Ivwililenunga Lizu lyaYehova Kala Kweshoko Muli
“Matwitwi enu nawakevwa lizu munyima yenu lyakwamba ngwalyo, Eyi yeyi jila.’”—ISA. 30:21.
1, 2. Uno Yehova eji kutwaminyinanga ngachilihi vangamba jenyi?
KUFUMA vene kunyima, Yehova eji kutwaminyinanga vatu jenyi mujijila jakulisezaseza. Kunyima Kalunga azachishilenga vangelo, vimweso navilota mangana alweze vatu jenyi vyuma navikasoloka kulutwe, nakuvahana nawa milimo yize vatela kuzata. (Kula. 7:89; Ezeke. 1:1; Ndanye. 2:19) Shimbu jimwe Kalunga asakwile vatu vamwimanyineko nakuhana jindongi kuli vatu jenyi. Numba tuhu vatu jaYehova vatambwilenga jindongi, oloze vaze vajikavangijilenga vakiko kaha vakiswile kuli Yehova.
2 Makumbi ano, Yehova eji kutwaminyinanga vatu jenyi kuhichila muMbimbiliya, nashipilitu yenyi yajila, nachikungulwilo chenyi. (Vili. 9:31; 15:28; Chimo. 2, 3:16, 17) Jindongi tweji kutambulanga kuli ikiye japwa jajashi kwivwishisa kwijiva nge ‘matwitwi etu ali nakwivwa lizu munyima yetu ngwalyo: “Eyi yeyi jila, tambukenungamo.”’ (Isa. 30:21) Yehova eji kuzachisanga nawa Yesu mangana atulweze lizu lyaYehova. Atongola Yesu mangana atwaminyine chikungulwilo kuhichila muli “ndungo wakushishika wakuzangama.” (Mateu 24:45) Twatela kwitavila Yehova atutwaminyine hakuzachisa jila kaneyi, mwomwo kuyoya haya myaka yosena chapendamina hakwononoka kuli ikiye.—Hepe. 5:9.
3. Vyuma muka vinahase kutuhonesa kwivwilila kulizu lyaYehova? (Talenu muvwimbimbi wakulivanga.)
3 Satana atachikiza ngwenyi nge vatu navetavila Yehova avatwaminyine, kaha navakayoya, ngocho eji kufwilanga kutuhungumwisa mangana tuhone kwivwilila kulizu lyaYehova. Kaha nawa ‘muchima wetu wakutangisa’ unahase kutulingisanga tuhone kukavangiza jindongi jaYehova. (Yele. 17:9) Shikaho, muchihande chino, natushimutwila omu tunahase kuhonesa Satana namuchima wakutangisa mangana twivwilile kanawa lizu lyaKalunga. Kaha nawa natushimutwila omu kulombanga kuli Yehova chinahase kutukafwa tukinge usoko wetu naikiye numba tuhu tuli muukalu.
KUHONESA TUFUTA TWASATANA
4. Uno Satana eji kuhungumwisanga ngachilihi vishinganyeka vyavatu?
4 Satana afwila kuhungumwisa vishinganyeka vyavatu hakuzachisa mijimbu yamakuli. (Tangenu WaYowano 1, 5:19.) Eji kuzachisanga nawa mapapilo amijimbu, mikanda, jiwayilesi, chisaji chamivwimbimbi naInternet mangana atandakanyise mijimbu yamakuli. Numba tuhu vinoma kana vinahase kukafwa vatu, oloze vyeji kukundwizanga vilinga vyavipi vize vyalimbalaka najishimbi jaYehova. (Yele. 2:13) Chakutalilaho, mijimbu navyakuhemahema vyeji kukundwizanga kulimbata chavatu vausonyi umwe, ngocho vatu vavavulu veji kushinganyekanga ngwavo Mbimbiliya kayakanyisa kulimona chavatu vausonyi umweko.—Koli. 1, 6:9, 10.
5. Tunahase kulihenda ngachilihi kumijimbu yamakuli yaSatana?
5 Vatu vaze vazanga Kalunga vahase kulihenda ngachilihi kumijimbu yamakuli yize eji kukundwizanga Satana? Vatu kana vanahase ngachilihi kutachikiza vyuma vyakwoloka nevi vyakuhenga? Chuma chinahase kuvakafwa shina ‘kulilamanga nge kutesa naMazu aKalunga.’(Samu 119:9) Mazu aKalunga atukafwa tutachikize mijimbu yamuchano neyi yamakuli. (Vishi. 23:23) Yesu azachishile Visoneka hakwamba ngwenyi ‘mutu atela kuyoyela hamazu osena akulovoka mukanwa kaYehova.’ (Mateu 4:4) Twatela kukavangizanga jishimbi jamuMbimbiliya mukuyoya chetu. Chakutalilaho, shimbu kanda Mose vamuhwiminyine kuli Kalunga asoneke lushimbi lwakukanyisa ujila, Yosefwe atachikijile ngwenyi ujila wapwa shili. Kasakile kulikanga kuli Yehova omu pwevo lyaPotefwale asakile kumuhungumwisa avulumune shiliko. (Tangenu Kuputuka 39:7-9.) Numba tuhu amushinjilile halwola lwalusuku, oloze Yosefwe evwilile lizu lyaYehova, keshi lizu lyapwevo lyaPotefwaleko. Makumbi ano twatela kwivwililanga lizu lyaYehova, keshi nge kumijimbu yamakuli yaSatanako.
6, 7. Vyuma muka twatela kulinga mangana tulihende kutufuta twaSatana?
6 Kano kaye kanazale namijimbu yakwitava chamakuli, kahechi chinalingisa vatu vavavulu vashinganyeke ngwavo kaveshi kuhasa kuwana kwitava chamuchanoko. Oloze nge natukavangiza vyuma mwatulweza Yehova, kaha nachitulingisa tutachikize muchano. Twatela kusakula mutu natwivwilila. Chapwa chachikalu kwivwilila kuvatu vavali vaze vali nakuhanjika halwola lwolumwe. Ngana muze mikoko veji kutachikizanga lizu lyakafunga kavo, nayetu twatela kutachikiza lizu lyaYesu uze vatongola kuli Yehova kupwa kafunga ketu.—Tangenu Yowano 10:3-5.
7 Yesu ambile ngwenyi: “Hakenu muchima kuvyuma muli nakwivwa.” (Mako 4:24) Mazu aYehova ahanjika hatoma kaha nawa akwoloka, twatela kuwevwililanga kanawa hakukavangiza vyuma nawahanjika. Nge katwazangamineko, kaha tunahase kukavangiza tufuta twaSatana muchishishisa chakwivwilila mazu aKalunga. Katwatela kwivwililanga kumyaso yayipi, jivindiyo jajipi, mivwimbimbi yayipi yahavisaji, masepa vavapi mangana vituhungumwiseko.—Kolo. 2:8.
8. (a) Tunahase kupwa ngachilihi navilinga vyaSatana vyashili? (b) Vyuma muka vinahase kusoloka kuli etu nge natuhumbula vyuma vyavipi?
8 Satana atachikiza ngwenyi twapwa tuvaka-shili, ngachize afwila kutulingisa tufwile vilinga vyashili. Satana afwila tulinge shili mangana tuhone kulama kulonga chetu. (Yowa. 8:44-47) Tunahase kuhonesa ngachilihi ukalu kanou? Achitalenu mutu uze mwandupukila muviseke vize navimulingisa jino aputuke kulinga vyuma vyavipi vize ahoneselenga hakavanga. (Loma 7:15) Vyuma muka vinahase kumulingisa alinge vyuma kana? Mutu kana pamo aputukile kuhonanga kwivwilila kulizu lyaYehova. Ahonenenga kutachikiza vyuma vyavipi vyapwile nakusoloka mumuchima wenyi chipwe avihumbwilenga. Chakutalilaho, pamo aputukile kuhonanga kulomba, kuhona kuyanga mumulimo wamuwande chipwe kuhona kuyanga nakukunguluka. Kaha kutwala muze aputukile kukavangiza vishinganyeka kana nakuputuka kulinga vyuma vyakuhenga. Tunahase kuhonesa ukalu kanou nge natupwanga vakutona nakuzachila haukalu kana hahaze vene. Nge natwivwilila kulizu lyaYehova, kaha kaveshi kuhasa kutuhungumwisa kuli vaka-kusosoloka kulufweleloko.—Vishi. 11:9.
9. Mwomwo ika chapwila chachilemu kulivanga kutachikiza washi ukalu?
9 Nge mutu ali nakuviza chikuma, kaha cheji kupwanga chachashi kumuka nge mwalivanga kutachikiza musongo ali nakuviza. Chochimwe, nge natutachikiza washi muchima waupi tuli nawo, kaha twatela washi kuzachilaho shimbu kanda “vatwoze kuli [Satana] tuvavatonyi mangana tulingenga mwaya muchima wenyi.” (Chimo. 2, 2:26) Vyuma muka twatela kulinga nge tunamono ngwetu tunaputuka kupwa navishinganyeka vyavipi vize navitusosolola kuli Yehova? Chakuhona kulangisa, twatela kukinduluka kuli ikiye nakwitavila vyuma navatukafwa, nakwivwilila vyuma kana namuchima wetu wosena. (Isa. 44:22) Twatela kutachikiza ngwetu kusakula vyuma vyavipi chinahase kutwingisa muukalu waunene uze unahase kutumwenesa makava muno mukaye. Chapwa chamwaza kuhonesa washi ukalu uze nautulingisa tuseze Yehova.
Uno kuzatanga milimo yakushipilitu nachitukafwa ngachilihi tulihende kutufuta twaSatana? (Talenu palangalafu 4-9)
KANENUNGA MUCHIMA WAKULIVWIMBA NALWISO
10, 11. (a) Muchima wakulivwimba weji kulingisanga mutu alinge vyuma muka? (b) Vyuma muka natulinangula kumujimbu waKola, Ndatane, naAvilame?
10 Twatela kutachikiza ngwetu muchima wetu unahase kutupyapumuna. Chakutalilaho, tunahase kupwa namuchima wakulivwimba nalwiso. Muchima kanou unahase kutulingisa tulinge vyuma vyavipi. Mutu wakulivwimba asaka kulitohwesa livene. Nahase kushinganyeka ngwenyi naumwe wauchi nahase kumulweza vyuma vyakulinga vakufwana nge vakwavo vaka-Kulishitu, vakulwane vachikungulwilo, naliuka lyaYehova. Mutu wangana amona lizu lyaYehova kupwa lyamokomoko.
11 Yehova atongwele Mose naAlone vatwaminyine vaIsalele mupambo. Oloze Kola, Ndatane naAvilame valikangile kuli Mose naAlone. Muchima wakulivwimba wavalingishile valemese Kalunga mujila yize vasakile. Uno Yehova alingile vyuma muka? Avanongesele. (Kula. 26:8-10) Vyuma muka natulinangula kumujimbu kanou? Kulikanga kuli Yehova nachitwingisa muukalu. Twatela kutachikiza ngwetu “kulivwimba cheji kutwaminyinanga kunonga.”—Vishi. 16:18, Isa. 13:11.
12, 13. (a) Hanjikenu chakutalilaho chize chasolola omu lwiso lunahase kutwingisa muukalu. (b) Lumbununenu omu lwiso lunahase kutohwa nge namulwechelela.
12 Lwiso lwapwa lwalupi. Mutu walwiso eji kushinganyeka ngwenyi jishimbi jaYehova kajeshi kumukafwako. Namane mukulwane wamaswalale wavaSulya vamukile mbumba kuli kapolofweto kaKalunga. Ngachize, Namane awahilile chikuma nakuhana Elisha jimbongo nachakuvwala, oloze avikanyine. Kaha Elisha apwile nangamba jenyi Ngehaze uze asakile wana kana. Ngehaze evwile lwiso, ngocho chakuhona kulweza Elisha, alahilile Namane nakumwonga mangana amuhane uze wana. Uno vyuma muka vyasolokele kuli mutu walwiso Ngehaze? Mbumba yamukwachile.—Vamya. 2, 5:20-27.
13 Lwiso lweji kuputukanga chindende chindende, nge natulwechelela, kaha nalutohwa chikuma. Mbimbiliya yasolola muchima waAkane walwiso. Akane ambile ngwenyi: “Omu ngwamonanga kuvyuma vyakupukula kwapwanga chikuto chamwaza chakuMbavilone najishekele japalata makulukaji avali nachihanda chaulu chapezo yajishekele makumi atanu, ngwavivwilanga lwiso, ngwavimbatanga.” Muchishishisa chakulihenda kuvishinganyeka kana, evwile lwiso nakwiva vyuma kana nakuvisweka mumbalaka yenyi. Omu mulonga waAkane wasolokele hatoma, Yoshuwa amulwezele ngwenyi Yehova mwamuzangamisa. Ngachize, Akane natanga yenyi vavashile malolwa nakufwa halikumbi vene lize. (Yoshu. 7:11, 21, 24, 25) Nayetu tunahase kupwa namuchima walwiso ngana mwaAkane. Ngocho, twatela ‘kulilamanga kuchipululu.’ (Luka 12:15) Numba tuhu lwola lumwe tunahase kupwa navishinganyeka vyavipi, oloze katwatela kwechelela vishinganyeka kana vitohwe nakutulingisa tuvulumuna shiliko.—Tangenu WaYakova 1:14, 15.
14. Vyuma muka twatela kulinga nge tunamono ngwetu tunaputuka kusolola muchima wakulivwimba nalwiso?
14 Kulivwimba nalwiso vinahase kutwingisa muukalu. Kushinganyeka haukalu weji kwizanga hakulinga vyuma vyavipi nachitukafwa tutwaleho lika kwivwilila kulizu lyaYehova. (Lushi. 32:29) MuMbimbiliya, Yehova atulweza nganyo yatwama hakulinga vyuma vyamwaza naukalu weji kwizanga hakulinga vyuma vyavipi. Nge muchima wetu nautuzondola tulinge vyuma vyavipi mwomwo yakulivwimba chipwe lwiso, kaha twatela kuzachilaho washi kuchina natwenyeka zangi yetu navakwetu nakwenyeka usoko wetu naYehova.
LOMBENUNGA CHIKUMA KULI YEHOVA
15. Vyuma muka natulinangula kuchakutalilaho chaYesu kutalisa kukulomba?
15 Yehova asaka tupwenga nachiyoyelo chamwaza. (Samu 1:1-3) Lwola lwosena eji kutuhananga jindongi jize twatela kukavangiza. (Tangenu WavaHepeleu 4:16.) Numba tuhu Yesu apwile wakukupuka mwosena oloze lwola lwosena alombelenga kuli Ise. Kaha Yehova amukafwilenga nakumutwaminyina muvyuma vyosena alingilenga. Yehova atumine navangelo kwiza nakukafwa mwanenyi, nakumuhana nawa shipilitu yajila yize yamukafwile kusakula vaposetolo 12. Kaha nawa lizu lyaYehova lyevwakanyine kufuma mwilu nakusolola nge evwilile kuwaha mwanenyi. (Mateu 3:17; 17:5; Mako 1:12, 13; Luka 6:12, 13; Yowa. 12:28) Ngana mwaYesu, nayetu nawa twatela kulombanga kuli Kalunga. (Samu 62:7, 8; Hepe. 5:7) Kulombanga kuli Yehova nachitukafwa tutwaleho lika kupandama kuli ikiye nakutwama mujila yize nayimwivwisa kuwaha.
16. Uno Yehova eji kutukafwanga ngachilihi mangana twivwilile kulizu lyenyi?
16 Numba tuhu Yehova eji kutuhuhumunanga, oloze keshi kutushinjila mangana tukavangize vyuma mwatulwezako. Nge natulombanga shipilitu yenyi yajila yitutwaminyinenga, kaha mwatuhanayo. (Tangenu Luka 11:10-13.) Mbimbiliya yahanjika ngwayo: “Hakenu muchima kukwivwilila chenu.” (Luka 8:18) Chakutalilaho, nge natulomba Yehova atukafwe tulihende kuujila, oloze nge natutwalaho lika kutala chipwe kutanga mivwimbimbi yauselesele chipwe kutalanga mivwimbimbi yauvumbi, kaha nachisolola nge katweshi nakusaka Yehova atukafweko. Hakusaka Yehova atukafwe, twatela kupwanga kuvihela kuze kuli shipilitu yaYehova, kwakufwana nge kukukunguluka chavaka-Kulishitu. Vangamba jaYehova vavavulu vanahonesanga ukalu kanou hakwivwililanga kuli Yehova nge vali kukukunguluka. Echi chinavakafwe vahonese vishinganyeka vyavipi vize veji kushinganyekanga.—Samu 73:12-17; 143:10.
TWALENUHO LIKA KWIVWILILANGA KULIZU LYAYEHOVA
17. Mwomwo ika chapwila chaponde kupendamina hamangana etu?
17 Tutalenu vyuma natulinangula kuchakutalilaho chaMwangana Ndavichi. Ndavichi alingilenga vyuma vyakukomwesa omu apendaminyinenga hali Yehova. Omu apwile kanyike, ajihile chindume Ngolyate uze apwile kaFwilishite. Apwile nawa liswalale, kufumaho apwile mwangana. Mulimo wenyi wapwile wakukinga nakulweza vaIsalele vyakulinga. Oloze omu Ndavichi apendaminyine hakunangakana chenyi, muchima wenyi wamwongele, nakuvulumuna shili yayinene hakulinga ujila naMbate-sheva nakulingisa lunga lyenyi Uliya vamujihe kujita. Oloze omu Yehova amuhuhumwine, Ndavichi etavilile mulonga wenyi nakupwa cheka nausoko wamwaza naYehova.—Samu 51:4, 6, 10, 11.
18. Vyuma muka vinahase kutukafwa tutwaleho lika kwivwililanga kulizu lyaYehova?
18 Hamukanda Wavaka-Kolinde 1, 10:12, watunangula nge chapwa chaponde kulifwelela etu vavene. Mbimbiliya yahanjika hatoma ngwayo katweshi kuhasa kulitwaminyina etu vaveneko. Shikaho vanahase kututwaminyina kulizu lyaYehova chipwe kulizu lyaSatana. (Yele. 10:23) Ngachize, tutwalenuho lika kulombanga kuli Yehova, nakwitavila shipilitu yajila yitutwaminyine, nakwivwililanga lwola lwosena kulizu lyaYehova.