:16) Hamyaka yayivulu, vatu vavavulu vaze vakwechi lutalililo lwahamavu navakivo vetavilile muchano.

9. Vyuma muka twatela kulinga nge tuli nakusaka tukalivwise kuwaha vyuma vyamwaza vatushika muMazu aKalunga?

⁹ Yehova natufwelelesa tuvosena vyuma vyamwaza kulutwe numba tupwa vaka-Kulishitu vawavisa chipwe tupwa vamuliyongomena lyalinene. Hakusaka mangana tunganyale kuvyuma mwakatulingila kulutwe, twatela kwononoka jishimbi jenyi. (Isa. 48:17, 18) Chakutalilaho, Yehova asakile vaIsalele vononoke Jishimbi jenyi. Jishimbi jenyi jatelele kuvakinga nakuvanangula mwakupwila vakuwahilila mutanga, mwakupwila namasepa vamwaza, namwakuzachila milimo yakusekasana mukashishi nakusolwela vakwavo vilinga vyamwaza. (Kulo. 20:14; Levi 19:18, 35-37; Lushi. 6:6-9) Chochimwe namakumbi ano, jishimbi jaKalunga jeji kutukinganga kaha nawa jeji kutunganyalisanga. Kajapwa jajikalu kukavangizako. (Tangenu WaYowano 1, 5:3.) Nge natujikavangizanga kaha natupwa vakuwahilila mukuyoya nakuzamisa usoko wetu naYehova.—Chitu. 1:13.

10. Mwomwo ika twatela kunoneka lwola lwakutanga Mbimbiliya naKulemesa Kalunga mwaTanga?

¹⁰ Liuka lyaYehova lili nakuzovoloka mujijila jajivulu. Chakutalilaho, lyeji kutukafwanga twivwishise kanawa muchano wamuMbimbiliya. Omu mukiko yahanjika Mbimbiliya ngwayo: “Oloze jila yavaka-kwoloka yinapu nge musana wakututuka, Wakuya nakututuka palanga nomu linahete lyehi likumbi helu.” (Vishi. 4:18) Oloze mutu himutu atela kulihulisa ngwenyi: ‘Kutala ngwatachikiza vyuma vanalumunako kupandama mujila twatachikijilamo Visoneka vimwe tahi? Kutala ngweji kutanganga Mbimbiliya hakumbi hakumbi tahi? Kutala ngweji kutanganga mikanda yayihya yeji kwizanga tahi? Kutala ngweji kupwanga nachilongesa Chakulemesa Kalunga mwaTanga tahi?’ Vyuma kanevi kavyapwa vyavikalu kulingako, oloze twatela kunonekanga lwola lwakuvilinga. Ngachize chapwa chachilemu kutwalaho lika kutanga Mazu aKalunga nakuwazachisa, nakutambukila hamwe naliuka lyaKalunga chikumanyi omu tuli nakupandama kumalwa amanene.

11. Mwomwo ika vatu jaYehova veji kuyilanga kukukunguluka chachikungulwilo,chalikumbi limwe, chachihanda nechi changalila?

¹¹ Liuka lyaYehova lyatukolezeza tukavangizenga mazu aPaulu akwamba ngwenyi: “Tulihakenunga michima navakwetu mangana tulisangumwine kuzangi nakuvilinga vyamwenemwene, nakuzeneka kusuvilila kulikungulula  chetu, nganomu vatu vamwe vatwama nachijililo kana, oloze tulikolezezenunga navakwetu, chikumanyi omu munamono ngwenu likumbi kana linapandama kwakamwihi.” (Hepe. 10:24, 25) VaIsalele valikungulwilenga lwola lwosena mangana valemese Yehova nakuvanangula kuli ikiye. Chiwanyino chaVisakila chize valingilenga mumakumbi aNehemiya chapwile hichiwanyino chimwe chize chavevwishilenga kuwaha. (Kulo. 23:15, 16; Nehe. 8:9-18) Namakumbi ano, nayetu tweji kunganyalanga hakupwa kukukunguluka chachikungulwilo, nechi chachihanda, nechi chalikumbi limwe nechi changalila. Ngachize, tuzatenu nangolo mangana tupwenganga kukunguluka chosena echi mwomwo cheji kutukafwanga tupandame kuli Yehova nakupwa vakuwahilila hakuzata milimo yenyi.—Chitu. 2:2.

12. Twatela kwivwa ngachilihi hakwambulula mujimbu wamwaza waWangana?

¹² Hakupwa twatwama muliuka lyaKalunga, twatela kuwahilila hakuzata “mulimo wajila wamujimbu wamwaza waKalunga.” (Loma 15:16) Kuzata ‘mulimo kanou wajila’ cheji kutulingisanga tupwenga “vaka-kuzachila” hamwe naYehova uze apwa “Wajila.” (Koli. 1, 3:9; Petu. 1, 1:15) Kwambulula mujimbu wamwaza cheji kulingisanga lijina lyaYehova valijilike. Kaha nawa chapwa hikutokwa kwambulula “mujimbu wamwaza waupahu wakuli Kalunga wakuwahilila.”—Chimo. 1, 1:11.

13. Uno kulikangula kushipilitu nakuyoya chetu chapendamina haka?

¹³ Kalunga asaka tupwenga lika vakulikangula kushipilitu hakupandama kuli ikiye nakukundwiza liuka lyenyi. Mose alwezele vaIsalele ngwenyi: “Ngunasanyika lilu namavu kwambulula unjiho wakumipayisa likumbi lyalelo ngwami, Ngunahake kuyoya nakufwa kumeso enu, nakuwahisa nakwangula nawa. Shikaho sakulenu kuyoya, mangana muyoyenga, nayenu navaka-tanga yenu, kuzanganga Yehova Kalunga kenu, mwononokenga mulizu lyenyi, mulipanjikenga neyi. Mwomwo Ikiye kuyoya chenu, Ikiye kuvula chamakumbi enu. Mangana mukatwamenga mulifuchi kana alishingile Yehova kuli vakakuluka jenu kuvahana, kuli Apalahama nakuli Isaka nakuli Yakova.” (Lushi. 30:19, 20) Kuyoya chetu chapendamina hakulinga mwaya muchina waYehova, nakumuzanga, nakwononokanga mulizu lyenyi nakupandama kuli ikiye.

14. Uno ndumbwetu umwe evwile ngachilihi kutalisa kuliuka lyaKalunga?

¹⁴ Ndumbu Pryce Hughes uze alinangwile muchano shimbu kanda mwaka wa 1914, atwalilileho lika kulyononona kuli Yehova naliuka lyenyi mukuyoya chenyi chosena. Omu apwile nakulumbununa mujimbu wenyi wakuyoya, ambile ngwenyi chuma chachilemu alinangwile shina kupandama kuliuka lyaYehova nakuhona kupendamina havishinganyeka vyavatu. Echi chamukafwile omike muvyeseko mukuyoya chenyi chosena. Ndumbu Pryce Hughes ambile ngwenyi jila yimwe yakutwivwilamo uselewa kuli Yehova shina kukavangizanga jindongi jamuliuka lyenyi lwola lwosena.

15. Chakutalilaho muka chamuMbimbiliya chize chatunangula vyuma twatela kulinga nge kuli kwalumuka chimwe muliuka lyaYehova?

¹⁵ Yehova asaka etu tukundwizenga liuka lyenyi nakwitavila kwalumuka chize chinakupwanga muliuka lyenyi kutalisa mujila tweji kwivwishishilangamo muchano wamuMbimbiliya namujila tweji kwambulilangamo. Mulikulukaji lyamyaka lyakulivanga, vaka-Kulishitu vavaYuleya vamwe vapwile lika nakukavangiza Jishimbi jaMose. (Vili. 21:17-20) Oloze Paulu avolwele nakuvakafwa  vatachikize nge wana waYesu ukiko kaha naulingisa jishili javatu vajikonekele keshi wana wavimunako. (Hepe. 10:5-10) Ava vaka-Kulishitu vavaYuleya vavavulu vakavangijile vyuma avahuhumwine Paulu kaha valumwine vishinganyeka vyavo. Chakutalilaho kana chinahase kutukafwa nayetu makumbi ano. Twatela kutanganga kanawa Mbimbiliya namikanda yetu. Kaha nge liuka lyaYehova nalyalumunako vyuma vimwe, kaha twatela kwononoka nakuvitavila.

16. (a) Vyuma muka vyamwaza natukalivwisa kuwaha mukaye kakahya? (b) Vyuma muka mwafwila kukamona mukaye kakahya?

¹⁶ Vosena vaze navatwalaho lika kulyononona kuli Yehova naliuka lyenyi navakalivwisa kuwaha vyuma vyamwaza kulutwe. Vawavisa navakalivwisa kuwaha kuzata mwavamyangana hamwe naKulishitu mwilu. (Loma 8:16, 17) Kaha vaze vakwechi lutalililo lwahano hamavu navakalivwisa kuwaha kuyoya haya myaka yosena muPalachise. Vangamba jaYehova vosena hano hamavu vakwechi kutokwa chakulwezako vakwavo vyalushiko lwaKalunga lwakuneha kaye kakahya. (Petu. 2, 3:13) Mbimbiliya yatufwelelesa ngwayo: “Vavavwovu navakaswana lifuchi, navakevwanga chipepa chakuunda chachivulu.” (Samu 37:11) Vatu “navakatunga jizuvo nakutwamangamo,” kaha navakalivwisa kuwaha “milimo yamavoko avo.” (Isa. 65:21, 22) Kakweshi kukapwa kuliyanjisa, uhutu nazalako. (Samu 72:13-16) Kwitava chamakuli kacheshi kukahungumwisa cheka vatuko mwomwo Kalunga mwakachifumisako. (Kuso. 18:8, 21) Vafu navakasanguka, kaha navakavahana lwola lwakulinangula nakukayoya myaka yosena hano hamavu. (Isa. 25:8; Vili. 24:15) Nge natuzamisa usoko wetu naYehova nakutwalaho lika kutambukila hamwe naliuka lyenyi, kaha natukamona omu vyuma kanevi vyamwaza navikatesamo.

17. Twatela kwivwa ngachilihi hakulemesa Yehova naliuka lyenyi?

¹⁷ Kalinwomu kaye kaSatana vakanongese. Hakusaka tukayovoke, twatela kuzama mbe mulufwelelo nakutwalaho lika kulemesa Yehova nakukundwiza liuka lyenyi. Twatela kwivwa ngana muze evwile muka-kwimba jisamu uze embile ngwenyi: “Kuli chuma chimwe ngunalombo kuli Yehova, chikiko vene nanguchitondanga, ngwami, ngutwamenga muzuvo yaYehova makumbi osena nanguyoya, mangana ngutalenga upahu waYehova, ngwihwojolenga mutembele yenyi.” (Samu 27:4) Ngachize, tuvosena tufwilenu kupandama kuli Yehova nakutambukila hamwe naliuka lyenyi.