FERNANDO * alizakaminyine mwomwo vakulwane vavali vamuchikungulwilo vamusanyikile mangana vahanjike nenyi kupenge. Omu kalama wakujinguluka atambukilile chikungulwilo chavo mapapa kakavulu, vakulwane vamuchikungulwilo kana valumbunwinyine Fernando vyuma atelelele kulinga hakusaka atengamo mangana vamutongole azatenga milimo yimwe muchikungulwilo. Hakuhita chalwola, Fernando apwile nakukakasana numba nge navakamutongola kupwa mukulwane nyi chiku. Kaha kutwala muze kalama wakujinguluka atambukilile cheka chikungulwilo chavo. Vyuma muka vakulwane valwezele ndumbwavo Fernando halwola kana?

Fernando evwililile omu mukulwane umwe apwile nakuhanjika nenyi. Uze mukulwane ahanjikile mazu atwama hamukanda WaChimoteu 1, 3:1 nakuhanjika ngwenyi vakulwane vamuchikungulwilo vanatambula mazu akuvalweza ngwavo Fernando vanamutongola kupwa mukulwane muchikungulwilo. Kaha Fernando alikomokelele nakuhulisa ngwenyi, “Munambe ngwenu ika?” Uze mukulwane ahanjikile cheka mazu kana, kaha Fernando amwesele kukanwa. Kahomu vavilikile kuchikungulwilo ngwavo Fernando vanamutongola kupwa mukulwane muchikungulwilo, vandumbwetu vosena mulizavu vawahililile.

Uno kufwila vatutongole tuzate milimo muchikungulwilo chapwa chakuhenga tahi? Nduma. Mukanda WaChimoteu 1, 3:1 wahanjika ngwawo, “kachi nge mutu ali nakusaka kupwa kalama, kaha ali nakufwila mulimo wamwenemwene.” Vandumbwetu vamalunga vavavulu veji kukavangizanga mazu kana awa nakuzovoloka kushipilitu mangana vatengamo kuzata milimo muchikungulwilo. Echi chinalingisa muvikungulwilo mupwenga vakulwane navaka-kuzachila vavavulu. Kuvula chavikungulwilo chinalingisa kusakiwe vandumbwetu vavavulu vamalunga vatengamo kuzata milimo. Jila muka yamwaza yize vatela kukavangiza vandumbwetu vamalunga mangana vatengamo? Kutala vandumbwetu vaze vali nakusaka kuvatongola vatela kukakasana ngwavo navakavatongola nyi chiku, ngana muze alingile Fernando tahi?

Lizu lyamuMbimbiliya vavuluka ngwayo “kusaka” muchiHelase lyalumbununa kufwila mujila yamwaza chipwe kwolovela chuma. Munahase kushinganyeka mutu uze ali  nakwolovela muhako wamwaza uli kumutondo. Oloze katwatela “kusaka kupwa kalama” mujila yakuhengako. Mwomwo ika? Mwomwo vaze vafwila kupwa vakulwane muchikungulwilo vatela kuzata “mulimo wamwenemwene,” keshi nge kufwila chihelako.

Vyuma vize mutu atela kutesamo vavisoneka hali WaChimoteu 1, 3:2-7 naWaChituse 1:5-9. Kutalisa kuvyuma kanevi, Raymond uze nashimbula haukulwane ambile ngwenyi: “Kuli ami chuma chachilemu shina kupwa navilinga vyamwaza. Numba tuhu kuhanjika nakunangula vyapwa vyavilemu, oloze kalama atela kupwa mutu wakuzeneka chuma chakumuhanyina mulonga, muka-kulinga vyuma mukwesekela, muka-kushinganyeka mwamangana, muka-kulinga vyuma mukulonga, wachisambo kaha nawa muka-kwashiwisa muchima.”

Ndumbwetu uze ali nakusaka kupwa mukulwane chipwe muka-kuzachila, atela kupwa navilinga kanevi vyakushipilitu hakutwamanga navakwavo. Atela kupwa mutu wakuhona chuma chakumuhanyina mulonga hakulihenda kumuchima wakwonga navyuma vyamajilo vyosena. Atela kulinganga vyuma mukwesekela, kushinganyeka mwamangana, kulinga vyuma mukulonga nakwashiwisanga muchima. Vandumbwenyi vatela kumufwelela ngwavo natemo kuvatwaminyina, kaha nawa mwavakafwanga nge vali muukalu. Nge mwapwa nachisambo, kaha mwakolezeza vakweze navaze vachili vavahya mumuchano. Eji kuvendejekanga nakukafwa vaka-kuviza natushinakaji mwomwo azanga vyuma vyamwaza. Atela kupwa navilinga kanevi mangana akafwe vandumbwenyi, keshi nge mwomwo yakufwila kaha vamutongoleko. *

Lizavu lyavakulwane lyeji kwivwanga kuwaha kukafwa nakukolezeza vandumbwetu, oloze kukavangiza vyuma vyamuVisoneka chapendamina hali mutu livene uze ali nakusaka kutesamo. Henry uze nashimbula haulama ambile ngwenyi: “Nge muli nakusaka kuzata ulama, kaha zatenu nangolo mangana musolole nge munatemo.” Mukanda waMuka-kwambulula 9:10 wahanjika ngwawo: “‘Cheshocho naliwana livoko lyove kulinga, chilingenga nangolo jove.’ Kala milimo navakuhana kuli vakulwane watela kuyizata nangolo. Zanga milimo yosena yize navakuhana kuzata muchikungulwilo kuhakilako vene nakukomba. Hakuhita chalwola, kukilikita chove nachikasolola nge unatemo.” Nge muli nakusaka kukapwa muvakulwane kulutwe, kaha zatenu nangolo nakupwa vakushishika mumilimo yize navamihana. Mwatela kusololanga  muchima wakulinyisa mukuyoya chenu.—Mateu 23:8-12.

Vandumbwetu vamwe vaze vali nakusaka kuzata milimo muchikungulwilo vanahase kupwa navishinganyeka vyavipi chipwe kusaka lizavu lyavakulwane likavangize munayi vishinganyeka vyavo. Kaha veka veji kupihililanga nge vakulwane vanavahuhumuna. Vandumbwetu kana vatela kulihulisa ngwavo, ‘Uno ngweji kufwilanga vyuma ngwasaka ami lyavene tahi nyi ngwasaka kulisuula kuzakama utanga waKalunga?

Vandumbwetu vaze vali nakusaka kutamo kupwa vakulwane vatela kwanuka chuma vatela kulinganga vakulwane, shina ‘kusolola chakutalila kuutanga.’ (Petu. 1, 5:1-3) Ndumbwetu uze eji kusololanga chakutalilaho chamwaza kuchikungulwilo atela kulihenda kuvishinganyeka navilinga vyavipi. Atela kupwa namuchima wakutalilila chikoki numba nge vanamutongola chipwe nduma. Mutu kupwa mukulwane kachalumbununa nge keshi kulimbenjangako. (Kula. 12:3; Samu 106:32, 33) Kaha nawa ndumbwetu keshi kuhasa ‘kutachikiza chuma’ chili nakumuhonesako, oloze vandumbwenyi vanahase kutachikiza vyuma vili nakumuhonesa. (Koli. 1, 4:4) Shikaho nge vakulwane navamihuhumuna kuzachisa jishimbi jamuMbimbiliya, kaha fwilenu kwivwilila vyuma kana chakuhona kupihilila. Fwilenu kukavangiza vyuma vize vanamilweze.

Vandumbwetu vavavulu veji kushinganyekanga ngwavo vanelila hamyaka yayivulu numba jino vavatongole. Nge munakilikita hamyaka yayivulu hakusaka “kupwa kalama” oloze kumitongola chiku, kaha kutala lwola lumwe mweji kulinyenganga tahi? Nge mukiko, kaha mazu amuMbimbiliya nawamikolezeza, akwamba ngwavo: “Kutalilila chakuzeneka kumona cheji kwivwisanga muchima kukola, oloze ocho vanafwila hakwiza chinapu mutondo wakuyoya.”—Vishi. 13:12.

Nge chuma chize mutu ali nakufwila kachasolokeleko, kaha cheji kumukolesanga kumuchima. Omu mukiko evwile naApalahama. Yehova amufwelelesele ngwenyi mwamuhana mwana, oloze mwahichila myaka yayivulu chakuhona Sala kusema vana. (Kupu. 12:1-3, 7) Omu Apalahama alingile nakolo, ambile ngwenyi: “Ove Mwata Yehova, naukanguhana ika, hamono ami kangweshi namwanako . . . Tala, kawanguhanyine mwanako.” Yehova amufwelelesele ngwenyi lushiko lwakumuhana mwana nalukatesamo. Oloze mwahichila myaka 14 numba jino Kalunga atesemo lushiko lwenyi.—Kupu. 15:2-4; 16:16; 21:5.

Halwola Apalahama apwile nakuvandamina lushiko kana lutesemo, kutala alitwaminyinyine kuzachila Yehova tahi? Nduma. Uno afwelelele ngwenyi Kalunga mwakatesamo lushiko kana tahi? Atwalileho lika kufwelela mulushiko lwaKalunga. Kaposetolo Paulu asonekele ngwenyi: “Apalahama asolwele muchima wakutalilila chikoki, atambwile lushiko kanelu.” (Hepe. 6:15) Kutwala muze, Kalunga Wangolo Josena akiswile Apalahama kuhambakana namuze apwile nakushinganyeka. Vyuma muka namulinangula kuli Apalahama?

Nge muli nakusaka kupwa muvakulwane, oloze myaka hanga chiyichikika chakuhona kumitongola, kaha twalenuho lika kufwelela muli Yehova. Kamwatela kulitwamina kuzachila Yehovako. Ndumbwetu walunga Warren uze nakafwe vandumbwetu vamalunga vazovoloke kushipilitu ambile ngwenyi: “Mweji kuhitanga lwola numba mutu atengamo kumutongola. Vilinga namuchima wandumbwetu  vyeji kusolokanga chindende hakuhita chalwola kweseka navyuma mwalinga namujila eji kuzakamanga milimo yamuchikungulwilo. Vandumbwetu vamwe vafwelela ngwavo navazachila kanawa Kalunga kuvanga kaha nge vanavatongola. Vishinganyeka kana vyapwa vyakuhenga kaha nawa vinahase kuvazeyesa kushipilitu. Nge namuzachila Yehova nakashishi kala kweshokwo muli nakala mulimo muli nakuzata, kaha muli nakuzachila kanawa Yehova.”

Ndumbwetu umwe avandaminyine hamyaka yakuhambakana 10 numba vamutongole. Kweseka namukanda waEzekele kapetulu 1, alinangwileho chishina chimwe ngwenyi: “Yehova eji kutambukisanga litemba lyenyi, kweseka nomu nasake. Chuma chachilemu shina muze Yehova amona vyuma keshi nge muze twavimona etuko. Kututongola kupwa tuvakulwane kachapendamina hali etu vavene, vyuma tuli nakusakako. Vyuma nguli nakusaka pamo keshi vikiko Yehova atachikiza ngwenyi vikiko nguli nakusakako.”

Nge muli nakusaka kuzata mulimo wamwenemwene waulama, kaha tesenumo vyuma vyasakiwa hakutwamanga navandumbwenu mukuunda muchikungulwilo. Nge myaka hanga chiyichikika chakuzeneka kumitongola, kaha pwenu namuchima wakutalilila chikoki nakuhonesa kuhomba. Raymond uze twavulukanga hakavanga ambile ngwenyi: “Kufwila chihela cheji kulingisanga mutu ahone kupwa wakuwahilila. Vosena vaze veji kuhombanga veji kuhonanga kuwana kuwahilila chize cheji kwizanga mwomwo yakuzachila Yehova.” Ngachize, fwilenu kusolola mihako yashipilitu yaKalunga chikumanyi kutalilila chikoki. Fwilenunga kuzovoloka kushipilitu hakutanganga Mbimbiliya. Fwilenu kwazana mumulimo wakwambulula mujimbu wamwaza nakunangula vatu vatachikize Mbimbiliya. Kolezezenunga tanga yenu vazate milimo yakushipilitu nakupwanga nachilongesa chakulemesa Kalunga mwatanga. Wahililenunga nge muli hamwe navandumbwenu. Nge namulinga ngocho, kaha namupwanga vakuwahilila hakuzachila Yehova.

Kutesamo vyuma vyasakiwa numba tutengamo kuzata milimo muchikungulwilo chapwa hikutokwa chize cheji kufumanga kuli Yehova. Ngocho, Yehova numba liuka lyenyi kalyasaka vandumbwetu vaze navasaka kuzata milimo muchikungulwilo vapwenga vakuhomba nakuhona kumuzachila kanawako. Oloze Kalunga eji kukafwanga nakukisula vosena vaze navamuzachila namuchima wavo wosena. Yehova eji kukisulanga vatu jenyi, Mbimbiliya yamba ngwayo, “[Yehova] keshi kukahakilako luyandoko.”—Vishi. 10:22.

Nge munatesangamo vyuma vyasakiwa mangana mutengamo kuzata milimo muchikungulwilo, kaha mwatela kutwalaho lika kuzovoloka kushipilitu. Nge namufwila kusolola vilinga vyasakiwa nakukilikita nangolo muchikungulwilo nakuhona kusuvilila tanga yenu, kaha Yehova keshi kuvulyama kukilikita chenu chakufwila kumuzachilako. Lwola lwosena pwenunga vakuwahilila omu navamihana kala milimo muchikungulwilo.