1, 2. Hanjikenu chakutalilaho chize chasolola ovyo chapwila chachilemu kuhulisa vihula mujila yamwaza. (Talenu muvwimbimbi wakulivanga.) (b) Mwomwo ika katwatela kulizakaminako nge tunakushimutwila vihande vyavikalu?

HAMYAKA yayivulu, ndumbwetu wapwevo apwilenga nakushimutwila vyaMbimbiliya nalunga lyenyi uze kapwile Chinjiho chaYehovako. Lunga lyenyi afwelelele muTulunga vatatu. Ou ndumbwetu ejivile ngwenyi kuchachi ayilenga lunga lyenyi vapwile nakunangula vyaTulunga vatatu, oloze katachikijile omwo chalumbunukilako. Ngocho amuhulishile mujila yamwaza ngwenyi, “Kutala mwafwelela ngwenu Kalunga apwa Kalunga, kaha Yesu nawa Kalunga, kaha nawa shipilitu yajila kupwa Kalunga, okunyi apwa Kalunga umwe kaha keshi vatatuko tahi?” Lunga lyenyi alikomokelele nakukumbulula ngwenyi, “Chiku, kangwafwelela vyuma kanako!” Kushimutwila mujila yamwaza chalingishile lunga lyenyi atachikize kanawa Kalunga.

² Vyuma muka natulinangula kuchakutalilaho kanechi? Kuhulisa vihula vyakutamo mujila yamwaza cheji kukafwanga. Kaha nawa twalinangula nge katwatela kwivwa woma kushimutwila vihande vyavikalu vyakufwana nge, Tulunga vatatu, kakahya kahelo, chipwe kunangula chakwamba nge kakwatwama Tengiko. Nge natupendamina hali  Yehova nakuzachisa vyuma vize ali nakutunangula, kaha natunangula vatu mujila yize nayivaheta kumuchima. (Kolo. 4:6) Muchihande chino natushimutwila omu tunahase kuheta vatu kumuchima (1) hakuhulisa vihula vize navilingisa mutu ahanjike vili kumuchima wenyi, (2) kulijingisa navo haVisoneka, (3) nakuzachisa vyakutalilaho vize navivakafwa vevwishise vyuma tuli nakuvanangula.

3, 4. Mwomwo ika chapwila chachilemu kuhulisa vihula mangana tutachikize vyuma afwelela mutu? Hanenu chakutalilaho.

³ Kuhulisa vihula chinahase kutukafwa tutachikize vyuma afwelela mutu. Mwomwo ika chapwila chachilemu? Mwomwo mukanda waVishimo 18:13 wahanjika ngwawo: “Ou mwakumbulula shimbu kandevweko, Chinapu uleya nasonyi kuli ikiye.” Ngocho chapwa chachilemu kuvangila kutachikiza vyuma vize afwelela mutu. Nge natuhona kwijiva vyuma vize afwelela mutu kaha tunahase kwenyeka lwola lwetu hakumunangula vyuma vize ejiva lyehi ngocho keshi kunganyalako.—Koli. 1, 9:26.

⁴ Achishinganyekenu tuli nakushimutwila namutu hachihande chakakahya kahelo. Vatu vamwe vafwelela ngwavo helo yapwa chihela chakuyekelesa vatu mukakahya. Kaha veka vafwelela ngwavo helo yalumbununa kuhona kupwa nausepa naKalunga. Ngocho tunahase kuvahulisa ngwetu: “Hakuwana nge vatu vakwechi vishinganyeka vyakulisezaseza kupandama kuhelo, nyi yenu mwafwelela vyuma muka hachihande kana?” Hanyima yakwivwilila kuvyuma mwakumbulula mutu, hakiko jino natuhasa kumukafwa atachikize omu yahanjika Mbimbiliya hachihande kanechi.

5. Vihula vinahase kutukafwa ngachilihi tutachikize ovyo vyalingisa vatu vafwelele vyuma vimwe?

⁵ Kuhulisa vihula vyamwaza cheji kukafwanga tutachikize ovyo vyalingisa mutu afwelele vyuma kana. Chakutalilaho, ngachilihi nge namuwana mutu muwande mwamba ngwenyi kafwelela muli Kalungako? Pamo munahase kukukulula ngwenu mutu kana pamo vamuhungumwisa navishinganyeka vyavaka-kaye vyakwamba ngwavo vyuma vyalijilile vivene. (Samu 10:4) Oloze vatu vamwe kavafwelela muli Kalungako mwomwo yakuyanda chavo chipwe chavakwavo. Echi chinahase kuvalingisa vashinganyeke ngwavo nge Tengi wazangi kwatwama, kachi keshi kuhasa kutwechelela tuyandeko. Ngachize, nge mwenya zuvo mwahanjika ngwenyi “Kangwafwelela muli Kalungako,” munahase kumuhulisa ngwenu, “Kutala omu mukiko mweji kushinganyekanga lwola lwosena tahi?” Nge mwakukumbulula ngwenyi nduma, kaha tunahase kumuhulisa nge pamo kuliko vyuma vimwe vize vyamulingisa ahone kufwelela nge Kalunga kwatwama. Kukumbulula chenyi nachitukafwa tuwane jila yamwaza yakumukafwilamo.—Tangenu Vishimo 20:5.

6. Vyuma muka twatela kulinga nge tunahulisa chihula?

⁶ Nge tunahulisa chihula, kaha twatela kwivwilila kanawa omu mwakumbulula mutu nakumona omu munayi vishinganyeka vyenyi. Chakutalilaho, mutu nahase kutulweza ngwenyi ukalu ukiko wamulingisa akakasane nge Tengi kwatwama. Shimbu kanda tumulweze vyuma vyasolola nge Kalunga kwatwama, twatela kumuvendejeka nakumulweza ngwetu kachapwa chakuhengako kushinganyeka havyuma vyeji kutulingisanga tuyande. (Hamba. 1:2, 3) Nge natumutalilila chikoki nakumusolwela zangi, kaha nachimulingisa afwile kulinangula vyavivulu. *

7. Vyuma muka twatela kulinga numba tufukile mumulimo wakwambulula?

⁷ Mbimbiliya yapwa hichinoma chetu chachinene chize tweji kuzachisanga mumulimo wamuwande. Yeji kutukafwanga tupwenga vakulizanga ‘mwosena nakuzata milimo yamwaza yosena.’ (Chimo. 2, 3:16, 17) Hakusaka tufukile mumulimo wakwambulula, twatela kulinga vyuma vyavivulu, keshi kutanga kaha Visoneka vyavivuluko. Oloze twatela kutachikiza mwakulijingishila navatu  havisoneka nakuvilumbununa kanawa. (Tangenu Vilinga 17:2, 3.) Tushimutwilenu havyakutalilaho vitatu vize vinahase kutukafwa.

8, 9. (a) Jila yimwe muka yize tunahase kulijingishilamo namutu uze afwelela ngwenyi Yesu eseka hamwe naKalunga? (b) Munakafwenga ngachilihi vatu vashinganyeke kanawa hachihande kana echi?

⁸ Chakutalilaho chatete: Omu tweji kuyanga mumulimo wamuwande, tweji kuwananga vatu vaze vafwelela ngwavo Yesu eseka hamwe naKalunga. Visoneka muka tunahase kuzachisa mangana tukafwe mutu hachihande kana? Tunahase kulweza mutu atange mazu aYesu atwama hamukanda waYowano 6:38 chize chavuluka ngwacho: “Nguneza kufuma mwilu mangana ngulingenga mwaya muchima wayauze angutumine, keshi nge mwaya muchima wamiko.” Hanyima yakutanga chisoneka kana, tunahase kumuhulisa ngwetu: “Nge Yesu apwa Kalunga, kaha iya amutumine ezenga hano hamavu? Kutala uze amutumine kahambakanyine Yesuko tahi? Kaha nawa mutu uze mwatuma mukwavo atwama nangolo kuhambakana uze navatuma.”

⁹ Tunahase nawa kutanga mukanda Wavaka-Fwilipi 2:9, haze Kaposetolo Paulu alumbunwine vyuma alingile Kalunga hanyima yakufwa nakusanguka chaYesu. Vesi kana yamba ngwayo: “Kalunga amuzezwile [Yesu] nakumuhaka hachihela chahelu, kaha amuhanyine mujila yalikoji lijina lize lyahambakana majina eka osena.” Hakukafwa mutu ashinganyeke hachisoneka kanechi, tunahase kumuhulisa ngwetu: “Nge Yesu esekele hamwe naKalunga shimbu kanda afwenga kaha Kalunga himwamuzezula nakumuhaka hachihela chachinene, kachi ngwetu Yesu apwile nangolo kuhambakana Kalunga. Kutala kwatwama mutu uze ahambakana Kalunga tahi?” Kulijingisa namutu mujila kaneyi nachikafwa vatu vamichima yamwaza vaze vamona Mazu aKalunga kupwa amalemu vafwile kulinangula vyavivulu.—Vili. 17:11.

10. (a) Tunahase kulijingisa ngachilihi namutu uze afwelela mukakahya kahelo? (b) Munakafwenga ngachilihi vatu vashinganyeke kanawa hachihande kanechi?

¹⁰ Chakutalilaho chamuchivali: Mwenya zuvo afwelela ngwenyi vatu vavapi navakavayekelesa mukakahya kahelo haya myaka yosena. Afwelela ngocho pamo mwomwo asaka vatu vavapi vakavazangamise havilinga vyavo vyavipi. Tunahase kulijingisa ngachilihi namutu akwechi vishinganyeka kana? Chakavanga twatela kumulweza ngwetu chikupu vene vatu vavapi navakavazangamisa. (Teso. 2, 1:9) Kufumaho twatela kumulweza atange chisoneka chaKuputuka 2:16, 17 chize chasolola nge fweto yashili kufwa. Tunahase kumulumbunwina ngwetu shili yaAlama yalingishile vatu vosena vapwenga nashili. (Loma 5:12) Tunahase kwamba ngwetu Kalunga kahanjikile vyakuzangamisa vatu mukakahya kaheloko. Tunahase kumuhulisa ngwetu, “Mwomwo ika Kalunga alwezelelele Alama naEve ngwenyi navakahiluka kulukungu muchishishisa chakuvalweza ngwenyi mwakavayekelesa mukakahya haya myaka yosena?” Twatela jino kumutangila chisoneka  chaKuputuka 3:19. Hachisoneka kana Kalunga avuluka nge Alama mwakahiluka cheka kulukungu, keshi ngwenyi mwakamuyekelesa mukakahyako. Tunahase kumuhulisa cheka ngwetu, “Kutala chinahase kupwa chamwaza kuli Kalunga kulweza Alama ngwenyi mwakahiluka kulukungu okunyi mwakaya mukakahya kahelo tahi?” Chihula kanechi chinahase kukafwa mutu wamuchima wamwaza ashinganyeke chikuma hachihande kanechi.

11. (a) Jila yimwe muka tunahase kulijingishilamo namutu uze afwelela ngwenyi vatu vamwaza vosena navakaya mwilu? (b) Munakafwenga ngachilihi vatu vashinganyeke kanawa hachihande kanechi chakuya mwilu?

¹¹ Chakutalilaho chamuchitatu: Omu tweji kuyanga mumulimo wamuwande, tweji kuwananga vatu vafwelela ngwavo vatu vamwaza vosena navakaya mwilu. Kufwelela kanechi chinahase kulingisa mutu afwelele vyuma vyeka kweseka nomu evwishishilamo Mbimbiliya. Chakutalilaho, nge natumutangila mukanda waKusoloka 21:4, (tangenu) mutu nahase kushinganyeka nge chili nakuhanjika havyuma vyamwaza navakalivwisa kuwaha vatu mwilu. Uno tunahase kulijingisa ngachilihi namutu kana? Muchishishisa chakuzachisa visoneka vyavivulu, tunahase kuzachisa kaha mukuku umwe uze watwama hachisoneka kana. Uze wamba ngwawo “kufwa kacheshi kukapwako chekako.” Ngachize, tunahase kumuhulisa ngwetu, “Kutala mwetavila ngwenu nge chuma kana kacheshi kukapwako chekako, kaha chalumbununa nge kuchapwile kunyima, nyi mweka?” Nahase kukumbulula ngwenyi mukiko vene. Kaha tunahase kumulweza ngwetu mwilu kamwatwama kufwako, oloze vatu veji kufwanga kaha hano hamavu. Ngachize, nachipwa chakutamo kwamba ngwetu mukanda waKusoloka 21:4 walumbununa vyuma vize navakalivwisa kuwaha vatu kushimbu yakulutwe hano hamavu.—Samu 37:29.

12. Mwomwo ika Yesu azachishilenga vyakutalilaho?

¹² Yesu azachishilenga vyakutalilaho mumulimo wenyi wakwambulula. (Tangenu Mateu 13:34, 35.) Vyakutalilaho azachishilenga Yesu vyamukafwile ejive vyuma vapwile nakushinganyeka vatu vaze vapwile nakumwivwilila. (Mateu 13:10-15) Yesu azachishile nawa vyakutalilaho mangana akafwe vatu vanukenga vyuma apwile nakuvanangula nakuvalingisa vafwile kwivwilila kuvyuma kana. Tunahase kuzachisa ngachilihi vyakutalilaho nge tuli nakunangula vatu?

13. Chakutalilaho muka tunahase kuzachisa mangana tusolole nge Kalunga atwama nangolo kuhambakana Yesu?

¹³ Chapwa chamwaza kuzachisa vyakutalilaho vyavyashi. Chakutalilaho, nge muli nakusaka kunangula vatu ngwenu Kalunga akwechi ngolo jakuhambakana Yesu, pamo tunahase kuzachisa chakutalilaho chino: Chatete tunahase kuvuluka ngwetu Kalunga naYesu valifwanyisa kuusoko watwama mukachi kaMwana naIse. (Luka 3:21, 22; Yowa. 14:28) Kufumaho tunahase kuhulisa mwenya zuvo ngwetu: “Nge mwasakanga kungunangula ngwenu vatu vavali veseka hamwe, chakutalilaho muka chamutanga munahase kunguhana?” Mutu nahase kukumbulula ngwenyi chakutalilaho chasongo namutu chipwe vapasa. Kaha tunahase kwamba ngwetu echi chakutalilaho chamwaza chikupu. Kaha tunahase kumuhulisa ngwetu: “Achishinganyekenu hachumechi: Nge Enu nayami tunavuluka chakutalilaho chamwaza chasongo namutu chipwe chavapasa, kutala munashinganyeka ngwenu Yesu hakupwa hiMulongeshi Wamunene kachi kavulukile chakutalilaho chamwaza chakulifwanako tahi? Oloze avulukile Kalunga ngwenyi Ise. Ngocho, Yesu asolwele nge Kalunga apwa mukulwane kaha nawa akwechi ngolo jakuhambakana ikiye.”

14. Chakutalilaho muka chasolola nge nachipwa chakuhenga kuli Kalunga kulweza Liyavolo kuzangamisa vatu mukakahya kahelo?

¹⁴ Tutalenu hachakutalilaho chikwavo. Vatu vamwe vafwelela nge Satana ikiye veji kuzachisanga kuli Yehova mangana ayekelese vatu mukakahya kahelo. Tunahase kukafwa ngachilihi chisemi amone nge kacheshi chakutamo kuli Kalunga kuzachisa Liyavolo kuyekelesa vatu mukakahya kaheloko? Tunahase kumuhulisa ngwetu:  “Namulinga vyuma muka nge mwanenu nalikange kuli yenu nakulinga vyuma vyavipi?” Chisemi nahase kukumbulula ngwenyi mwolola mwanenyi. Nahase kumukafwa mapapa kakavulu mangana alitwamine vilinga vyavipi. (Vishi. 22:15) Tunahase kumuhulisa ngwetu: “Mulinga ngachilihi nge mwanove kate kuseza vilinga vyavipi?” Visemi vavavulu vanahase kwamba ngwavo navazangamisa mwanavo. Tunahase kuhulisa ngwetu: “Nyi ngachilihi nge muwana ngwavo mwanove vanamuhungumwisa kuli mutu wamupi mangana alikange?” Chikupu vene chisemi mwapihilila namutu kana. Hakusaka kushindakanya chishina tunamuhane, tunahase kumuhulisa ngwetu: “Nge munatachikiza ngwenu mutu wamupi ikiye nahungumwisa mwanenu, kutala munahase kulweza uze mutu amizangamishile mwanenu tahi?” Nduma. Satana ikiye eji kulingisanga vatu valinge vyuma vyavipi. Ngocho, Kalunga keshi kuhasa kuzachisa Satana azangamise vatuko.

15, 16. (a) Mwomwo ika katwatela kufwelela ngwetu vatu vosena navetavila mujimbu wamwazako? (b) Uno mwatela kupwa muvalongeshi vakwipangweji numba mwambulule mujimbu wamwaza tahi? Lumbununenu. (Talenu lipwata lyakwamba ngwavo “ Chinoma Chakutukafwa Mwakukumbulwila.”)

¹⁵ Numba tuhu natuhulisanga vihula vyamwaza, nakulijingisa navatu mujila yamwaza, nakuzachisa vyakutalilaho vyamwaza, oloze vatu vamwe kaveshi kwitavila mujimbu wamwaza waWanganako. (Mateu 10:11-14) Vatu vavandende kaha vakivo vetavilile vyuma anangwile Yesu numba tuhu apwile Mulongeshi wamunene hano hamavu.—Yowa. 6:66; 7:45-48.

¹⁶ Nyi ngachilihi nge natulivwa nge katwatelemoko kupwa vaka-kunangula vamwenemwene? Chipwe ngocho, tunahase kufukila mumulimo wakwambulula. (Tangenu Vilinga 4:13.) Mbimbiliya yatulweza ngwayo, ‘vosena vaze vakwechi michima yambwende yakutwala kukuyoya chahaya myaka yosena’ navaketavila mujimbu wamwaza. (Vili. 13:48) Shikaho tufwilenu kupwa namuchima wamwaza. Tufwilenu kuhotola uhashi wetu wakunangula oloze katwatela kuzeyako nge vaze natwambulila kavate kwitavila mujimbu wamwaza. Nge natupendamina hali Yehova nakuzachisa vyuma vize eji kutunangulanga, kaha natupwa vaka-kunangula vakwipangweji kaha natulinganyalisa etu vavene navaze veji kutwivwililanga. (Chimo. 1, 4:16) Yehova nahase kutukafwa mangana tutachikize ‘mwakukumbulwila mutu himutu.’ Muchihande chinakavangizaho natulinangula omu tunahase kufukila mumulimo wakwambulula hakusolola vilinga vyamwaza.