1, 2. Mwomwo ika Paulu evwilile keke vatu vakuhehela?

LWOLA lumwe tuvosena tweji kuzeyanga. Shimbu jimwe nge katweshi nakwivwa kanawako, tweji kuzeyanga kahechi cheji kutulingisanga tuhone kuzata milimo twasaka. Oloze achishinganyekenu nge mweji kwivwanga kuzeya lwola lwosena. Uno namusaka vakwenu vamipopolole tahi? Nduma, oloze namusaka vejive omu muli nakwivwa nakusaka vamivwile keke.

² Shimbu jimwe kaposetolo Paulu azeyelenga mwomwo yaukalu amwenenga muchikungulwilo nakuvatu veka vamuchivulu. Lwola lumwe evwilenga nge mwafwa mwomwo yaukalu. (Koli. 2, 1:8; 7:5) Paulu evwishishile ukalu veji kumonanga vaze vahehela mwomwo naikiye ahichile muukalu kana. Ambile ngwenyi: “Iyaze nazeye chakuzeneka ami kuzeya?” (Koli. 2, 11:29) Omu Paulu afwanyishile vatu vamuchikungulwilo chavaka-Kulishitu kuvilyo vyamujimba wamutu, ambile ngwenyi vaze ‘vasoloka kupwa vakuhehela, vapwa vavalemu.’ (Koli. 1, 12:22) Uno atalishile mulihi? Mwomwo ika twatela kumona vaze vahehela ngana muze avamona Yehova? Kaha natunganyala ngachilihi?

3. Vishinganyeka muka vyakuhenga tunahase kupwa navyo kupandama kuli vandumbwetu?

³ Makumbi ano vatu veji kutambulanga vyuma vyatushinakaji navaze vanahehela. Vashinganyeka ngwavo hakusaka mutu afukile kuvanga apwenga mukweze chipwe ali nangolo. Nge katwazangamineko nayetu tunahase kupwa namuchima kanou wavaka-kaye. Tunahase kupwa navishinganyeka vyakuhenga kupandama kuli vandumbwetu vakuzeya vaze vasakiwa kuvakafwa. Uno tunahase kumona ngachilihi vandumbwetu muchikungulwilo ngana muze avamona Kalunga?

4, 5. (a) Uno chakutalilaho chatwama hamukanda Wavaka-Kolinde 1, 12:21-23 chatukafwa ngachilihi tumone omu Yehova amona kuhehela chavatu? (b) Natunganyala ngachilihi nge natukafwa vatu vaze vahehela?

⁴ Yehova amona vatu vosena vamuchikungulwilo kupwa vavalemu. Mumukanda wakulivanga kapetulu 12 uze asonekelele vaka-Kolinde, Paulu ambile ngwenyi navilyo vyamujimba vyakuhehela chikuma vyapwa vyavilemu. (Tangenu Wavaka-Kolinde 1, 12:12, 18, 21-23.) Vatu vamwe vaze vafwelela mukunangula chakwamba ngwavo vyuma vyalijilile vivene, vahanjika ngwavo vihanda vimwe vyamujimba kavyapwa vyavilemuko. * Chakutalilaho, vamwe vamona munwe wakulihinji wasongo kupwa wamokomoko. Oloze vaka-sayasi vanawane jino ngwavo munwe kana weji kutukafwanga mangana tuhase kwimana kanawa.

⁵ Paulu ashindakanyine muchakutalilaho chenyi ngwenyi vatu vosena vamuchikungulwilo chavaka-Kulishitu vapwa vavalemu. Satana asaka tulivwe nge twapwa tuvamokomoko, oloze Yehova amona vangamba jenyi vosena kupwa ‘vavalemu.’ (Yopa 4:18, 19) Chuma kana chatela kutulingisa tuvosena tuwahilile hakutachikiza ngwetu vatuzanga muchikungulwilo nakuli vandumbwetu vamukaye kosena. Achishinganyekenu halwola luze mwakafwile ndumbwetu wakashinakaji. Echi chamunganyalishile, kutala nayenu mwanganyalile tahi? Eyo. Omu tweji kukafwanga vakwetu tweji kuwahililanga, nakuvatalilila chikoki, nakuvazanga chikuma nakupwa vaka-Kulishitu vamwenemwene. (Efwe. 4:15, 16) Setu wamwilu Yehova atulweza tumonenga vatu muchikungulwilo kupwa vavalemu kuhakilako vene navosena vaze vasoloka kupwa vamokomoko.

6. Lwola lumwe Paulu azachishile ngachilihi lizu “kuhehela” nalizu “kujikiza”?

⁶ Chikupu vene Paulu azachishile lizu ‘kuhehela’ omu apwile nakuhanjika vyavaka-Kulishitu vamwe muchikungulwilo. Mwomwo vaka-kuzeneka kwitava vamwe vamwene vaka-Kulishitu kupwa vakuhehela. Oloze Paulu kapwile nakuhanjika ngwenyi vaka-Kulishitu vamwe vapwile najingolo kuhambakana vakwavoko. Shimbu jimwe nawa alivulukile ivene ngwenyi apwile wakuhehela. (Koli. 1, 1:26, 27; 2:3) Kahomu Paulu azachishile lizu “kujikiza” kutalisa kuli vaka-Kulishitu vamwe kapwile nakulumbununa nge vapwile vavalemu kuhambakana vakwavoko. (Loma 15:1) Oloze apwile nakuhanjika ngwenyi vaka-Kulishitu vaze vashimbwile mumuchano vatelele kutalilila chikoki vaze vapwile te kanda vachizame mumuchano.

7. Vyuma muka navitulingisa tuhone kukafwa vakwetu vali muukalu?

⁷ Nge natukafwa “vaka-kuhutwa,” kaha natulondezeza Yehova, kaha Yehova mwatwivwila kuwaha. (Samu 41:1; Efwe. 5:1) Echi kachapwa chachashi kuchilinga lwola lwosenako. Mwomwo ika? Mwomwo pamo tuli nakushinganyeka ngwetu ndumbwetu atela kuzata  nangolo mangana akumise ukalu wenyi. Nyi pamo katwatachikijile vyakuhanjikako, kaha tunahase kwivwa sonyi nakuhanduka kuli vatu vaze vali muukalu. Ndumbwetu wapwevo walijina lyaCynthia, * uze vachinyine kuli lunga lyenyi ambile ngwenyi: “Cheji kwivwisanga kupihya kumuchima nge vandumbwove navakuchina nakuhona kulinga vyuma vize vatela kulinga hakupwa masepa jove. Nge tuli nakumona ukalu, twasaka vakwetu vatu vatuvendejeke.” Ndavichi evwile kupihya omu masepa jenyi vamuchinyine.—Samu 31:12.

8. Vyuma muka vinahase kutukafwa twivwile vakwetu keke?

⁸ Tweji kwivwilanga vatu keke nge natwanuka ngwetu vandumbwetu vaze twazanga vanahehela mwomwo yavyuma vimwe vyakufwana nge kuviza, kutwama mutanga yakwitava chakulihandununa chipwe kuhomba. Nayetu lwola lumwe tunahase kukapwa muukalu kanou. Shimbu kanda vengile muLifuchi lyaLushiko, vaIsalele vaze vapwile vihutu kaha nawa vakuhehela mulifuchi lyaEjipitu vavalwezele ngwavo kavatelelele ‘kukaluhwisa michima yavo’ kuli vandumbwavo vaze vapwile nakuyandako. Yehova asakile vamonenga vatu vakuhutwa kupwa vavalemu nakuvakafwa.—Lushi. 15:7, 11; Levi 25:35-38.

9. Vyuma muka twatela kulinga hakusaka kukafwa vaze vali nakumona ukalu? Hanenu chakutalilaho.

⁹ Katwatela kuvahana vandumbwetu milonga haukalu wavo chipwe kushinganyeka ngwetu twapwa tuvavalemu kuhambakana vakivoko. Oloze twatela kukafwa vandumbwetu nge vanazeye. (Yopa 33:6, 7; Mateu 7:1) Chakutalilaho, twambenga ngana ngwetu mutu umwe uze ali nakwendesa mutukutuku nalivulumuna, kaha vanamutwale kuchipatela. Kutala vandotolo vanahase kwenyeka lwola hakushimutwila vawane owo anehanga ponde numba jino vamuhane vitumbo tahi? Nduma. Oloze hahaze vene navamuhana vitumbo. Chochimwe nayetu, nge ndumbwetu nazeye mwomwo yaukalu wamukuyoya, chuma chatete twatela kulinga shina kumukafwa kushipilitu.—Tangenu Wavaka-Tesolonyika 1, 5:14.

10. Vatu vamwe vaze veji kusolokanga nge vakuhehela vanahase kusolola ngachilihi nge vapwa “valuheto mulufwelelo”?

¹⁰ Vandumbwetu vamwe vanahase kusoloka nge vahehela. Oloze nge natulihulika nakushinganyeka, natuwana nge kavapwa vakuzeyako. Achishinganyekenu ukalu nahase kumona ndumbwetu wapwevo uze akwechi lunga uze kazachila Yehovako. Chipwe ndumbwetu wapwevo uze ali nakulela vana ukawenyi uze eji kupwanga kukukunguluka lwola lwosena. Chipwe vakweze vaze veji kufumbukilanga kushikola mangana vaseze muchano. Vandumbwetu vosena ava vazanga Yehova kaha vafwila kumwononoka. Nge natushinganyeka havyuma vyosena vize vali nakulinga vandumbwetu hakuzachila Yehova, kaha natuvamona kupwa “valuheto mulufwelelo” numba tuhu natuvamona kupwa vakuhehela.—Yako. 2:5.

11, 12. (a) Vyuma muka navitukafwa tushinganyeke ngana muze ashinganyeka Yehova nge vandumbwetu vanaluwisa? (b) Mwomwo ika Yehova akonekelele Alone?, kaha vyuma muka natulinangulaho?

¹¹ Twatela kushinganyeka hali vandumbwetu ngana muze Yehova eji kuvashinganyekanga numba vene vanaluwisa. Vyakutalilaho vyamuMbimbiliya vinahase kutukafwa tulinangule omu Yehova amona vangamba jenyi. (Tangenu Samu 130:3.) Chakutalilaho, achishinganyekenu nge kumwapwile omu Mose apwile nakwivwilila kuli Alone uze apwile nakulumbununa ovyo vyamulingishile atenge mwanangombe waulu. Kachi mwashinganyekele vyuma muka hali Alone? (Kulo. 32:21-24) Kachi mwevwile ngachilihi omu Alone apwile nakwivwilila kuli Milyame nomu afwefulwile Mose hakumbata pwevo  wakulifuchi lyeka? (Kula. 12:1, 2) Kachi mwalingile ngachilihi omu Alone naMose vahonene kuvumbika Yehova uze avahanyine meya mujila yakukomwesa kuMeliva?—Kula. 20:10-13.

¹² Yehova kachi azangamishile Alone havyuma vyosenevi alingile hahaze vene. Oloze amwene ngwenyi Alone kapwile mutu wamupiko numba tuhu apwile natutenga. Alone alingile vyuma vyakuhenga mwomwo yaukalu amwene nakumuhungumwisa kuli vakwavo. Oloze Alone etavilile tutenga twenyi nakwitavila vamwolole kuli Yehova. (Kulo. 32:26; Kula. 12:11; 20:23-27) Alone azangile Yehova na kupihilila nakwalumuka. Ngocho Yehova amukonekelele. Omu mwahichile makulukaji amyaka, Alone navana venyi vavamwene kupwa hivatu vaze vevwile Yehova woma.—Samu 115:10-12; 135:19, 20.

13. Tunahase kwalumuna ngachilihi vishinganyeka vyetu kupandama kukuhehela chavandumbwetu? Hanenu chakutalilaho.

¹³ Ngana muze alingile Alone, navandumbwenu vanahase kuluwisa. Nge vanalingi ngocho, kaha mwatela kuvamona ngachilihi? Kutala mwatela kwalumunako vishinganyeka vyenu tahi? (Samwe. 1, 16:7) Chakutalilaho, achishinganyekenu hali mukweze uze atwama navilinga vyavipi. Mukweze kana pamo kejivile mwakusakwila kanawa vyakulihizumunako. Kanda namwanguhwisa nakwamba ngwenu apwa mutu wamupiko. Oloze mwatela kushinganyeka omu munahase kumukafwilamo. Twamenu nenyi hamavu mangana mumunangule mwakusakwila kanawa vyuma vyakulihizumuna. Nge namukafwa vandumbwenu mujila kaneyi, kaha namuvatalilila chikoki nakuvazanga chikuma.

14, 15. (a) Yehova evwile ngachilihi omu Elija ahonene kupwa nalufwelelo hakashimbu kakandende? (b) Vyuma muka natulinangula kumujimbu waElija?

¹⁴ Yehova amona ngachilihi vaze vanahombo? Achitalenu omu akafwile ngamba yenyi umwe uze ahombele. Elija apwile kapolofweto  kaYehova uze apwile wakumika nakufungulula vapolofweto vaMbale vakuheta ku 450. Oloze atambwile mujimbu wakuvuluka nge Lisano Yezevele apwile nakusaka kumujiha. Kaha evwile woma nakuchinyina kuMbele-sheva, tunda yajikilomita kafwe 150 nakuchinyina mupambo. Elija azeyele chikuma, kaha echi chamulingishile mangana apwenga wakuhomba nakushinganyeka ngwenyi atela kufwa.—Vamya. 1, 18:19; 19:1-4.

¹⁵ Vyuma muka alingile Yehova omu amwene Elija nahombo kaha nawa ali nakwivwa woma? Kutala amumbile nyima tahi? Nduma. Oloze Yehova atumine kangelo mangana ayenga nakumukafwa. Kangelo ahanyine Elija vyakulya mapapa kavali mangana apwenga nangolo jakutambuka ungeji wenyi. (Tangenu Vamyangana 1, 19:5-8.) Shimbu kanda Yehova alweze Elija vyakulinga, avangilile kumwivwilila numba jino amukafwe.

16, 17. Tunahase kulondezeza ngachilihi Yehova mujila azakaminyinemo Elija?

¹⁶ Tunahase kukafwa ngachilihi vandumbwetu ngana muze Kalunga akafwile Elija? Kanda kulusukanga nakuvalweza omu tunashinganyekako. (Vishi. 18:13) Nge ndumbwetu nahombo chipwe nge ali nakulivwa nge wamokomoko, mwasaka mwivwilile omu mwamilweza ukalu wenyi nakusolola nge mwamuzakama. (Koli. 1, 12:23) Kahechi nachimilingisa mutachikize ukalu wenyi nakwijiva mwakumukafwila.

¹⁷ Achishinganyekenu cheka hachakutalilaho chaCynthia. Omu lunga lyenyi amuchinyine, amusele navana vavali vamapwevo. Ou ndumbwetu navana venyi vevwile nge vanavasuvilila. Vandumbwetu vamwe vavakafwile ngachilihi? Ambile ngwenyi: “Omu twavatuminyine shinga nakuvalweza vyuma vyasolokele, kavakwachile kumashindeko, hahaze vene vejile, valilile. Kaha vatwamine nayetu hamakumbi kafwe avali chipwe atatu. Hakuwana nge katwapwile nakulya kanawako mwomwo yakulishona, ngocho lwola lumwe vatutwalile kuzuvo yavo nakutwama navo.” Chakutalilaho kana chatwanukisa mazu asonekele Yakova ngwenyi: “Kachi nge ndumbwove walunga chipwe wapwevo ali nauvu kaha nawa nahono kulya chakutamo chalikumbi, oloze minenu umwe mwamba kuli vakivo ngwenyi: ‘Yenunga mukuunda, ivwenunga yuku, kaha lyenunga nakwikuta,’ oloze enu kamweshi kuvahana vyuma navasaka kumijimba yavoko, kaha kuwaha mukaze chiliho? Ngocho nawa, lufwelelo hauka walwo lwakuzeneka vilinga, lunapu lwakufwa.” (Yako. 2:15-17) Vyuma vavakafwile vandumbwavo vyajikijishile Cynthia navana venyi, kaha chavalingishile vazate upayiniya wakukafwa omu mwahichile kaha tukweji 6 kufuma haukalu wavo.—Koli. 2, 12:10.

18, 19. (a) Tunahase kukafwa ngachilihi vaze vanazeye? (b) Veya veji kunganyalanga nge natukafwa vaze vanazeye?

¹⁸ Tuvosena twatachikiza ngwetu cheji kumbatanga lwola numba tulikangule kanawa kumujimba nge tunavijinga hatando yayisuku. Nge ndumbwetu napihisako vyuma vimwe chipwe nge nahichinga muukalu waunene, chinahase kumbata lwola numba jino akapwe kanawa kushipilitu. Ngachize atela kulinangula Mbimbiliya, nakulomba kuli Yehova, nakupwanga kukukunguluka lwola lwosena numba azame cheka kushipilitu. Chipwe ngocho, mutu kana asakiwa nawa kumukafwa kuli etu vandumbwenyi. Halwola kanelu twatela kumutalilila chikoki nakutwalililaho kusolola ngwetu twamuzanga kaha nawa apwa wamulemu muchikungulwilo.—Koli. 2, 8:8.

¹⁹ Kukafwa vakwetu cheji kutulingisanga tupwenga vakuwahilila. Cheji kutukafwanga tulinangule kupwa vaka-kutalilila vakwetu chikoki nakuvevwila keke. Oloze keshi etu kaha tweji kunganyalangako. Chikungulwilo chosena nachikiko chinahase kupwa nazangi. Chachinenenyi, nge ‘natukafwa vaze vanazeye,’ kaha natusolola ngwetu tuli nakulondezeza Yehova. Setu wazangi amona vatu vosena kupwa vavalemu.—Vili. 20:35.