KATHERINE akolelele muUnited States, kahomu apwile namyaka yakusemuka 16 vamumbapachishile nakupwa Chinjiho chaYehova. Ambulwilenga mujimbu natwima, oloze mungalila apwile nakwambulwila, vatu vavavulu kavapwile namuchima wakulinangula mujimbu waWanganako. Ambile ngwenyi: “Ngwatangilenga mijimbu yavatu vaze valombelenga kuli Kalunga mangana avatumine mutu uze mwavakafwa vatachikize Kalunga. Nayami ngwafwililile kuwana vatu vakufwana ngana, oloze kangwavawanyineko.”

Hakwambulwila myaka yayivulu muze mungalila yoyimwe, Katherine aputukile kushinganyeka vyakuya kungalila yize mwakawana vatu vakuwahilila vaze navafwila kulinangula vyaWangana waKalunga. Oloze apwile nakukakasana numba nge mwahasa kulinga ngocho. Kamwe kaha asezaho lyehi tanga yenyi muvyalumingo vivali mukuyoya chenyi chosena. Oloze apwile nakwivwa chikuma uli mwomwo yakuseza tanga yenyi. Chipwe ngocho, muchima wakufwila kumona kuwaha chatwama hakukafwa vatu vaze vali nakusaka kutachikiza Yehova, wamulingishile ajine kuya kungalila kuze kwapwile nakusakiwa vaka-kwambulula. Omu apwile nakushinganyeka hajingalila jize japwile nakusakiwa kukafwa vaka-kwambulula, asonekelele mutango wamuGuam, kaha vamukafwile mwakulingila. Kuheta muJuly 2007, omu apwile namyaka 26, Katherine ayile kuSaipan, litungu lize lyatwama kuKalungalwiji vavuluka ngwavo Pacific ocean, tunda yajikilomita 10,000, kufuma kwimbo lyenyi. Vyuma vyapwile ngachilihi omu ayile kungalila kana?

Omu mwahichile makumbi amandende kufuma haze ahetele kuchikungulwilo chachihya, Katherine aliwanyine naDoris, pwevo uze apwile namyaka 45, uze etavilile kulinangula Mbimbiliya. Omu vakumishile kulinangula tupetulu vatatu vatete vamumukanda waMbimbiliya Yanangula, Katherine alizakaminyine. Ambile ngwenyi: “Doris apwile muka-kulinangula Mbimbiliya wamwaza, kaha kangwasakile kumwenyekako. Mwomwo kanda lyehi ngutwaminyineho chilongesa chaMbimbiliya, kaha ou pwevo ali nakusaka ndumbwami wapwevo wakuhya kushipilitu mangana alinangule nenyi, chipwe ndumbwetu uze apwa mumazangavo.” Ngocho, Katherine alombele kuli Yehova mangana amukafwe kuwana ndumbwetu wapwevo uze mwatwaminyina echi chilongesa. Shikaho Katherine alwezele Doris ngwenyi navamunangulanga kuli ndumbwetu weka.

Katherine ambile ngwenyi: “Shimbu kanda ngujimbule chihande chakulinangula, Doris angulwezele ngwenyi anakusaka angulweze ukalu apwile nawo. Hanyina yakwivwilila kuukalu wenyi, ngwamulwezele omu Yehova angukafwile nguhonese ukalu woumwe mukuyoya chami. Evwile kuwaha.” Kufumaho Doris alwezele Katherine ngwenyi: “Yehova ali nakuzachisa yove mangana ungukafwe. Likumbi lyatete wejile kuzuvo yami, ngwapwile nakutanga Mbimbiliya halwola lwalusuku. Ngwapwile nakulila, nakulomba Kalunga atume ngamba yenyi kwiza nakungukafwa ngutachikize  Mbimbiliya. Nakushimbula chiku, wangongomwezele kuchikolo. Chikupu vene Yehova akumbulwile kulomba chami!” Katherine apwile nakusotola masoji omu apwile nakwivwilila kumujimbu kanou wamwaza, kaha ambile ngwenyi: “Mazu ahanjikile Doris asolola nge Yehova akumbulwile kulomba chami. Yehova asolwele nge ngwatela kutwalililaho kulinangula Mbimbiliya nou pwevo.”

Doris vamumbapachishile mu 2010, kaha oholili ali nakutwaminyina vilongesa vyaMbimbiliya vyavivulu. Katherine asonekele ngwenyi: “Ngweji kwivwanga kuwaha chikuma hakumona omu vyuma ngwapwile nakufwila halwola lwalusuku vyakukafwa mutu uze mwapwa ngamba yaYehova, vyateselemo!” Makumbi ano, Katherine apwa wakuwahilila kuzata upayiniya wakulipwila halitungu lyaPacific island lyaKosrae.

Vandumbwetu vakuhambakana 100 vakufuma kumafuchi eka (vali namyaka yakusemuka 19 nakuheta ku 79) vanazachilanga kuze kuli nakusakiwa vaka-kwambulula vavavulu muMicronesia. Vyuma veji kuhanjikanga ava vandumbwetu vaka-kwambulula natwima vanavihanjika kuli ndumbwetu umwe wapwevo Erica, uze ayile nakwambulila kuGuam mu 2006 omu apwile namyaka 19. Ambile ngwenyi: “Kuzata upayiniya mungalila muze vatu vali nakufwila kutachikiza muchano cheji kwivwisanga kuwaha chikuma. Ngachize, ngweji kusakwililanga Yehova hakungukafwa nguzate mulimo kanou. Mulimo kanou ukiko wamwaza kuzata mukuyoya!” Makumbi ano, Erica eji kwivwanga kuwaha chikuma kuzata upayiniya wakulipwila muEbeye mulitungu lyaMarshall Islands. Oloze kuzachila mulifuchi lyeka chatwama naukalu. Tumonenu ukalu utatu nomu vaze vayile nakwambulila kuMicronesia valipikile naukalu kana.

Chiyoyelo. Omu ndumbwetu Simon wamyaka 22 ahetele halitungu lyaPalau mu 2007, hahaze vene awanyine nge milimo mwazata kayeshi kumuhana jimbongo jajivulu jakulikafwa najo hakujesekesa kujimbongo jize apwile nakutambula mulifuchi lyenyi lyaEnglandko. Ambile ngwenyi: “Ngwatelelele kutachikiza mwakuzachishila kanawa jimbongo jami hakuhona kulandanga kala vyuma nangutonda. Ngocho, ngweji kusakula kanawa vyakulya vize ngwatela kulanda, kaha nawa ngweji kuyanga nakulanda kuvitanga vize kavyeshi nandando chikumako. Nge chuma chami chimwe chinafu, ngweji kutonda kuze veji kulanjisa vyuma vyamwaka nakulanda vyuma kana, kaha ngweji kufwila kuwana mutu uze mwanguwahishila chuma chami chinafu.” Uno kupwa nachiyoyelo chachashi chamukafwile ngachilihi? Simon ambile ngwenyi: “Changukafwile ngutachikize vyuma vize vyasakiwa chikuma mukuyoya nomu ngunahase kuyoya najimbongo jajindende. Yehova nangukafwenga mapapa kakavulu mangana nguwane mwakuyoyela. Hamyaka 7 ngunazachila kuno, kangweshi kusavalila nazalako, oloze lwola lwosena ngweji kupwa navyakulya naha hakusavala.” Chikupu vene, Yehova eji kuzakamanga vosena vaze navashiwisa chiyoyelo chavo mangana vatondenga chatete Wangana waKalunga.—Mateu 6:32, 33.

Kwivwa uli chikuma. Erica ambile ngwenyi: “Ngwatwama kwakamwihi navatanga jami, kaha nawa ngwalizakaminyine nge kwivwa uli nachikangulingisa ngukahone kuzata kanawa mulimo wakwambulula.” Vyuma muka vyamukafwile ahonese ukalu kana? Ambile ngwenyi: “Shimbu kanda nguyenga kulifuchi kana, ngwatangile vihande vyamuKaposhi Kakutalila vize vyahanjikile hauli wakuseza vausoko namasepa. Evi vihande vyangukafwile mwakukalipikila naukalu kana. Muchihande chimwe, chisemi wapwevo akolezezele mwanenyi wapwevo ngwenyi, ‘Yehova mwakakuzakama kanawa kuhambakana yami.’ Mazu kana angukolezezele chikupu.”  Hannah nalunga lyenyi, Patrick, veji kwambulilanga muMajuro halitungu vavuluka ngwavo Marshall Islands. Hannah eji kulipikanga naukalu wakwivwa uli hakupendamina hali vandumbwenyi vamuchikungulwilo chavo. Ambile ngwenyi: “Ngweji kusakwililanga lika Yehova hawanawakwetu wamukaye kosena mwomwo navakivo vapwa tanga yami. Kungukafwa kuli vandumbwami, chikiko changulingishile nguzachile kuze kwapwile nakusakiwa kukafwa.”

Kuhona masepa. Simon ambile ngwenyi: “Omu ngwahetele mulifuchi lyeka, vyuma vyapwile mweka. Shimbu jimwe ngweji kuhonanga kuwana mutu wakuseseka nenyi uze mwangwivwishisa omu ngwapwa nge omu ngwapwile kwimbo lyami.” Kaha nawa Erica ambile ngwenyi: “Omu ngwapwile te kanda nguchilijilile navatu, ngwevwilenga nge ngunajimbala, oloze echi changukafwile ngushinganyeke vyuma vyangulingishile ngwizenga kuno. Kangwejile mangana ngulinge vyuma vyakumujimbako, oloze nguzachile Yehova.” Ambile nawa ngwenyi: “Omu ngwashimbwile, ngwaputukile kupwa namasepa, vaze ngwamona kupwa vavalemu.” Simon azachile nangolo mangana alinangule lilimi lyaPalauan, lize lyamukafwile ‘akasunune chikuma michima’ yavandumbwenyi. (Koli. 2, 6:13) Kulinangula lilimi kana chalingishile vandumbwenyi vevwanga kuwana nakumuzanga chikuma. Chikupu vene, nge vandumbwetu vaze naveza nakuzachila muchikungulwilo navandumbwetu vaze navawana muchikungulwilo navazachila hamwe, kaha navapwa vakukisula mwomwo yakupwa namasepa vamwenemwene muchikungulwilo. Vyuma muka vyamwaza vikwavo veji kulivwisanga vandumbwetu vaze veji kulihananga namuchima wavo wosena wakuya nakuzachila kuze kuli nakusakiwa vaka-kwambulula?

Kaposetolo Paulu asonekele ngwenyi: “Ou mwakuvila hahanene mwakahila nawa hahanene.” (Koli. 2, 9:6) Awa mazu vasoneka aha hamukanda atalisa kuli vaze veji kufwilanga kutohwesa mulimo wavo wakwambulula. Mihako muka yamwaza veji ‘kwahilanga hahanene’ muMicronesia?

MuMicronesia, muchili lika vatu vavavulu vaze vali nakufwila kulinangula Mbimbiliya kaha tuli nakumona omu vatu vali nakulinangula Mbimbiliya, nomu vali nakukavangiza muchano wamuMazu aKalunga nakuzovoloka kushipilitu. Patrick naHannah vayile nakwambulila halitungu lyalindende lyaAngaur, lize likwechi vatu vakuheta ku 320. Omu vambulile hatukweji vavali kuze, vawanyine chisemi wapwevo wamujike nakumwambulila. Hahaze vene etavilile kumunangula Mbimbiliya, kaha atachikijile washi muchano, nakwalumuna vilinga vyenyi vyavipi vize apwile nakulinga mukuyoya chenyi. Hannah ambile ngwenyi: “Omu twakumishilenga kulinangula, nakuhiluka kuzuvo hajikinga jetu, twalitalilenga tuvosena nakuwahilila nakwamba ngwetu: ‘Twasakwililako Yehova!’” Hannah ambile cheka ngwenyi: “Ngunatachikiza ngwami Yehova kachi azachishile kala jila mangana akafwe ou pwevo alinangule muchano nakupandama kuli Yehova, oloze mwomwo yakwiza nakuzachila kuno kuli nakusakiwa vaka-kwambulula, chinatulingisa tumuwane nakumukafwa mangana atachikize Yehova. Ou ukiko mujimbu umwe weji kutwivwisanga kuwaha mukuyoya chetu chosena!” Ngana muze ambile Erica, “nge natukafwa mutu atachikize Yehova, tweji kwivwanga chikuma kuwaha!”

Mumafuchi namujingalila jajivulu, muli nakusakiwa chikuma vaka-kwambulula Wangana. Kutala nayenu munahase kuya kuze kuli nakusakiwa vaka-kwambulula tahi? Nge munakusaka, kaha lombenu Yehova amikafwe mupwenga namuchima wakufwila kutohwesa mulimo wenu wakwambulula. Shimutwilenu chihande kana navakulwane vamuchikungulwilo chenu, nakalama wakutambwojoka, chipwe vandumbwetu vaze vayile nakuzachila kuze kwapwile nakusakiwa vaka-kwambulula. Omu namuputuka kushinganyeka vyakuya, sonekelenu mutango uze weji kutalanga ngalila kana kuze muli nakusaka kuya nakuzachila, nakuhulisa mijimbu yayivulu yakuchihela kana. * Nge namulinga ngocho, kaha nayenu munahase kupwa hali vandumbwetu vavavulu vanyike navakulwane, vajike navaka-kulimbata vaze vali nakulihana namuchima wavo wosena nakumakila kuwahilila cheji kwizanga ‘hakwahila hahanene.’