1, 2. Uno Yehova eji kumona ngachilihi vangamba jenyi hano hamavu?

OMU visemi veji kutalanga vana vavo nge vali nakuhema, veji kuwahililanga hakumona uhashi vatwama navo vana vavo. Kutala nayenu mwamonaho lyehi chuma kanechi tahi? Mwana umwe nahase kutachikiza kanawa vyakuhemahema oloze weka pamo atachikiza vyakufundafunda navyakutengatenga. Visemi veji kwivwanga kuwaha hakuwana vyuma vyamwaza vyatwama muli vana vavo numba tuhu vakwechi uhashi wakulinga vyuma vyakulisezaseza.

² NaYehova eji kwivwilanga kuwaha vana venyi vahamavu. Eji kwivwilanga “chipepa” vangamba jenyi. (Hangai 2:7) Avamona kupwa vavalemu mwomwo yalufwelelo nakulisuula chavo. Pamo nayenu munamono ngwenu vandumbwetu vatwama nawana wakulisezaseza. Vandumbwetu vamwe vakwechi wana wakuhanjika kanawa vihande kaha veka vakwechi wana wakulongesa kanawa vyuma. Vandumbwetu vamapwevo vamwe vakwechi uhashi wakulinangula malimi eka nakuwazachisa mumulimo wamuwande, nakukolezeza vandumbwavo, nakuzakama vaveji. (Loma 16:1, 12) Tweji kuwahililanga kupwa navandumbwetu vangana muchikungulwilo.

3. Vihula muka natushimutwila muchihande chino?

 ³ Vaka-Kulishitu vamwe chikumanyi vanyike navaze vavahya mumuchano vanahase kushinganyeka ngwavo pamo vapwa vakukuminamo. Kutala tunahase kuvakafwa ngachilihi mangana vazate nangolo? Mwomwo ika twatela kulondezeza Yehova hakutala vilinga vyamwaza vyavandumbwetu?

4, 5. Uno mujimbu watwama hamukanda waVaka-kuyula 6:11-16, wasolola ngachilihi nge Yehova eji kumonanga uhashi vatwama nawo vangamba jenyi?

⁴ Mbimbiliya yasolola nge Yehova eji kumonanga vilinga vyamwaza muli vangamba jenyi, nauhashi vatwama nawo. Chakutalilaho, Yehova asakwile Ngiteyone asokole vaIsalele kuli vaMichane vaze vapwile nakuvayanjisa. Ngiteyone alimwene kupwa wamokomoko, ngocho alikomokelele omu kangelo amulwezele ngwenyi: “Ove chindume waungazule, Yehova ali kuli ove.” Ngiteyone kalivwile nge apwile ‘chindumeko,’ ngocho amwene ngwenyi keshi kuhasa kuyovola vatu jaKalungako. Oloze Yehova amwene vyuma mujila yeka. Amwene ngwenyi Ngiteyone nahase kuyovola vaIsalele.—Tangenu Vaka-kuyula 6:11-16.

⁵ Yehova afwelelele ngwenyi Ngiteyone mwayovola vaIsalele mwomwo amwene uhashi apwile nawo. Yehova amwene omu Ngiteyone apwile nakuzungula tiliku nangolo jenyi josena. Kushikulu vanjimi vapwilenga nakuzungwila vimbuto haweluka mangana peho yipekumune undemba. Oloze Ngiteyone apwile nakuzungula tiliku mukachi kachikamwino chavinyo mangana vaMichane vahone kwiva jimbuto jenyi. Yehova amwene ngwenyi Ngiteyone apwile samalikita kaha nawa muka-kuzata mukuzangama uze asakwilenga kanawa vyakulinga kuchina mwengila muponde. Chikupu vene Yehova amwene uhashi wenyi nakumunangula.

6, 7. (a) Uno jila Yehova amwene Amose yalihandununa ngachilihi namuze vamumwene vaIsalele? (b) Vyuma muka vyasolola nge Amose kayile kushikolako?

⁶ Yehova amwene nawa uhashi muli kapolofweto Amose. Vatu vavavulu vashinganyekele ngwavo Amose apwile wakuhola kaha nawa wamokomoko. Apwilenga kafunga kaha nawa njimi uze apwilenga nakuzata milimo yaupukuvele. Oloze Yehova azachishile Amose kuhuhumuna miyachi yavaIsalele likumi yize yalitwaminyine kumuzachila. Oloze vaIsalele vashinganyekele ngwavo Yehova katelelele kusakula Amoseko.—Tangenu Amose 7:14, 15.

⁷ Amose afumine kungalila yize yapwilile kwakusuku nambaka. Oloze atachikijile visemwa navamyangana vaze alihachile navo. Pamo vamulwezelenga visemwa kana kuli malunga vaze vejilenga nakusekasana mungalila apwilenga. Chakutalilaho, Amose atachikijile vyavivulu kupandama kuvilinga vyavipi valingilenga vaIsalele. (Amose 1:6, 9, 11, 13; 2:8; 6:4-6) Kaha nawa Amose apwile muka-kusoneka. Azachishilenga mazu amalemu aze apwilenga amashi kwivwishisa. Kevwile woma kuhana mulonga kapilishitu Amajiya uze apwile navilinga vyavipiko. Chikupu vene, Yehova asakwile mutu wakutamo uze ayile nakwambulula mujimbu wenyi. Amwene uhashi apwile nawo Amose uze vatu veka kavamweneko.—Amo. 7:12, 13, 16, 17.

8. (a) Vyuma muka Yehova afwelelesele Ndavichi? (b) Mwomwo ika mazu atwama hali Samu 32:8 eji kukolezezelanga vaze valimona kupwa vamokomoko?

⁸ Chikupu vene Yehova eji kumonanga uhashi vatwama nawo vangamba jenyi vosena. Yehova afwelelesele mwangana Ndavichi ngwenyi mwamutwaminyinanga lwola lwosena ‘nakumulamanga naliso lyenyi.’ (Tangenu Samu 32:8.) Mwomwo ika chuma kanechi cheji kutukolezezanga? Numba  tuhu natulimona nge katwatelemoko, oloze Yehova nahase kutukafwa tutesemo milimo yize katwashinganyekanga ngwetu tunahase kuyizatako. Ngana muze mulongeshi wamwaza eji kunangulanga mukashikola mwakulingila vyuma vyosena, naYehova eji kutwaminyina vangamba jenyi mangana vazovoloke kushipilitu. Yehova nahase nawa kuzachisa vakwetu mangana vatukafwe tuzate nangolo. Mujila muka?

9. Uno tunahase kuzachisa ngachilihi mazu aPaulu ‘akufwila’ kukafwa vakwetu?

⁹ Paulu alwezele vaka-Kulishitu vosena ‘vafwilenga’ kukafwa vakwavo. (Tangenu Wavaka-Fwilipi 2:3, 4.) Paulu ashindakanyine hachishina chakwamba ngwenyi twatela kumona uhashi vatwama nawo vakwetu nakuvasangejeka. Uno tweji kwivwanga ngachilihi nge vakwetu navatulweza ngwavo vanawahilila hakuzovoloka chetu chakushipilitu? Echi cheji kutulingisanga tuzovoloke nakuzata chikuma. Chochimwe nawa, nge natumona vandumbwetu kupwa vavalemu, kaha nachitulingisa tuvakafwe vazovoloke kushipilitu.

10. Veya vasakiwa kukafwa chikuma?

¹⁰ Tuvosena twasakiwa kutukafwa halwola lumwe nalumwe. Oloze vandumbwetu vavanyike navaze vavahya muchikungulwilo vasakiwa kuvakafwa chikuma. Vandumbwetu kana vatela kulivwa ngwavo vali nakuvazachisa muchikungulwilo. Mazu aKalunga eji kukolezezanga vandumbwetu vamalunga mangana vatengamo kuzata milimo yamuchikungulwilo. (Chimo. 1, 3:1) Oloze vanahase kuzeya nge navamona ngwavo kaveshi nakuvasakwilila hamilimo vanakuzatako.

11. (a) Uno mukulwane umwe wamuchikungulwilo akafwile ngachilihi mukweze uze apwile nakwivwa sonyi? (b) Vyuma muka natulinangula kumujimbu waJulien?

¹¹ Mukulwane umwe wamuchikungulwilo walijina lyaLudovic ambile ngwenyi nge ndumbwetu mwamona ngwenyi vamuzakama kaha eji kuzovolokanga washi. Mukweze umwe vakafwile shina Julien. Ludovic ambile ngwenyi Julien apwile nasonyi kaha achikiminenga hakuzata milimo muchikungulwilo. Ludovic ambile ngwenyi “ngwamwene ngwami apwile nalikoji kaha asakile kukafwa vatu.” Muchishishisa chakumufwefulula, Ludovic atalile havilinga vyenyi vyamwaza nakumukolezeza. Julien atelemo kuzata mwamuka-kuzachila kaha oholili apwa jino payiniya washimbu yosena.

12. Vilinga muka twatela kupwa navyo numba tukafwe vakwetu vazate nangolo? Hanenu chakutalilaho.

¹² Hakusaka kukafwa vakwetu, twatela kumona vilinga vyavo. Muchishishisa chakutala hatutenga twavo, twatela kutala havilinga vyavo vyamwaza nahauhashi wavo. Omu mukiko Yesu amwene kaposetolo Petulu. Numba tuhu Petulu lwola lumwe aluwishilenga, oloze Yesu ahanjikile ngwenyi mwakapwa lilolwa lyakukola.—Yowa. 1:42.

13, 14. (a) Uno Mbalanape amwene ngachilihi Mako? (b) Alexandre anganyalile ngachilihi hakumukafwa kuli mukulwane? (Talenu muvwimbimbi wakulivanga.)

¹³ Tushimutwilenu nawa hamujimbu waMbalanape naMako. (Vili. 12:25) Mako atelelele kukafwa Paulu naMbalanape haungeji wavo watete waumishonali. Oloze omu vahetele kuPamafulya, Mako avasezele. Paulu naMbalanape vatambuke ukawavo mungalila yavihwanga. (Vili. 13:5, 13) Kaha kutwala muze Mbalanape alingile vyuma muka? Atalile havilinga vyamwaza apwile navyo Mako, keshi hatutenga twenyiko. Kamumwene ngwenyi apwile wamokomokoko. Oloze Mbalanape anangwile Mako, kaha kutwala muze Mako jino apwile muka-Kulishitu wakuhya. (Vili. 15:37-39)  Kaha myaka yakavangijileho, Mako apwile muLoma nakukafwa Paulu uze apwile mukamenga. Kahomu Paulu asonekelele vaka-Kolose, asangejekele Mako. (Kolo. 4:10) Achishinganyekenu hakuwaha evwile Mbalanape omu evwile ngwavo Paulu ali nakusaka Mako ayenga nakumukafwa.—Chimo. 2, 4:11.

¹⁴ Alexandre uze vatongwele kupwa mukulwane anukile omu ndumbwenyi amukafwile. Ambile ngwenyi: “Omu ngwapwile ngukanyike changukaluhwilile kulomba kulizavu lyavatu. Mukulwane wamuchikungulwilo angukafwile mwakuwahishila chimweza kulomba nakupwa namuchima wakuunda. Muchishishisa chakulitwamina kunguhana mulimo kana, oloze lwola lwosena anguhanyinenga mulimo wakulomba hakuliwana chakuya muwande. Kutwala muze woma wangufumine.”

15. Uno Paulu asangejekelenga ngachilihi vandumbwenyi?

¹⁵ Vyuma muka mweji kulinganga nge munamono vilinga vyamwaza muli vandumbwenu? Kutala mweji kuvasangejekanga tahi? Hamukanda Wavaka-Loma kapetulu 16, Paulu ahanjikile vilinga vyamwaza vyavandumbwenyi vakuhambakana 20 vize azangile. (Loma 16:3-7, 13) Chakutalilaho Paulu asangejekele Andolonyiku naYunya hakuzachila Kulishitu hamyaka yayivulu kuhambakana ikiye nahakumika chavo. Paulu avulukile nawa naye yaLufuse uze amuzakaminenga.

16. Kuwaha muka cheji kufumanga hakusangejeka vanyike?

¹⁶ Nayetu nawa nge natusangejekanga vakwetu kaha navanganyala. Tuchitalenu hachakutalilaho chamukweze Rico wakuFrance uze apwile naise uze kapwile nakuzachila Yehovako. Ou mukweze ahombele mwomwo ise amukanyishile kumumbapachisa. Rico ashinganyekele ngwenyi mwakazachila kanawa Yehova nge nakolo. Kaha nawa ahombelenga mwomwo vakwavo hashikola vamusekelekelenga mwomwo yavyuma afwelela. Oloze mukulwane umwe wamuchikungulwilo walijina lyaFrédéric amukolezezele nakumulweza ngwenyi vyeseko apwile nakumona vyasolola nge apwile wakumika hakulweza vakwavo vyuma afwelela. Mazu kana akolezezele Rico atwaleho lika kuzovoloka nakuputuka kutwama kanawa naise. Kahomu apwile namyaka 12 vamumbapachishile.

17. (a) Tunahase kukafwa ngachilihi vandumbwetu mangana vazovoloke kushipilitu? (b) Uno kamishonali umwe akafwile ngachilihi vakweze vamwe, kaha vyuma muka vyafumineho?

¹⁷ Nge natusangejekanga vandumbwetu hamilimo yamwaza vanazate, kaha nachivalingisa vazachile Yehova nangolo javo josena. Sylvie * uze nazate myaka yayivulu haMbetele yamuFrance ambile ngwenyi navandumbwetu vamapwevo vatela kusangejekanga vandumbwetu vamalunga. Amwene ngwenyi apwile namulimo wakusangejeka vandumbwenyi. (Vishi. 3:27) Kakavulu vandumbwetu vamapwevo veji kumonanga vyuma vimwe muli  vandumbwavo vize kaveshi kumona vandumbwetu vamalungako. Shikaho nge vandumbwetu vamapwevo navasangejekanga vandumbwetu vamalunga hamilimo vanazate, kaha navavakolezeza ngana muze veji kuvakolezezanga kuli vandumbwetu vamalunga vakuhya. Jérôme uze apwa kamishonali wamuFrench Guiana nakafwe vakweze vavavulu valitomene kuzata mulimo waumishonali. Ambile ngwenyi omu eji kusangejekanga vakweze hamilimo vanakuzata muwande eji kuvulukanga vyuma vize vanalingi kanawa hakwambulula mujimbu chipwe hakukumbulula hakukunguluka. Kahechi cheji kuvalingisanga vazate natwima nakuhotola uhashi wavo.

18. Mwomwo ika chapwila chamwaza kuzachila hamwe navandumbwetu vavanyike?

¹⁸ Tunahase nawa kukolezeza vandumbwetu vazovoloke hakuzata navo hamwe. Chakutalilaho, mukulwane nahase kulomba ndumbwetu wamukweze uze atachikiza mwakuzachishila kopyuta mangana amupulitileko mujimbu kufuma hakeyala yetu yajw.org, yize nayikafwa tushinakaji vaze kaveshi najikopyutako. Kaha nawa munahase kulweza ndumbwenu wamukweze mangana mulikafwe kuwahisa haZuvo yaWangana. Kuzachila hamwe navandumbwetu vavanyike nachimilingisa mutachikize uhashi wavo nakuvasangejeka nakwivwilila kuvyuma navahanjika.—Vishi. 15:23.

19, 20. Mwomwo ika twatela kukafwila vakwetu vazovoloke?

¹⁹ Yehova asakwile Yoshuwa mangana atwaminyine vaIsalele. Halwola kaha Yehova alwezele Mose ‘akolezeze nakujikijisa’ Yoshuwa. (Tangenu Lushimbi lwamuchivali 3:28.) Makumbi ano vatu vavavulu vanakuputuka kulemesa Yehova. Ngocho kuli nakusakiwa vandumbwetu vamalunga vaze vanatemo mangana vatwaminyine vikungulwilo. Shikaho vaka-Kulishitu vakulindunuka vosena vatela kukafwa vanyike navaze vanambapachisa kalinwomu mangana vazate nangolo. Echi nachilingisa vandumbwetu vavavulu vazate mulimo washimbu yosena, nakukafwa nawa vandumbwetu vamalunga vavavulu ‘vahase kunangula vakwavo nawa.’—Chimo. 2, 2:2.

²⁰ Numba tuli muchikungulwilo chize chili navandumbwetu vavavulu vakuhya kushipilitu chipwe lizavu lize kanda lipwenga chikungulwilo, tuvosena tufwilenu kuliwahishila vyakulutwe. Hakusaka tulinge ngocho twatela kulondezezanga Yehova nakutala havilinga vyamwaza vyavandumbwetu.