PETULU alilile hakukana Yesu uze ejivile. Numba tuhu ou kaposetolo apwile nakuchiwana kupwa chachikalu kuzama kushipilitu, oloze Yesu amuzachishile mangana akolezeze vakwavo. Amulwezele ngwenyi: “Omu naukalinga hiunalumuka cheka, kazamikise vandumbwove.” (Luka 22:32, 54-62) Kutwala muze Petulu apwile panda muchikungulwilo chavaka-Kulishitu mulikulukaji lyamyaka lyakulivanga. (Ngale. 2:9) Chochimwe nawa ndumbwetu uze vafumishile haukulwane nahase kuzata cheka ukulwane nakwivwa kuwaha omu mwakolezeza vandumbwenyi kushipilitu.

Vandumbwetu vamwe vaze vafumishile haukulwane veji kwivwinga nge kavatamo kuzata mwavakulwaneko. Julio, * uze azachile mwamukulwane mulifuchi lyaBolivia mulitungu lyaSouth America hamyaka yakuhambakana 20, ambile ngwenyi: “Kuwahisanga vihande nakutambukilanga vandumbwami nakufunga utanga yapwile milimo yize ngwapwile nakuzatanga mukuyoya chami. Oloze omu vangufumishile haukulwane milimo yosena yakumine. Echi changulingishile nguhombe.” Oloze makumbi ano, Julio ali cheka nakuzata mwamukulwane muchikungulwilo.

Kambaji Yakova asonekele ngwenyi: “Enu vandumbwami, wahililenu omu namumona vyeseko vyakulisezaseza.” (Yako. 1:2) Yakova apwile nakuvuluka vyeseko vize vyeji kwizanga mwomwo yaluyanjisa nakuhona kukupuka mwosena. Avulukile nawa vyeseko vyakufwana nge kufwila chamumuchima wamutu ivene, nakumona vatu mweka namweka navyuma vyeka nawa. (Yako. 1:14; 2:1; 4:1, 2, 11) Omwo Yehova eji kutuzangamisanga tweji kwivwinga kukola kumuchima. (Hepe. 12:11). Oloze kutuzangamisa kana kachatela kutulingisa tuhone kupwa vakuwahililako.

Nge vanatufumisa hachihela chimwe muchikungulwilo, kaha twatela kulikekesa tumone numba nge tuli nalufwelelo lwakukola nakusolola nawa nge twazanga Yehova. Twatela nawa kushinganyeka ovyo vyatulingishile tuzate mulimo kana. Kutala twasakile kulinganyalisa kaha etu vavane tahi nyi twasakile kuzata mulimo  kana mwomwo yakuzanga Kalunga, nakufwelela ngwetu chikungulwilo chapwa chaKalunga, ngocho chasakiwa kuchizakama tahi? (Vili. 20:28-30) Vandumbwetu vaze vafumishile haukulwane vaze veji kutwalangaho lika kuzachila Yehova nakashishi, veji kusolola unjiho kuli vandumbwavo vosena naSatana ngwavo vazanga Kalunga namuchima wavo wosena.

Omu mwangana Ndavichi vamuzangamishile hakulinga milonga yashili yayinene, etavilile kuzangamisa kana, ngocho vamukonekelele milonga yenyi yashili. Ndavichi embile ngwenyi: “Natokwou vanakonekela lyehi kuzomboka chenyi jishimbi, ou vanafwiki lyehi mulonga wenyi washili. Natokwa mutu ou mwakana Yehova kuvulukila kuhenga, ou azeneka kutangisa mushipilitu yenyi.” (Samu 32:1, 2) Kuzangamisa chakafwile Ndavichi, kaha apwile nakufunga kanawa vatu jaKalunga.

Kakavulu vandumbwetu vaze veji kukindulwisanga nakuzata cheka mwavakulwane, veji kuzatanga kanawa milimo yaukulwane kuhambakana namuze vapwile nakuzata kunyima. Mukulwane umwe ahanjikile ngwenyi: “Oholili ngunatachikiza kanawa mwakuzakamina vandumbwami vaze veji kupihisanga.” Mukulwane mukwavo ahanjikile ngwenyi: “Oholili ngwamona mulimo wakuzachila vandumbwami kupwa waulemu chikuma.”

Muka-kwimba jisamu asonekele ngwenyi: “[Yehova] keshi kukokojolanga makumbi osenako.” (Samu 103:9) Shikaho katwatela kushinganyeka ngwetu Yehova keshi kufwelela cheka mutu uze avulumwine shili yayineneko. Ricardo uze vatambwile ukulwane, uze azachile hamyaka yayivulu ambile ngwenyi: “Ngwevwile kupihya havyuma vize ngwapihishile. Vishinganyeka vyakulimona kupwa nge nguwamokomoko vyangulingishile nguhone cheka kukinduluka nakuzata cheka mwamukulwane. Kangwafwelelele ngwami vandumbwami navakangufwelela chekako. Oloze hakuwana nge ngwevwilenga kuwaha kukafwa vandumbwami, changukafwile ngutwaminyine vilongesa vyaMbimbiliya, nakukolezeza vandumbwami haZuvo yaWangana, nakuzata navo mumulimo wamuwande. Echi changukafwile ngufwelele ngwami ngunahase cheka kuzata mwamukulwane, kaha oholili ngunakuzata cheka mwamukulwane.”

Kulaminanga vakwetu koko chinahase kuhonesa ndumbwetu kuzata mwamukulwane muchikungulwilo. Twatela kupwa ngana mwangamba yaKalunga Ndavichi, uze  ahonene kwivwila koko Mwangana Saulu. Ndavichi kalingile sambanjingako numba tuhu awanyinenga lwola lwamwaza luze atelelele kujiha Saulu. (Samwe. 1, 24:4-7; 26:8-12) Omu Saulu afwile kujita, Ndavichi alishonene hakufwa chenyi. Ndavichi avulukile Saulu namwanenyi Yonatane kupwa vatu ‘vamwaza vaze azangile.’ (Samwe. 2, 1:21-23) Chikupu vene Ndavichi kalaminyine koko mwangana Sauluko.

Nge munamono ngwenu vamifumisanga haukulwane mwomwo yakuhona kusopa kanawa mulonga wenu chipwe kuhona kwivwishisa kanawa chihande chenu, kaha kamwatela kupwa nakoko kumuchimako. Chakutalilaho, omu ndumbwetu William wamulifuchi lyaBritain uze apwile nakuzata mwamukulwane hamyaka kafwe 30 vamufumishile haukulwane, ajinjile vakulwane vamwe. Chuma muka chamukafwile ahone kujinda vakwavo? Ambile ngwenyi: “Kutanga mukanda waYopa changukafwile chikuma. Ngana muze Yehova akafwile Yopa apwenga mukuunda namasepa jenyi vatatu, kaha nayami mwangukafwa ngutwame mukuunda navakwetu vakulwane muchikungulwilo.”—Yopa 42:7-9.

Nge mwasakile kulitwamina kufunga utanga waKalunga, kaha mwatela kushinganyeka kanawa vyuma vyamilingishile mulitwamine. Uno mwalitwaminyinyine mwomwo yaukalu wamukuyoya tahi? Kutala mwamwene vyuma vimwe kupwa vyavilemu chikuma mukuyoya chenu tahi? Kutala mwahombele mwomwo yatutenga twavakwenu tahi? Chamokomoko nakala vyuma vyamilingishile, oloze mwatela kwanuka ngwenu omu mwapwile muvakulwane mwapwile namulimo wakukafwa vandumbwenu mujijila jakulisezaseza. Vihande vyenu vyapwilenga nakuvakolezeza, chakutalilaho chenu chapwilenga nakuvakolezeza, kaha nawa kutambukila vandumbwenu nakuvakafwa chavalingishile vomike muukalu wavo. Kuzachila vandumbwenu mukashishi chevwishile Yehova kuwaha.—Vishi. 27:11.

Yehova nakafwenga vandumbwetu vavavulu vaze vafumishile haukulwane vafwile cheka kutwaminyina vikungulwilo. Nge mwalitwaminyine kuzata mwamukulwane chipwe vamifumishile haukulwane, kaha munahase cheka ‘kutesamo vyuma vyasakiwa mangana muzate cheka mulimo waulama.’ (Chimo. 1, 3:1) Paulu atwalilileho lika ‘kulombela’ vandumbwenyi vamuKolose mangana vazale nachinyingi chakwoloka chakutachikiza mwaya muchima waKalunga ‘mangana vatambukenga muze mwatela kuli Yehova nakumwivwisanga kuwaha chikuma.’ (Kolo. 1:9, 10) Nge vanamikindulwisa cheka mangana muzate mwamukulwane muchikungulwilo, kaha Pendaminenu hali Yehova amihane ngolo nakutalilila chikoki nakuwahilila. Mumakumbi ano akukuminyina vatu jaYehova vali nakusakiwa tufunga vazangi vaze navavakafwa kushipilitu. Kutala munahase kulisuula mangana mukolezeze vandumbwenu tahi?