OMU vaIsalele vafumine muMbavilone mu 537 B.C.E., Yehova avakafwile haungeji wavo wakukinduluka kuYelusalema. Avalwezele ngwenyi: “Longesenu jila yavatu, sukililenu, sukililenu likulakula, kungululenumo malolwa.” (Isa. 62:10) Vyuma muka vatelele kulinga hakusaka kwononoka lushimbi kanelu? VaIsalele vatelelele kulivanga kuya kulutwe lwavandumbwavo nakushikila mena nakufumisa malolwa apwile mujila. Echi chavalingishile vatambuke kanawa nakukinduluka kwimbo lyavo.

Chochimwe nayetu nawa, tweji kukavangizanga jila yaKalunga hakuzakama kala milimo navatuhana muliuka lyaYehova. Yehova asaka tuzate milimo kana chakuzeneka vyuma vyakutuhonesa. Hakusaka mangana tuzate kanawa, tuvosena twatela kukavangiza mazu atwama muMbimbiliya akwamba ngwawo: “Salamisa jila yamahinji ove, kaha jijila jove josena jizame mbe.”—Vishi. 4:26.

Mbimbiliya ngwayo: “Upahu wavakweze jikiko ngolo javo.” (Vishi. 20:29) Vakweze vavavulu vapwa vakulikangula kumujimba, vatwama nangolo nachinyingi, kaha nawa vafwila kufukila mukuyoya chavo. Vakulwane veji kumonanga ngolo nauhashi vatwama nawo vakweze, kaha veji kufwelela ngwavo vanahase kuzata nangolo. Vakweze navapwa vakuwahilila nge navazachisa ngolo nauhashi wavo kumilimo yaYehova.

Navatu vamwe vakukaye nawa veji kwivwanga kuwaha hangolo nauhashi vatwama nawo vakweze vaze vapwa Vinjiho. Chakutalilaho, vakweze vaVinjiho vavavulu veji kuzatanga kanawa kushikola, ngocho milongeshi navakwavo vaka-shikola veji kuvakolezeza mangana vafwile kuya kumashikola ahelu. Kaha nawa vakweze vaze vejiva kanawa vyakuhemahema vanahase kuvakolezeza kuli vakwavo mangana vatwalilileho lika namulimo kanou. Nge pamo muli  mucheseko kanechi chipwe mwejivako vakweze vamwe vali mucheseko kana, kaha vyuma muka navikafwa muka-Kulishitu ashinganyeke kanawa vyakulinga?

Jishimbi jamuMbimbiliya najitukafwa tukavangize jila yamwaza yize nayikatulingisa tukafukile kulutwe hakuzata milimo yaYehova. Chakutalilaho, Chisoneka chaMuka-kwambulula 12:1 chatwama namazu akwamba ngwavo: “Anukanga nawa Ou nakutenge hamakumbi aukweze wove.” Munahase kwanuka ngachilihi Yehova?

Tuchitalenu chakutalilaho chandumbwetu wamukweze waKumulauko waAfrica walijina lyaEric. * Azangile chikuma kwasa ngunja. Omu apwile namyaka 15, apwile nakwasa mulizavu lyakwasa ngunja lyakwimanyinako lifuchi (national team). Apwile nakutokwa chakuya nakulinangula ngunja kuEurope mangana akapwe muka-kwasa ngunja wakwipangweji. Halwola kanelu, Eric aputukile kulinangula Mbimbiliya naVinjiho jaYehova. Uno ‘anukile’ ngachilihi Yehova? Kaha vyuma muka natulinangula kuchakutalilaho chenyi?

Kulinangula Mbimbiliya chamulingishile atachikize nge Kalunga mwakakumisa ukalu wosena wavatu. Ngocho, ejivile nge kulinga mwaya muchima waKalunga chapwile chachilemu chikuma kuhambakana kwasa ngunja. Kufumaho vamumbapachishile, kaha azachishile lwola nangolo jenyi kumilimo yaYehova. Kutwala muze vamutongwele kupwa muka-kuzachila muliuka. Muchishishisa chakulinangula kwasa ngunja, oloze ayile kuShikola Yakulinangula Mbimbiliya yaVandumbwetu vaMalunga vaVajike.

Nge ayile nakulinangula ngunja kachi Eric apwile naluheto nakuya puho. Oloze anukile ngwenyi Mbimbiliya yahanjika mwakwoloka hakwamba ngwayo: “Vikumba vyamuka-luheto vinapu limbo lyenyi lyakukola, navimono ngwenyi, kembwe yakunyunga.” (Vishi. 18:11) Vatu vanahase kushinganyeka ngwavo jimbongo jinahase kuvalingisa vapwenga vakukingiwa, oloze kaveshi kupwa vakukingiwako. Mwomwo vaze veji kufwilanga kupwa naluheto veji ‘kulituvasana namakava amavulu.’—Chimo. 1, 6:9, 10.

Vandumbwetu vavavulu vavakweze vapwa vakuwahilila kaha nawa vakukingiwa hakuzata mulimo washimbu yosena. Eric ahanjikile ngwenyi: “Ngunakuzata hamwe nalizavu lyavatu jaYehova mumulimo washimbu yosena. Eli likiko lizavu lyamwaza ngwatela kupwamo. Kaha nawa ngweji kusakwililanga chikuma Yehova hakungusolwela jila yakuwana kuwahilila nakufukila mukuyoya.”

Nyi ngachilihi yenu? Muchishishisa chakufwila vyuma vyakukaye, kutala munahase kukavangiza jila yize nayimilingisa mulivwise kuwaha hakuzachila Yehova tahi? Kutala munahase kuzata nangolo mangana muzate upayiniya tahi?—Talenu lipwata lwakwamba ngwavo “ Nganyo Yize Kaweshi Kuhasa Kuwana haYunivesitiko.”

Omu lunga napwevo vakulimbata vaze vapwa vandumbwetu vatambukilile mutango wamuUnited States, vamwene omu vaka-Mbetele vapwile vakuwahilila hakuzachila Yehova. Kaha uze ndumbwetu wapwevo asonekele ngwenyi: ‘Twazachishilenga chikuma lwola lwetu kumilimo yakukaye.’ Ngocho, vashinganyekele jino kuzachisa kanawa lwola nangolo javo mumilimo yaYehova.

Chapwile chachikalu kwalumuna chiyoyelo chavo. Oloze likumbi limwe vashinganyekele hamazu ahanjikile Yesu atwama hali Yowano 8:31 akwamba ngwavo: “Kachi nge namutwamanga mumazu ami, kaha chikupu vene mutumbaji twami.” Echi chavalingishile vashinganyeke ngwavo hakusaka vapwenga tumbaji twaYesu vamuchano, vatela kulisuula mukuyoya chavo. Ngocho, valanjishile zuvo yavo yayinene, navyuma vyeka nakuya kuchikungulwilo chize chasakiwile kukafwa. Oholili vapwa vapayiniya kaha nawa veji kukafwa kutunga jiZuvo jaWangana nakuzata mulimo wakulisakila hakukunguluka changalila. Uno vanakwivwa ngachilihi? Vambile ngwavo: “Tunapu jino vakuwahilila mwomwo yakwashiwisako chiyoyelo chetu nakulinga vyuma vize liuka lyaYehova lyeji kutukolezezanga.”

Solomone asonekele ngwenyi: “Meso ove atalenga kulutwe lwove, jikavizo jove jitalenga kumeso ove kwakusungama.” (Vishi. 4:25) Uno mazu kana alumbununa ika? Twatela kutwalililaho lika kutambuka mujila yize nayitulingisa tuzate milimo yakushipilitu. Twatela kulihenda kuvyuma vize vinahase kutuhonesa kulitomena kulinga vyuma vyakushipilitu.

Vyuma muka vyakushipilitu mwatela kulitomena kulinga? Pamo mwalitomena kukazata mulimo washimbu yosena. Chipwe munahase kuya  kuchikungulwilo kuze kuli vaka-kwambulula vavandende mangana mukachikafwe. Nge mwapwa muvandumbwetu vamalunga, kaha munahase kuya kuvikungulwilo kuze kuli nakusakiwa vakulwane navaka-kuzachila. Munahase kuhanjika nakalama wakutambwojoka amilweze vikungulwilo vize vili nakusakiwa kukafwa. Nge munakusaka kuya nakuzachila kuvikungulwilo vyatwama kwakusuku, kaha mwatela kuhulisa mangana vamilweze mijimbu yayivulu kupandama kuvikungulwilo kana. *

Tutalenu cheka hamazu atwama hali Isaya 62:10. Hakusaka vaYuleya vakahete kanawa kuYelusalema, atela vazachile nangolo mangana vawahise jila yavo. Namakumbi ano nawa, mwatela kuzata nangolo mangana muhase kutesamo vyuma munalitomena kulinga. Kamwatela kuzeyako. Yehova nahase kumikafwa mutesemo vyuma munalitomena kulinga. Mulombenu amihane chinyingi mangana mufumise vyuma vize vinahase kumihonesa. Kaha namumona omu Yehova mwamikafwa ‘musalamise jila yamahinji enu.’—Vishi. 4:26.