Kutala Mwafwelela Chikupu Ngwenu Mwatachikiza Muchano Tahi? Mwomwo Ika?
“Mutachikize kanawa mwaya muchima waKalunga, ngwenu mwamwaza, mukiko vetavila, kaha mwakukupuka.”—LOMA 12:2.
1. Vyuma muka valingile vatwamina vamukwitava chamakuli mujita?
KUTALA Kalunga asaka vaka-Kulishitu vamuchano vayenganga kujita nakujiha vatu vamumafuchi eka tahi? Mumyaka 100 yinahichimo, vatu vaze valivuluka ngwavo vaka-Kulishitu vanajihinga vakwavo mujijita. Vatwamina vamukwitava chaKatolika vanajihinga vakwavo vaka-Katolika, kaha vaka-Polotesitati nawa vanajihinga vakwavo vaka-Polotesitati. MuJita yaKaye yamuchivali, vaka-Kulishitu valijihilenga mwavomwavo.
2, 3. Vyuma muka valingile Vinjiho jaYehova muJita yaKaye yamuchivali nahanyima yajita kana, kaha mwomwo ika?
2 Vyuma muka valingile Vinjiho jaYehova omu kwapwile Jita yaKaye yamuchivali? Mijimbu yakunyima yasolola nge Vinjiho kavazanyine mujitako. Mwomwo ika? Mwomwo yakukavangiza chakutalilaho chaYesu navyuma anangwilenga. Ambile ngwenyi: “Hakupwa nazangi yakulizanga mwenumwenu, hakiko vene navakatachikijila vatu vosena ngwavo, enu mwapwa mutumbaji twami.” (Yowa. 13:35) Kaha nawa vakavangijile mazu aze kaposetolo Paulu asonekelele vaka-Kulishitu vamuKolinde.—Tangenu Wavaka-Kolinde 2, 10:3, 4.
3 Ngachize, vaka-Kulishitu vamuchano vaze vakwechi chivezu chize chapendamina haMbimbiliya kavazana mujijitako. Echi chinalingisa Vinjiho vavavulu, vanyike navakulwane vavayanjise. Vinjiho vavavulu vanavayanjisanga chikuma nakuvatwala mutumenga. Muchiyulo chaNazi chize chapwile muGermany, vandumbwetu vamwe vavajihile. Numba tuhu vavayanjishile mulitungu lyaEurope, oloze kavalitwaminyine kwambulula mujimbu wamwaza waWangana waYehovako. Vatwalileho lika kwambulula mujimbu namutumenga nomu vene vavafumishile mutumenga. * Kaha nawa mumwaka wa 1994, Vinjiho kavazanyine mujita yize yapwile mulifuchi lyaRwandako. Kavazanyine namujita yize yapwile mulifuchi lyaYugoslaviako.
4. Uno kuhona kwazana mujijita chalingisa vatu vahanjike vyuma muka hali Vinjiho jaYehova?
4 Kuhona kwazana mujijita chalingisa vatu vavavulu vahanjike ngwavo Vinjiho jaYehova vazanga chikupu Yehova navakwavo vatu, kaha nawa vapwa vaka-Kulishitu vamuchano. Vyuma muka vyeka vize vyalingisa vatu vafwelele ngwavo Vinjiho jaYehova vapwa vaka-Kulishitu vamuchano?
MULIMO WAUNENE WAKUNANGULA
5. Kwalumuka muka chize chapwile kuli tumbaji twaKulishitu?
5 Yesu alwezele vaka-kumukavangiza ngwenyi, kwambulula mujimbu wamwaza waWangana waKalunga wapwa ukiko mulimo waulemu chikuma hano hamavu. Omu aputukile mulimo wakwambulula, asakwile tumbaji vakuheta ku 12 mangana vazate mulimo kanou waulemu. Kaha kufumaho anangwile tumbaji vakwavo vakuheta ku 70. (Luka 6:13; 10:1) Yesu anangwile tumbaji twenyi mwakwambulwila mujimbu wamwaza. Hakavanga avanangwile mwakwambulila vaYuleya, kaha kutwala muze avalwezele vambulile navatu vakumafuchi eka. Tumbaji vaze vapwile vaYuleya valumukile mwamunene hakwambulila vaze kavapwile vaYuleyako.—Vili. 1:8.
6. Vyuma muka vyalingishile Petulu amone ngwenyi Yehova kamona vatu mweka namwekako?
6 Kaposetolo Petulu vamutumine kuli Kalunga kuya kuzuvo yaKolonelyu nakumwambulila mujimbu wamwaza. Petulu amwene ngwenyi Kalunga kamona vatu mweka namwekako. Ngachize, Kolonelyu navakuzuvo yenyi vavambapachishile. Vaka-Kulishitu vaputukile jino kuvula, kaha vatu vakumafuchi osena vaputukile kwivwilila kumujimbu wamwaza nakuwitavila. (Vilinga 10:9-48) Ngachize, kufuma halwola kana Petulu navakwavo tumbaji vatandakanyishile mujimbu wamwaza kumafuchi osena.
7, 8. Liuka lyaYehova linalingi vyuma muka? (Talenu muvwimbimbi wakulivanga.)
7 Makumbi ano, vandumbwetu vaze veji kutwaminyinanga liuka lyaYehova veji kuzatanga natwima hakukundwiza mulimo wakwambulula nakunangula vatu mujimbu wamwaza mukaye kosena. Vinjiho kafwe 8 miliyoni vali nakwambulula mujimbu mumalimi akuhambakana 600, kaha veka vachili nakwiza muliuka. Vinjiho jaYehova vavatachikijila hamulimo wakwambulwila kuzuvo hizuvo, mumikwakwa, kaha lwola lumwe veji kuzachisanga jimesa jamikanda jakushindumuna najize jakuhona kushindumuna.
8 Liuka lyaYehova lili nakunangula vandumbwetu vakuhambakana 2, 900 vatachikize mwakwalumwina Mbimbiliya namikanda yahanjika haMbimbiliya. Ava vandumbwetu veji kwalumunanga namikanda yamumalimi amandende. Chakutalilaho, mulifuchi lyaSpain vatu vavavulu veji kuhanjikanga lilimi lyaCatalan hakumbi hakumbi. Vatu vavavulu vanaputuka jino kuzachisa lilimi lyaCatalan mujinganda jaValencia, naAlicante, namatungu aBalearic Islands, namulifuchi lyaAndorra. Vinjiho jaYehova vali jino nakwalumuna mikanda yize yahanjika haMbimbiliya mulilimi lyaCatalan, kaha vatu kana veji kukungulukanga kuzachisa lilimi lyavo nakwivwishisa kanawa muchano.
9, 10. Vyuma muka vyasolola nge liuka lyaYehova lyazakama vatu vosena kushipilitu?
9 Mulimo wakwalumuna mikanda nakunangula vatu mumalimi avo vali nakuuzata kwalenga kaye kosena. Chakutalilaho, muMexico vatu veji kuhanjikanga lilimi lyaSpanish, oloze vatu vavavulu veji kuhanjikanga malimi eka omu veji kuyanga kujizuvo javo. Lilimi limwe lyatwamamo shina lyaMaya. Mutango wamulifuchi lyaMexico watumine lizavu lyavaka-kwalumuna mikanda mulilimi lyaMaya kuya nakutwama mungalila muze vahanjika lilimi kana. Kutwama kungalila kana chakafwile vaka-kwalumuna mikanda valumune mikanda mujila yayashi kwivwishisa kuli vatu kana. Chakutalilaho chikwavo shina chalilimi lyaNepali lize vahanjika mulifuchi lyaNepal, muze mwatwama vatu vakuhambakana ha 29 miliyoni. Mulifuchi kana veji kuzachisanga malimi akuheta kafwe ku 120, oloze vatu vakuhambakana ha 10 miliyoni veji kuhanjikanga lilimi lyaNepali, oloze veka kavalitachikiza kanawako. Oloze makumbi ano mikanda yetu yahanjika haMbimbiliya vali nakuyalumuna mulilimi kaneli.
10 Mulimo wakwalumuna mikanda uze vali nakuzata vandumbwetu mumalimi amavulu wasolola nge liuka lyaYehova linakuzata nangolo mulimo wakwambulula mujimbu wamwaza mukaye kosena. Vinjiho jaYehova vali nakuhananga vatu jitalakiti, jimbuloshuwa, najimangazini mwahita kaye kosena hawana wakanyombo. Jimbongo jakuzachisa mulimo kana jeji kufumanga kuwana wakulisakila uze Vinjiho jaYehova veji kuhananga hakukavangiza mazu aYesu akwamba ngwenyi: “Mwatambwile chawana, hanenunga nawa chawana.”—Mateu. 10:8.
Vaka-kwalumuna vali nakuliwahisa mangana valumune mikanda mulilimi lyaLow German (Talenu palangalafu 10)
Mikanda yamulilimi lyaLow German yili nakukafwa chikuma vatu mulifuchi lyaParaguay (Talenu namuvwimbimbi wakulivanga)
11, 12. Kwambulula mujimbu wamwaza mukaye kosena chinalingisa vatu vahanjike vyuma muka kutalisa kuli Vinjiho jaYehova?
11 Vinjiho jaYehova vafwelela ngwavo vatachikiza muchano. Veji kulisuulanga kwambulila vatu vakumafuchi navakuvisemwa vyosena. Vandumbwetu vavavulu vanashiwisako chiyoyelo chavo nakulinangula lilimi lyeka, nachisemwa cheka mangana vambulule mujimbu wamwaza. Kwambulula mujimbu wamwaza mukaye kosena chinalingisa vatu vahanjike ngwavo Vinjiho jaYehova vapwa vaka-Kulishitu vamuchano.
12 Vinjiho veji kuzatanga mulimo kana mwomwo vafwelela ngwavo ou ukiko muchano. Vyuma muka vikwavo vize vyeji kulingisanga vatu vafwelele ngwavo Vinjiho jaYehova vawana muchano?—Tangenu Wavaka-Loma 14:17, 18.
OVYO VYALINGISA VANDUMBWETU VAMWE VAFWELELE NGWAVO VANAWANE MUCHANO
13. Uno Vinjiho jaYehova vanalamenga ngachilihi liuka lyaYehova kupwa litoma?
13 Tunahase kunganyala kuvyuma vanahanjikanga vandumbwetu vize vyavalingisa vahanjike ngwavo vanawane muchano. Ndumbwetu walunga umwe uze nazachila Yehova halwola lwalusuku ahanjikile ngwenyi: “Tweji kuzatanga nangolo mangana tulingise liuka lyaYehova kupwa litoma hakuhuhumuna chipwe kuzangamisa kala ndumbwetu.” Uno vatu jaYehova veji kulinganga ngachilihi ngocho? Veji kukavangizanga jishimbi jamuMazu aKalunga nachakutalilaho chaYesu natumbaji twenyi. Ngachize, makumbi ano Vinjiho jaYehova veji kufumisanga muchikungulwilo muka-Kulishitu uze mwahona kukavangiza jishimbi jamuMazu aKalunga. Oloze Vinjiho jaYehova vavavulu veji kuyoyanga mujila yitoma kumeso aYehova. Vavavulu vaze valingilenga vyuma vyavipi kushimbu yakunyima vanambili vilinga kana nakukavangiza jino jishimbi jaKalunga.—Tangenu Wavaka-Kolinde 1, 6:9-11.
14. Vyuma muka vanalinginga vaze vanafumisanga muchikungulwilo, kaha vyuma muka vinafumungamo?
14 Mbimbiliya yalweza vaka-Kulishitu vafumise muchikungulwilo vatu vavilinga vyavipi vaze navakana kwononoka jishimbi jaKalunga. Vaze vanapihilila nakwalumuna veji kukindulukanga cheka muchikungulwilo. (Tangenu Wavaka-Kolinde 2, 2:6-8.) Kukavangiza jishimbi jamuMbimbiliya chinakafwe Vinjiho valame chikungulwilo kupwa chitoma. Kahechi chavalingisa vafwelele ngwavo liuka lyavo valitavila kuli Kalunga. Numba tuhu vatwamina vamujichachi veji kwitavisanga vatu javo valingenga kala vyuma vanasake, oloze Vinjiho jaYehova veji kukavangizanga jishimbi jaYehova.
15. Vyuma muka vyalingishile ndumbwetu umwe afwelele ngwenyi nawane muchano?
15 Mwomwo ika Vinjiho vamwe vafwelela ngwavo vanawane muchano? Ndumbwetu umwe walunga wamyaka yakusemuka 54 ambile ngwenyi: “Ngunazachila Yehova putu vene kuunyike wami. Lufwelelo lwami lwazamine haunjiho utatu: (1) Kalunga kwatwama, (2) Mbimbiliya yafuma kuli Kalunga, (3) Vinjiho jaYehova vakiko kaha veji kulinganga mwaya muchima waKalunga makumbi ano. Omu ngunalinangula muchano hamyaka yayivulu, ngunafwilanga kukekesa unjiho kanou nakumona nge unjiho kana wamuchano. Kutachikiza unjiho kanou chinangukafwe nguzame kulufwelelo nakufwelela chikupu ngwami tunawane muchano.”
16. Vyuma muka vyalingishile ndumbwetu umwe wakusomboka afwelele ngwenyi nawane muchano?
16 Ndumbwetu wakusomboka uze azachila hachikota chetu chamuNew York ahanjikile kutalisa kuliuka lyaYehova ngwenyi: “Liuka lyaYehova likiko kaha lyeji kulwezanga vatu lijina lyaYehova lize lyatwama muMbimbiliya mapapa kafwe 7, 000. Mazu aze atwama hali Mijimbu 2, 16:9 angukolezeza. Mazu kana amba ngwawo: “Meso aYehova eji kuhitangananga kumavu kwosena, mangana alisolole nangolo hali vakwechi michima yakukupuka mwosena kuli Ikiye.” Ambile nawa ngwenyi: “Muchano unangukafwe ngupwenga namuchima utoma mangana Yehova angusolwele ngolo. Usoko wami naYehova ngwaumona kupwa waulemu. Kaha nawa ngwamona mulimo eji kuzatanga Yesu wakutukafwa tutachikiza Kalunga kupwa waulemu.”
17. Vyuma muka ahanjikile ndumbwetu umwe walunga uze kafwelelelenga Kalungako, kaha mwomwo ika?
17 Ndumbwetu umwe walunga uze kafwelelelenga Kalungako ahanjikile ngwenyi: “Vyuma atenga Kalunga vyangulingisa ngufwelele ngwami Kalunga asaka vatu valivwisenga kuwaha kuyoya, kaha nawa keshi kuketavila kuyanda chikatwalilileho likako. Kaha nawa omu kaye kali nakupihilako lika, vatu jaYehova navatwalaho lika kuzama mulufwelelo nakupwa natwima nazangi. Shipilitu yaYehova kaha yikiko yinahase kulingisa vangamba jenyi vatwaleho lika kusolola mihako kaneyi.”—Tangenu WaPetulu 1, 4:1-4.
18. Muli nakwivwa ngachilihi havyuma vahanjikile vandumbwetu vavali?
18 Ndumbwetu mukwavo walunga uze nazachila Yehova hamyaka yayivulu avulukile vyuma vize vyamulingisa afwelele ngwenyi nawane muchano ambile ngwenyi: “Vyuma ngunalinangula hamyaka yayivulu vinangulingisa ngufwelele ngwami Vinjiho vanazate nangolo hakukavangiza chakutalilaho chavaka-Kulishitu vamulikulukaji lyamyaka lyakulivanga.” Omu ngunatambujokanga mafuchi akulisezaseza, ngunamono omu Vinjiho jaYehova valinunga mukaye kosena. Muchano wamuMbimbiliya unangulingisa ngupwenga nguwakusuuluka nakuwahilila.” Omu ndumbwetu umwe walunga wamyaka yakusemuka yakuhambakana 60 vamuhulishile ahanjike vyuma vyamulingishile afwelele ngwenyi nawane muchano, ahanjikile mazu aYesu Kulishitu nakulumbununa ngwenyi: “Tunatange nakukekesa kanawa chiyoyelo namulimo waYesu nakutukafwa tukavangize chakutalilaho chenyi. Tunalumunako vyuma vimwe mukuyoya chetu mangana tupandame kuli Kalunga kuhichila muli Kulishitu Yesu. Twatachikiza ngwetu kuyovoka chetu chapendamina handando yakusokola yaKulishitu, kaha nawa vamusangwile kuvafu. Tukwechi unjiho wavatu vaze vamwene omu Yesu asangukile.”—Tangenu Wavaka-Kolinde 1, 15:3-8.
AMBULILENUNGA VAKWENU MUCHANO WAMUMBIMBILIYA
19, 20. (a) Mulimo muka uze Paulu alwezele vandumbwenyi vamuchikungulwilo chamuLoma? (b) Etu vaka-Kulishitu twatwama namulimo muka?
19 Vaka-Kulishitu vamuchano vazanga vakwavo vatu, echi chikiko chatulingisa twambulilenga vakwetu muchano uze twalinangula. Paulu alwezele vandumbwenyi vamuchikungulwilo chamuLoma ngwenyi: “Kachi nge muhanjika hatoma kumeso avatu mazu ali mukanwa kove ngwove Yesu ikiye Mwata, nakusolola lufwelelo mumuchima wove ngwove, Kalunga amusangwile kuvafu, kaha navakulwila. Mwomwo mutu eji kusololanga lufwelelo namuchima mangana apwenga wakwoloka, oloze eji kuhanjikanga hatoma nakanwa mangana awane ulwilo.”—Loma 10:9, 10.
20 Etu vinjiho jaYehova twafwelela chikupu ngwetu twatachikiza muchano nakutachikiza nawa ngwetu chapwa chachilemu kunangulako vakwetu mujimbu wamwaza waWangana waKalunga uze uli nakuyula. Shikaho twatela kufwila kunangula vatu Mbimbiliya nakusolola mukuyoya chetu nge twafwelela chikupu ngwetu tunawane muchano.
^ par. 3 Talenu mukanda waJehovah’s Witnesses—Proclaimers of God’s Kingdom, mafwo 191-198, 448-454.