MUMWAKA wa 1923, zuvo yakuhemena yamu São Paulo yize vavuluka ngwavo Drama and Music Conservatory yazalile navatu. Kutala muli nakwivwa lizu lyaGeorge Young lyamwaza tahi? Chihande chenyi chosena vapwile nakuchalumuna mulilimi lyaPortuguese. Vatu 585 vapwile nakwivwilila kanawa kuchihande chenyi. Visoneka vyapwile nakusoloka muPortuguese hachisaji chamivwimbimbi. Omu akumishile kuhanjika chihande, vatu vavapangililile mikanda vavuluka ngwavo Millions Now Living Will Never Die muPortuguese, muChingeleshi, muGerman, namuItalian. Chihande kana chakafwile vatu vavavulu, kaha vatu vayile nakulwezako vakwavo. Omu mwahichile makumbi avali, vatu vejile nakwivwilila cheka kuchihande chikwavo. Vyuma muka vyalingishile kupwenga vihande kana?

Mu 1867, Sarah Bellona Ferguson natanga yenyi vafumine kuUnited States nakuya nakutwama kuBrazil. Mu 1899, Sarah amwene ngwenyi nawane muchano hakutanga mikanda yimwe yize vamuhichikile kuli songo yenyi kufuma kuUnited States. Sarah asakile chikuma kutanga mikanda yetu, ngocho alanjilenga Kaposhi Kakutalila wamuChingeleshi. Hakwivwa kuwaha vyuma alinangwile muMbimbiliya, asonekelele Ndumbu C. T. Russell, ngwenyi ‘ami mazu ananguhete, hiunjiho wakusolola nge mujimbu wamuMbimbiliya unahase kuheta kuvihela vyakwakusuku.’

Sarah Ferguson azachile nangolo mangana ambulile vakwavo muchano wamuMbimbiliya, oloze apwile nakusaka mutu wakumukafwa natanga yenyi navatu vaze vasolwele michima yamwaza muBrazil. Kuheta mu 1912, Mbetele yamuBrooklyn yamulwezele nge kuli nakwiza mutu munganda yaSão Paulo uze ali najitalakiti jajivulu jakwamba ngwavo Where Are the Dead? (Uno Vafu Vali Kulihi?) mulilimi lyaPortuguese. Mu 1915 alikomokelelenga hakutanga nge Vaka-Kulinangula Mbimbiliya vavavulu kalinwomu vayenga mwilu. Hakwivwa mujimbu kana, ou pwevo asonekele ngwenyi: “Nyi ngachilihi vatu vamuBrazil nalitungu lyosena lyaSouth America? . . . Nge namutachikiza omu lyatohwa litungu lyaSouth America, kaha namumona ngwenu mulimo wakwaha kuuchili.” Chikupu vene, kuchapwile milimo yayivulu yakuzata.

 Muji 1920, vakweze 8 vakuBrazil vaka-kutambukisa mbopolo vayile kunganda yaNew York. Kahomu vapwile nakuvandamina mbopolo yavo vayiwahise, vayile kukukunguluka chachikungulwilo. Omu vakindulukile munganda yaRio de Janeiro yamuBrazil, valwezeleko vakwavo lutalililo lwamuMbimbiliya vakalinangwile kuze. Nakushimbula chiku, kuheta muMarch 1923, Ndumbwetu George Young, uze apwile kalama wakutambwojoka ayile munganda yaRio de Janeiro, muze awanyine vatu vakuwahilila. Ngocho alongesele vyuma mangana valumune mikanda yayivulu mulilimi lyaPortuguese. Ndumbu Young ayile nakunganda yaSão Paulo, nganda yize yapwile navatu 600,000 halwola kana. Akahanyine chihande chaMbimbiliya nakupangila mikanda yakuvuluka ngwavo Millions ngana muze twavulukanga kumaputukilo achihande chino. Ambile ngwenyi: “Hakupwa ukawami, ngwapendaminyine hamapapilo amijimbu mangana ngulanye vatu vakeze nakwivwilila kuchihande chami. Echi chikiko chapwile chatete kulanya vatu kuvihande vahanjikilenga kuzachisa liuka lyaInternational Bible Students Association muBrazil.” *

Kaposhi Kakutalila waDecember 15, 1923 ahanjikile hamujimbu wamu Brazil ngwenyi: “Hakuwana nge mulimo mulifuchi kana waputukile haJune 1 kaha nawa kamwapwile mikanda yetuko, ngocho twalikomokela omu Mwata nakisula mulimo mulifuchi kana.” Mujimbu kana watwalililaho nge, havihande 21 ahanjikile ndumbu Young muSão Paulo kufuma muJune 1 nakuheta kuSeptember 30, vihande vivali vikiko vyapwile navatu 3,600 mulizavu. Munganda yaRio de Janeiro mujimbu waWangana wapwile nakutandakana chikoki chikoki. Oloze mutukweji vavandende kaha mikanda yakuhambakana 7,000 yamulilimi lyaPortuguese vapwile nakuyipangila kuvatu. Kaha nawa Kaposhi Kakutalila wamulilimi lya Portuguese aputukile kulovoka mutukweji vavali November-December 1923.

Ndumbu Young atambukilile Sarah Ferguson kaha Kaposhi Kakutalila alumbunwine ngwenyi: “Ou ndumbwetu wapwevo omu ejile kuzuvo yavangeji halwola kana kahanjikileko. Kufumaho akwachile ndumbu Young kulivoko nakumutala kumeso nakwamba jino ngwenyi, ‘Uno chikupu vene wapwa uKalama waKutambwojoka tahi?’” Kutwala muze yikiye navana venyi vamwe vavambapachishile. Avandaminyine hamyaka 25 numba jino vamumbapachise. Kaposhi Kakutalila waAugust 1, 1924 ahanjikile nge vatu vakuheta ku 50 vavambapachishile muBrazil chikumanyi munganda yaRio de Janeiro.

Munahichi lyehi jino myaka 90 kufuma halwola kana. Oloze katweshi kuhulisa jino chihula ngwetu “Nyi ngachilihi vatu vamuBrazil nalitungu lyosena lyaSouth America?” Vinjiho jaYehova vakuhambakana ku 760,000 vali nakwambulula mujimbu wamwaza muBrazil. Kaha nawa mulitungu lyaSouth America mujimbu wawangana vanakuwambulula mulilimi lyaPortuguese, Spanish namalimi eka amavulu. Mu 1915 ndumbu Sarah Ferguson ahanjikile mwakwoloka ngwenyi ‘mulimo wakwaha kuwapwile.’—Mijimbu yetu yayilemu yakunyima muBrazil.