Vatu jaYehova Vatela ‘Kuseza Vilinga vyaKuhenga’
“Mutu himutu uze ali nakuvuluka lijina lyaYehova aseze vilinga vyakuhenga.”—CHIMO. 2, 2:19.
1. Chuma muka twamona kupwa chachilemu mukulemesa chetu?
KUTALA mwamonaho lyehi lijina lyaYehova vanalisoneka hajizuvo chipwe hajizuvo valamina vyuma vyakushikulu tahi? Nge mukiko, kaha mwapwile vakuwahilila chikupu hakumona lijina kana. Shikaho, yetu Vinjiho jaYehova twamona lijina lyaYehova kupwa lyalilemu mukulemesa chetu. Kakweshi vatu veka hano hakaye veji kuzachisanga lijina lyaYehovako, shina yetu kaha. Hakupwa tuVinjiho jenyi, tukwechi mulimo wakuvumbika lijina kana mukuyoya chetu.
2. Vyuma muka twatela kulinga numba Kalunga atwivwile uselewa?
2 Hakusaka Yehova atwivwile uselewa, twatela kulinga vyuma vikwavo keshi kuzachisa kaha lijina lyenyiko. Twatela kukavangizanga jishimbi jenyi ‘nakusosoloka kukupihya.’ (Samu 34:14) Kaposetolo Paulu ashindakanyine chishina kanechi omu asonekele ngwenyi: “Mutu himutu uze ali nakuvuluka lijina lyaYehova aseze vilinga vyakuhenga.” (Tangenu WaChimoteu 2, 2:19.) Uno tunahase kuseza ngachilihi “vilinga vyakuhenga”?
‘SOSOLOKENU’ KUVYUMA VYAVIPI
3, 4. Mazu muka aze vaka-kulinangula chikuma Mbimbiliya kavevwishisako, kaha mwomwo ika?
3 Tutalenu mazu asonekele Paulu hamukanda WaChimoteu 2, 2:19. Hamukanda kana hatwama mazu akwamba ngwavo, “chihela chakukola chaKalunga” kaha hachihela kana vasonekaho mijimbu yivali. Mujimbu watete shina, “Yehova atachikiza vaze vanapu venyi,” mazu kana awafumishile hali Kulava 16:5. (Talenu chihande chinafumuho.) Kaha mujimbu wamuchivali shina wakwamba ngwavo: “Mutu himutu uze ali nakuvuluka lijina lyaYehova aseze vilinga vyakuhenga.” Vaka-kulinangula chikuma Mbimbiliya kavevwishisa mujimbu kanou wamuchivaliko. Mwomwo ika?
4 Mazu aPaulu asolola nge apwile nakuvuluka Chisoneka chikwavo kufuma muVisoneka VyachiHepeleu. Oloze chasoloka nge muVisoneka VyachiHepeleu kamweshi vesi yalitombola namazu apwile nakuvuluka Pauluko. Nge chili ngocho, kaha Paulu atalishile mulihi omu ambile ngwenyi: “Mutu himutu uze ali nakuvuluka lijina lyaYehova aseze vilinga vyakuhenga”? Mazu atete ahanjikile Paulu awafumishile hamukanda waKulava kapetulu 16, kaha atalisa kumujimbu wakulikanga chaKola. Kutala mazu akwavo ahanjikile atalisa kumujimbu woumwe tahi?
5-7. Paulu atalishile kumujimbu muka omu avulukile mazu atwama hali WaChimoteu 2, 2:19? (Talenu muvwimbimbi wakulivanga.)
5 Mbimbiliya yavuluka ngwayo, Ndatane, naAvilame vana vaElyave, vakundwijile Kola nakupwa vosena vatwamina vaze valikangile kuli Mose naAlone. (Kula. 16:1-5) Vafumbukilile Mose nakukana ngolo jakuyula jize Kalunga ahanyine Mose. Ava vaka-kulikanga vahungumwishile navakwavo vaIsalele vakushishika mwomwo vatwalilileho lika kutwama hamwe. Shimbu kanda atachikize vaka-kumulemesa vakulyononona, Yehova ahanyine lushimbi vaIsalele.
6 Mbimbiliya ngwayo: “Yehova ahanjikile kuli Mose ngwenyi: ‘Hanjika kulizavu ngwove, “Ehukenu okwo vatwama vaKola naNdatane naAvilame jingulwishi.”’ Mose akatukile, ayile kuli vaNdatane naAvilame, kaha vakulwane javaIsalele vamukavile. Ahanjikile kulizavu ngwenyi, ‘Achehukenu kujimbalaka jamalunga vakuhukava, kanda mukwata kuchuma chavo chipwe chimweko, kuchina namunonga hamilonga yavo yashili yosena.’ Ngocho vehukile kuze vatwamine vaKola naNdatane naAvilame.” (Kula. 16:23-27) Kufumaho Yehova anongesele vaka-kulikanga vosena. Oloze vaka-kumulemesa vaze vapwile vakulyononona kavanongeseleko. Mwomwo ika? Mwomwo ‘vasezele vilinga vyakuhenga’ hakusosoloka kuli vaka-kulikanga.
7 Omu Paulu asonekele mazu ahali Chimoteu 2, 2:19, akwamba ngwavo “Yehova atachikiza vaze vanapu venyi,” apwile nakuwafumisa hamukanda waKulava 16:5. Kahomu avulukile ngwenyi: “Mutu himutu uze ali nakuvuluka lijina lyaYehova aseze vilinga vyakuhenga,” atela apwile nakutalisa kumujimbu vasoneka hali Kulava 16:23-27. Ngocho, nachipwa chakutamo kwamba ngwetu mazu osena awa asonekele Paulu, atalisa kumujimbu woumwe. Vyuma muka natulinangula kumazu awa asonekele Paulu? Twalinangula nge, Yehova eji kumonanga vili mumichima yetu. Atachikiza vangamba jenyi vakulyononona kaha asaka valihende kuli vaka-kuhenga.
“KANANGA VIHULA VYAULEYA, VYAMOKOMOKO”
8. Vyuma muka vikwavo twatela kulinga muchishishisa chakuzachisa kaha lijina lyaYehova nakupandama kuchikungulwilo?
8 Paulu azachishile nawa ou mujimbu wasolokele mumakumbi aMose, kwanukisa Chimoteu nge, atelelele kukinga usoko wenyi naYehova. Vaka-Kulishitu vatelele kulinga vyuma vikwavo keshi kupwa kaha muchikungulwiloko. Mwomwo vangamba jaKalunga vakulyononona vamumakumbi aMose valingile vyuma vikwavo keshi kuzachisa kaha lijina lyaYehovako. Ngocho, vangamba jaKalunga vakushishika vosena vatela kukana “vilinga vyakuhenga.” Vyuma muka alingile Chimoteu? Kaha vyuma muka natulinangula kumazu akuhuhumuna aPaulu?
9. Uno “vihula vyauleya, vyamokomoko” vyahungumwishile ngachilihi vaka-Kulishitu vakulivanga?
9 Mumukanda uze Paulu asonekelele Chimoteu, mwapwile namazu akukafwa vaka-Kulishitu omu vanahase kukana vilinga vyakuhenga. Chakutalilaho, Paulu alwezele Chimoteu ahonenga “kulipula jipami hamazu” nakukananga “mazu amokomoko.” (Tangenu WaChimoteu 2, 2:19.) Mwomwo ika Paulu ahanjikilile mazu kana? Mwomwo vatu vamwe muchikungulwilo vapwile nakukundwiza kunangula chavaka-kusosoloka kulufwelelo. Kaha veka vapwile nakutandakanyisa kunangula chize chapwile nakuneha jipami. Numba tuhu vishinganyeka vimwe kavyalimbalakile nakunangula chamuMbimbiliyako, oloze vyalingishile vatu vahone kulinunga muchikungulwilo. Echi chikiko chalingishile Paulu akolezezele Chimoteu mangana ‘akanenga vihula vyauleya, vyamokomoko.’
10. Vyuma muka twatela kulinga nge tunawane vaka-kusosoloka kulufwelelo?
10 Makumbi ano, kamweshi kuwana chikuma vaka-kusosoloka kulufwelelo muchikungulwiloko. Chipwe ngocho, tunahase kwivwa kunangula chize chalimbalaka nakunangula chamuMbimbiliya. Kala kweshoko nakufuma echi kunangula kana, twatela kuchikana. Chapwa chakuhenga kulivwasana navaka-kusosoloka kulufwelelo, numba chipwa haInternet chipwe mujijila jeka. Numba tuhu nge natufwila kukafwa muka-kusosoloka kulufwelelo, oloze kulinga ngocho nachisolola nge katweshi nakwononoka Kalungako. Mwomwo Yehova atulweza tulihende kuli vaka-kusosoloka kulufwelelo mujijila josena.
Lihendenu kukushimutwila navaka-kusosoloka kulufwelelo (Talenu palangalafu 10)
11. Vyuma muka vinahase kuneha “vihula vyauleya,” kaha vakulwane muchikungulwilo vanahase kusolola ngachilihi chakutalilaho chamwaza?
11 Kuli vyuma vikwavo nawa vize vinahase kulingisa vatu vahone kupwa vakuunda muchikungulwilo. Chakutalilaho, vandumbwetu vanahase kupwa navishinganyeka vyakulihandununa kutalisa kukuhemahema chize vatela kulinga vaka-Kulishitu. Nge natufwila kushinyinyika vakwetu vakavangize vishinganyeka vyetu, kaha chinahase kutulingisa tuputuke kulipula jipami havihula “vyauleya, vyamokomoko.” Nyi ngachilihi nge ndumbwetu muchikungulwilo ali nakukundwiza kuhemahema chize chalimbalaka najishimbi jaKalunga? Vakulwane muchikungulwilo kavatela kwitavila vilinga vyandumbwetu kanako, kavatela kulinga ngocho mwomwo yakusaka kuhonesa jipamiko. (Samu 11:5) Vakulwane vatela kuzangama kuchina navahuhumuna vakwavo kuzachisa vishinganyeka vyavo vize kavyazama muMbimbiliyako. Oloze vatela kukavangiza mazu akuhuhumuna atwama muMbimbiliya ngwawo: “Fungenunga utanga waKalunga uze vamihana kulama, . . . keshi nakulilingisa kupwa muvakaka javava vanapu uswana waKalungako, oloze pwenunga muvakutalilaho kuutanga.”—Petu. 1, 5:2, 3; tangenu Wavaka-Kolinde 2, 1:24.
12, 13. (a) Uno Vinjiho jaYehova veji kusakulanga ngachilihi vyakuhemahema, kaha jindongi muka jamuMbimbiliya veji kukavangizanga? (b) Uno jindongi tunashimutwila mupalangalafu 12 jinahase kutukafwa ngachilihi muvyuma tweji kusakulanga kulinga?
12 Liuka lyetu kalyatusakwila mivwimbimbi, namikanda chipwe myaso twatela kulihendako. Mwomwo ika? Mwomwo Mbimbiliya yakolezeza mutu himutu anangule ‘uhashi wenyi mangana ahandunune kwoloka nakuhenga.’ (Hepeleu 5:14) Tunahase kuzachisa jindongi jamuMbimbiliya jize najitukafwa tusakule kanawa vyakuhemahema. Vyuma vyosena natusakula kulinga mukuyoya chetu, vyatela kupendamina hakufwila ‘kutwalaho lika kukekesanga tumone vyuma vize etavila Mwata.’ (Efwe. 5:10) Mbimbiliya yanangula nawa ngwayo, mitwe yajitanga vakwechi wata, ngocho vanahase kukanyisa kuhema chimwe mutanga yavo.—Koli. 1, 11:3.
13 Jindongi jamuMbimbiliya tunavuluka jinahase kutukafwa tusakule kanawa vyakulinga muvyuma vikwavo nawa. Chakutalilaho, vatu vatwama navishinganyeka vyakulisezaseza kutalisa kukuvwala nakulilenga, kukuliwahisa kumujimba, vyakulya navyuma vyeka vize asaka mutu ivene. Vatu vamwe vanahase kushinyinyika vakwavo vakavangize vishinganyeka vyavo kutalisa kuvyuma twavuluka. Kulinga ngocho chinahase kunena jipami. Nge vyuma kana kavyalimbalakile najindongi jamuMbimbiliyako, kaha katwatela kulipula jipami navakwetu vaka-Kulishitu havyuma vize vatela kulingako. Mwomwo Mbimbiliya yamba ngwayo: “Ndungo yaMwata katela kuzungako, oloze atela kupwa wamuvwovu kuli vosena.”—Chimo. 2, 2:24.
KANDA KULIKATA NAVATU VAVAPIKO
14. Chakutalilaho muka ahanjikile Paulu chize nachitukafwa tuhone kulikata navatu vavapi?
14 Mujila muka yikwavo tunahase ‘kuseza vilinga vyakuhenga’? Jila kana shina kuhona kulikata navatu vavapi. Chakutalilaho muka ahanjikile Paulu chize nachitukafwa tulihende kuvatu vavapi? Omu akumishile kuhanjika ‘vyachihela chakukola chaKalunga,’ asonekele nawa ngwenyi, “muzuvo yayinene kamwatwama vyuma vyaulu nevi vyapalata kahako, oloze muli navyevi vyavitondo navyevi vyauma, kaha vimwe vyamulimo waulemu, vyeka nawa vyamulimo wakuhona ulemu.” (Chimo. 2, 2:20, 21) Shikaho, Paulu apwile nakukolezeza vaka-Kulishitu ‘valihende kuvyuma vyamulimo wakuhona ulemu.’
15, 16. Vyuma muka natulinangula kuchakutalilaho ‘chazuvo yayinene’?
15 Chakutalilaho chaPaulu chalumbununa ika? “Zuvo yayinene” vayifwanyisa kuchikungulwilo chavaka-Kulishitu, kaha “vyuma” vyamuzuvo vavifwanyisa kumutu himutu atwama muchikungulwilo. Vyuma vimwe vyamuzuvo vinahase kuneha ponde nge navipwa namajilo. Nge mwenya-zuvo namono ngwenyi vyuma vimwe vili namajilo, kaha atela kuvihandununa kuvyuma vize kavyeshi namajiloko, vyakufwana nge vize veji kuzachisanga hakuteleka vyakulya.
16 Omu mukiko chapwa nakuli vangamba jaYehova. Hakusaka tupwenga vatoma muvyuma vyosena vize natulinga mukuyoya, twatela kulihenda kuvatu vamuchikungulwilo vaze navatwalaho lika kuhona kwononoka jishimbi jaYehova. (Tangenu Wavaka-Kolinde 1, 15:33.) Nge natuhona kulikata navatu vavapi vali muchikungulwilo, kaha twatela nawa kulihenda kuvatu vavapi vakukaye. Mwomwo vatu vavavulu vakukaye vapwa ‘vaka-kuzanga jimbongo, vaka-kulikanga kuli visemi javo, vaka-kuhona kulyononona, vaka-kuvangila vakwavo, vaka-ukenya, vaka-kuzeneka kuzanga kuwaha, vaka-kusolola vakwavo, vaka-kuzanga viseke muchishishisa chakupwa vaka-kuzanga Kalunga.’—Chimo. 2, 3:1-5.
YEHOVA EJI KUKISULANGA KULYONONONA CHETU
17. Vyuma muka valingile vaIsalele vakulyononona hakuhunga vilinga vyakuhenga?
17 Mbimbiliya yavuluka vyuma valingile vaIsalele omu Yehova avalwezele ngwenyi, “ehukenu okwo vatwama vaKola naNdatane naAvilame jingulwishi.” Mbimbiliya ngwayo, “ngocho vehukile [hahaze vene vafumine, NW].” (Kula. 16:24, 27) Kavalangishile kusosoloka kuli vaka-kulikangako. Oloze “vehukile kuze vatwamine [vafumine kumitamba yosena, NW].” Vangamba jaKalunga vakulyononona vakavangijile vyuma avalwezele Yehova namuchima wavo wosena. Vasolwele hatoma nge vapwile nakukundwiza Yehova nakuhunga vilinga vyakuhenga. Vyuma muka natulinangula kuchakutalilaho kana?
18. Paulu atalishile mulihi omu alwezele Chimoteu ngwenyi, “china kufwila chize cheji kwizanga haukweze”?
18 Usoko wetu naYehova wapwa waulemu chikuma. Ngocho, twatela kulinga vyuma hahaze vene navatulweza mangana tukinge usoko wetu naYehova. Omu mukiko Paulu atalishile hakulweza Chimoteu ngwenyi, “china kufwila chize cheji kwizanga haukweze.” (Chimo. 2, 2:22) Halwola kana luze, Chimoteu atela apwile namyaka yakuhambakana 30. Chipwe ngocho, namutu uze nakolo nahase kufwila chuma chauleya “chize cheji kwizanga haukweze.” Chimoteu atelelele ‘kuchina’ vyuma kana nge apwile namuchima wakuvifwila. Atelelele ‘kuseza vilinga vyakuhenga.’ Omu mukiko ahanjikile naYesu, ngwenyi: “Kachi nge liso lyove lili nakukuhukanyisa, litombongonyemo nakulimbila.” (Mateu 18:9) Navaka-Kulishitu makumbi ano, vatela kukavangiza mazu kana awa akuhuhumuna mangana vakinge usoko wavo naYehova. Vatela kukavangiza vyuma kana hahaze vene chakuzeneka kulangisa numba vakinge usoko wavo naKalunga.
19. Uno vaka-Kulishitu vamwe vanakingi ngachilihi usoko wavo naYehova?
19 Uno vaka-Kulishitu vamwe vanakingi ngachilihi usoko wavo naYehova? Vandumbwetu vamwe vaze vapwile naukalu wakupenda vanalitwamina jino kunwa wala. Kaha veka vaze vatwama namuchima wakuhehela vanalitwamina kuhemahema chize chinahase kulingisa mutu afwile vyuma vyavipi. (Samu 101:3) Chakutalilaho, shimbu kanda ndumbwetu umwe apwenga Chinjiho, alivwishilenga kuwaha kuya kuvilika vyakukinakina kuze vatu vapwile nakusolola vilinga vyauvumbi. Oloze omu alinangwile muchano, alitwaminyinyine kukina chosena numba vene havilika vyaVinjiho. Kasaka kushinganyeka cheka vyuma vyavipi chipwe kuvifwilako. Echi kachalumbununa nge vaka-Kulishitu vosena vatela kulitwamina kunwa wala, kukina chipwe kulinga vyuma vyeka vize kavyalimbalaka najishimbi jamuMbimbiliyako. Oloze tuvosena twatela kupwa vakuvanguluka nakukinga usoko wetu naYehova.
20. Chuma muka cheji kutulingisanga tuwahilile numba tuhu kachapwa chachashi ‘kuseza vilinga vyakuhengako’?
20 Chapwa hikutokwa kutuvuluka ngwavo Vinjiho jaYehova. Kutokwa kana chasakiwa kulinga vyuma vimwe. Vyuma kana shina ‘kuseza vilinga vyakuhenga’ ‘nakusosoloka kukupihya.’ (Samu 34:14) Kachapwa chachashi kulinga vyuma kana lwola lwosenako. Oloze tweji kwivwanga kuwaha hakutachikiza ngwetu lwola lwosena Yehova mwazanga “vaze vanapu venyi,” navaze veji kumwononokanga.—Chimo. 2, 2:19; tangenu WaChimoteu 2, 2:19a.