Kutala munalivwisanga kuwaha kutanga jimangazini jakalinwaha jaKaposhi Kakutalila nyi? Nge mukiko, kaha tumonenu omu namuhasa kukumbulula vihula vino vinakavangizaho:

Lwola muka vatelele kujiha mwanamukoko wahaPaseka haNyisane 14?

Jimbimbiliya jimwe jamba ngwajo mwana mukoko vamujihile hakulauka chalikumbi. (Kulo. 12:6)—12/15, mafwo 18-19.

Vakweze vanahase kuzachisa ngachilihi jindongi jamuMbimbiliya mangana vasakule kanawa vyakulinga?

Kuli jindongi jitatu (1) Tondenu chatete Wangana waKalunga nakwoloka chenyi. (Mateu 6:19-34) (2) Wahililenunga hakuzachila vakwenu. (Vili. 20:35) (3) Livwisenu kuwaha kuzachila Yehova muukweze wenu. (Kwambu. 12:1)—1/15, mafwo 19-20.

Lwola muka nakukapwa “chilika chaulo waMwanamukoko”? (Kuso. 19:7)

“Chilika chaulo waMwanamukoko” nachikapwako omu Mwangana Yesu Kulishitu mwakakumisa kufungulula kulumbununa hanyima yakunongesa Mbavilone Yayinene nahanyima yajita yaAlamangetone.—2/15, lifwo 10.

Vyuma muka vyalingishile vaYuleya vamulikulukaji lyamyaka lyakulivanga ‘vatalilile’ Meshiya? (Luka 3:15)

Katweshi naunjiho wakusolola nge vaYuleya vamulikulukaji lyamyaka lyakulivanga vatachikijile upolofweto waNdanyele wakupandama kuli Meshiya nganomu twautachikiza yetuko. (Ndanye. 9:24-27) Chipwe ngocho, atela vevwile mujimbu kana kuli tufunga vaze vevwile mujimbu kana kuli vangelo chipwe kuli kapolofweto Ana uze ahanjikile hakumona kemba Yesu hatembele. Kaha nawa vevwile mujimbu kana kuli vaka-kutahisa vatanganyika vaze vejile nakutondatonda ‘mwangana wavaYuleya uze asemukile.’ (Mateu 2:1, 2) Kutwala muze, Yowano Muka-kumbapachisa Vatu asolwele ngwenyi Kulishitu kalinwomu ezenga.—2/15, mafwo 26-27.

Tunahase kulingisa ngachilihi Eyo yihone kupwa Nduma? (Koli. 2, 1:18)

Lwola lumwe tunahase kwalumuna vishinganyeka vyetu mwomwo yavyuma vimwe vinasoloka vize katweshi nangolo jakuvihonesako. Oloze hakupwa muvaka-Kulishitu, mwatela kuzata nangolo mangana mutesemo jishiko jenu.—3/15, lifwo 32.

Ponde muka nahase kumona muka-Kulishitu nge mwaseza tanga yenyi nakuya kweka nakutonda jimbongo?

Nge visemi navana kaveshi nakutwama hamwe mwatangako, kaha vanahase kuviza muvishinganyeka nakuputuka kwazana muvilinga vyavipi. Echi chinahase kuvalingisa vajinde visemi javo. Kaha nawa nge valunga napwevo navaliseza halwola lwalusuku chinahase kuvalingisa vengile mucheseko chakulinga ukoji.—4/15, mafwo 19-20.

Vihula muka viwana vize twatela kwanukanga nge tuli mumulimo wamuwande?

Vatu muka nguli nakwambulila? Kuchihela muka nguli nakwambulila? Lwola muka lwamwaza ngwatela kwambulila vatu? Mujila muka ngwatela kuvambulila?—5/15, mafwo 12-15.