1, 2. (a) Iya apwa chinjiho chaYehova wakushishika wamuchano? (b) Uno lijina lyaYesu lyalumbununa ika, kaha akafwile ngachilihi vaYuleya vavevwile uselewa kuli Kalunga?

OMU Yesu vapwile nakumusopesa muzango, omikile nakulweza Pondeu Pilatu Nguvulu wavaYuleya ngwenyi: “Mwomwo echi chikiko vene ngwasemukilile ami, kahechi chikiko nawa ngwejililile muno mukaye, mangana nguhane unjiho wakuvuluka muchano.” (Tangenu Yowano 18:33-37.) Myaka yakavangijileho kaposetolo Paulu avulukile Yesu ngwenyi chinjiho uze ahanjikile “hatoma mujila yamwenemwene kumeso aPondeu Pilatu.” (Chimo. 1, 6:13) Twatwama mukaye kaze vali nakuyula kuli Satana, kaze kanazale nachijindo. Hakusaka tutwaleho lika kwambulula, twatela kumika ngana muze alingile Yesu uze apwa “chinjiho wakushishika wamuchano.”—Kuso. 3:14.

² VaYuleya vosena vapwile vinjiho jaYehova oloze Yesu apwile chinjiho wamunene wakulipwila. (Isa. 43:10) Shimbu kanda Yesu asemuke, kangelo alwezele Yosefwe Ise yaYesu wakumulela ngwenyi: “Ukamuluka lijina lyenyi ngwove Yesu, mwomwo ikiye mwakalwila vatu jenyi kujishili javo.” (Mateu 1:20, 21) Lijina lyaYesu muchiHepeleu lyalumbununa “Yehova Ikiye Ulwilo.” Ngocho  Yehova azachishile Yesu kusokola vatu kufuma kushili nakufwa. Yesu alwezele vaYuleya ngwenyi vatelelele kupihilila nakwalumuka numba vavevwile uselewa kuli Kalunga. (Mateu 10:6; 15:24; Luka 19:10) Yesu ambulwile natwima vyaWangana waKalunga. Mako asonekele ngwenyi: “Yesu ayile kuNgalileya nakwambulula mujimbu wamwaza waKalunga ngwenyi: ‘Lwola vatongola lunahete, kaha Wangana waKalunga unapandama kwakamwihi. Pihililenu nakwalumuka, kaha fwelelenu mujimbu wamwaza.’” (Mako 1:14, 15) Yesu ambulwile natwima kaha nawa apwile wakumika hakuhuhumuna vatwamina javaYuleya, echi chikiko chalingishile vaYuleya vamujihe.—Mako 11:17, 18; 15:1-15.

3. Vyuma muka vyasolokele halikumbi lyamuchitatu omu Yesu afwile?

³ Omu mwahichile makumbi atatu kufuma haze vajihile Yesu, kwasolokele chuma chakukomwesa. Yehova asangwile Yesu namujimbu wakushipilitu keshi wanyama namanyingako. (Petu. 1, 3:18) Yesu alisolwele kuli tumbaji twenyi namujimba wautu mangana vejive ngwavo nasanguka. Halikumbi lyakavangijileho kufuma hakusanguka chenyi, Yesu asolokele kuli tumbaji twenyi mapapa katanu halwola lwakulisezaseza.—Mateu 28:8-10; Luka 24:13-16, 30-36; Yowa. 20:11-18.

4. Vyuma muka vyasolokele omu Yesu asolokele kuli tumbaji twenyi, kaha vyuma muka avalwezele kulinga?

⁴ Omu Yesu alisolwele halwola lyamuchitanu, apwile hamwe navaposetolo naveka vaze valikungulwile hamwe. Avakafwile vatachikize ngwavo kufwa nakusanguka chenyi vavisonekele chimweza muVisoneka. Omu vakumishile kushimutwila, Yesu alwezele tumbaji twenyi vyuma vatelele kulinga. Avalwezele ngwenyi: “Mulijina lyenyi mukiko navakambulwila vyakupihilila nakwalumuka chakukonekela jishili muli vaka-mafuchi osena—kuputukila vene kuYelusalema.” Kufumaho Yesu avalwezele ngwenyi: “Enu namukapwa muvinjiho vavyuma kanevi.”—Luka 24:44-48.

5, 6. (a) Mwomwo ika Yesu ambile ngwenyi: “Namukapwanga muvinjiho jami”? (b) Vyuma muka vize tumbaji twaYesu vatelelele kwambulula?

⁵ Omu mwahichile myaka 40 kufuma haze Yesu asolokele kuli vaposetolo jenyi halwola lwamakumishilo, vaposetolo jenyi atela vejivile omu Yesu avalwezele ngwenyi: “Namukapwanga muvinjiho jami muYelusalema, namuYuleya mwosena, namuSamaliya, nakuvihela vyakwakusuku vyahamavu.” (Vili. 1:8) Tumbaji vapwile vaIsalele vaze vapwile lyehi vinjiho jaYehova. Halwola kanelu jino vatelelele kupwa nawa vinjiho jaYesu. Uno echi chalumbununa ika?

⁶ Vatelelele kuputuka jino kwambulwila vatu ngwavo Yehova anakuzachisa jino Yesu mangana alwile vatu. Kulwila kanechi chalihandununa chikuma namujila Yehova asokwelelemo vaIsalele kunyima. Kufwa nakusanguka chaYesu Kulishitu chalingishile vatu vavasokole kushili nakufwa. Omu tumbaji twaYesu vavawavishile nashipilitu yajila haPendekoseta 33 C.E., vaputukile kwambulila vatu “vyuma vyaukelenga waKalunga.” Vatu vaze vevwilile kumujimbu vambulwile tumbaji, vapihilile nakwalumuka nakufwelela mundando yakusokola yaYesu. Yesu uze vasangwile vamuhanyine ngolo mwilu kaha Yehova amuzachishile mangana asokole vatu vavavulu hano hakaye.—Vili. 2:5, 11, 37-41.

7. Vyuma vyasolokele haPendekoseta 33 C.E., vyasolola vyuma muka?

⁷ Vyuma vize vyasolokele haPendekoseta 33 C.E., vyasolwele nge Yehova etavilile wana waYesu wakukupuka mwosena kupwa ndando yakusokola vatu kushili. (Hepe. 9:11, 12, 24) Yesu alumbunwine ngwenyi, “kejile mangana vamuzachilenga milimoko, oloze  mangana avazachile milimo nakuhana mwono wenyi kupwa ndando yakusokola vavavulu.” (Mateu 20:28) Uno kutala vaYuleya kaha vakiko vatelelele kunganyala kundando yakusokola tahi? Nduma. Oloze eyi ndando yakusokola ‘nayikafumisa shili yakaye!’ Mwomwo Kalunga ajina ngwenyi “vatu vosena vavalwile.”—Chimo. 1, 2:4-6; Yowa. 1:29.

8. Vyuma muka vyakafwile tumbaji twaYesu vatwaleho lika kwambulula, kaha vateselemo ngachilihi mulimo wavo?

⁸ Tumbaji twaYesu vakulivanga vatwalilileho lika kwambulula vyaYesu nakumika. Vyuma muka vyavakafwile? Keshi mwomwo yajingolo javoko oloze mwomwo yashipilitu yajila yikiko yavakafwile vatwaleho lika kwambulula. (Tangenu Vilinga 5:30-32.) Myaka kafwe 27 kufuma haze tumbaji twaYesu vaputukile mulimo wakwambulula, “mazu amuchano amujimbu wamwaza” vawambulile kuli vaYuleya naVatu vakumafuchi eka, “vaze vatwama mwishi yamelu” kulumbununa nge kuvihela vyakulisezaseza.—Kolo. 1:5, 23.

9. Vyuma muka vyasolokele muchikungulwilo chavaka-Kulishitu?

⁹ Oloze omu mwahichile lwola vatu muchikungulwilo vaputukile kunangula vyuma vyamakuli. (Vili. 20:29, 30; Petu. 2, 2:2, 3; Yuta 3, 4) Kutwala muze vaka-kunangula vakwonga vahungumwishile chikungulwilo chosena. Yesu ahanjikile chimweza ngwenyi vaka-kusosoloka kulufwelelo navatwalaho lika palanga nahachikukulwishi “chakatwamino kamyaka yino.” (Mateu 13:37-43) MuOctober 1914 Yehova atongwele Yesu kupwa Mwangana wavatu hano hamavu. Mumwaka kanou mukiko aputukile “makumbi akukuminyina” atulingilo twaSatana.—2Chimo. 2, 3:1.

10. (a) Mwaka uka waulemu uze vaka-Kulishitu vawavisa vapwile nakuvilika? (b) Vyuma muka vyasolokele muOctober 1914, kaha twejiva ngachilihi ngocho?

¹⁰ Hamyaka yakuhambakana 30 shimbu kanda October 1914, vakaka-Kulishitu vawavisa vaputukile kwambulila vatu ngwavo, wangana waKalunga naukaputuka kuyula mu 1914. Kunangula chavo chazamine haupolofweto waNdanyele wakutalisa kumutondo waunene uze vapakwile kaha kutwala muze waputukile cheka kusokolokela omu mwahichile “jitando jitanu najivali.” (Ndanye. 4:16) Yesu alumbunwine chinjikizo chize nachikakafwa tumbaji twenyi kutachikiza lwola navakamutongola  kupwa Mwangana nalwola nawakaputuka makumbi akukuminyina. Vyuma vinakusoloka mukaye kufuma vene mu 1914 vyasolola nge Yesu apwa Mwangana. (Mateu 24:3, 7, 14; Luka 21:24) Makumbi ano, “vyuma vyaukelenga waKalunga” vize tweji kwambululanga vyapwa muchano wakuvuluka nge Yehova atongwele Yesu kupwa Mwangana mu 1914.

11, 12. (a) Vyuma muka vyasolokele mu 1919? (b) Vyuma muka vyasolokele mumwaka wa 1935 (Talenu muvwimbimbi wakulivanga.)

¹¹ Omu Yesu Kulishitu vamutongwele kupwa mwangana mu 1914, aputukile kusokola vaka-kumukavangiza vawavisa kufuma ‘muMbavilone Yayinene’ yize yapwa kwitava chamakuli. (Kuso. 18:2, 4) Omu Jita yaKaye yatete yakumine mu 1919, vaka-Kulishitu vapwile namulimo wakwambulula mujimbu wamwaza muKaye kosena. Vambulwile vyandando yakusokola yaYesu namujimbu wamwaza waWangana waKalunga. Ngocho vatu vavavulu valinangwile muchano nakuvawavisa kupwa vamyangana vaze navakayula hamwe naKulishitu mwilu.

¹² Mumwaka wa 1935, Yesu Kulishitu aputukile kukungulula “mikoko veka.” Makumbi ano jimiliyoni jamikoko veka vali mukaye kosena. Mikoko veka navaka-Kulishitu vawavisa veji kulondezezanga chakutalilaho chaYesu nakwambulula mujimbu wamwaza nakumika. Namikoko veka vafwelela ngwavo ndando yaYesu yikiko kaha nayilingisa vatu vavalwile. Vatachikiza nawa ngwavo nge navatwalaho lika kwambulula nakumika nakuzachisa kuyoya chavo mangana vevwise Yehova kuwaha, kaha navakayovoka “malwa amanene” nakukengila mukaye kakahya kaKalunga.—Yowa. 10:16; Kuso. 7:9, 10, 14.

13. Etu Vinjiho jaYehova twafwila kulinga vyuma muka, kaha tunahase kulondezeza ngachilihi vaka-Kulishitu vamulikulukaji lyamyaka lyakulivanga?

¹³ Chapwa hikutokwa kwambulula vyuma vikwavo “vyaukelenga waKalunga” vize nalingi Yehova najishiko jenyi jize mwakatesamo kulutwe. Kachapwa chachashi kutwalaho lika kwambulula mujimbuko. Vatu vanahase kukana mujimbu wetu chipwe kutuyanjisa. Nge chili ngocho, kaha twatela kukavangiza chakutalilaho chakaposetolo Paulu navakwavo. Paulu ambile ngwenyi: “Twomikile muli Kalunga ketu nakumilweza mujimbu wamwaza waKalunga halwola luze lwakutufumbukila.” (Teso. 1, 2:2) Twatela kulama lushiko lwetu luze twalishikile naKalunga omu twalihanyine kuli ikiye. Twafwila kupwa lika Vinjiho jaYehova palanga nomu navakanongesa kaye kaSatana. (Isa. 6:11) Katweshi kulinga ngocho mungolo jetuko. Ngana muze chapwile kuli vaka-Kulishitu vakulivanga, nayetu twatela kulomba Yehova atuhane  shipilitu yenyi yajila mangana tupwenga nangolo “jakuhambakana jize javatu.”—Tangenu Wavaka-Kolinde 2, 4:1, 7; Luka 11:13.

14, 15. (a) Uno vaka-Kulishitu vapwile nakuvayanjisanga ngachilihi, kaha Petulu avakolezezele ngachilihi? (b) Vyuma muka twatela kwanuka nge vali nakutuyanjisa mwomwo yakupwa Vinjiho jaYehova?

¹⁴ Makumbi ano, vatu vavavulu veji kwamba ngwavo vapwa vaka-Kulishitu, oloze veji kulinga vyuma vize ahunga Kalunga, ngocho kavavevwila uselewa kuli Kalungako. (Chitu. 1:16 ) Mulikulukaji lyamyaka lyakulivanga, vatu vavavulu kavapwile nakulemesa Kalunga mujila yize etavilileko. Ngocho, vaka-Kulishitu vamuchano halwola luze vavahungile kuli vatu vavavulu. Ngachize, kaposetolo Petulu akolezezele vakwavo vaka-Kulishitu ngwenyi: “Kachi nge vali nakumisaula halijina lyaKulishitu, kaha munapu vakuwahilila.” Mwomwo ika vatelele kupwa vakuwahilila? Mwomwo vyuma vapwile nakulinga vavitavilile kuli Kalunga nashipilitu yajila.—Petu. 1, 4:14.

¹⁵ Kutala makumbi ano Vinjiho jaYehova veji “kuvasaulanga halijina lyaKulishitu” tahi? Eyo, mwomwo tweji kwambululanga vyaYehova naYesu nakwambulula ngwetu, Yesu ikiye Mwangana waWangana waKalunga. NaYesu vamuyanjishile mwomwo apwile chinjiho chaYehova. Alwezele vaka-kumuhunga ngwenyi: “Ami nguneza mulijina lyaTata, oloze kamute kungutambula.” (Yowa. 5:43) Shikaho, nge vatu navamiyanjisa mwomwo yakwambulula, kaha mwatela kwanuka ngwenu, Kalunga ali nakumivwila uselewa kaha nawa muli nashipilitu yajila.

16, 17. (a) Vangamba jaKalunga veji kwivwanga ngachilihi hamulimo veji kwambululanga? (b) Vyuma muka mwafwila kulinga?

¹⁶ Twatela kwanuka nawa ngwetu vatu vavavulu vali nakutachikiza muchano. Kala kweshokwo twatwama nakala ngalila tweji kwambulilanga, kuli vatu vaze vali nakufwila kwivwilila kumujimbu wamwaza. Shikaho, nge tunawane vatu vaze vali nakufwila kwivwilila kumujimbu wetu, kaha twatela kuvahaka mangana nakufwila kukindulukilako mangana tuputuke vilongesa vyaMbimbiliya. Kulinga ngocho, nachitulingisa tuvakafwe vatachikize Yehova nakulihana kuli ikiye nakuvambapachisa. Mweji kwivwanga ngachilihi hakuzata mulimo kanou? Ndumbwetu umwe walijina lyaSarie wamulifuchi lyaSouth Africa, uze nazachila Yehova hamyaka kafwe 60 ahanjikile ngwenyi: “Ngweji kusakwililanga chikuma ndando yaYesu Kulishitu, mwomwo yinangulingisa ngupwenga nausoko wamwaza naYehova, Mwata wavyuma vatenga vyosena, kaha ngwapwa wakuwahilila hakutandakanyisa lijina lyenyi kuvatu.” Ikiye nalunga lyenyi Martinus vanakafwe vana vavo vatatu navatu veka vamuchivulu kupwa vangamba jaYehova. Ambile nawa ngwenyi: “Kakweshi milimo yeka yinahase kutwivwisa kuwahako, kaha nawa Yehova ali nakutukafwa nashipilitu yenyi mangana tupwenga nangolo jakutwalaho lika kuzata ou mulimo wakuyovola vatu.”

¹⁷ Numba nge vatumbapachisa lyehi chipwe kanda, twatela kusakwililanga Yehova hakutokwa twatwama nacho chakupwa hamwe naVinjiho jenyi mukaye kosena. Shikaho, twalenuho lika kwambulula mujimbu hamwe kaha navandumbwenu vamukaye kosena nakupwa vatoma kuvilinga vyakaye kaSatana. Nge namulinga ngocho, kaha namuneha kavumbi kulijina lyaSetu wamwilu Yehova uze tweji kwimanyinangako.