1, 2. (a) Milimo muka vapwilenga nayo tufunga vamuIsalele? (b) Visemi vapwa ngachilihi nge tufunga?

TUFUNGA vamuIsalele vapwilenga nachiyoyelo chachikalu. Vapwilenga nakufunga vimuna mumusenge muze vafwilenga musana nachishika, nakukinga vimuna kuvikenya nakuveji. Ava tufunga vakekeselenga mukoko himukoko nakuka vaze vapwilenga nakuviza chipwe kulemana. Vazakaminenga vana vamikoko mujila yakulipwila mwomwo vapwile vakuhehela kuhambakana vaze vapwile vakukola.—Kupu. 33:13.

² Visemi vaka-Kulishitu vatela kusololanga vilinga ngana vize vatwama navyo tufunga. Visemi vatela kulela vana vavo kweseka namwaya jishimbi jaYehova. (Efwe. 6:4) Kutala mulimo kana wapwa wawashi tahi? Nduma. Vana veji kuvahungumwisanga kuvilinga vyaSatana, kaha nawa kavakupuka mwosenako. (Chimo. 2, 2:22; Yowa. 1, 2:16) Nge mwatwama navana, kaha munahase kuvakafwa ngachilihi? Tutalenu havyuma vitatu vize vinahase kumikafwa mufungenga kanawa vana venu: (1) Kuvatachikiza kanawa, (2) Kuvalisa, (3) Kuvatwaminyina.

3. Uno visemi ‘kutachikiza kanawa’ vana vavo chalumbununa ika?

³ Kafunga wamwenemwene eji kukekesanga mukoko mangana amone nge ali kanawa. Omu mukiko mwatela kulinga nayenu visemi kuli vana venu. Mbimbiliya yahanjika ngwayo: ‘Tachikiza kanawa omu wapwa utanga wavimuna jove.’ (Vishi. 27:23) Hakupwa muvisemi, mwatela kutachikiza vilinga vyavana venu navishinganyeka vyavo nomu veji kwivwanga. Munahase kulinga ngachilihi ngocho? Mwatela kulihanjikisanga navana venu lwola lwosena.

4, 5. (a) Vyuma muka vyamwaza vize vinahase kukafwa vana vapwenga vakukasunuka kuhanjika navisemi javo? (Talenu muvwimbimbi wakulivanga.) (b) Vyuma muka munalingi hakusaka mukafwe vana venu vamilweze vili mumichima yavo?

⁴ Visemi vamwe vamona ngwavo nge vana vavo vanapu lyehi vakweze, kaha chapwa chachikalu kushimutwila navo. Vana vavo vanahase kukana kushimutwila navo omu veji kwivwanga. Nge omu mukiko vapwa vana venu, kaha vyuma muka mwatela kulinga? Muchishishisa chakushimutwila vihande navana venu halwola lwalusuku nakuvatenukila, wanenunga lwola lwamwaza lwakushimutwila navo mujila yamwaza. (Lushi. 6:6, 7) Twamenunga navo hamwe. Munahase kutambuka navo, kuhema navo, chipwe kuzachila hamwe milimo yahazuvo. Echi chinahase kuvalingisa vamilwezenga vyuma vili mumichima yavo.

⁵ Nyi ngachilihi nge mwanenu kate lika kumilweza vyuma vili mumuchima wenyi? Kaha munahase kuzachisako jila yeka. Chakutalilaho, muchishishisa chakuhulisa mwanenu wapwevo vyuma nazate, mulwezenu vyuma munazate enu. Nahase kupwa wakukasunuka kumilweza vyuma nazate. Munahase nawa kuhulisa mwanenu omu eji kwivwanga havihande vimwe, keshi vyakupandama kuli ikiyeko. Munahase kumuhulisa omu masepa jenyi vamona vihande kana. Kaha munahase kumuhulisa omu nahase kukafwa masepa jenyi.

6. Uno kupwa wamwashi kuhanjikisa chalumbununa ika?

⁶ Hakusaka vana venu vamilwezenga vyuma vili mumichima yavo, mwatela kupwa muvavashi kuhanjikisa. Nge visemi lwola lwosena navasolokanga kupwa nge vali namilimo, kaha vana navaswekanga vyuma vili kumichima yavo. Munahase kutachikiza ngachilihi ngwenu mwapwa muvavashi kuhanjikisa? Mwatela kulinga vyuma vyavivulu keshi nge kuhanjikanga ngwenu, “Munahase kwiza kuli ami kala lwola.” Vana venu vatela kumona ngwavo kamweshi kumona ukalu wavo kupwa wamokomoko chipwe kuvatenukilako. Visemi vavavulu vasolwela vana vavo chakutalilaho chamwaza mujila kaneyi. Kayla kanyike wamyaka yakusemuka 19 ambile ngwenyi: “Ngunahase kulweza tata kala vyuma ngunasake. Keshi kupihililako, chipwe kunguhana mulonga, oloze eji kungwivwililanga. Eji kungukafwanga mujila yamwaza.”

7. (a) Chisemi atela kuhanjika ngachilihi mujila yamwaza chihande chakufwila kukalimbata? (b) Uno visemi vanahase kulihenda ngachilihi kukutenukilanga vana vavo?

⁷ Chakutalilaho, nge muli nakuhanjika chihande chalunga napwevo vaze vali nakufwila kukalimbata, kaha mwatela kuvanangula kanawa chihande kana. Chakutalilaho, nge munayi kuchitanda chakulanjishila vyakulya, kaha halipapilo vanasonekaho kaha kulya chize chili naulembe. Chikupu vene namuseza chitanda kana nakuya kweka. Chochimwe navana nawa vanahase kulinga mujila yoyimwe. Nge namutenukilanga vana venu, kaha vanahase kupihilila nakulitwamina kumihulisanga mangana muvakafwe. (Tangenu Wavaka-Kolose 3:21.) Muchishishisa chakuvatenukilanga, mwatela kupwa namuchima wamwaza. Ndumbwetu wapwevo wakanyike walijina lyaEmily ambile ngwenyi: “Nge visemi jami navahanjika nayami hachihande chalunga napwevo vaze vali nakufwila kukalimbata, kavahanjika havyuma vyavipiko, oloze veji kuhanjikanga hakuwaha chatwama hakutachikiza  mutu wakukalimbata nenyi. Echi chinangukafwe ngupwenga wakusuuluka kuvalweza chihande kana. Nguli nakusaka kuvalwezanga kala mutu uze nguli nakusaka kukalimbata nenyi muchishishisa chakuvaswekela.”

8, 9. (a) Nganyo muka yeji kufumanga hakwivwilila kuvyuma navahanjika vana venu muchishishisa chakuvakanyisanga? (b) Vyuma muka vinafumuho hakwivwililanga vyuma vanahanjikanga vana venu?

⁸ Kweseka navyuma ahanjikile Kayla, munahase kusolola nge mwapwa muvavashi kuhanjikisa hakwivwililanga vyuma navahanjika vana venu. (Tangenu WaYakova 1:19.) Katia, chisemi wapwevo ambile ngwenyi: “Kushimbu yakunyima ngwapihililenga washi namwanami wapwevo. Kangwamwechelelenga avangile kukumisa vyuma apwilenga nakuhanjikako. Ngwazeyelenga kwivwilila vyuma apwile nakuhanjika. Oholyapwa jino ngunalumuka, kaha mwanami naikiye nalumuka. Tweji kulivwasananga jino.”

⁹ Chisemi walunga walijina Ronald nayikiye ahichile muvyuma kana namwanenyi wapwevo. Ambile ngwenyi: “Omu mwanami angulwezele ngwenyi nguli nalunga wahashikola, hakavanga ngwapihilililenga chikuma. Oloze omu ngwashinganyekele hamuchima waYehova wakutalilila vangamba jenyi chikoki nakupwa wakuvova, ngwamwene ngwami nachipwa chamwaza kwecha mwanami ahanjike vyuma vili mumuchima wenyi numba jino ngumwolole. Echi cheji kungwivwisanga kuwaha. Halwola lwatete, ngwatachikijile omu apwile nakwivwa mwanami. Omu akumishile kuhanjika, chapwile chachashi kushimutwila nenyi mujila yazangi. Kaha ikiye nawa etavilile vyuma ngwamukafwile. Asolwele muchima wakulihenda kuvilinga kana.” Kuhanjikanga navana venu lwola lwosena nachimikafwa mutachikize vishinganyeka vyavo nomu vali nakwivwa. Kahechi nachimikafwa mukafwe vana venu vasakulenga vyakulinga vyamwaza mukuyoya chavo. *

10, 11. Munahase kukafwa ngachilihi vana venu kuchina navaseza muchano?

¹⁰ Kafunga wamwenemwene atachikiza ngwenyi mukoko umwe hautanga wenyi nahase kujimbala. Mukoko nahase kuputuka kusosoloka kuvakwavo nakuya nakulila mwila kwaukawenyi, swi nomu mwaswenya hahasuku. Chochimwe namwana nahase kuputuka kusosoloka kushipilitu chindende chindende, hakulikata navatu vavapi chipwe vyakuhemahema vyavipi. (Vishi. 13:20) Munahase kukinga  ngachilihi vana venu kuchina navengila muukalu kana?

¹¹ Omu namunangulanga vana venu, tachikizenunga washi vyuma vize navihasa kuvanehela ukalu. Vakafwenunga vatwaleho lika kusololanga vilinga vyauKulishitu.( Petu. 2, 1:5-8) Lwola lwamwaza lwakukafwa vana venu shina nge muli haKulemesa Kalunga mwaTanga. Mulimo wetu waWangana waOctober 2008 wahanjikile ngwawo: “Mitwe yajitanga vatela kuzakama chikuma mulimo wavo vavahana kuli Yehova hakunonekanga lwola lwachilongesa chaMbimbiliya chatanga.” Kutala mweji kunonekanga lwola kanelu mangana munangule vana venu tahi? Fwelelenu ngwenu vana venu navamona kukilikita chenu chakuvazakama kushipilitu kupwa chachilemu.—Mateu 5:3; Fwili. 1:10.

12. (a) Uno vakweze vananganyalanga ngachilihi kuchilongesa chatanga? (Hanjikenu nahalipwata lyakwamba ngwavo “ Vamwene Chilongesa chaTanga Kupwa Chachilemu.”) (b) Uno mutu himutu nanganyala ngachilihi kuchilongesa chatanga?

¹² Talenu vyuma ahanjikile mukweze walijina lyaCarissa omu Kulemesa Kalunga mwaTanga changanyalishile tanga yenyi. Ambile ngwenyi: “Ngweji kwivwanga kuwaha nge tuvosena tunatwame nakushimutwila. Echi cheji kutulingisanga twanuke vyuma vyamwaza tweji kulinangulanga. Lwola lwosena tata eji kutwaminyinanga Kulemesa Kalunga mwaTanga. Muchima watata wakuhaka mangana kuchilongesa kanechi weji kungulingisanga nayami nguhakeko mangana. Kaha nawa cheji kungulingisa nguvumbike tata kupwa mutwe watanga wakushipilitu.” Ndumbwetu wapwevo wamyaka yakusemuka 23 walijina lyaBrittney ambile ngwenyi: “Kulemesa Kalunga mwatanga chinangukafwe ngupandame kuli visemi jami. Cheji kusololanga nge visemi jami vasaka kutachikiza ukalu nguli nakuhitamo kaha nawa vanguzakama. Kulemesa Kalunga mwatanga cheji kutukafwanga tupwenga vakujikiza nakulinunga mutanga.” Kulisa vana venu kushipilitu kuhichila muchilongesa chaTanga yapwa jila yayilemu yakumikafwa mufungenga kanawa vana venu. *

13. Vyuma muka vinahase kukafwa mwana azachile Yehova?

¹³ Kafunga wamwenemwene eji kuzachisanga mukombo hakutwaminyina nakukinga mikoko jenyi. Chuma afwila shina kutwala mikoko jenyi “kuulilo wamwaza.” (Ezeke. 34:13, 14) Enu visemi, kutala omu mukiko mweji kulinganga kushipilitu tahi? Mwatela kutwaminyina vana venu mangana vazachile Yehova. Vana venu vatela kwivwa ngana muze evwile muka-kwimba jisamu ngwenyi: “Ove Kalunga kami, ngunevu kuwaha hakulinga mwaya muchima wove, Jishimbi jove jili mukachi kamuchima wami.” (Samu 40:8) Vana vaze vakwechi muchima kanou, veji kulihananga vavene kuli Yehova nakuvambapachisa.

14, 15. (a) Visemi vaka-Kulishitu vatela kufwila kulinga vyuma muka? (b) Mwomwo ika mwana nahase kukakasana kwitava chamuchano?

¹⁴ Nyi ngachilihi nge vana venu kaveshi nakuzovoloka kushipilituko, nakuputuka kukakasana vyuma vafwelela Vinjiho jaYehova? Fwilenu kuvanangula vazange Yehova Kalunga nakumona vyuma vize avalingila kupwa vyavilemu. (Kuso. 4:11) Nge vanapu lyehi vakulizanga, kaha vanahase kusakula jino vavene kuzachila Yehova chipwe nduma.

¹⁵ Nge vana venu vali nakukasana lufwelelo lwavo, kaha undenu muchima nakuvakafwa. Vakafwenu vatachikize ngwavo kuzachila Yehova yapwa jila yimwe yayilemu mukuyoya chamutu, kaha nawa cheji kunehanga nganyo yahaya myaka yosena. Tachikizenu vyuma vili nakuvalingisa vapwenga namuchima kanou wakukakasana. Chakutalilaho, kutala mwanenu walunga eji kukananga vyuma yanangula  Mbimbiliya, nyi pamo eji kwivwanga kaha woma wakuhakwila vyuma afwelela kuli vakwavo tahi? Kutala mwanenu wapwevo eji kukakasananga nge jishimbi jaKalunga kajapwa jamwazako, nyi eji kwivwanga kaha uli nakumona nge vakwavo navamuhunga tahi?

16, 17. Visemi vanahase kukafwa ngachilihi vana vavo vatunge usoko wavo naYehova?

¹⁶ Munahase kukafwa ngachilihi vana venu vahonese muchima wakuhuhwasananga vyuma vafwelela? Visemi vavavulu vanakafwenga vana vavo hakuvahulisanga ngwavo: “Uno kupwa umuka-Kulishitu cheji kukukaluhwila tahi nyi cheji kukwashiwila? Uno weji kushinganyekanga ngwove kupwa umuka-Kulishitu nachineha nganyo muka? Ukalu muka watwama hakuzachila Yehova? Uno weji kwivwanga ngachilihi nge mushinganyeka hanganyo yize tuli nayo oholyapwa nayize natukapwa nayo kulutwe? Kutala nganyo kana yapwa yayilemu kuhambakana ukalu watwama hakuzachila Yehova tahi?” Mwatela kuhulisa vihula kanevi mumazwenu, namulikoji, kaha nawa mujila yamwaza. Kanda kulingisa vana venu vashinganyeke ngwavo muli nakuvahana mulongako. Munahase kushimutwila navo mukanda waMako 10:29, 30. Vakweze vamwe vanahase kusoneka mikana yivali yavyuma, mukana umwe wakuwaha chatwama hakupwa muka-Kulishitu, kaha mukana ukwavo waukalu watwama hakupwa muka-Kulishitu. Echi nachimikafwa hamwe navana venu mutachikiza ukalu uze vana venu vali nakumona nakuwana mwakuukumishila. Nge tuli nakusaka kulinangula mukanda waMbimbiliya Yanangula “naMuzangi yaKalunga,” navatu veka, nyi ngachilihi kulinangula navana venu? Kutala omu mukiko muli nakulinga tahi?

¹⁷ Omu vana venu navakola, navakahasa kulisakwila vavene kuzachila Kalunga chipwe Satana. Kanda kushinganyeka ngwenu vana venu navalinangula muchano chakuhona kuzata nangoloko. Vana venu vatela kutunga usoko wavo naYehova. (Vishi. 3:1, 2) Nyi ngachilihi nge mwanenu chichili nakumukaluhwila kupandama kuli Kalunga? Nge chili ngocho, kaha mukafwenu akakekese vyuma afwelela nakulihulisa ngwenyi: “Kutala ngwatachikiza ngwami Kalunga kwatwama tahi? Vyuma muka vyeji kungulingisanga ngufwelele ngwami Yehova Kaunga angumona kupwa wamulemu? Kutala ngwafwelela ngwami kukavangiza jishimbi jaYehova nachingunganyalisa tahi?” Enu visemi, fungenunga kanawa vana venu nakuvakafwa namuchima wakutalilila chikoki. Vakafwenu vatachikize ngwavo kuzachila Kalunga chapwa chachilemu mukuyoya chavo. *—Loma 12:2.

18. Visemi vanahase kulondezeza ngachilihi Yehova uze apwa Kafunga Wamunene?

¹⁸ Vaka-Kulishitu vosena vatela kulondezeza Kafunga kavo Wamunene. (Efwe. 5:1; Petu. 1, 2:25) Visemi vatela kutachikiza kanawa utanga wavo chipwe ngwetu vana vavo nakuzata nangolo hakuvatwaminyina mangana valivwise kuwaha vyuma vyamwaza vize avawahishila Yehova. Enu visemi zatenu nangolo hakufunga vana venu nakutwalaho lika kuvalela mumuchano.