TULI nakuyoyela mulwola lwalukalu. (Chimo. 2, 3:1-5) Tweji kumonanga vyeseko hakumbi hakumbi mwomwo yakuzanga Yehova nakufwila kuyoya kweseka najishimbi jenyi jakwoloka. Yesu atachikijile ngwenyi kulutwe nakukapwa ukalu kanou, ngocho afwelelesele vaka-kumukavangiza ngwenyi mwakavakafwanga mangana vakatwaleho lika kumika palanga nakusongo. (Mateu 24:3, 13; 28:20) Hakusaka avakafwe, atongwelele ndungo wakushishika mangana avahanenga ‘kulya halwola lwakutamo.’—Mateu 24:45, 46.

Kufuma halwola luze vatongwele ndungo wakushishika mumwaka wa 1919, nawahisanga kulya chakushipilitu mumalimi amavulu mangana alise “vakuzuvo yenyi.” (Mateu 24:14; Kuso. 22:17) Chipwe ngocho, kulya kanechi kacheshi mumalimi osenako, kaha nawa keshi nge vatu vosena vanahase kupwa namakina akusolola mikanda yetu yize yili hajw.org koko. Chakutalilaho, vatu vavavulu kaveshi kuhasa kutala jivindiyo namikanda yetu yize yatwama hajw.org koko. Uno echi chili nakulumbununa nge vandumbwetu vamwe kavatambula kulya kana mangana vapwenga vakulikangula kushipilituko tahi? Hakusaka tukumbulule chihula kana, tutalenu omu vanakumbulula vihula viwana vino.

Omu Satana esekele Yesu mangana alumune malolwa kupwa mbolo, Yesu akumbulwile ngwenyi: “Mutu katela kuyoyela hambolo kahako, oloze hamazu osena akulovoka mukanwa kaYehova.” (Mateu 4:3, 4) Mazu aYehova vawasoneka muMbimbiliya. (Petu. 2, 1:20, 21) Ngachize, Mbimbiliya yapwa chuma chachilemu chize chatwama mukulya chetu chakushipilitu.—Chimo. 2, 3:16, 17.

Liuka lyaYehova linalumuna Mbimbiliya yaNew World Translation of the Holy Scriptures yamuundu chipwe yachihanda mumalimi akuhambakana 120, kaha mwaka himwaka vali lika nakuyalumuna namumalimi akwavo. Kaha nawa mumalimi amavulu muli jiMbimbiliya jeka jamuundu chipwe jachihanda. Echi chili nakutesamo kweseka namwaya muchima waYehova hakwamba ngwenyi “vatu vosena vavalwile, ngwenyi, vapwenga nachinyingi chakwoloka chakutachikiza muchano.” (Chimo. 1, 2:3, 4) Kaha nawa hakuwana nge “kakweshi chuma chakutenga chimwe chaswamana kumeso [aYehovako],” twatela kufwelela ngwetu mwakoka vatu vosena vaze “vejiva ngwavo vasaka vyuma vyakushipilitu” vezenga kuliuka lyenyi nakuvahana kulya chakushipilitu.—Hepe. 4:13, Mateu 5:3, 6, Yowa. 6:44; 10:14.

Hakusaka mutu apwenga nalufwelelo lwakukola, atela kulinga vyuma vyavivulu, keshi kutanganga kaha Mbimbiliyako. Atela kutachikiza vyuma ali nakutanga nakukavangiza vyuma ali nakulinangula. (Yako. 1:22-25) Chilolo wakaEchopa wamulikulukaji lyamyaka lyakulivanga amwene chuma kana kupwa chachilemu. Omu muka-kwambulula mujimbu wamwaza Fwilipu amwene ou kaEchopa ali nakutanga Mazu aKalunga, amuhulishile ngwenyi: “Uno vyuma uli nakutanga unavitachikiza chikupu tahi?” Uze kaEchopa amukumbulwile ngwenyi: “Uno chikupu nanguhasa ngachilihi kuvitachikiza chakuzeneka mutu wakungulumbunwinavyo?” (Vili. 8:26-31) Fwilipu akafwile uze chilolo apwenga nachinyingi chakwoloka chamuMazu aKalunga. Vyuma alinangwile uze chilolo vyamukwachile kumuchima, ngachize vamumbapachishile. (Vili. 8:32-38) Chochimwe namikanda yetu yize yahanjika haMbimbiliya yeji kutukafwanga tupwenga nachinyingi chakwoloka chamuchano. Yeji kutukwatanga kumuchima nakutulingisa tukavangize vyuma tweji kulinangulanga.—Kolo. 1:9, 10.

Mikanda kana yeji kukafwanga vangamba jaYehova vapwenga navyakulya navyakunwa vyavivulu vyakushipilitu. (Isa. 65:13) Chakutalilaho, Kaposhi Kakutalila uze veji kusonekanga mumalimi akuhambakana 210 eji kulumbununanga upolofweto, kutukafwa tutachikize chikuma vyuma vyakujiminyina, nakutukafwa tukavangizenga jishimbi jamuMbimbiliya. Kaha nawa mangazini yaTonenu! yize veji kusonekanga mumalimi kafwe 100 yeji kutukafwanga tutachikize chikuma milimo yaYehova, nakutulweza mwakukavangijila mazu akuhuhumuna atwama muMbimbiliya. (Vishi. 3:21-23; Loma 1:20) Ndungo wakushishika eji kutuhananga mikanda yahanjika haMbimbiliya mumalimi akuhambakana 680. Kutala mweji kuwanangako lwola hakumbi hakumbi lwakutanganga Mbimbiliya tahi? Kutala mweji kutanganga kala mangazini yayihya namikanda yosena yayihya yamulilimi lyenu yize yeji kulovokanga mwaka himwaka tahi?

Liuka lyaYehova lyeji kuwahisanga nawa jiautulayini javihande jahanjika haMbimbiliya jize vandumbwetu veji kuhanjikanga hakukunguluka chachikungulwilo, nachachihanda, nachangalila. Kutala mweji kulivwisanga kuwaha vihande, navimweso, navyakwihwojola vize vyeji kupwanga kukukunguluka tahi? Chikupu vene Yehova eji kutuhananga kulya chakushipilitu chachivulu.—Isa. 25:6.

Kukumbulula ngwetu nduma. Katwatela kulikomokelako numba tuhu vangamba jaYehova vamwe vatwama navyakulya vyakushipilitu vyavivulu kuhambakana vakwavo. Mwomwo ika? Achishinganyekenu hali vaposetolo. Vaposetolo vamwe vatambwilenga kulya chakushipilitu chachivulu kuhambakana tumbaji vakwavo vavavulu mulikulukaji lyamyaka lyakulivanga. (Mako 4:10; 9:35-37) Chipwe ngocho, ava tumbaji vavavulu kavafwilenga zala yakushipilituko; navakiko vatambwilenga kulya chakushipilitu chakutamo.—Efwe. 4:20-24; Petu. 1, 1:8.

Twatela kutachikiza ngwetu vyuma vyavivulu vize Yesu ahanjikilenga nakulinga omu apwile hano hamavu, kavavisoneka muMbimbiliyako. Kaposetolo Yowano asonekele ngwenyi: “Kaha nawa, kuvili vyuma vyeka vyavivulu alingilenga Yesu, vikiko kachi nge vavisonekele vyosena munona munona, ngunafwelela kaye kachi kakeshi nomu mwakulamina mikanda yakuvungako.” (Yowa. 21:25) Numba tuhu vaka-kukavangiza Yesu vamulikulukaji lyamyaka lyakulivanga vatachikijile chikuma Yesu kuhambakana etu, oloze katwafwa zala kushipilituko. Yehova atukafwa tutachikize kanawa Yesu mangana tukavangizenga mujitambo jenyi.—Petu. 1, 2:21.

Shinganyekenu nawa mikanda yize vaposetolo vatuminenga kuvikungulwilo vyamulikulukaji lyamyaka lyakulivanga. Hamikanda yize asonekele Paulu, mukanda umwe kawatwama muMbimbiliyako. (Kolo. 4:16) Kutala katwatwama nakulya chakushipilitu chakutamoko mwomwo yakuhona kupwa namukanda kana tahi? Nduma. Yehova atachikiza vyuma twasaka, kaha nawa atuhana kulya chakushipilitu chakutamo mangana tutwaleho lika kupwa vakujikiza kushipilitu.—Mateu 6:8.

Makumbi ano vangamba jaYehova vamwe vatwama nakulya chakushipilitu chachivulu kuhambakana vakwavo. Kutala mweji kuhanjikanga lilimi lize lyatwama namikanda yayindende kaha tahi? Nge mukiko, kaha tachikizenu ngwenu Yehova eji kumizakamanga. Linangulenunga mikanda kana nakuyanga nakukunguluka mulilimi lize mwatachikiza. Kaha nawa tachikizenu ngwenu Yehova mwamizamisanga kushipilitu.—Samu 1:2; Hepe. 10:24, 25.

Hachihanda chetu chahaInternet hatwama jimangazini namikanda yeka yahanjika haMbimbiliya. Hatwama navyuma vyakukafwa vaze valimbata, vakweze, navaze vatwama navana vavandende. Jitanga jeji kunganyalanga hakuzachisa vyuma kana haKulemesa Kalunga mwaTanga. Kaha nawa hatwama mijimbu yakulipwila yakufwana nge chilika chavaze vanakumisa shikola yaNgileyate, nakuliwana chize cheji kupwangako mwaka himwaka, nakulweza vandumbwetu vamukaye kosena nge kunasoloka ukalu, navihande vyakutalisa kuvatu jaYehova. (Petu. 1, 5:8, 9) Echi Chihanda cheji kutukafwanga nawa hakutandakanyisa mujimbu wamwaza namumafuchi muze fulumende yakanyisa mulimo wetu wakwambulula.

Chipwe ngocho, munahase kuzama kushipilitu numba nge munahase kuwana vinoma vyetu vyahaInternet chipwe nduma. Ndungo nazate nangolo hakuwahisa mikanda yakupulita mangana vangamba jaYehova vosena valyenga kanawa kushipilitu. Ngachize, kamwatela kushinganyeka ngwenu kuvanga mulande likina lyakumilweza vyuma vize vili hajw.org koko. Vandumbwetu vamwe vanahase kuzachisa lwola lwavo hakupulita mikanda yize yatwama haKeyala yetu nakuhanako vaze kavatwama naInterneko. Oloze vikungulwilo kavyatela kulinga ngochoko.

Tweji kusakwililanga Yesu hakutesamo lushiko lwenyi lwakutuzakama kushipilitu. Twatela kufwelela ngwetu Yehova mwatwalaho lika kutuhananga kulya chakushipilitu “halwola lwakutamo,” palanga nomu navakanongesa kano kaye kakuhuka.