1. Uno Paulu amwenenga ngachilihi vandumbwenyi vaze vazachilenga nangolo mumulimo wakwambulula Wangana?

KAPOSETOLO Paulu amwenenga vandumbwenyi vaze vazachilenga nangolo mulimo wakwambulula Wangana kupwa vavalemu. Asonekele ngwenyi: “Katwavulyama milimo yenu yakushishikako, nakukilikita chenu chazangi, nakukakachila chenu mwomwo yalutalililo lwenu lwakumutalilila Mwata wetu Yesu Kulishitu kumeso aKalunga ketu, Setu.” (Teso. 1, 1:3) Yehova naikiye amona vatu vaze veji kumuzachilanga kupwa vavalemu nakuvazakama numba vatwama mumulimo washimbu yosena chipwe nduma.—Hepe. 6:10.

2. Vyuma muka natulinangula muchihande chino?

² Vaka-Kulishitu vakunyima navava vamakumbi ano vanalisuulanga kuzachila Yehova mumulimo washimbu yosena. Muchihande chino, natushimutwila vaka-Kulishitu vamwe vamulikulukaji lyamyaka lyakulivanga vaze vazachilile Yehova mumulimo washimbu yosena. Natulinangula nawa milimo yize vazata vaze vatwama mumulimo washimbu yosena makumbi ano.

3, 4. (a) Milimo muka vazachilenga vandumbwetu vamwe vamulikulukaji lyamyaka lyakulivanga? (b) Uno vandumbwavo vavakafwilenga ngachilihi kumujimba?

³ Omu Yesu vamumbapachishile, aputukile kwambulula vyaWangana nakunangula vakwavo mwakuzachila mulimo kana. (Luka 3:21-23; 4:14,  15, 43) Omu afwile, vaposetolo jenyi vatwaminyinyine mulimo wakwambulula, ngachize mulimo kana watohwele. (Vili. 5:42; 6:7) Vaka-Kulishitu vamwe vasezele membo avo nakuputuka kuzata mulimo waumishonali. Chakutalilaho; Fwilipu ayile nakwambulwila muPaleshitane. (Vili. 8:5, 40; 21:8) Paulu navakwavo veka vayilenga nakwambulula mujimbu wamwaza mumafuchi amavulu. (Vili. 13:2-4; 14:26; Koli. 2, 1:19) Kaha veka vakufwana nge Shilivanu (Shilase), Mako naLuka vasonekele mikanda yamuMbimbiliya, kaha veka vapwile vaka-kunungulula mazu. (Petu. 1, 5:12) Vandumbwetu vamapwevo vavavulu vazachilenga hamwe nava vandumbwetu. (Vili. 18:26; Loma 16:1, 2) MuVisoneka VyachiHelase vyaVaka-Kulishitu mwatwama mijimbu yamwaza yavandumbwetu vamapwevo nava vamalunga. Mijimbu kaneyi yasolola nge Yehova amona milimo yavangamba jenyi kupwa yayilemu kaha nawa avazakama.

⁴ Uno vangamba jaKalunga vaze vazachilenga mulimo washimbu yosena vahashilenga ngachilihi kulizakama vavene kumujimba? Kavalombelenga vandumbwavo vavakafweko, lwola lumwe vazachilenga namilimo yimwe yakulikafwa nayo. (Koli. 1, 9:11-15) Oloze lwola lumwe vandumbwavo vavakafwilenga mujijila jakulisezaseza jakufwana nge kuvasanyikila vyakulya nakuvahana kwakusavala. Vandumbwetu navikungulwilo vyavakafwilenga.—Tangenu Vilinga 16:14, 15; Wavaka-Fwilipi 4:15-18.

5. Ndumbwetu umwe napuwenyi vahanjikile vyuma muka kutalisa kumulimo washimbu yosena?

⁵ Makumbi ano, vandumbwetu vavavulu vali nakuzata nangolo milimo yashimbu yosena yakulisezaseza. (Talenu lipwata lyakwamba ngwavo, “ Milimo Yashimbu Yosena Yakulisezaseza.”) Uno ava vandumbwetu veji kwivwanga ngachilihi hamulimo kanou vasakula? Echi chihula kana nge namuchihulisa vandumbwenu vaze vatwama mumulimo washimbu yosena, kaha mazu navahanjika nawamikolezeza. Chakutalilaho; ndumbwetu uze nazate upayiniya washimbu yosena, payiniya wakulipwila, kamishonali, nakuzachila haMbetele mulifuchi lyeka ambile ngwenyi: “Ngweji kushinganyekanga ngwami kuzata mulimo washimbu yosena chapwa chuma chachilemu chize ngwasakula mukuyoya chami. Omu ngwapwile namyaka yakusemuka 18, changukaluhwililenga kusakula kuya kuyunivesiti, kuzata mulimo wakukaye washimbu yosena chipwe kuzata upayiniya. Kuwaha ngunawane mumulimo washimbu yosena chinangulingisa ngumone ngwami Yehova keshi kuvulyama kulisuula chavangamba jenyi vaze navalihana kumuzachilako. Yehova nangukafwe nguzachise uhashi wami mujijila muze kachi kangwahashileko kuzata milimo kana nge ngwayile kushikola yakukaye.” Kaha puwenyi ambile ngwenyi: “Milimo ngwazachilenga muliuka lyaYehova yangukafwile nguzame kushipilitu. Tunamono omu Yehova ali nakutukinga nakututwaminyina lwola lwosena mujijila jize vyuma kana kavyasolokeko kachi nge katwazachilenga milimo kanako. Hakumbi hakumbi ngweji kusakwililanga Yehova hakupwa mumulimo washimbu yosena.” Uno nayenu muli nakusaka kupwa nachiyoyelo kana tahi?

6. Yehova amona ngachilihi vaze veji kumuzachilanga?

⁶ Vandumbwetu veka kaveshi kuhasa kuzata mulimo washimbu yosena oholyapwako. Twafwelela ngwetu Yehova amona kukilikita chavo hakumuzachila kupwa chachilemu. Achishinganyekenu vaze Paulu avulukile kumukanda WaFwilemone 1-3, navosena vaze vapwilenga muchikungulwilo chamuKolose. (Tangenu.) Paulu avasakwililile ngana muze alingilenga Yehova. Setu wamwilu Yehova eji kumisakwililanga nayenu hamilimo mweji kukilikitanga. Munahase kukundwiza ngachilihi vaze vatwama mumulimo washimbu yosena?

7, 8. Mulimo waupayiniya wasakiwa kulinga vyuma muka, kaha vandumbwetu muchikungulwilo vanahase kuvakafwa ngachilihi?

⁷ Ngana mwavaka-kwambulula mujimbu vamulikulukaji lyamyaka lyakulivanga, vapayiniya vamakumbi ano veji kukolezezanga chikuma vikungulwilo. Vapayiniya vavavulu veji kwambululanga jola 70 muwande kakweji hikakweji. Munahase kuvakafwa ngachilihi?

⁸ Ndumbwetu wapwevo umwe wapayiniya walijina lyaShari ambile ngwenyi: “Vapayiniya vasoloka kupwa vakutakama, mwomwo veji kuyanga mumulimo wamuwande hakumbi hakumbi. Chipwe  ngocho, twatela kuvakolezezanga.” (Loma 1:11, 12) Ndumbwetu mukwavo wapwevo uze azachile upayiniya hamyaka yayivulu avulukile vapayiniya vamuchikungulwilo chenyi ngwenyi: “Veji kukilikitanga natwima. Nge navaya muwande, kaha vahanenuko jikinga vatambukileho, chipwe kuvasanyikila vyakulya chipwe kuvakafwako jimbongo, kaha navasakwilila chikuma. Echi nachivalingisa vamone ngwavo mwavazakama.”

9, 10. Vandumbwetu vamwe vanakafwenga ngachilihi vapayiniya vamuvikungulwilo vyavo?

⁹ Jila yikwavo tunahase kukafwa vapayiniya shina kuzata navo mumulimo wamuwande. Vandumbwetu vamapwevo vavali vaze vazata upayiniya vambile ngwavo, vasaka vandumbwetu vakuzatanga navo mukachi kachalumingo, chipwe nachingoloshi. Payiniya weka wamuchikungulwilo chimwe ambile ngwenyi: “Chapwa chachikalu kuwana vandumbwetu vakuzata navo nachingoloshi.” Ndumbwetu wapwevo uze azachila haMbetele yamuBrooklyn anukile omu vandumbwenyi vamukafwile omu apwile nakuzata upayiniya. Ambile ngwenyi: “Ndumbwenyi umwe wapwevo uze apwile naminyau amulwezele ngwenyi, ‘Kala lwola muhona kupwa nandumbwetu wakuzata nenyi muwande watela kungulwezanga mangana tuzachile hamwe muwande.’ Chikupu vene angukafwile ngutwaleho lika kuzata upayiniya.” Ndumbwetu wapwevo walijina lyaShari ambile ngwenyi: “Kakavulu omu vapayiniya vavajike veji kufumanga mumulimo wamuwande veji kupwanga ukawavo. Ngocho, mwatela kuvasanyikanga kuchilongesa chenu chakulemesa Kalunga mwatanga. Kuzachila navo hamwe milimo yikwavo, nachivakafwa vapwenga vakuzama kushipilitu.”

¹⁰ Ndumbwetu umwe wapwevo uze nazatenga upayiniya washimbu yosena hamyaka kafwe 50 ahanjikile omu ikiye navandumbwetu vamapwevo vavali vavajike vaze vapwile nakuzata upayiniya vavakafwilenga. Ambile ngwenyi: “Vakulwane muchikungulwilo vapwilenga nakutambukila vapayiniya nge munahichi tukweji vavali. Vapwilenga nakutuhulisa kulikangula chetu kumujimba namilimo yakukaye twazachilenga, nakufwila kutachikiza nge twapwile naukalu umwe mukuyoya chetu. Kaha vatwalilileho lika kututambukilanga mangana vamone nge natusakiwa kutukafwa.” Ava vakulwane vamuchikungulwilo veji kukavangizanga chakutalilaho chaOnesefwolu uze azakaminenga tanga yenyi nakukafwa nawa Paulu.—Chimo. 2, 1:18.

11. Vyuma muka vyasakiwa hakuzata upayiniya wakulipwila?

¹¹ Mulimo ukwavo washimbu yosena shina kuzata upayiniya wakulipwila. Vapayiniya vakulipwila  veji kuzatanga jola 130 kakweji hikakweji mumulimo wamuwande. Hakuwana nge veji kuzatanga jola jajivulu mumulimo wamuwande nakuzata milimo yakuchikungulwilo, ngocho cheji kuvalingisanga vahone kuwana lwola lwakuzata milimo yakukaye. Echi chikiko cheji kulingisanga ofesi yamutango yivahanenga jimbongo jajindende kakweji hikakweji jakulikafwa najo mangana vatwalilileho kuzata mulimo wakwambulula.

12. Uno vandumbwetu navakulwane muchikungulwilo veji kukafwanga ngachilihi vapayiniya vakulipwila?

¹² Tunahase kukafwa ngachilihi vapayiniya vakulipwila? Mukulwane wamuchikungulwilo uze azachila haofesi yamutango uze ahulishilenga vapayiniya vakulipwila vavavulu, ambile ngwenyi: “Vakulwane muchikungulwilo vatela kuhanjikanga navo nakuvahulisa vawane nge vali naukalu nakufwila kuwana mwakuvakafwila. Vandumbwetu vamwe vashinganyeka ngwavo vapayiniya vakulipwila veji kuvazakamanga kuofesi yamutango, oloze navandumbwetu vamuchikungulwilo vatela kukafwa ava vapayiniya mujijila jakulisezaseza.” Ngana mwava mwavapayiniya vashimbu yosena, navapayiniya vakulipwila veji kupwa vakuwahilila nge navazachila hamwe navandumbwavo mumulimo wamuwande. Kutala munahase kuzata navo hamwe mumulimo wamuwande tahi?

13, 14. (a) Vyuma muka twatela kwanuka kutalisa kuli tulama vakujinguluka namapwevo javo? (b) Munahase kukafwa ngachilihi tulama vakutambwojoka?

¹³ Tulama vakujinguluka namapwevo javo vapwa vandumbwetu vakuhya kushipilitu vaze vanahase kutukolezeza. Oloze twatela kwanuka ngwetu navakiko vasakiwa kuvakolezeza kuli vandumbwavo. Vasakiwa kuzata navo mumulimo wakwambulula. Veji kusakwililanga nge vandumbwavo navavasanyika kujizuvo javo mangana valihizumune chipwe kulinga vyuma vyeka. Nge vali muchipatela mwomwo yamisongo, kaha twatela kuvatambukila nakuvazakama. Chakutalilaho, Luka uze apwile “chimbuke” azakaminenga Paulu naveka vaze vatambukililenga vikungulwilo.—Kolo. 4:14; Vili. 20:5–21:18.

¹⁴ Tulama vakutambwojoka namapwevo javo vasakiwa kuvazanga nakuvakolezezanga. Kalama umwe wakujinguluka ambile ngwenyi: “Masepa jami veji kutachikizanga nge nguli nakusakiwa kungukolezeza. Veji kunguhulisanga vihula, kahechi cheji kungukafwanga nguvalweze ukalu wami. Kwivwilila kanawa vyuma nanguvalweza cheji kuvakafwanga vawane mwakungukafwila.” Tulama vakujinguluka namapwevo javo veji kusakwililanga vandumbwavo omu veji kuvazakamanga nakupwa masepa javo vamwenemwene.

15, 16. Milimo muka veji kuzatanga vaka-Mbetele navaze veji kutunganga jiZuvo jaKukungulukila jajinene, kaha tunahase kuvakafwa ngachilihi?

¹⁵ Vandumbwetu vaze vazachila haMbetele, navaze veji kutunganga jiZuvo jaKukungulukila jajinene veji kuzatanga mulimo waunene wakukundwiza mulimo wakwambulula mujimbu wamwaza waWangana. Nge muli navaka-Mbetele muchikungulwilo chenu chipwe muchihanda chenu, kaha munahase kuvakafwa ngachilihi?

¹⁶ Omu ava vandumbwetu veji kuvasanyikanga kuya nakuzachila haMbetele, hakulivanga veji kwivwanga uli mwomwo vanaseze jitanga namasepa javo. Ngachize, ava vaka-Mbetele vavahya veji kuwahililanga nge vakwavo vaka-Mbetele navandumbwetu vamuchikungulwilo navafwila kuvatachikiza nakulikata navo usepa. (Mako 10:29, 30) Milimo veji kuzatanga haMbetele yeji kuvahanangako lwola lwakuya nakukunguluka nakuya mumulimo wamuwande chalumingo hichalumingo. Oloze shimbu jimwe veji kupwanga namilimo yeka yakuzata haMbetele. Nge vikungulwilo navitachikiza milimo veji kuzatanga vaka-Mbetele, kaha nachivalingisa vasakwilile milimo veji kuzatanga ava vandumbwetu.—Tangenu Wavaka-Tesolonyika 1, 2:9.

17, 18. Milimo muka veji kuzatanga vandumbwetu vaze veji kutumanga kumafuchi eka?

¹⁷ Vandumbwetu vamwe veji kwitavilanga kuya nakuzachila kumafuchi eka. Ngocho, veji kuwananga kulya cheka nakulinangula lilimi lyalihya, nachisemwa, nachiyoyelo cheka. Mulimo muka vatwama nawo vandumbwetu vaze vatwama mumulimo washimbu yosena vaze veji kuyanga nakuzachila kumafuchi eka?

 ¹⁸ Vandumbwetu veka vapwa vamishonali vaze veji kuzatanga jola jajivulu mumulimo wakwambulula. Veji kwambululanga natwima kaha nawa veji kunangulangako vandumbwavo muvikungulwilo mwakuzachila milimo yaYehova. Ofesi yamutango yeji kuhananga vamishonali jizuvo jakutwamamo najimbongo jajindende jakulikafwa najo. Vamishonali veka veji kuvatumanga mulifuchi lyeka nakuzachila hamutango chipwe kukafwa mulimo wakutunga jiofesi jamutango, nakutunga jiofesi javaka-kwalumuna mikanda jakwakusuku, nakutunga jiZuvo jaKukungulukila chachinene, chipwe jizuvo jaWangana. Veji kuvahananga vyakulya najizuvo jakusavala, navyuma vyeka. Ngana mwavaka-Mbetele, navandumbwetu vaze valisuula kutunga jizuvo veji kuyanga nakukunguluka lwola lwosena nakuya mumulimo wamuwande. Ngocho, vikungulwilo vyeji kunganyalanga.

19. Vyuma muka twatela kwanuka kutalisa kuli vandumbwetu vaze naveza nakuzachila mulifuchi lyetu?

¹⁹ Uno munahase kukafwa ngachilihi vandumbwetu vaze veji kwizanga nakuzachila mulifuchi lyenu? Tachikizenu ngwenu omu veji kwizanga, veji kuhonanga kuzanga vyakulya vimwe mwomwo yakuhona kwijilila vyakulya kana. Shikaho nge munavasanyikila vyakulya kuzuvo yenu, kaha vangilenu kuvahulisa nge veji kulya vyakulya kana, chipwe vize navasaka kweseka. Vatalililenu chikoki omu navalinangula lilimi lyalihya nachisemwa chenu. Chinahase kumbata lwola numba vahase kutachikiza kanawa lilimi lyenu, ngocho fwilenu kuvakafwa mangana vatachikize kanawa mwakuvulukila mazu. Vali nakufwila chikupu kulinangula!

20. Tunahase kukafwa ngachilihi vandumbwetu vaze vali mumulimo washimbu yosena navisemi javo?

²⁰ Mukuhita chalwola, vandumbwetu vaze vazachila mulimo washimbu yosena kwakusuku navisemi javo, vanahase pamo kushinganyeka mwakukafwila visemi javo vatushinakaji. Oloze nge visemi javo vapwa vinjiho, kaha vanahase kulweza vana vavo mangana vatwalilileho namulimo wavo washimbu yosena. (Yowa. 3, 4) Vandumbwetu vaze vatwama mumulimo washimbu yosena vatela kuzata nangolo mangana vazakame visemi javo nakuvatambukilanga. Oloze vana vavo vaze vatwama kwakamwihi navisemi javo vatela navakiko kuzakamanga visemi javo. Twatela kwanuka ngwetu vandumbwetu vaze vatwama mumulimo washimbu yosena vatwama namulimo waunene wakukundwiza mulimo wakwambulula uze tuli nakuzata mukaye kosena. (Mateu 28:19, 20) Kutala yenu chipwe chikungulwilo chenu chinahase kukafwa visemi javandumbwetu vaze vali mumulimo washimbu yosena tahi?

21. Uno vaze veji kuzatanga mulimo washimbu yosena veji kwivwanga ngachilihi omu vandumbwavo veji kuvakafwanga nakuvakolezeza?

²¹ Vatu vavavulu veji kuzatanga nangolo mangana vapwenga naluheto. Oloze vaze veji kuzatanga mulimo washimbu yosena veji kuzatanga nangolo mangana vazachile Yehova namuchima wavo wosena nakukafwa vatu mangana vazachile Yehova. Ngocho, veji kusakwililanga nge vandumbwavo navavakafwa. Ndumbwetu wapwevo uze atwama mumulimo washimbu yosena, kaha nawa ayile nakuzachila kulifuchi lyeka ambile ngwenyi: “Chipwe vene kusonekela kamukanda kakusolola kusakwilila cheji kusolola nge vakwenu veji kumishinganyekanga kaha nawa vapwa vakuwahilila hamilimo muli nakuzata mumulimo washimbu yosena.”

22. Uno mulimo washimbu yosena mwaumona ngachilihi?

²² Vandumbwetu vaze vali nakuzata mulimo washimbu yosena vanasakula mulimo wamwaza uze uli nakuvasuulwisa mukuyoya chavo. Veji kulinangulanga vilinga navishina vyamwaza vize vyasakiwa oholyapwa navize navikasakiwa mukaye kakahya. Kalinwomu vangamba jaKalunga vosena navakazata milimo yize nayikavasuulwisanga hakumbi hakumbi. Ngachize, tutwalenuho lika kuhona ‘kuvulyama milimo yakushishika nakukilikita’ chavandumbwetu va^zze vatwama mumulimo washimbu yosena.—Teso. 1, 1:3.