Visoneka kavyakanyisa kulumba mufuko.

MuMbimbiliya mwatwama mijimbu yakutalisa kumijimba navifuhwa vyavafu vize valumbilenga. (Yoshu. 7:25; Miji. 2, 34:4, 5) Echi pamo chasolola nge vatu vaze valumbilenga kavatelemo kuvafundako. Echi kachalumbunwine nge vatu vaze valumbilenga kavapwile vavalemuko.

Twejiva ngocho mwomwo yavyuma vyasolokele hakufwa chaMwangana Saulu navana venyi vamalunga vatatu. Vosena vawana vafwile hakulwa jita navaFwilishite. Mwanenyi umwe apwile Yonatane uze apwilenga sepa lyaNdavichi kaha nawa uze amukafwilenga. Omu vingazule vavaIsalele vaze vapwilenga muYaveshi-ngileyate vejivile chuma chasolokele, vambachile mijimba yosena yiwana nakuyilumba kaha vifuhwa vyavo vavifunjile. Ndavichi asangejekele vaze vaIsalele havyuma valingile.—Samwe. 1, 31:2, 8-13; Samwe. 2, 2:4-6.

Visoneka vyatulweza nge Kalunga mwakasangula vafu. Yehova akwechi ngolo jakusangula vafu namijimba yayihya numba nge vavalumbile chipwe kuvafunda oloze. VaHepeleu vakushishika vatatu vaze vambilile mulilungu lyakakahya kweseka nalushimbi lwaMwangana Nevukataneza, kavevwile woma wakuvalumbako mwomwo vejivile ngwavo Kalunga nahase kukavasangula. (Ndanye. 3:16-18) Omu mukiko chapwile kuli vangamba jaYehova vakushishika vaze valumbile muvilombo vyavaNazi vyakulamina vafunge. Vangamba jaKalunga vakwononoka vavavulu vanafunga mujiponde namujijila jeka chakuzeneka kuwana haze vanafwila. Chipwe ngocho vakwechi lutalililo lwakusanguka.—Kuso. 20:13.

Yehova hakusangula mutu kachapendamina hakutungulula mujimba uze apwile nawo mutu hakavangako. Twejiva ngocho mwomwo Kalunga eji kusangulanga vaka-Kulishitu vawavisa mangana vakayoyele mwilu. Ngana mwaYesu uze ‘vayoyesele mushipilitu,’ navaka-Kulishitu vawavisa nawa veji kusanguka ngana muze vapwile hakavanga oloze namijimba yakushipilitu. Kaveshi kuya namijimba yavo yanyama namanyinga mwiluko.—Petu. 1, 3:18; Koli. 1, 15:42-53; Yowa. 1, 3:2.

Lutalililo lwetu lyakusanguka kalwapendamina mujila navalingilamo mujimba wetu nge tunafuko, oloze lwapendemina halufwelelo nangolo atwama najo Kalunga jakufwila kukatesamo jishiko jenyi. (Vili. 24:15) Pamo katweshi kuhasa kwivwishisa kanawa omu Kalunga asangwililemo vafu kunyima chipwe omu mwakasangwilamo vafu kulutweko. Chipwe ngocho twatela kufwelela muli Yehova. ‘Atufwelelesa’ lutalililo lwakusanguka mwomwo asangwile Yesu.—Vili. 17:31; Luka 24:2, 3.

Vaka-Kulishitu vatela kushinganyeka havisemwa vyamungalila vatwama nahajishimbi jafulumende yamulifuchi lyavo shimbu kanda vafunde chipwe kulumba mufu. (Koli. 2, 6:3, 4) Kufunda chipwe kulumba chapendamina hali mutu yivene nge ashikile ngocho chipwe nge vaka-tanga yenyi vanajinyi kulinga ngocho.