LIZU vavuluka ngwavo “Eureka” lyalumbununa “ngunachiwane.” Mulikulukaji lyamyaka lyakusokesa 19, mulifuchi lyaCalifornia, U.S.A., vawanyinemo mungochi waulu. Mujimbu kana watanjile, ngocho vatu vavavulu vayile kulifuchi kana nakutonda ulu. Oloze ndumbwetu Charles Taze Russell navakwavo Vaka-Kulinangula Mbimbiliya vawanyine chuma chachilemu chikuma kuhambakana ulu. Chuma kana shina muchano wamuMbimbiliya. Ngocho, vafwililile kutandakanyisa muchano kana mangana vatu vautachikize.

Kusongo yamwaka wa 1914, vatu vavavulu mujinganda jajinene valikungulwilenga mumazavu nakutala vindiyo yachimweso chakwamba ngwavo “Photo-Drama of Creation,” chize chambachilenga jola 8 numba chikume. Echi chimweso vachitungile kuliuka lyetu lyaInternational Bible Students Association (I.B.S.A.). Chimweso kana chapwile namivwimbimbi yamwaza yize yapwile nakusoloka kanawa, navihande vyamwaza, namyaso yamwaza. Echi chimweso chahanjika haMbimbiliya chasolwele omu Kalunga atengele vyuma, nomu atengele vatu vakulivanga, swi nakuChiyulo chaYesu Kulishitu chaMyaka Likombakaji.—Kuso. 20:4. *

Nyi ngachilihi vatu vakuwahilila vaze vapwile nakutwama mujimbaka jajindende nakujingalila jakumembo, vaze kavatachikijile muchanoko? Vatu kana vatelele navakiko kuvambulwila. Ngocho, muAugust 1914, liuka lyetu lyaInternational Bible Students Association, lyalowele “Eureka Drama.” Chimweso kana chapwile navihanda vyakuhona kusolola mivwimbimbi yize vambachile muchimweso chakwamba ngwavo “Photo-Drama.” Echi chimweso chapwile muvihanda vitatu, vihanda vyosena vyapwile mumalimi amavulu aze nahase kusakula mutu lyavene. Chihanda chachimweso chimwe vachivulukile ngwavo “Eureka X” chize chapwile kaha navihande vyakukopa namyaso. Chihanda chamuchivali chapwile “Eureka Y,” chize chapwile navihande vyakukopa namivwimbimbi yamwaza. Kaha chihanda chamuchitatu vachivulukile ngwavo “Eureka Family Drama,” chize chapwile navihande vimwe namyaso yimwe yize vasakwile. Chimweso kana chapwile chakukafwa vaze vatwama najitanga. Vatu valanjilenga visaji namakina akutalisa mivwimbimbi kana kuhichila muliuka lyaInternational Bible Students Association handando yayindende.

Muchishishisa chakumbata likina lyakutalisa mivwimbimbi chipwe chisaji chachinene chakutalisa mivwimbimbi, Vaka-Kulinangula Mbimbiliya vambachilenga kaha vihanda vyachimweso omu vayilenga nakutandakanyisa mujimbu waWangana kujingalila jize japwilenga kwakusuka nambaka. Vembishilenga chimweso chakwivwilila kaha, chize chapwile “Eureka X,” ufuku chipwe musana. Chihanda chachimweso chakwamba ngwavo “Eureka Y” chize chapwile nakusolola mivwimbimbi, vachitalishilenga kuvatu kuzachisa carbide lamp nge kakahya kakezi kauchi. Mujimbu uze vasonekele muFinnish kuliuka lyetu lyaWatch Tower wambile ngwawo, “Tunahase kutalisa mivwimbimbi kana kala kweshoko kuli vatu.” Mujimbu kana wamwaza chiyovo!

 Muchishishisa chakufwetela jizuvo jajinene jakuhemena mangana tutalishilemo vimweso kana, Vaka-Kulinangula Mbimbiliya vaze vapwile naluheto, vazachishilenga jizuvo chakuzeneka kufweta jakufwana nge, jishikola, jizuvo jakusopela milonga, vitulilo vyanjanji najizuvo jajinene jakulihizumwina vangeji. Kakavulu vatalishilenga vimweso kana haweluka, kuzachisa lihina lyalinene litoma lize vahakile hambango yazuvo yakulamina jimbuto. Anthony Hambuch asonekele ngwenyi: “Vanjimi vawahishilenga vihela haweluka kumande avo nakuhakamo mitondo mangana vatu vatwameho, nakulivwisa kuwaha kutala vimweso kana.” Ava vandumbwetu vazachishilenga “litemba lyatuvalu” muze vambachililenga viteli vyavo vyosena kuhakilako navyuma vyakukazachisa hakuteleka vyakulya.

Vatu vaze vatalilenga chimweso ‘chaEureka’ vavulilenga chikokichikoki. Mulifuchi lyaUnited States, vatu vakuheta ku 400 vayile nakutala chimweso chaEureka’ mushikola yize yapwilile mumbaka muze mwapwile vatu vakuheta kaha ku 150. Kujingalila jikwavo, vatu vatambukilenga tunda yakuheta kujikilomita 8 kuya nakutala chimweso kana. Mulifuchi lyaSweden, vatu vaze valihata nandumbwetu Charlotte Ahlberg vaze vejile nakutala chimweso kana muzuvo yenyi yayindende, “vevwile kuwaha chikuma” omu vevwililile kuvihande vyakukopa. Kaha nawa vatu vakuheta ku 1,500 vatambukile tunda yayisuku kuya nakutala chimweso kana kumungochi uze wapwilile mulifuchi lyaAustralia. Liuka lyaWatch Tower lyahanjikile nge hajishikola jajinene nahajishikola jakulinangwila, “milongeshi navaka-shikola vavavulu vapwile namivwimbimbi navisaji vyakwivwilila kuvihande vyetu vyakukopa.” Chimweso ‘chaEureka Drama’ vachitachikijile chikuma kuvatu namujizuvo muze vapwilenga nakutalishila mivwimbimbi.

Mazavu chipwe vikungulwilo vyaVaka-Kulinangula Mbimbiliya vyatuminenga vaka-kuhanjika vihande kuya kujingalila jakulisezaseza mangana vakatunge mazavu amahya hakuhanjika vihande vyaMbimbiliya nakutalisa chimweso ‘chaEureka.’ Katwatachikiza kanawa vatu vangahi vatalile chimweso ‘chaEurekako.” Oloze vihanda ‘vyaChimweso’ kana vapwilenga nakuvizachisa lwola lwosena. Kuheta mumwaka wa 1915, vandumbwetu vakuheta kaha ku 14 hali vosena 86, vakiko kaha vahanyinenga lwola lwosena lipoti ‘lyaChimweso’ kana. Oloze kuheta kusonga yamwaka kana, vatu vakuhambakana ku 1 miliyoni vatalile “Chimweso” chaEureka. Vatu vakuheta ku 30,000 vaze vatalile chimweso kana valombele mikanda yahanjika haMbimbiliya.

Numba tuhu vatu vavavulu kavatalile chimweso ‘chaEureka’ mukuyoya chavoko, oloze vatu vavavulu mumafuchi akufwana nge Australia, Argentina, South Africa, Great Britain namatungu amandende atwamako, Ireland namatungu amandende atwamako, India, nalifuchi lyaCaribbean, atela vatalile chimweso kanechi chamwaza. Hakachi kavatu vaze vatalile chimweso kana mumafuchi kana awa, vavavulu vawanyine muchano wamuMbimbiliya uze wapwile waulemu kuhambakana ulu, nakwamba ngwavo “Eureka!” kulumbununa tunauwane.