1, 2. (a) Lushimbi muka lwamuchivali ambile Yesu? (b) Vihula muka natushimutwila?

HAKUSAKA kweseka Yesu, Kafwaliseu umwe amuhulishile ngwenyi: “Ove Muka-kunangula, lushimbi muka lwapwa lwalulemu haJishimbi josena?” Nge muze tunashimutwila muchihande chinafumuho, Yesu akumbulwile ngwenyi, ‘lushimbi lwalulemu kaha nawa lwatete’ shina luno: “Watela kuzanga Yehova Kalunga kove namuchima wove wosena, namwono wove wosena, navishinganyeka vyove vyosena.” Yesu ambile nawa ngwenyi: “Kaha lwamuchivali, lunalifwaneko, lukiko vene elu ngwavo: ‘Watela kuzanga mukwenu nganomu walizanga ove lyavene.’”—Mateu 22:34-39.

² Yesu ambile ngwenyi twatela kuzanga vakwetu nganomu twalizanga etu vavene. Shikaho tulihulisenu ngwetu? Tunahase kusolola ngachilihi nge twazanga vakwetu?

3, 4. (a) Chakutalilaho muka azachishile Yesu omu vamuhulishile ngwavo: “Uno iya chikupu napu mukwetu”? (b) Uno uze kaSamaliya akafwile ngachilihi uze lunga vapupile nakumuveta nakumuseza nalezumuka? (Talenu muvwimbimbi wakulivanga.)

³ Achishinganyekenu havyuma ahanjikile Yesu omu mutu  umwe amuhulishile ngwenyi: “Uno iya chikupu napu mukwetu?” Yesu amukumbulwile kuzachisa chakutalilaho chakaSamaliya. (Tangenu Luka 10:29-37.) Lunga umwe wakaYuleya vamutambwile vyuma vyenyi nakumuveta nakumuseza kuswanga, nalezumuka. Kapilishitu nakaLevi vaze vatelelele kumukafwa vamusezele, oloze kaSamaliya ikiye ejile nakumukafwa. Halwola kana luze vaSamaliya navaYuleya kavalinwishilenga meyako.—Yowa. 4:9.

⁴ Uze lunga wakaSamaliya ahakile maji navinyo hajimbandu jauze lunga mangana jiyoye washi. Kufumaho amutwalile kuzuvo yavangeji nakufwetela jindenali jivali mangana vamulame. Jimbongo kana jesekele hamwe najimbongo vafwetelenga mutu mumakumbi avali. (Mateu 20:2) Vyuma alingile uze lunga wakaSamaliya hakukafwa ou kaYuleya vyasolwele nge apwile nazangi yamwenemwene. Tunahasa kupwa ngana mwauze kaSamaliya nge natwivwilanga vakwetu keke nakuvazanga.

5. Vangamba jaYehova vanasololanga ngachilihi nge vazanga vakwavo halwola lwaukalu?

⁵ Makumbi ano chapwa chachikalu kuwana vatu vamichima yakeke ngana mwauze kaSamaliya. Chikumanyi muno ‘mumakumbi akukuminyina’ vatu kaveshi nazangiko, vanapu vaka-ukenya, vaka-kuzeneka kuzanga kuwaha. (Chimo. 2, 3:1-3) Chakutalilaho kunahase kusoloka ukalu wakulijila. Achitalenu vyuma vyasolokele omu nyamanganda vavuluka ngwavo Hurricane Sandy yenyekele ngalila yimwe yamunganda yaNew York muOctober 2012. Vatu vavavulu kavapwile nakakahya kakezi, navyuma vyeka vyakulikafwa navyoko, oloze chaluvinda mihuza vevile vyuma vasalile navyo vatu vaze vapwile muukalu. Oloze Vinjiho jaYehova valongesele kanawa vyuma mangana vakafwe vandumbwavo navatu veka. Vaka-Kulishitu veji kulinganga vyuma kana mwomwo vazanga vakwavo. Jijila muka jikwavo tunahase kusolwelamo nge twazanga vakwetu?

6. Mulimo wetu wakwambulula wasolola ngachilihi nge twazanga vakwetu?

⁶ Kukafwa vatu kushipilitu. Mumulimo wetu wakwambulula tweji ‘kuvendejekanga vakwetu kuzachisa visoneka.’ (Loma 15:4) Tweji kusolwelanga vakwetu zangi hakuzachisa Mbimbiliya mangana tuvambulile mujimbu wamwaza waWangana waKalunga. (Mateu 24:14) Ocho kutokwa kana tuli nacho hakwambulula mujimbu ‘waKalunga uze eji kuhananga lutalililo.’—Loma 15:13.

7. Vyuma muka vinahase kufumaho nge natusololanga vilinga vyamwaza?

⁷ Sololenunga vilinga vyamwaza. Yesu ambile ngwenyi: “Vyuma vyosena namusaka ngwenu vatu vavilinge kuli enu, nayenu nawa vilingenu kuli vakivo. Mwomwo omu mukiko vene mwaya Jishimbi naMazu aVapolofweto.” (Mateu 7:12) Nge natutwama navakwetu ngana muze ahanjikile Yesu kaha natukavangiza “Jishimbi” (Kuputuka nakutwala kuLushimbi lwamuchivali) “naMazu aVapolofweto” (mikanda yaupolofweto yamuMazu-vasoneka AchiHepeleu). Mikanda kaneyi yasolola hatoma nge Kalunga akiswilenga vaze vazangilenga vakwavo. Yehova ahanjikile kuhichila muli Isaya ngwenyi: “Lamenunga chiyulo, lingenunga mwakwoloka . . . Natokwa mutu ou mwalinganga ngana.” (Isa. 56:1, 2) Nge natusolwelanga vakwetu zangi nakupwa navilinga vyamwaza kaha navatukisula.

8. Mwomwo ika twatela kuzangila vaka-kole jetu kaha vyuma muka vinahase kufumamo?

⁸ Zangenunga vaka-kole jenu. Yesu ambile ngwenyi: “Mwevwa lyehi muze vambile ngwavo: ‘Watela kuzanga mukwenu nakuhunga muka-kole wove.’” Oloze aminyi nangwamba kuli enu ngwami: Twalenuho kuzanganga vaka-kole jenu nakulombelako vaze vali nakumiyanjisa mangana muhase kupwa muvana vaSenu uze ali mwilu.”  (Mateu 5:43-45) Kaposetolo Paulu nayikiye asonekele ngwenyi: “Kachi nge muka-kole wove nevu zala, mulise; kachi nge nevu lipwila, muhane vyakunwa.” (Loma 12:20; Vishi. 25:21) Mumakumbi avaIsalele Yehova ahanyine vatu jenyi jishimbi mangana vakafwe vaka-kole navimuna javo. (Kulo. 23:5) Kukavangiza jishimbi kaneji chakafwile vatu vaze valijinjilenga valizange cheka. Etu vaka-Kulishitu nge natusolwela vaka-kole jetu zangi kaha pamo vanahase kwalumuna vishinganyeka vyavo nakutusolwela zangi. Kaha vamwe vanahase kwalumuka nakupwa vangamba jaYehova.

9. Vyuma muka ahanjikile Yesu kupandama kukuneha kuunda navandumbwetu?

⁹ “Fwilenunga kutwama mukuunda navatu vosena.” (Hepe. 12:14) Katwatela kaha kutwama mukuunda navatu veka kahako oloze navandumbwetu nawa. Yesu ambile ngwenyi: “Kachi nge uli nakuneha wana wove kulijiko lyakulumbila, kaha hakuheta kuze hinawanuka ngwove uli namulonga nandumbwove, seza wana wove kulutwe lwalijiko lyakulumbila, kaha yako. Chatete kalivwasane nandumbwove, kahomu naulinga hiunakinduluka lyehi, hana jino wana wove.” (Mateu 5:23, 24) Kalunga mwatukisula nge natusolola zangi kuli vandumbwetu nakukumisa washi vikokojola mangana tupwenga mukuunda.

10. Mwomwo ika katwatela kuwanyinanga vakwetu tutengako?

¹⁰ Kanda namuwanyinanga vakwenu tutengako. Yesu ambile ngwenyi: “Litwaminenu kusopesanga vakwenu, kuchina nayenu navakamisopesa, mwomwo kusopesa chize muli nakusopesanga vakwenu, chikiko navakamisopesa nayenu nawa; kaha chesekelo chize muli nakwesekelanga nacho vakwenu, chikiko navakamyesekela nacho nayenu nawa. Nyi ikaze weji kutalilanga chiswaswa chili muliso lyandumbwove, oloze kaweshi kumona lisoko lili muliso lyove ove lyaveneko? Chipwe nawamba ngachilihize kuli ndumbwove ngwove, ‘Ngwitavile ngukufumise chiswaswa chili muliso lyove,’ okunyi muliso lyove ove lyavene muli lisoko? Ove muka-kulyonga! Vangila kulifumisa lisoko lili muliso lyove, numbanyi umone kanawa mwakufumishila chiswaswa chili muliso lyandumbwove.” (Mateu 7:1-5) Hachisoneka kana twalinangulaho nge katwatela kuwanyinanga vakwetu tutengako mwomwo nayetu tukwechi tutenga vavavulu.

11, 12. Jila muka yakulipwila yakusolwelamo zangi kuli vakwetu?

¹¹ Kwatwama jijila jajivulu jakusolwelamo zangi kuli vakwetu. Yesu asolwele jila yamwaza yakulingilamo ngocho, jila kana shina kwambulula mujimbu waWangana. (Luka 8:1) Yesu alwezele vaka-kumukavangiza ngwenyi: “Yenunga mukatunge tumbaji kuvatu vakumafuchi osena.” (Mateu 28:19, 20) Nge natwononoka Yesu kaha natukafwa vakwetu vaseze jila yayinene yakuya kunonga nakuwana jila yakupalakanya yakuya kukuyoya. (Mateu 7:13, 14) Yehova eji kukisulanga milimo yetu.

¹² Ngana mwaYesu nayetu tweji kukafwanga vatu vafwile vyuma vyakushipilitu. (Mateu 5:3) Nge natwambulula “mujimbu wamwaza waKalunga,” kaha nachisolola nge tunakulondezeza Yesu. (Loma 1:1) Tweji kuvanangulanga ngwetu ndando yaYesu yikiko kaha yeji kulingisanga vatu vavevwile uselewa kuli Kalunga nakupwa nausepa naikiye. (Koli. 2, 5:18, 19) Kwambulula mujimbu wamwaza yapwa hijila yimwe yayilemu yakusolwelamo zangi kuli vakwetu.

13. Mweji kwivwanga ngachilihi hakwazana mumulimo kanou wakwambulula Wangana?

¹³ Nge natuliwahisanga kanawa shimbu kanda tuyenga kumaungeji akuhilukila nakuvilongesa vyaMbimbiliya, kaha natukafwa vatu vononoke Yehova. Echi nachikafwa vamwe vaseze vilinga vyavipi. (Koli. 1, 6:9-11) Tweji kwivwanga kuwaha hakumona omu Kalunga ali nakukafwa vatu vakulinyisa vazovoloke nakupwa masepa jenyi. (Vili. 13:48) Kulinangula Mbimbiliya chinakukafwa vatu vaze kavapwile nalutalililoko vapwenga vakuwahilila kaha nawa kulizakamina chavo chinakukuma mwomwo yakufwelela muli Yehova. Chapwa hikutokwa chikuma kusolola zangi yetu mujila kaneyi yakulipwila.

14. Paulu alumbunwine ngachilihi zangi hamukanda Wavaka-Kolinde 1, 13:4-8?

¹⁴ Nge natuzanga vakwetu ngana muze alumbunwine Paulu, kaha natwivwisa Yehova kuwaha, nakuhonesa ukalu wauvulu, nakupwa vakuwahilila. (Tangenu Wavaka-Kolinde 1, 13:4-8.) Tuchishimutwilenu chindende havyuma avulukile Paulu kupandama kuzangi nakumona omu tunahase kuvizachisa mangana tupwenga nausoko wamwaza navakwetu.

15. (a) Mwomwo ika twatela kupwa namuchima wakutalilila chikoki nakeke? (b) Mwomwo ika twatela kuhonesa muchima walwiso nakulivwimba?

¹⁵ “Zangi yika-kutalilila chikoki kaha nawa yika-kutetela.” Yehova eji kutalililanga vatu vosena chikoki numba tuhu kavakupuka mwosenako. Ngachize nayetu twatela kutalilila vakwetu chikoki nakuvatetela nge vanatwivwisa kupihya, numba tuhu navalikanga kuli etu. Mbimbiliya yamba ngwayo: “Zangi kayevwa lisunguko.” Vandumbwetu vamwe vanahase kuvahana milimo yimwe muchikungulwilo yize katweshi nayoko. Ngocho, nge twavazanga, kaha katweshi kuvevwila lwisoko. Kaha nawa katwatela kulivwimbako. Yehova ahunga “meso akutala helu namuchima wakulivwimba.”—Vishi. 21:4.

16, 17. Jijila muka tunahase kusolwelamo zangi kuli vakwetu ngana muze vanalumbununa hamukanda Wavaka-Kolinde 1, 13:5, 6?

¹⁶ Zangi “kayeshi kulinga mwakuhingamako.” Nge twazanga vakwetu, kaha katweshi kuvonga, kwiva vyuma vyavo chipwe kulinga vyuma vize navivwisa Yehova kupihyako. Zangi nayitulingisa tuhone kulizanga kaha etu vavene mwomwo “kayeshi kufwila vyuma vyayo yiveneko.” Ngocho natufwilanga kulingila vakwetu vyuma vyamwaza.—Fwili. 2:4.

¹⁷ Zangi “kayeshi kusangumuka washi ndomboko. Kayeshi kulama kokoko.” (Teso. 1, 5:15) Nge mutu mwatulinga mwamupi,  katwatela kupihilila washiko. Katwatela kulamanga vyuma vyosena vize navatupihisa vakwetuko. Nge natulamanga koko, kaha nachipwa chaponde kuli etu nakuli vaze tunasulakanyina, mwomwo kulundundu yetu nayitohwa nge kakahya mutulo yetu. (Levi 19:18) Oloze twatela kuvakonekela nakuvulyamako. Zangi “kayeshi kuwahilila navilinga vyakuhengako.” Nge mutu uze atuhunga vanamulingi mwamupi, katwatela kuwahililako.—Tangenu Vishimo 24:17, 18.

18. Vyuma muka tunalinangula kupandama kuzangi hali Wavaka-Kolinde 1, 13:7, 8?

¹⁸ Paulu asonekele nawa ngwenyi zangi “yeji kufwikanga vyuma vyosena.” Nge twazanga vakwetu, kaha natuvakonekelanga nge vanatufutwisa kumuchima. Paulu asonekele nawa ngwenyi zangi yeji “kwitavila vyuma vyosena.” Tweji kufwelelanga vyuma tweji kulinangulanga muMbimbiliya nakusakwilila Yehova hakutunangula kuhichila muliuka lyenyi. Zangi yeji “kutalilila vyuma vyosena” vize vasoneka muMbimbiliya nakutulingisa tulwezeko vakwetu vyalutalililo lwetu. (Petu. 1, 3:15) Tweji kulombanga kuli Kalunga nakuvandamina omu mwatukumbulula. Numba tuhu vakwetu navatuyanjisa oloze tweji kumikanga, mwomwo zangi yeji “kukakachila muvyuma vyosena.” Paulu ambile nawa ngwenyi “zangi kayakumako.” Vaze vononoka Yehova navasololanga zangi kuli vakwavo haya myaka yosena.

19, 20. Visoneka muka vyatela kutulingisa tutwaleho lika kuzanganga vakwetu?

¹⁹ Nge natukavangiza vyuma yatunangula Mbimbiliya, kaha natutwalangaho lika kuzanga vakwetu ngana muze twalizanga etu vavene. Zangi kana nayitulingisa tuzange vatu vosena chamokomoko nachisemwa chavo. Twatela kwanuka nawa mazu aYesu akwamba ngwenyi: “Watela kuzanga mukwenu nganomu walizanga ove lyavene.” (Mateu 22:39) Yesu naKalunga vasaka tuzangenga vakwetu. Nge tuli nakuchiwana chachikalu kusolola zangi kuli vakwetu, kaha twatela kulomba kuli Kalunga atuhane shipilitu yenyi yajila. Nge natulinga ngocho, kaha natwivwisa Yehova kuwaha, kaha mwatukafwa.—Loma 8:26, 27.

²⁰ Elu lushimbi vatuhana lwakuzanga vakwetu ngana muze twalizanga etu vavene valuvuluka ngwavo ‘lushimbi lwaWangana.’ (Yako. 2:8) MuJishimbi jaMose, Yehova ahanyine vatu jenyi jishimbi jajivulu jize javanangwile kuzanga vakwavo. Mukuhita chamyaka Yehova ahwiminyine Paulu asoneke ngwenyi: “Lwesholwo lushimbi lweka luliko nawa, josena vanajiwanyisa hamwe mumazu ano ngwavo: ‘Watela kuzanga mukwenu nganomu walizanga ove lyavene.’ Zangi kayeshi kuzata vyuma vyavipi kumutuko; shikaho zangi yikiko vene kutesamo mwaya jishimbi.” (Loma 13:8-10) Ngachize, tutwalenuho lika kuzanganga vakwetu.

21, 22. Mwomwo ika twatela kuzangila Kalunga navakwetu vatu?

²¹ Yesu atukafwa tutachikize vaze vapwa vakwetu omu ahanjikile ngwenyi, Ise “eji kututwisanga likumbi lyenyi hali vaka-kuhuka nahali vatu vamwaza, nakunokesa vula hali vaka-kwoloka nahali vaka-kuhona kwoloka.” (Mateu 5:43-45) Twatela kusolola zangi kuli vakwetu, numba vapwa vakwoloka chipwe chiku. Ngana muze twavulukanga hakavanga, jila yayilemu yakusolwelamo zangi shina kwambulila vatu mujimbu waWangana. Nge vakwetu navazachisa vyuma natuvanangula muMbimbiliya, kaha navapwa vakuwahilila nakupwa masepa jaKalunga.

²² Tunalinangula lyehi ovyo vyatela kutulingisa tuzange Yehova namuchima wetu wosena, namwono wetu wosena, namangana etu osena. Tunalinangula nawa omu tunahase kusolola zangi kuli vakwetu. Nge natuzanga Yehova navakwetu, kaha natusolola nge twavumbika eji jishimbi jaYesu jajilemu. Kaha chachinenenyi natwivwisa kuwaha Setu wamwilu Yehova.