Vihula Vyakufuma Kuli Vaka-Kutanga
Yesu alwezele vaSatuse ngwenyi vaze navakasanguka “kaveshi kukambata chipwe kukasombokako.” (Luka 20:34-36) Uno atalishile kuli vaze navakasangukila hano hamavu tahi?
Chihula kana chachilemu chikuma, chikumanyi kuli vaze vafwisa vaka-mahyavo. Vatu kana vafwila kukalinunga cheka muulo navaka-mahyavo vaze navakasanguka mukaye kakahya. Tuliwe umwe walunga ambile ngwenyi: “Ami napuwami katwasakile kukumisa ulo wetuko. Twafwila kutwalaho lika kulemesa Yehova muulo wetu myaka yosena. Omu mukiko nguchili lika nakushinganye.” Uno kuliko vyuma vize vyatela kutulingisa tufwelele ngwetu vatu vaze navakasanguka navakambata chipwe kusomboka tahi? Katwejivileko.
Hamyaka yayivulu mikanda yetu yinahanjikanga ngwayo, vyuma vize ahanjikile Yesu kutalisa kukusanguka nakulimbata vyatalisa kuli vaze navakasangukila hano hamavu, kaha kaveshi kukambata chipwe kusombokako. * (Mateu 22:29, 30, Mako 12:24, 25, Luka 20:34-36) Kutala Yesu atalishile kuli vaze navakasanguka nakukayoyela mwilu tahi? Tukekesenu vyuma ahanjikile Yesu.
Talenu mujimbu uno. (Tangenu Luka 20:27-33.) VaSatuse vaze kavafwelelele mukusangukako vasakile kwoza Yesu mumuheto hakumuhulisa chihula chakutalisa kukusanguka chamalunga vamujimo limwe vaze vambachile pwevo umwe. * Yesu avakumbulwile ngwenyi: “Vana vakatwamino kamyaka yino veji kumbata nakusomboka, oloze vaze vatamo kukaswana katwamino kamyaka nayikezaho nakukasanguka kuvafu, kaveshi kukambata chipwe kukasombokako. Chipwe kufwa kaveshi kukafwa chekako, mwomwo navakapwa nge vangelo, kaha navakapwa nawa vana vaKalunga hakupwa vana vakusanguka kuvafu.”—Luka 20:34-36.
Mwomwo ika mikanda yetu yinahanjikanga ngwayo Yesu pamo apwile nakutalisa kuli vaze navakasanguka nakukayoyela hamavu? Vishinganyeka kana vyapendaminyine havyuma vivali. Chatete, vaSatuse pamo vatalishilenga kukusanguka chahamavu. Ngocho chapwile chamangana Yesu kuvakumbulula hakuhanjika vyakusanguka chavafu hano hamavu. Chamuchivali, Yesu avakumbulwile hakutalisa kuli Apalahama, Isaka, naYakova vatu vakushishika vaze navakasanguka nakukayoyela hano hamavu.—Luka 20:37, 38.
Chipwe ngocho, tunahase kwamba ngwetu Yesu atalishile kuli vaze navakasanguka nakukayoyela mwilu. Mwomwo ika tunahanjikila ngocho? Tushimutwilenu hamikuku yino yivali.
“Vaze vatamo kukaswana . . kukasanguka kuvafu.” Vaze vawavisa vakushishika ‘vatela Wangana waKalunga.’ (Teso. 2, 1:5, 11) Kalunga amona vawavisa kupwa vakwoloka mwomwo yandando yakusokola. Kaha nge vanafu, avamona kupwa vakuhona shili. (Loma 5:1, 18; 8:1) Vawavisa vavavuluka ngwavo, ‘vawahilila kaha nawa vajila,’ ngocho vatamo kusanguka nakukayoyela mwilu. (Kuso. 20:5, 6) Oloze vaze navakasanguka nakukayoyela hana hamavu kavapwa ngochoko, mwomwo havatu kana nahakapwa “navaka-kuhona kwoloka.” (Vili. 24:15) Kutala vatu “vaka-kuhona kwoloka” navakiko “vatamo” kukasanguka tahi?
“Kaveshi kukafwa chekako.” Yesu kahanjikile ngwenyi: “Kaveshi kukafwako.” Oloze ahanjikile ngwenyi: “Kaveshi kukafwa chekako.” JiMbimbiliya jeka jahanjika mukuku kanou ngwajo, “kufwa kachatwama nangolo hali vakikoko.” Vawavisa vaze navashishika palanga nakusongo veji kusangukanga nakuya mwilu nakukapwa namwono wakuzeneka kufwa. (Koli. 1, 15:53, 54) Kufwa kachatwama nangolo hali vaze veji kusangukanga nakuya mwiluko. *
Vyuma muka tunalinangula kweseka namujimbu tunashimutwila? Tunahase kwamba ngwetu Yesu atalishile kuli vaze navakasanguka nakukayoyela mwilu. Nge mukiko, kaha mazu ahanjikile ali navishina vitatu vyakutalisa kuli vaze navakasanguka nakukayoyela mwilu: (1) Vatu kana kaveshi kukambata chipwe kusombokako, (2) Kaveshi kukafwako, kaha (3) mujijila jimwe valifwana navangelo vamwilu. Nge Yesu atalishile kuli vaze navakasanguka nakukayoyela mwilu, kaha twatela kukumbulula vihula vinakavangizaho.
Chatete, mwomwo ika Yesu atalishile kuli vaze navakasanguka nakukayoyela mwilu omu akumbulwile chihula chavaSatuse vaze pamo vapwile nakutalisa kuli vaze navakasanguka nakukayoyela hano hamavu? Kakavulu Yesu kakumbulwilenga vaka-kole jenyi kweseka navyuma vapwile nakushinganyekako. Chakutalilaho, omu vaYuleya vamwe valwezele Yesu alinge chinjikizo, avakumbulwile ngwenyi: “Shiulenu yino tembele, kaha mumakumbi atatu nanguyitunga cheka.” Yesu atachikijile ngwenyi vapwile nakushinganyeka tembele yivene, “oloze ikiye apwile nakuvuluka tembele yamujimba wenyi.” (Yowa. 2:18-21) Pamo Yesu amwene ngwenyi katelele kukumbulula vaSatuse vaze kavafwelelele mukusanguka chipwe kufwelela ngwavo kakwatwama vangeloko. (Vishi. 23:9; Mateu 7:6; Vili. 23:8) Oloze asakile kunangula tumbaji twenyi muchano wakutalisa kuli vaze navakasanguka nakukayoyela mwilu. Ava tumbaji vapwile nalufwelelo lwakusanguka nakuya mwilu.
Chamuchivali, mwomwo ika Yesu akukulwile chihande kana hakutalisa kuli Apalahama, Isaka naYakova vaze navakasanguka nakukayoyela hano hamavu? (Tangenu Mateu 22:31, 32.) Shimbu kanda Yesu avuluke ava vangamba jaKalunga vakushishika, aputukile namazu akwamba ngwenyi “oloze hakuvuluka kusanguka chavafu.” Ou mukuku unahase kwalumuna chihande kufuma kukusanguka chakuya mwilu nakuputuka kuhanjika kusanguka chavafu vaze navakatwama hano hamavu. Yesu atachikijile ngwenyi vaSatuse vetavilile vyuma asonekele Mose, ngachize azachishile mazu aze Yehova alwezele Mose omu apwile kuchiputa chize chapwile nakuwema mangana akafwe vaSatuse nge kusanguka chahamavu chapwa hikujina chaKalunga.—Kulo. 3:1-6.
Chamuchitatu, nge mazu aYesu atalisa kukusanguka chavaze navakaya mwilu, kaha kutala vaze navakasanguka nakukayoyela hano hamavu navakambata chipwe kusomboka tahi? Mbimbiliya kayakumbulula hatoma chihula kanako. Nge Yesu apwile nakuhanjika vaze navakasanguka nakukayoyela mwilu, kaha vyuma apwile nakuhanjika kavyalumbunwine nge vaze navakasanguka nakukayoyela hano hamavu navakambata chipwe kusomboka mukaye kakahyako.
Mbimbiliya yahanjika hatoma ngwayo kufwa cheji kukumisanga ulo. Ngachize, nge muka-mahyenu afwa, kaha kamwatela kushinganyeka ngwenu nge namumbata chipwe kusomboka kuli weka, kaha namupwa namulongako. Echi chapwa kujina chamutu yivene. Kakwatela kupwa mutu mwahana mukwavo mulonga mwomwo yakumbata chipwe kusomboka kuli wekako.—Loma 7:2, 3, Koli. 1, 7:39.
Tunahase kupwa navihula vyavivulu kutalisa kuchiyoyelo nachikapwa mukaye kakahya. Muchishishisa chakutaka mwakukumbulwila vihula kana, etu twatela kuvandamina omu navikapwa vyuma kulutwe. Oloze twatela kutachikiza ngwetu vosena vaze veji kwononokanga Yehova navakawahilila mwomwo mwakavasuulwisa muvyuma vyosena vize vasaka mujila yize navakevwila kuwaha.—Samu 145:16.
^ par. 4 Talenu Kaposhi Kakutalila, wamuChingeleshi waJune 1, 1987, mafwo 30-31.
^ par. 5 Kushikulu vatu vambachilenga vanyali javo. Nge lunga nafu chakuhona kuseza vana, kaha uze pwevo asezele atelele kusomboka kuli nyalyenyi. Echi chalingishile vaseme vana mangana tanga yitwaleho lika.—Kupu. 38:8, Lushi. 25:5, 6.
^ par. 9 Vaze navakasanguka nakukayoyela hano hamavu navakapwa nakuyoya chahaya myaka yosena, oloze kaveshi kukapwa namwono wakuzeneka kufwako. Nge muli nakusaka kulinangula vyavivulu kutalisa hachihandwa chatwama hamwono wakuzeneka kufwa nakuyoya chahaya myaka yosena, kaha talenu Kaposhi Kakutalila waApril 1, 1984, wamuChingeleshi mafwo 30-31.
